16, మార్చి 2017, గురువారం

గత రెండు నెలల కబుర్లు

గత రెండు నెలలలో మా పాప స్కూల్ లో జాయిన్ అవడం అలాగే నేను ఉద్యోగ రీత్యా కంపనీ మారడం లాంటి వాటి వలన బ్లాగింగ్ కేమిటి అసలు ఇంటెర్నెట్ కే దూరమయ్యాను. ఏదో మెయిల్స్ లాంటి వాటికి తప్ప దేనికీ నెట్  ఉపయోగించే సమయం చిక్కలేదు. ఇకపైన పోస్టుల రాశి తగ్గచ్చేమో కానీ వాసి తగ్గకుండా చూసుకుంటానని హామీ ఇస్తూ ఈ పోస్ట్ తో మీ ముందుకు వచ్చాను. 




తొలి రోజు కదా గుర్తుగా ఉంటుందని మా పాప స్కూల్ లో జాయిన్ అయినప్పుడు ఒక ఫొటో తీసుకున్నాను.  స్కూల్ లో యెలాగూ చదువంతా ఇంగ్లిష్ లోనే కాబట్టి అదనంగా ఇంకో భాష నేర్పిస్తారు. కాకపోతే వాళ్ళు ఇచ్చిన ఆప్సెన్స్ మాత్రం నచ్చలేదు. ఏ రాయి అయితేనేం  పళ్ళు రాలగొట్టుకోవడానికి అన్నట్లు అప్పట్లో తమిళనాడు ముఖ్యమంత్రి పోస్ట్ కు పన్నీర్ సెల్వమ్, శశికళా, పళని స్వామి లాంటి ముగ్గురి పేర్లు బయటికి వచ్చినట్లు ఇక్కడ స్కూల్ లో చైనీస్, కొరియన్, తమిళ్ అంటూ మూడు పనికిమాలిన ఆప్సెన్స్ ఇచ్చారు. నేను ఆ మూడు భాషలను తక్కువ చేయడం లేదు కాని మా పాపకు భవిష్యత్తు లో బొత్తిగా వాటి అవసరం పడకపోవచ్చేమే అని నా అంచనా.

మొన్నా మధ్య ఇల్లంతా వెదికినా రిమోట్ కనపడలేదు. మా బుడ్డోడికి మా చెడ్డ అలవాటు ఉంది...వాడికి తిక్క రేగినపుడు అది అరటి తొక్కైనాచెక్కయినాపనికొచ్చే ముక్కైనా వాడికి లెక్కుండదు దాన్ని సరా సరి డస్ట్ బిన్ లో పారేస్తాడు.  రెండు రోజులైనా రిమోట్ దొరక్కపోయేసరికి దాన్ని కూడా అలా డస్ట్ బిన్లో పడేసి ఉండచ్చుకనుక అది దొరికే ఛాన్స్ లేదని కొత్త టీవీ కొన్నాము .. మీ వాడి తిక్క సరే మీకు లెక్క అంటే లెక్క లేనట్లుందేరిమోట్ పోయిందని కొత్త టీవీ కొన్నారా లెక్క మీకు అంత ఎక్కువుందా అని ఆశ్చర్య పోకండి. (మా వూర్లో డబ్బును లెక్క అని కూడా అంటారు) మేము వాడుతున్నది బాగా పాత మోడల్ టీవీ అందుకే కొత్తది కొనాలని ఎప్పటినుంచో అనుకుంటున్నాముకాగల కార్యం గంధర్వులు తీర్చినట్లు మా బుడ్డోడి మూలాన ఇప్పుడు కొత్త టీవీ కొన్నాము.

పోయిన నెల ఒక పార్టీ లో పది మంది మిత్రులు కలిసినప్పుడు  'నేను లోకల్ సినిమా నుంచి  ట్రంప్ అజెండా అయిన 'ప్రిఫెరెన్స్ టు లోకల్స్'  టాపిక్  పైకి చర్చ మళ్లింది. లోకల్స్ కు ప్రిఫెరెన్సు ఇవ్వాలన్న ట్రంప్ డెసిషన్ కు ఫిదా అయిపోయిన ఇక్కడి లోకల్స్, ఆస్ట్రేలియా లో కూడా ట్రంప్ పెడుతున్న రూల్స్ లాంటివి పెట్టాలని డిమాండ్స్ మొదలెట్టారట. మాటల్లో ఒక మిత్రుడు ఆస్ట్రేలియా ప్రైమ్ మిసిస్టర్ ఎవరో చెప్పమని అడిగితే, గత మూడు నాలుగేళ్లుగా ఇక్కడే ఉంటున్న పది మందిలో ముగ్గురంటే ముగ్గురే సరైన జవాబివ్వగలిగారు. అది ఆస్ట్రేలియాకు అమెరికాకు తేడా, ప్రపంచం కళ్ళు, చెవులు అన్నీ అమెరికా వైపే ఉంటాయి అనడానికి ఇదే సాక్ష్యం. 

"ఊరుకున్నంత ఉత్తమం బోడిగుండంత సుఖం లేదంటారు" కదా...అందులో రెండవ భాగం నాకిప్పుడు అవగతమవడమే కాకుండా అనుభవంలోకి కూడా వచ్చింది. గత రెండు నెలల్లో ఎండలు బాగా మండిపోతుంటేనూ గుండు చేయించుకోవాలనుకున్నాను కానీ బద్దకానికి బ్రాండ్ అంబాసిడర్ని అలాగే ప్రపంచ బద్దకస్తుల సంఘానికి అధ్యక్షత వహించగలిగే అవకాశాన్ని బద్ధకం చేత తృణప్రాయంగా త్యజించిన చరిత్ర కలిగిన వాడిని కావడం వల్ల గుండు చేయించుకునేప్పటికి ఎండలు పోయి భారీ వర్షాలు మొదలయ్యాయి, ఏమైనప్పటికి గుండు కదా యెంత వర్షమైనా తడుస్తుందన్న భయం లేదు, గుండు చేయించుకోవడం కాస్త లేట్ అయినా ఇదొకందుకు మంచిదైంది. ఈ భారీ వర్షాలు చూసి నాలుగేళ్ళ మా పాప 'ఇంతకు ముందు నేనెప్పుడూ ఇంత వర్షాలు చూడలేదబ్బా' అని తన ఫ్రెండ్ తో చెప్తోంటే 'నాలుగు వారాల నాడు పుట్టిన నక్క ఇంత పెద్ద గాలి వాన నా జీవితంలో యెన్నడూ చూడలేదు'   అన్న సామెత గుర్తొచ్చి నవ్వుకున్నా. 

గుండు విషయం ఇంట్లో మా ఆవిడకి తెలిస్తే ఆ ఇచ్చే జుత్తేదో దేవుడికి ఇస్తే పుణ్యం వస్తుందని అంటుందని తెలిసి తనకి చెప్పకుండా గుండు చేయించుకొని ఇంటికి వచ్చాను. కాసేపటికి నిద్ర లేచిన మా బుడ్డోడు గుండుతో ఉన్న నన్ను ఎగా దిగా చూసి వెంటనే వాడి తల మీద చెయ్యి పెట్టుకుని, నిద్రపోతున్నపుడు నాకూ గుండు చేయించలేదు కదా ఈ మనిషి అని చెక్ చేసుకున్నాడు. 

నేను సాధారణంగా చాలా విషయాలు గుర్తుపెట్టుకోను అందుకే నన్ను గజిని అంటుంటారు నా మిత్ర బృందం.  నువ్వో  గజినీవి, గుండొక్కటి తక్కువ అనే వారు ఇంతకు ముందు.  ఇప్పుడు ఆ ముచ్చట తీరిపోయి గుండు గజినీని అయిపోయా. 

గత నెల నా మిత్రుడొకడు  ఫొన్ చేసి...అలాగే జరిగింది కదూ అన్నాడు తలా తోక లేకుండా

ఏం జరిగింది ఎలా జరిగింది అన్నాను సరిగ్గా అర్థం కాక

జనవరి మొదటి వారం లో నేను నీకు ఈ సంవత్సరానికి గాను రాశి పలితాలు పంపాను గుర్తుందా..

అవును అయితే అన్నాను

అందులో ఉద్యోగ మార్పు ఉంటుంది అని రాశారు కదా అది నిజమైంది చూశావా అన్నాడు

వెనకటికి నీలాంటి వాడు ఒకడు శవాన్ని చూడటానికి వెళ్ళి 'నేనెప్పుడో చెప్పాను వీడు ఏదో ఒక రొజు చస్తాడని అన్నాడట' ఆలా ఉంది నీ వాలకం అన్నాను.

అయినా నేను చేసేది ఏమైనా గవర్నమెంట్ ఉద్యోగమా మారకుండా ఉండటానికి, IT జాబ్ అన్నాక అప్పుడప్పుడు కంపెనీ మారడమన్నది అతి సాధారణమైన విషయం. 

మా వాడు వాట్స్ అప్ లో పంపిన రాశి  ఫలాలు ఇవే ఓపికుంటే చదవండి.
  

సింహం (జూలై 24–ఆగస్టు 23)

సగర్వంగా, కొండొకచో అహంకారంగా అనిపిస్తున్నా, నమ్మకంగా, ధైర్యంగా ముందుకు సాగడం సింహ రాశి వారి లక్షణం. సౌహార్దంగా ఉంటారు. ఇతరుల పట్ల దయతో, మంచి ఉత్సాహంగా ముందుకు సాగుతుంటారు. ఇల్లు మారడం, ఉద్యోగం మారడం, ప్రయాణాలు, లాటరీలు కొనడం జరుగుతాయి అంతేగాక అవన్నీ మీకు ఈసారి కలిసొస్తాయి. మీ ఆశయాలు, లక్ష్యాలకు కట్టుబడి ఉండండి. ఇతరులను ఎవరినీ మీ మార్గంలోకి అడ్డుగా రానివ్వకండి. ఉద్యోగం, పని విషయంలో ఏడాది మీకు ఎక్కడ లేని శక్తి, ఉత్సాహం ఉంటాయి. కొత్త ఏడాది ఆరంభంలో మీరు పట్టిందల్లా బంగారమేమీకంటూ ఒక ప్రత్యేకత ఉంది. దాని మీద దృష్టి పెట్టండి. మీ ప్రేమ విషయంలో మీ మనసులోని మాటను నిజాయతీగా చెప్పేయడం మంచిది. సింహరాశి వారికి తగిన వ్యక్తులు దొరుకుతారు. ఇంట్లో దక్షిణ మూలలో  రెండు ఎర్ర కొవ్వత్తులు వెలిగించండి. దాంతో, మీకు మరింత ప్రేమ, ప్రణయం లభిస్తాయి.

కలిసొచ్చేవి: అదృష్ట సంఖ్య: 4; రంగు: అగ్ని జ్వాల లాంటి కమలాపండు రంగువారం: ఆదివారం


8 కామెంట్‌లు:

  1. వెల్కం బాక్.
    ---------
    మీరుంటున్న దేశంలో కూడా పిల్లల స్కూల్ బ్యాగ్ ల సైజ్ మనదేశంలో వాటికేమీ తీసిపోదనుకుంటానే? ఏదైనా ఇండియన్ స్కూల్ కి పంపిస్తున్నారా ఏమిటి 😀?
    అదనపు భాష ఛాయిస్ మహత్తరంగా ఉంది 🙂. French, German, Japanese, Spanish లాంటివి లేకపోవడం ఆశ్చర్యంగా ఉంది. ఇంతకూ దేన్ని ఎంచుకున్నారు, చైనీసేనా ?
    --------
    ఇప్పటి మాట కాదు లెండి గానీ మీరుంటున్న దేశం కూడా గతంలో (20వ శతాబ్దంలో అయిదారు దశాబ్దాల పాటు) అనధికారికంగా / అప్రకటిత White Australia పోలసీ అవలంబించిందంటారు. ప్రభుత్వంలో కాకపోయినా సామాన్య ప్రజలలో అటువంటి భావాలు తిరిగి తలెత్తే ప్రమాదం లేదని పూరిగా చెప్పలేం - ఎమోషన్స్ కి సంబంధించిన విషయం కదా. ఏ దేశంలోనైనా ప్రవాసీయులు అక్కడి లోకల్స్ తో మమేకం అవడానికి ప్రయత్నం చేస్తుండడం ఎప్పుడూ మంచి పని.
    ---------
    రాశి ఫలాలకేంలెండి. మీ రాశి తర్వాత రెండో రాశికో, మూడో రాశికో కూడా ఇంచుమించు ఇదే ఫలాలు వ్రాసుండే అవకాశాలెక్కువ. దక్షిణ దిశలో కొవ్వొత్తులు వెలిగించడమేమిటండీ విడ్డూరం? 🤔
    ----------
    మీ కొత్త ఉద్యోగం మీకు మరిన్ని విజయాలు చేకూరుస్తుందని ఆశిస్తున్నాను. All the best 👍.
    ----------
    అలాగే మీకు, మీ కుటుంబానికి ఉగాది శుభాకాంక్షలు 💐.

    రిప్లయితొలగించండి
    రిప్లయిలు
    1. థాంక్స్ ఫర్ యువర్ కామెంట్స్ నరసింహా రావు గారు. ఆ బ్యాగ్ చూడటానికి అలా ఉంది కానీ అందులో తన లంచ్ బాక్స్, వాటర్ బాటిల్ మినహాయించి ప్యాకెట్ డైరీ సైజు లో ఉండే రెండు పుస్తకాలు మాత్రమే ఉంటాయి. ఇక్కడ పుస్తకాలు మోసే శ్రమ ఉండదండి, ఆ చదివే బుక్స్ స్కూల్లో నే చదివించి ఇంటికి ఆ ప్యాకెట్ డైరీ సైజు లో ఉండే రెండు పుస్తకాలు పంపిస్తారు అంతే. అందులో కిడ్స్ డైలీ ఆక్టివిటీ గురించి పేరెంట్స్ కు తెలియజేస్తుంటారు.

      ఇక కొవ్వుత్తుల మాటంటారా ఆ రాశి ఫలాలు రాసిన వారికే తెలియాలి.

      తొలగించండి
  2. గుండుతో వచ్చే మజాయే మజా గురూజీ. అలా చల్ల గాలి గుండుమీంచి వెళ్తూ, CPU ని కూల్ చేస్తుంటే ఆ ఫీలింగే వేరు.

    రిప్లయితొలగించండి
    రిప్లయిలు
    1. కరెక్ట్ గా చెప్పారు నాగేశ్వర రావు గారు. థాంక్స్ ఫర్ యువర్ కామెంట్స్.

      తొలగించండి
  3. మీ పాప విద్యారంభం, మీ గుండు కథ బావున్నాయి. కానీ మీ వారఫలాలలో యెర్ర క్రొవ్వొత్తుల వ్యవహారమే తమాషాగా ఉంది. రెండు వత్తి దీపాలు పనికిరావా?

    రిప్లయితొలగించండి
    రిప్లయిలు
    1. థాంక్స్ ఫర్ యువర్ కామెంట్స్ అన్యగామి గారు. ఆ రాశి ఫలాలు రాసిన వ్యక్తి ఎవరో తెలిస్తే ఆయన్నే అడిగేయొచ్చు.

      తొలగించండి
  4. మీ పాప స్కూల్ విశేషాలు బావున్నాయి - తనకి నచ్చిందా? ఇంతకీ language ఏం తీసుకుంది?

    రిప్లయితొలగించండి
    రిప్లయిలు
    1. థాంక్స్ ఫర్ యువర్ కామెంట్స్ లలిత గారు. తనకి స్కూల్ నచ్చింది, మా ఇల్లు స్కూల్ పక్కనే కావడం చేత, అప్పుడప్పుడూ ఆ దారిన వెళ్తున్నప్పుడు స్కూల్ లో ఆడుకుంటున్న పిల్లలను చూస్తూ పెరగడం వల్ల ఆ స్కూల్ లో ఎప్పుడెప్పుడు చేరతానా అని ఎదురు చూస్తూంటం వల్ల తనకు మరీ నచ్చింది. మేమైతే 'కొరియన్' అని choose చేసాము కానీ ఫైనల్ డెసిషన్ మాత్రం స్కూల్ వారిదేనట. ఇదో తిక్క తిరకాసు మళ్ళీ.

      తొలగించండి