బ్లాగ్ కి పట్టిన బూజు

ఓయ్ పవనూ ఎటెళ్లి  పోయావూ ఇన్ని రోజులు, నీ కోసమే ఈ ఎదురు చూపులు 

సంక్రాంతి వస్తోందిగా బూజు దులపడానికి వచ్చా

ఇప్పుడు  సంక్రాంతి ఏమిటి తమరి బొంద శివ రాత్రి కూడా వెళ్ళిపోయింది .. అజ్ఞాతవాసి సినిమా చూసాక నీ మతి గతి తప్పినట్లుంది. 

అయినా  ఇంట్లో చెప్పే సినిమాకి వచ్చావా అని ఎంట్రీ దగ్గర ఉండే గేట్ కీపర్, జండూ బామ్ కావాలా నాయనా అని పైనుంచి  కీర వాణి హెచ్చరించినప్పుడే జాగ్రత్త పడుండాల్సింది. 

కీర వాణి ,దివ్య వాణి కాదు ఆకాశ వాణి..అయినా ఆ సినిమా ..

సరేలే ఆ సినిమా గుర్తుకు తెప్పించి మానిపోతున్న గాయాన్ని గెలక్కు

ఆరిపోతున్న దీపాన్ని నువ్వు వెలిగించాలనుకోవట్లా ఇదీ అంతే

దీపమా?

అదేలే  నీ బ్లాగ్

ఏదో కాస్త బూజు దులిపి మళ్ళీ మొదలెడతామని

బూజా .. ఇంటికా నీ బుర్రకా?

కాదు బ్లాగ్ కి

ఇన్ని రోజులేం చేస్తున్నావ్ బ్లాగ్ రాయకుండా

రాస్తునే ఉన్నాను కానీ,  అది జావా కోడ్. 

ఇంట్లో రాయొచ్చుగా

ఇంట్లో కూడా జావా కోడ్ రాయమని మా మానేజర్ ఫోర్స్ చేస్తుంటేనూ కుదరడం లేదు. 

మిగతా టైమ్స్ లో రాయొచ్చుగా

బరువు భాధ్యతలు కూడా ఉన్నాయిగా అందుకే

అలాగని రాయకుండా వదిలేస్తే ఎలా? ఆఫీస్ పని ఉందని దాని మీదే కాన్సట్రేట్ చేస్తే ఎలా?

నేనంతే, దేని మీదైనా కాన్సంట్రేట్ చేస్తే ఆ పని పూర్తయ్యేదాకా డిస్టర్బ్  అవ్వను

చూస్తూనే అర్థమవుతోంది...నీ కాన్సంట్రేషన్ దేని మీదో, అయినా పనులన్నాక వస్తుంటాయ్ పోతుంటాయ్...కడలి తరంగాల లాంటివి అవి, అలాగని బ్లాగ్ రాయకపోతే ఎలా

కడలి తరంగాలు...ఇదేదో బాగుంది, నెక్స్ట్ పోస్ట్ కి నా టైటిల్ ఇదే

రామ్ గోపాల్ వర్మ లా ఏది అనిపిస్తే ఆది చేసేస్తావా, అదేం టైటిల్, అయినా బ్లాగ్ కి కాదు నీ బుర్రకు పట్టిన బూజు దులుపుకో ముందు

'లలిత్ మోడీ నీరవ్ మోడీ లాంటి  కేడీలు ఎందరో మా నరేంద్ర మోడీ రాజ్యం లో' అనే టైటిల్ పెట్టి పోస్ట్ రాస్తా

ఏమిటా అర్థం పర్థం లేని డైలాగు

సమకాలీన పరిస్థితులను నా బ్లాగ్ ద్వారా ఎలుగెత్తి చాటాలని తపన

తపన ఒక్కటే సరిపోదు దానికి తగ్గ విషయం ఉండాలి

పవన్ కళ్యాణ్ దగ్గర ఏ మాత్రం ఉందని ....

అయినా ఆయన్ని కామెంట్ చేయడానికి నువ్వేమీ కత్తివో వర్మవో కాదు.

వర్మ అంటే గుర్తుకు వచ్చింది యెంత ఇష్టమో శ్రీదేవి అంటే తనకి.  నాకు కూడా శ్రీదేవి అంటే బాగా ఇష్టం. 

ఎప్పటికైనా

పెళ్లంటూ చేసుకుంటే శ్రీదేవినే చేసుకుంటా 20  ఏళ్ళు పెద్దదైనా,

వాళ్ళింట్లో, మా ఇంట్లో ఒప్పుకోకపోతే దివ్య భారతి నైనా చేసుకుంటా 15 ఏళ్ళ తర్వాతైనా

ఇల్లంటూ కట్టుకుంటే నాగార్జున సిమెంట్ తోనే కట్టుకుంటా 10 ఏళ్ళ తర్వాతైనా [అప్పట్లో టి.వి లో ఇదే యాడ్ వచ్చేది మరి]

కిళ్ళీ అంటూ తినవలసి వస్తే పూర్తిగా చదువైపోయాకే తింటా ఎన్నేళ్ల తర్వాతైనా [కిళ్ళీ తింటే చదువు సరిగ్గా రాదు అని ఎవరో చెప్పిన మాటకు భయపడి ]

అని అప్పుడెప్పుడో స్కూల్ రోజుల్లోనే గట్టిగా డిసైడ్ అయ్యాను.  అలాంటిది శ్రీదేవి చనిపోయిందట అని మా ఆవిడంటే, వయసైపోయిందిగా పైగా బోల్డన్ని సర్జరీలు అన్నాను కొద్దిగ కూడా బాధ పడకుండా.

కానీ మా ఆవిడే చాలా బాధ పడింది. "కట్టిన చీర మళ్ళీ కట్టేది కాదట, ఇప్పుడు ఆ చీరలన్నీ ఎవరు సొంతం చేసుకుంటారో అని". 

ఏది ఏమైనా పాత సినిమాల్లో చిరంజీవి పక్కన ఏ హీరోయిన్ ఉన్నా చిరంజీవినే చూడాలనిపిస్తుంది ఆ  విషయంలో శ్రీదేవి మాత్రం మినహాయింపు.

కే.వి రెడ్డి - మాయా బజార్, రాం గోపాల్ వర్మ - శివ, బాపు - ముత్యాల ముగ్గు, బ్రహ్మదేవుడు - శ్రీదేవి. అరుదుగా మాస్టర్ పీస్ లు సృష్టించబడతాయి. 

ఆగ్రా కు వెళ్లి తాజ్ మహల్ చూడాలి, ముంబై కి వెళ్లి శ్రీదేవిని చూడాలి అనుకునేవాడిని. మొదటిది ఎప్పుడో తీరింది రెండోది ఇక ఎప్పటికీ తీరదు. 

ఈ పోస్ట్ చదివే ముందు వద్దు వద్దు అని మీకు కీర వాణి ,దివ్య వాణి, ఆకాశ వాణి లాంటివి హెచ్చరించినా  మీరు పట్టించుకోక పోయి ఉండచ్చు.  ఇప్పటికి మించిపోయింది లేదు , చరవాణి చేతిలోకి తీసుకొని జండూబామ్ తెప్పించుకోండి. గత 6 నెలల్లో సేల్స్ బాగా తగ్గిపోయాయని ఒకటే గగ్గోలు.

గుడ్డు మా కులదైవం - లడ్డు మా ఫలహారం: ప్లాట్ నెంబర్ 62 బ్లాగోతానికి పునః స్వాగతం

బాహుబలి-1 కి బాహుబలి-2 కి బాగా గ్యాప్ వచ్చినా పర్లేదు కానీ నువ్వు రాసే ఈ ప్లాట్ నెంబర్ 62 సిరీస్ కి ఇంత గ్యాప్ వస్తే ఎవరికి గుర్తుఉంటుందబ్బాయ్ అని మీరు అనుకుంటుంటారు కానీ తప్పలేదు కాస్త పని ఒత్తిడి వలన తరచూ రాయలేకపోతున్నాను.

ఆ ఎక్కడ ఉన్నాం? తిరుపతి లో మిర్చి బజ్జి తింటూ, టీ తాగుతున్నాం కదా!

కొత్త చెప్పులు కొనాలి షాప్ కి వస్తావా అని మా చిన్ని భయ్యా అడిగితే వెళ్ళొద్దని చెప్పాను కదా అని వాళ్ళ ఊరికి వెళదామని పిలిస్తే మాత్రం వెళ్లడం మానకండి. ఆప్యాయతకు, ప్రేమకు కేర్ అఫ్ అడ్రస్ అయిన మా చిన్ని వాళ్ళ అమ్మను నాన్నను  కలిసే అవకాశం మీరు మిస్ అయినట్లే.

గుండె నాలుగు గదులంటారు కదా ఆ నాలుగు గదుల్లో వారి ఆప్యాయతను నింపుకొచ్చాను వారింటికి వెళ్లిన 4 సార్లలో. ఇక నింపుకోవడానికి ఖాళీ లేదనేమో ఇంకో సారి వెళ్లే అవకాశం నాకు దొరకలేదు :(

ఏంటి కళ్ళలో నీళ్ళొచ్చేశాయా..రావా మరి, మిర్చి బజ్జి తింటే,  మరీ ఇంత సున్నితమైన మనుషులైతే ఎలాగండీ?  కళ్ళు సరిగ్గా తుడుచుకొని చూడండి మా సుబ్బు, చంద్ర లని. ఒంటి బరువు తక్కువుండటం వలన మామూలుగానే కంటికి సరిగా కనపడరు మా ఈ జంట మిత్రులు. కనీసం 10 గ్రాములైనా పెరగాలని తెగ అవస్థలు పడుతుంటారు ఇద్దరూ. తమిళనాడు లో పుట్టవలసిన వాళ్ళు ఆంధ్రా లో పుట్టారు అంత అభిమానం వీరికి రజనీ కాంత్ అంటే. 

స్వాతి, ఆంధ్ర జ్యోతి లాంటి పుస్తకాలు మాత్రమే తెలిసిన మాకు క్షమించాలి నాకు, ఎందుకంటే మా శీను భయ్యాకి 'చిలక', 'మేనక' లాంటి అద్భుతమైన(?) పుస్తకాల నుంచి 'దేవాలయాల మీద బూతుబొమ్మలెందుకు' 'ఇనుప కచ్చడాలు' లాంటి తాపీ ధర్మారావు గారి పుస్తకాల వరకు చాలా జ్ఞానం ఉండేది అది వేరే విషయం. (ఇళ్ళు కట్టడమే కాకుండా ఖాళీ సమయాల్లో ఇలా పుస్తకాలు కూడా రాసేవాడు కాబోలు అని అనుకునేవాడిని అతని పేరులోని 'తాపీ' ని చూసి) 

అలా ఏవో స్వాతి, ఆంధ్ర జ్యోతి, జ్యోతి చిత్ర, సితార వంటివి కాకుండా ఏవేవో పుస్తకాలు (నాకు తెలిసి చస్తేగా మీకు ఖచ్చితంగా చెప్పడానికి)  ఉండేవి అతని దగ్గర. వాటిని తూకం వేస్తే మాత్రం అతనికి రెట్టింపు బరువు తూగుతాయని ఖచ్చితంగా చెప్పగలను.  పదండి రూమ్ కెళ్ళి మీ కళ్ళతో మీరే చూద్దురు గాని.

ఇక మా చంద్ర గురించి చెప్పాలంటే నేను రాముడనుకుంటే తను లక్ష్మణుడు. ఇక్కడ నేను రాముడినని చెప్పుకోవడం కేవలం మా చంద్ర గొప్పతనాన్నితెలియజేయడానికి మాత్రమే సుమా. అలాంటి అనుబంధం మాది.

పదండి ఎగ్-365 చేశాను డిన్నర్ చేస్తూ మాట్లాడుకుందాం

ఎగ్-65 గురించి విన్నాను గానీ ఈ ఎగ్-365 ఏమిటా అని ఆశర్యపోతున్నారా? అది మామూలు ఎగ్ బుర్జీ నే, కాకపొతే సంవత్సరం లో 365 రోజులు మేము అదే తింటాము కాబట్టి దానికి ఆ పేరెట్టాను అంతే.

అలా తిని తినీ నాకు గుడ్డు మేనియా తో పాటు గుడ్డో ఫోబియా కూడా పట్టుకుంది. 

మళ్ళీ ఇదేమిటంటారా? ఇలా ప్రతి రోజూ రెండు పూటలా గుడ్డు తింటూ ఉంటే ఏదో ఒక పూట నేనే కోడి లాగా గుడ్డు పెట్టేస్తానేమో అని భయపడుతూ ఉంటాను. దీన్నే గుడ్డో ఫోబియా అని నామకరణం చేసాను లెండి.

మాతృదేవోభవ, 
పితృదేవోభవ, 
ఆచార్యదేవోభవ,
గుడ్డుదేవోభవ 

అని గుడ్డు ను కూడా అందులో కలిపి తీరాల్సిందే. ఈ మాటను 90%  బ్యాచ్ లర్స్ ఒప్పుకుని తీరతారు అని నా గట్టి నమ్మకం (ఒప్పుకోని ఆ 10% మంది గుడ్డు తినని వాళ్ళు అయి ఉండచ్చు అని నా అంచనా) . కాబట్టి కుల దైవం లాగా మా లాంటి యువ కుల దైవం ఈ గుడ్డు.

ఇక మేము తిరుపతి లో ఉండటం వలన ఏదో ఒక రకంగా తిరుమల నుంచి లడ్డు వచ్చేది. ఎంతగా తిన్నామంటే లడ్డు అనే పేరు విన్నా విరక్తి కలిగేటంతగా. ఏదో ఫలహారం తిన్నట్లుగా ప్రతి రోజూ తినేవాళ్ళము (హి...హి...హి..ఏదో రకంగా ఈ పోస్ట్ టైటిల్ కి జస్టిఫికేషన్ ఇచ్చేశా) 

అందరి గురించి చెప్పి మరో రూమ్ మేట్ అయినా మా మను గురించి చెప్పలేదు కదా. "అసలు అదృష్టం ఉండాలంటే పెట్టి పుట్టాలి అంటారు" కదా అలాంటి వాడే మా మను ...చూశారా మనం ఇంతలా మాట్లాడుతున్నా కూర్చునే నిద్రపోతున్నాడే తనే మా మను, మరి అంతటి అదృష్టం ఎవరికీ దొరుకుతుందండీ?

ఏమిటి? బాగా బోర్ కొట్టించానా, దమ్ము కొడదామనుకుంటున్నారా, దయచేసి మా రూమ్ బయటికి వెళ్ళి దమ్ము కొట్టి రండి.  ఎందుకంటే రూమ్ లో మేమింతమంది ఉన్నా ఏనాడూ సిగరెట్, మందు, పేక లాంటి దురలవాట్లను, బలహీనతలను మా రూమ్ లోకే కాదు, అసలు మా జీవితాల్లోకి కూడా జొరబడనీయలేదు. అదే మాకు, మా రూమ్ కు ఉన్న విశిష్టత.

అలాగని మాకే బలహీనత లేదనుకోకండి, ఉంది అదేమంటే ఒక్కసారి మేము ప్రేమించడం మెదలెట్టామంటే విపరీతంగా ప్రేమ పెంచుకుంటాం అది సినిమాలైనా, ఇష్టపడ్డ వ్యక్తులైనా.