25, ఏప్రిల్ 2019, గురువారం

చేసిన సహాయం ఊరికే పోదు - ఏర్చి కూర్చిన కథలు

రాయడం నాకు ఇష్టం, కానీ బుర్రలో ఉండే ఐడియాలన్నీ ఖాళీ అయిపోయాయి. కాబట్టి ఏం రాయాలో తట్టక ఎప్పుడో విన్న కథని నా రాతల్లో మీతో పంచుకుంటున్నాను. చాలా మంది వినే ఉండచ్చు, కాకపోతే మరో సారి చదవడం వల్ల వచ్చే నష్టం ఏమీ లేదనుకుంటాను. నాకు నచ్చిన కథలన్నీ ఒక చోటికి నా మాటల్లో చేర్చాలనే నా ఈ ప్రయత్నానికి ఇది తొలి మెట్టు. ఏదో ట్రై చేశాను, ఇది నాకు సెట్టవ్వదనుకుంటే మొహమాటపడకుండా చెప్పెయ్యండి, ఇలాంటి పోస్ట్లు రాయకుండా ఉండనని చెప్పను గానీ మరింత బాగా రాయడానికి ప్రయత్నిస్తాను.  

ఇవాళ రాయబోతున్న ఈ చిన్ని కథ నాది కాదు, కానీ కథనం, రాతలు మాత్రం నావే. 

ఇంటింటికి తిరిగి వస్తువులమ్మే హోవార్డ్ కెల్లీ అనే ఒక కుర్రాడు, ఆ రోజు ఒక్క వస్తువు కూడా అమ్ముడుకాకపోవడంతో నిరాశగా ఉన్నాడు. మధ్యాన్నం కూడా దాటటంతో కడుపులో ఆకలి పెరిగిపోయింది, జేబు తడిమి చూసుకుంటే అందులో ఒక పెన్నీ (సెంట్ కాయిన్) మాత్రమే ఉంది. కడుపులో ఏదో ఒకటి పడితే గానీ అడుగు కూడా ముందుకు వేయలేను అనిపించింది.

పక్కన ఉండే ఇంటి డోర్ తట్టాడు. ఒక యువతి తలుపు తీసి ఇప్పుడు మేము ఏ వస్తువులు కొనదలచు కోలేదు, వెళ్ళమని అంది. 

ఆకలిగా ఉంది, ఏదైనా ఆహారం ఇవ్వగలరా అని అడగబోయి తన దగ్గర ఉన్న పెన్నీకి అది రాదని మొహమాటపడి, ఒక గ్లాస్ మంచి నీళ్లివ్వగలరా అని అడిగాడు. 

అలాగే అని లోపలికెళ్లిన యువతి గ్లాస్ తో తిరిగొచ్చింది. 

గ్లాస్ అందుకొని చూస్తే అందులో నీళ్ల బదులు పాలు ఉండటం గమనించి ఆమె వైపు చూశాడు. 

"నువ్వు ఆకలితో ఉన్నావని అర్థమవుతోంది, ఇంట్లో ప్రస్తుతానికి ఇవే ఉన్నాయి" అంది ఆ యువతి అంతకు మించి సహాయం చేయలేని నిస్సహాయతకు సిగ్గుపడి. 

అతను తన జేబు లోంచి పెన్నీ ఇవ్వబోతే, ఆవిడ పుచ్చుకోవడానికి ఒప్పుకోలేదు. 

స్వచ్ఛమైన ఆ యువతి మంచితనానికి ఆ పాలే కాక, అతని కనుపాపల వెనుక ఉబికిన కన్నీళ్లూ సాక్ష్యమయ్యాయి. 

ఆ యువతి కి కృతజ్ఞతలు తెలిపి బయలుదేరాడు. 

పాలతో కాస్త ఆకలి బాధ తగ్గడం వల్ల, సాయంత్రం లోపు ఇంకొన్ని ఇళ్లకు తిరిగి ఏదో ఒక వస్తువు అమ్మగలననే  నమ్మకం పెరిగింది దానితో పాటు మనుషుల మీద నమ్మకం కూడా. 

                                            *************************************

కొన్నేళ్ళకు, మంచి వాళ్ళకే కష్టాలు ఎదురవుతాయి అన్న అపోహను మరోసారి బలపరుస్తూ తీవ్రమైన జబ్బుతో ఆసుపత్రి పాలయ్యింది ఆ గ్లాస్ పాలు ఇచ్చిన ఆవిడ. 

తనుండే ఊరిలోని హాస్పిటల్ వాళ్ళు చేతులెత్తెయ్యడంతో పక్కనుండే సిటీ లోని పెద్ద హాస్పిటల్ లో నయం చేస్తారు అనే ఆశతో అక్కడికి వెళ్ళింది. 

ఆ డాక్టర్ ఆవిడకు అన్ని పరీక్షలు చేసి నయం అవడానికి కొన్ని రోజులు హాస్పిటల్ లో జాయిన్ అవ్వమన్నాడు. 

అతని ట్రీట్మెంట్ ఫలించి కొన్ని రోజులకే ఆవిడ జబ్బు నయమైంది. 

ఆవిడ డిశ్చార్జ్ అయ్యే రోజు రానే వచ్చింది, ఆ రోజు ఉదయం లేచి కిటికీ తలుపులు తెరవగానే  బయటి నుంచి వచ్చిన గాలికి టేబుల్ మీదున్న పేపర్  యెగిరి కింద పడింది. 

ఆ పేపర్ చూడగానే అర్థం అయ్యింది అది తాను చెల్లించాల్సిన బిల్ అని. అది తన తాహతుకు మించిన బిల్ అయి ఉంటుంది అని ముందే ఊహించడం వల్ల వణుకుతున్న చేతులతో ఆ బిల్ ను తెరచి చూసింది . 

'మీరు ఆరోజు ఇచ్చిన గ్లాస్ పాలకు ఈ బిల్లుకు చెల్లు - డాక్టర్ హోవార్డ్ కెల్లీ' అని రాసి ఉన్న ఆ బిల్లు, చేసిన సహాయం ఊరికే పోదు అన్న నిజాన్ని మరో సారి రుజువు చేసింది.  

ఆ బిల్ టేబుల్ పై ఉంచి డాక్టర్ కు కృతజ్ఞతలు తెలపడానికి రూమ్ బయటికి వెళ్ళింది ఆవిడ. 

ఈ సారి కిటికీ నుంచి గాలి మళ్ళీ వీచింది కానీ కన్నీటితో తడిచి బరువెక్కిన ఆ బిల్లును కదిలించలేక పోయింది. 


పైన చెప్పిన కథ Dr. Howard Kelly (1858-1943) జీవితంలో జరిగిన సంఘటన అని అంటారు కానీ నిజంగా జరిగిందో లేదో కరెక్ట్ గా తెలియదు. అందరి డాక్టర్స్ లాగానే ఇతను కూడా ఫీజులు బాగా ఛార్జ్ చేసేవారని అంటారు. కాకపోతే అతని ఫ్రెండ్ అయిన  Audrey Davis ప్రకారం కొందరికి ఫ్రీ గానే ట్రీట్మెంట్ చేసేవారట.

21, ఏప్రిల్ 2019, ఆదివారం

ఫేస్ బుక్ ఫిష్ మార్కెట్ అయితే, మరి ట్విట్టర్?

ఎప్పుడూ మిడిల్ క్లాస్ ఫామిలీస్, లోయర్ మిడిల్ క్లాస్ ఫామిలీస్ ఉండే ఏరియా లో చెత్త ఎత్తేసే ఒక మున్సిపాలిటీ వర్కర్ ను సెలబ్రిటీస్, హయ్యర్ క్లాస్ ఫామిలీస్ ఉండే పోష్ ఏరియా లోని ఇళ్లల్లో చెత్త ఎత్తేసే పని అప్పగించారు. 

అబ్బో గొప్పోళ్ళు ఉండే ఏరియా అనుకొని సంతోషంతో సంకలు గుద్దుకొని వెళ్ళాడు ఆ వర్కర్. చివరికి అక్కడా అలాంటి చెత్తే ఎదురైంది, కాకపొతే స్లం ఏరియా లో ఉండే చెత్త అన్నం, దోశ, ఇడ్లీ ముక్కలతో వాసన వస్తే, పోష్ ఏరియా లో పాచిపోయిన పాస్తా, పిజ్జా, బర్గర్ ముక్కలతో కంపు కొడుతోంది.

ఆ విషయాన్ని అక్కడితో ఆపేసి, అసలు విషయానికి వద్దాం. మొన్న ఒక సినిమా పెద్దాయన, ఫేస్ బుక్ ఫిష్ మార్కెట్ అని, ట్విట్టర్ ఏదో గొప్ప ఆలయం లాంటిదన్నట్లు సెలవిచ్చాడు. 

ఓహో, అది నిజంగానే జ్ఞాన సముద్రమేమో, నిజంగా జ్ఞానం అలల్లా ఎగసి పడుతుంటుంది కాబోలు అని పెద్ద బకెట్ తో జ్ఞానం తోడుకుందాం అనుకుని ఒక ట్విట్టర్ అకౌంట్ క్రియేట్ చేసుకున్నాను. తర్వాత తెలిసింది అది ఆ పెద్ద మనిషి అభిప్రాయం, అపోహ అంతే కానీ అంత సీన్ లేదని తేలింది.

అలా ట్విట్టర్ అకౌంట్ క్రియేట్ చేసుకుని కొందరు అన్ని రంగాలకు చెందిన ప్రముఖులను ఫాలో అయ్యాను. అందులో కొన్ని మాత్రమే ఇంట్రస్ట్ అనిపించే విషయాలు ఉన్నాయి. మెజారిటీ అంతా నాకు చెత్తే అనిపించింది.


ట్విట్టర్ లో మహేష్ బాబు ఏమో పారిస్ లో ఫ్యామిలీ టైం అని వాళ్ళ ఫ్యామిలీ ఫొటోస్ పెడతాడు. మరో సారి, మా అమ్మ పుట్టిన రోజు అని వాళ్ళ అమ్మ గారి ఫోటో పెడతాడు. మా ఆవిడ బోలెడు కష్టపడి ఒక అవార్డ్ సంపాదించుకుంది అని రామ్ చరణ్ వాళ్ళావిడ ఫోటో పెడతాడు. శ్రీలంక బాంబ్ బ్లాస్ట్ ఖండిస్తున్నాం అని పలువురు ప్రముఖులు పోస్ట్ పెడతారు.

మరి పేస్ బుక్ లో కూడా అంతేగా, అక్కడ మహేష్ అయితే ఇక్కడ హరీష్ అనే వ్యక్తి మేము మంత్రాలయం వెళ్ళాము అని వాళ్ళ ఫామిలీ ఫొటోస్ పెడతాడు. మా అమ్మాయికి  స్టేట్ లో 5th రాంక్ వచ్చింది దీవించండి అంటారు పేస్ బుక్ లో మనకు బాగా తెలిసిన సురేష్ అయినా రమేష్ అయినా. కాకపోతే నేను అబ్సర్వ్ చేసినంతవరకూ ఇవే విషయాలను పేస్ బుక్ లో సామాన్యులు కాస్త కవితాత్మకంగా అయినా చెప్తారు. 

అక్కడ ఆ మున్సిపాలిటీ వర్కర్ కి ఇక్కడ నాకూ జ్ఞానోదయం అయ్యిందేమిటంటే, ఫేస్ బుక్ ఫిష్ మార్కెట్ అయితే ట్విట్టర్ ఒక కాస్ట్లీ ఫిష్ షాప్ అని, ఎక్కడైనా చేపలు సంపాదించుకోవాలంటే ఆ చేపల కంపు భరించక తప్పదని అది షాప్ లో అయినా మార్కెట్ లో అయినా.  

14, ఏప్రిల్ 2019, ఆదివారం

నాలో స్ఫూర్తి ఇంకా మిగిలే ఉంది, అదలాగే రగులుతూనే ఉంటుంది.

Robert Chesebrough, ఇతని పేరు మనలో చాలా మంది విని ఉండరు కానీ, మన దినచర్య లో భాగంగా, ప్రత్యేకించి చలి ప్రాంతాల్లో నివసించేవారికి ఈ పేరుతో ఒక అనుబంధం ఉండే ఉంటుంది.

రాబర్ట్ తన కెరీర్ మొదట్లో తిమింగళాల ద్వారా ఉత్పత్తి అయ్యే ఆయిల్ నుంచి కిరోసిన్ ను రిఫైన్ చేసే కెమిస్ట్ గా అమెరికా లో పనిచేసేవాడు. Titusville అనే ప్రాంతంలో పెట్రోలియం ను కనుగొనటంతో ఇతను చేస్తున్న పని useless అయిపోవడంతో అతను jobless అయిపోయాడు. కాకపోతే అతని క్యూరియాసిటీ అతన్ని మూలాన కూర్చోనివ్వలేదు. వెంటనే ఆ ప్రాంతానికి వెళ్లి పెట్రోలియం నుంచి ఏదైనా పనికొచ్చే ఉత్పత్తులు తయారు చేయొచ్చా అనే ప్రయోగాలు మొదలెట్టాడు.  అతని ప్రయోగాలు ఫలించి పెట్రోలియం జెల్లీ అనే మెటీరియల్ ని తయారు చేశాడు.   

తనను తాను ఒక Guinea Pig లా మలుచుకున్నాడు.   (Since the 1800s, Guinea pigs have been used in laboratories to study nutrition, genetic, toxicology and pathology. Guinea pigs have done more than their fair share to contribute to medical science and to the health and well-being of humans and animals worldwide) తన చర్మం పై చాకుతో  గాట్లు పెట్టుకున్నాడు, ఒంటి పై ఆసిడ్ పోసుకున్నాడు, చర్మాన్ని నిప్పుతో కాల్చుకున్నాడు. ఆ గాయాలను మాన్పగల శక్తి  ఆ జెల్లీ కి ఉందా లేదా అని తెలుసుకోవడానికి తను తయారు చేసిన జెల్లీ ని అప్లై చేశాడు. అలా ప్రయోగాలు చేస్తూ అలాగే పెట్రోలియం వాసన రాకుండా ఉండే ఆ జెల్లీ లాంటి మెటీరియల్ తయారు చేయడానికి అతనికి పట్టింది పదేళ్లు.

దాన్నే vasaline అనే పేరుతో అమ్మబోతే ఎవరూ కొనలేదు, షాప్ వాళ్ళు కూడా కొనడానికి ముందుకు రాలేదు ఒంటి మీద నయమైన ఆ గాయాల మచ్చలను చూపినా. మళ్ళీ రోడ్డున పడ్డాడు తన ప్రయోగం సత్ఫలితాలివ్వక. 

ఇక ఇదే చర్యలను రోడ్ల పక్క తన షాప్ ని తెరిచి అందరి ముందు తన చర్మాన్ని కోసుకోవడం, నిప్పుతో, ఆసిడ్ తో కాల్చుకోవడం లాంటివి లైవ్ డెమో చేసి చూపించాడు, వాటిపై vasaline పూశాడు, ఆ vasaline తో నయమైన పాత గాయాల మచ్చలను ప్రూఫ్ గా చూపించాడు. ఫ్రీ సాంపిల్స్ పంచి వాడమని కోరాడు. అతని ప్రయత్నం వృధా కాలేదు, కొద్ది రోజులకు దాని ప్రభావం తెలిసి జనాలు మెడికల్ షాప్స్ లో వాటి గురించి అడగడం మొదలెట్టారు, గతంలో ఇతన్ని పట్టించుకోని మెడికల్ షాప్ వాళ్ళు ఇతని ఇంటి ముందు క్యూ కట్టారు. ఇక తర్వాతది చరిత్రే, చెప్పనవసరం లేదు  vasaline మన జీవితాల్లో ఎలా భాగమైందో.



ఈ చరిత్ర అంతా 1870 లో జరిగింది. ఎప్పుడో జరిగిన చరిత్రే కావచ్చు కానీ ఎప్పటికీ నిలిచి ఉండే విజయ యాత్రే. 

ఇది ఇవాళ నాకు నేను గుర్తుకు తెచ్చుకున్న విజయం, నాలో మరింత స్ఫూర్తి నింపుకోవటానికి. 

పోయిన వారం వెంట వెంటనే రెండు ఎదురు దెబ్బలు అదీ ఒకే రోజు, రెండేళ్ళ నా శ్రమను బూడిదగా మార్చేసిన రోజు. అందులో ఒకటి ఏకంగా నా జీవితాన్ని, నా కుటుంబాన్ని దెబ్బ కొట్టేది. నేనస్సలు ఊహించని ఈ ఎదురు దెబ్బకి దభేల్ మని కింద పడిపోయా, తిరిగి లేచి పరిగెత్తడానికి కావాల్సిన స్థైర్యాన్ని కూడగట్టుకొని మళ్ళీ పరిగెత్తడానికి ప్రయత్నిస్తున్నా.

ఫీనిక్స్ అనబడే ఒక కాల్పనిక పక్షి గురించి మీరు వినే ఉంటారు. అగ్ని లో తన ప్రాణాలను కోల్పోయినా తిరిగి ఆ బూడిద నుంచి ప్రాణం పోసుకొని పైకెగురుతుంది.   

ప్రస్తుతానికి ఈ రెండు దెబ్బలు నా ప్రమేయం లేకుండానే నన్ను దెబ్బదీశాయి, కోలుకోవడానికి నాకు నాల్రోజులు పట్టింది. విధి, లక్కు, తొక్క, తోటకూర అని చేతులు ముడుచుకొని కూర్చోదలచుకోలేదు. సంవత్సరం కావచ్చు రెండేళ్లు కావచ్చు, ప్రయత్నాన్ని ఆపేది మాత్రం లేదు. కొత్త రెక్కలు తొడుక్కుంటున్నా ఫీనిక్స్ పక్షి లా మళ్ళీ ఎగిరి నా లక్ష్యాన్ని చేరుకోవడానికి

8, ఏప్రిల్ 2019, సోమవారం

చూద్దాం ఎవరు గెలుస్తారో ఎన్నికల్లో ఈ సారి

ఒక సారి స్కూల్ లో జనరల్ నాలెడ్జి మీద టెస్ట్ ఉంటుంది ప్రిపేర్ అవ్వండి అన్నారు.

ఆ తర్వాత దాని గురించి మా బడదల్ తో డిస్కషన్ మొదలైంది. మన దేశ ప్రధాని ఎవరు అని వాడు అడిగాడు ?

దీనికి ఆన్సర్ తెలియకపోతే మన తెలుగోడి పరువు తీసినట్లే? ఆయన మన తెలుగు జాతి ముద్దు బిడ్డ అన్నాను నేను.

హమ్మయ్య! వీడు కరెక్ట్ ఆన్సర్ రాసినట్లే ఉన్నాడు అని సంతోషించి, పేరు చెప్పు మరి అన్నాడు.

ఇంకెవరు నీ క్వశ్చన్ లో ఆన్సర్ ఉంది. ఇంకెవరు మన అన్న ఎన్టీఆర్ గారు.

నీ మొహం, ఆ తెలుగు బిడ్డ P.V నరసింహా రావు, ఆయన మన ప్రధాని. మా నాన్న వాళ్ళు మాట్లాడుకుంటుండగా విన్నాను.

నువ్వు కరెక్ట్ అయి ఉండచ్చు, నేనే పొరపడ్డాను మన రాష్టానికి ప్రధాని ఎన్టీఆర్.

అయ్యి ఉండచ్చు. అవును ఎందుకైనా మంచిది మన దేశంలో ఉండే అన్ని రాష్టాల ప్రధాన మంత్రులు, ముఖ్య మంత్రుల గురించి కూడా తెలుసుకోవాలి.  ఇంతకీ మన దేశంలో ఎన్ని రాష్ట్రాలు ఉన్నాయంటావ్?

ఉండవూ ఒక వంద?

ఉండే ఉండచ్చు. మరి జిల్లా ప్రధాని గురించి అడిగితే? ఇంతకీ దేశంలో మొత్తం జిల్లాలు ఎన్ని ఉండచ్చు.

ఉండవూ ఒక యాభై?

దేశం మొత్తంలో రాష్ట్రాలే వంద ఉంటే జిల్లాలు అంత కంటే ఎక్కువ ఉండచ్చు.

అవును నువ్వు కరెక్ట్, మొత్తం జిల్లాలు నూటొక్కటి.

అంత ఖచ్చితంగా ఎలా చెప్పగలవ్?

సినిమా జ్ఞానం వల్ల, ఈ పెద్దోళ్ళు సినిమాలు చెడగొడతాయంటారు కానీ సినిమాల వల్ల ఎన్నో తెలుసుకోవచ్చు. మన నూతన ప్రసాద్ డైలాగ్ గుర్తు తెచ్చుకో 'నూటొక్క జిల్లాల అందగాడిని'

అంటే మొత్తం దేశంలో నూటొక్క జిల్లాలు ఉన్నాయంటావ్. మరి అంత మంది ప్రధానుల పేర్లు గుర్తు పెట్టుకోగలమా?

ఖచ్చితంగా కుదరదు, కాబట్టి వదిలేద్దాం.
     
                                                        *******కొన్నేళ్ల తర్వాత *********

వీధుల్లో చక్రం (గాను) తిప్పుకుంటూ ఆడుకునే రోజుల్లో చంద్రబాబు ఢిల్లీ లో చక్రం తిప్పుతున్నాడు అని మాట్లాడుకునేవాళ్ళు పెద్దోళ్లు. ఓహో, మేము వీధుల్లో పరిగెడుతూ సైకిల్ టైర్ తిప్పుకుంటుంటే, చంద్రబాబు ఢిల్లీ వీధుల్లో తిప్పుతున్నాడేమో,  ఛాన్స్ దొరికితే నేనూ ఢిల్లీ లో చక్రం తిప్పుతా, మరి దీనికెందుకంత గొప్పగా చెప్తున్నారు అని అనుకునేవాడిని అప్పట్లో.

ఆ తర్వాత లక్కీ గా సమ్మర్ హాలిడేస్ లో  నేను ఢిల్లీలో ఉన్న మా బాబాయ్ దగ్గరకు వెళ్లాను. అప్పుడు సైకిల్ చక్రం ఢిల్లీ వీధుల్లో తిప్పి వచ్చాను. ఈ విషయం తెలిసి ఊరూ వాడా ఏకమై నన్ను చంద్ర బాబు కన్నా ఎక్కువ పొగుడుతారని ఊహించా. కానీ నన్ను మా బడదల్ తప్ప ఎవరూ పొగడకపోవటం నిరాశకు గురి చేసినా, ఈ లోకం తీరే ఇంత అని సరి పుచ్చుకున్నాను.

                                             *******చాలా ఏళ్ల తర్వాత..అంటే ఇప్పుడు  *********

రాజకీయ జ్ఞానం పెరిగిందని మీరనుకోవద్దు, ఏదో వయసుతో పెరిగే జ్ఞానమే తప్ప రాజకీయ జ్ఞానం అయితే పెరగలేదు.  మొన్నా మధ్య కొలీగ్ ఒకతను మీ  ఊరు ఏ నియోజక వర్గం కింద వస్తుంది అని అడిగితే, పులివెందులో, జమ్మలమడుగో, పొద్దుటూరో అయి ఉండచ్చు లేదా వేరే నియోజక వర్గం కిందకు రావచ్చు అని తిక్క తిక్కగా సమాధానమిచ్చి పక్కకు తప్పుకున్నాను ఆ డిస్కషన్ నుంచి. 

సో, అప్పటికీ ఇప్పటికీ పెద్దగా మార్పు లేదు రాజకీయాల్లో నా నాలెడ్జి విషయంలో. కాబట్టి ఈ సారి ఎన్నికల్లో ఎవరు గెలుస్తారు అనే దాని మీద విశ్లేషణ నేను చేయలేను. ఎలెక్షన్లో ఏ పార్టీ గెలుస్తుంది అనే దాని మీద ఒక్క పోస్ట్ కూడా రాయలేదెందుకు అని కొందరు అడిగిన దానికి పై సోది అంతా చెప్పుకోవాల్సి వచ్చింది. 

నాకు గుర్తున్నంతవరకు ఎన్నికల్లో ఒకే ఒక్కసారి వోట్ వేసినట్లు గుర్తు. పలానా పార్టీ కే వెయ్యి అని మా బంధువులంతా ఫోర్స్ చేశారు కాబట్టి ఆ పార్టీ కి కాకుండా వేరే పార్టీకి దేనికో వేసినట్లు గుర్తు. అసలే నేను ఉలిపిరి కట్టెను మరి. 

చిన్నప్పుడు మా సొంతూరు వెళ్ళినప్పుడు భలే కన్ఫ్యూషన్ గా ఉండేది, ఎవరు ఏ పార్టీ నోతెలీక.  ఎవరూ ఏ పార్టీ లో శాశ్వతంగా ఉండరు అని తెలుసు గానీ, మరీ సంవత్సరానికి ఒకసారి ఊరు వెళ్ళినప్పుడల్లా పక్కింటి వాళ్ళతో మాటల్లేవు వాళ్ళు వేరేపార్టీ, ఆ మర్రి చెట్టు పక్కన ఉండే ఇంట్లో వాళ్ళు ఇప్పుడు మన పార్టీ అనేవాళ్ళు.

నాకు రాజకీయాల గురించి, ఇప్పుడు పోటీ చేస్తున్న పార్టీల గురించి తెలిసింది కొంచెమే. అదేంటో మీరే చూడండి.

ఎక్కడ నెగ్గాలో కాదు ఎక్కడ తగ్గాలో తెలిసినోడు గొప్పోడు - పార్టీ :

నేను చెబుతూ ఉన్నది ఎవరి గురించో ఈ పాటికే తెలిసే ఉంటది. సినిమా పబ్లిసిటి stunts చేస్తుంటాడు, చాప మీద కూర్చొని మట్టి కుండలో తినడాలు, తనకు ఇష్టమైన లీడర్ అని చెప్పి వంగి కాళ్లకు దండం పెట్టడాలు లాంటివి అన్నమాట. 


స్వతహాగా నేను అతని అభిమానినే కానీ అతని పార్టీ మీద నాకు ఎటువంటి నమ్మకం లేదు. 

సినిమా తారలుండే పార్టీ:

చోటా మోటా నటుల నుంచి రోజా, మోహన్ బాబు లతో పాటు ఎక్కడ ఎప్పుడు ఏ పార్టీలో తేలతారో తెలియని రాజశేఖర్, జీవిత లాంటి బడా తారలంతా ఉండే పార్టీ ఇది. వీళ్ళ మొహాలు చూసి ఎన్ని ఓట్లు రాలతాయో తెలియదు కానీ ఆ పార్టీ అధినేత యొక్క తండ్రి ప్రభావం వల్ల పడే ఓట్లే ఎక్కువ.  

ఇప్పటికీ చెట్టు పేరు చెప్పుకుని కాయలు అమ్ముకునే పార్టీ:

చెట్టు పేరు (అన్న గారి పేరు) చెప్పుకొని కాయలు అమ్ముకుంటూ ఉంటారు ఈ పార్టీ వాళ్ళు, కాకపోతే ఆ చెట్టుకు కాయలు కాయడం మానేసి కుక్క మూతి పిందెలు పుట్టుకొస్తున్నాయి. అన్నగారు ఎప్పుడూ కాంగ్రెస్ ను, కాంగ్రెస్ పార్టీ వాళ్ళను కుక్క మూతి పిందెలు అని అంటూ ఉండేవారు అప్పట్లో. ఇప్పుడు అదే పార్టీలో అలాంటి వాళ్ళే చాలా మంది ఉన్నారు. వారిలో ఇద్దరి గురించి పరిచయం అనవసరం. యూట్యూబ్ ఓపెన్ చేస్తే సగం ట్రోలింగ్స్ వారి మీదే ఉంటాయి. సో వాళ్ళను నమ్ముకొని బాబు గారు ఈ ఎన్నికల్లో గెలవడం అనేది కుక్కతోక పట్టుకొని గోదారి ఈదినట్లే. పండిత పుత్ర పరమ శుంఠ అనేది వీరిద్దరికీ వర్తిస్తుంది.

పాలిటిక్స్ లో నా వయసంత అనుభవం ఉందంటుంటాడు ఈ పార్టీ అధినేత, కాబట్టి ఇప్పటికీ ఈయన చక్రం తిప్పి తన పార్టీ ని గెలిపించుకునే సమర్థత ఉన్న చాణుక్యుడే.

ఆటలో అరటి పండు పార్టీ:

పెద్ద పిల్లలు ఆడుకుంటున్నప్పుడు చిన్న పిల్లాడొచ్చి నేనూ ఆడతాను అని మారాం చేస్తే పోనీ లేరా ఆడిద్దాం ఆటలో అరటిపండు అని ఆడించుకునేవాళ్ళు. సో, ఈ పార్టీ కూడా అలాంటిదే. పిట్టలదొర లేని లోటు తీర్చుతుంటాడు ఈ పార్టీ లీడర్.

ప్రస్తుతానికి, నాకు మటుకు ఈ ఎన్నికల మీద ఎటువంటి ఇంట్రస్ట్ లేదు, ప్రస్తుతానికి నా ఇంటరెస్ట్, efforts, ఎదురు చూపులు అన్నీ నేను చేస్తున్న నా హోమం మీద దాని రిజల్ట్స్ మీద.

చివరిగా, ఈ ఎలెక్షన్స్ లో ఎవరు గెలుస్తారు అనే దాని మీద నా వ్యూ ఏంటో క్లియర్ చెప్పలేను గానీ, ఒక చిన్న పజిల్ ఇస్తున్నాను మీకు (ఇంటర్నెట్ నుంచి అరువు తెచ్చుకున్నది).

Source From Internet

4, ఏప్రిల్ 2019, గురువారం

మంచి కథ ఒకటి ఉంది, సినిమా తీద్దామా?

"నేను ప్రతి కారం తురుచుకుంటాను" హీరోయిన్ క్యారెక్టర్ చేస్తున్న అమ్మాయి ఆవేశంగా డైలాగ్ చెప్తోంది.

వెరీ గుడ్, షాట్ ఓకే, పాకప్ అన్నాడు డైరెక్టర్.

అదేంటి సార్, అదేం డైలాగ్ అన్నాడు నిర్మాతతో పక్కనుండే  వ్యక్తి .

'నేను ప్రతీకారం తీర్చుకుంటాను' అనేది డైలాగ్. ఈ హిందీ వాళ్ళను తెస్తే ఇలాగే ఉంటుంది. డబ్బింగ్ లో కవర్ చేయాలి, తెల్ల తోలు పిల్ల అయితేనే చేస్తాను అని హీరో డిమాండ్. అందుకే తప్పలేదు.  సరే కథ ఏదో ఉందన్నావ్ గా చెప్పు.

నా కథలో హీరోకి ఒక కన్ను ఉండదు…హీరోయిన్ కు ఒక చెయ్యి ఉండదు…విలన్ కు ఒక కాలు ఉండదు….

దీన్ని సినిమా గా తీస్తే ఆ పైన నేను ఉండను. ఇంకో కథ చెప్పు.

లాస్ట్ వీక్ రాసిన కథ చెప్తాను. ఇందులో విలన్ ఒక ఊరిలో అడుక్కు తింటూ ఉంటాడు. అతడు అదే స్ట్రీట్ లో అడుక్కు తింటున్న హీరోయిన్ ను ప్రేమిస్తూ ఉంటాడు. హీరో ఇంకొక ఊరి నుంచి ఈ ఊరికి అడుక్కోవడానికి వచ్చి, అదే స్ట్రీట్ లో అడుక్కుతింటూ ఉంటాడు. 

దీన్ని సినిమాగా తీశానాంటే నేను కూడా అడుక్కుతినాలి. ఇలాంటి ఆర్ట్ సినిమాలు, అవార్డులొచ్చే సినిమాలు కాకుండా మాంఛి మాస్ మసాలా స్టోరీ చెప్పవయ్యా. 

నిన్న రాత్రి రాసిన ఒక మాంఛి మాస్ మసాలా స్టోరీ రాశాను వినండి.

అడగడం మర్చిపోయాను, ఇంతకీ నువ్వు ఏం చేస్తుంటావ్.

రివ్యూ రాస్తుంటాను.

ఏ సైట్లో నేమిటి?

ఇంకొకడి సైట్ లో నేనెందుకు రాస్తాను, నాకే ఒక ఓన్ సైట్ ఉంది, అందులో రాస్తుంటాను.

ఏమిటా సైట్?

రివ్యూరాజా.కాం

ఓహో ఆడివి నువ్వేనన్నమాట, బుద్ది ఉందటయ్యా,  అదేదో   సినిమాలో  సస్పెన్స్ పాయింట్ ను రివ్యూ పేరు చెప్పి మొత్తం రాసేస్తే యెట్లయ్యా? సరే గానీ సినిమా టైటిల్ ఏమనుకుంటున్నావ్?



బొబ్బట్టు.  

అదేం పేరు, అయినా ఇలాంటి సినిమా పేరు ఎక్కడో విన్నట్లు ఉందే?

అది పెసరట్టు సర్. 

అవును గుర్తొచ్చింది, రివ్యూలు రాస్తూ అతను కూడా నీలాగే పెద్ద బిల్డప్ ఇచ్చి కత్తి లాంటి సినిమా తీస్తానని చెప్పి ఒక సుత్తి సినిమా తీశాడు. పెన్ ఉంది కదా అని ఇష్టమొచ్చినట్లు రివ్యూ రాయడం కాదు, తీస్తే తెలుస్తుంది సినిమా కష్టాలు. ఏమన్నా అంటే బిర్యాని తిని రుచి గురించి మాట్లాడే వాడికి బిర్యాని ఎలా చెయ్యాలో తెలియాల్సిన అవసరం లేదని వెధవ లాజిక్ ఒకటి లాగుతారు. సరే కథ మొదలెట్టు. 

సంక్రాంతి సందర్బంగా ఒక ఊరిలో బొబ్బట్లు తినే పోటీ ఉంటుంది.  ఆ ఊరిలో ఇది తరతరాలుగా వచ్చే ఆచారం. విలన్ వాళ్ళ వంశమే తరతరాలుగా ఆ పోటీలో గెలుస్తూ ఉంటుంది. 

హీరో ఆ ఊరికి చుట్టపు చూపుగా వచ్చి ఆ పోటీలో పాల్గొని విలన్ ని ఓడిస్తాడు.  దాంతో  విలన్ మరదలు అయిన హీరోయిన్ హీరో మీద మనసు పారేసుకుంటుంది. దాంతో విలన్ పగతో రగిలి పోతాడు.

అవును, ఇందాకటి ముష్టివాళ్ళ కథ కూడా  ఆల్మోస్ట్ ఇదే కదా.

మీకు తెలియనిదేముంది లోకంలో ఉండేది పట్టుమని పది కథలే, అవే అటూ ఇటూ మారుతూ ఉంటాయి.  కథతో పాటు పాటలు కూడా నేనే రాసుకున్నాను. సంక్రాంతి కాబట్టి ఒక మంచి ఐటెం సాంగ్ పెట్టొచ్చు ఆ పోటీల తర్వాత

సంకురాతిరి సంకురాతిరి 

ఇయ్యాలే వచ్చింది సంకురాతిరి 

నిన్న రాతిరి నిన్న రాతిరి  

పండనియ్యలేదు నన్ను పిల్లగాడు పూరా రాతిరి 

శివరాతిరి  శివరాతిరి చేసేయ్  ప్రతీ రాత్రినీ శివరాతిరి 


అంతే కాదు సార్, ఇప్పుడు షూటింగ్ స్టార్ట్ చేస్తే నెక్స్ట్ సంక్రాంతి కి కంప్లీట్ చేసి రిలీజ్ చెయ్యొచ్చు. సినిమాలో సంక్రాంతి  సాంగ్ ని పబ్లిసిటీ కి కూడా పెట్టుకోవచ్చు. ఇక సంక్రాంతి, శివరాత్రి ఉత్సవాలు జరిగిన ప్రతి చోట ఈ సాంగ్ మోగిపోతూ ఉంటుంది ఉత్సవాల్లో. సంక్రాంతి రోజున రిలీజ్ చేస్తే పిచ్చి జనాలు పండగ పూట సినిమా ఎలా ఉన్నా చూసి హిట్ చేసేస్తారు. ..మరీ హిట్ కాకపోయినా ఓపెనింగ్స్ తో మన డబ్బులు మనకు వచ్చేస్తాయి. సినిమాలో  

"నీ నెత్తి మీద పిడుగు పడితే నువ్వు బతకచ్చు, కానీ నా అడుగు పడిందో నీకు పిండాకూడు పెట్టాల్సిందే"

"నా ప్రేమకు అడ్డొస్తే అడ్డ దిడ్డంగా నరికేస్తా

"సింహం ఆడితే వేట, అదే నేనాడితే కుమ్ములాట, మీలో ఒక్కరు కూడా మిగలరు ఈ పూట"

లాంటి భారీ డైలాగులు పెట్టేద్దాం.

ఇదిగో రైటరూ, స్టోరీ సూపర్ గా ఉంది…దీన్ని సినిమా గా తీద్దాం. 

హీరోగా ఎవర్ని తీసుకుందామనుకుంటున్నారు?

ఎవరో ఎందుకయ్యా, నా కొడుకు పదో తరగతి పది సార్లు తప్పి ఊరి మీద బలాదూర్లు తిరుగుతున్నాడు. వాడు దేనికి పనికి రాడని మాకు అర్థమై పోయింది. వాడినే హీరోగా పెట్టి సినిమా తీద్దాం.

అది…మరి…

అర్థం అయ్యిందయ్యా…నువ్వు ఎందుకలా నసుగుతున్నావో అర్థం అయ్యింది. నల్లటి నలుపు, లావూ, పెద్ద అందం లేదు…హీరో గా  సూట్ అవ్వడనేగా నీ డౌట్…అలాంటి అనుమానాలు ఏమీ పెట్టుకోవద్దు…పంచాయితీ ఎలక్షన్స్ లో కూడా గెలవని లోకేష్ బాబు ను పంచాయితీ రాజ్ శాఖా మంత్రి ని చేస్తే జనం ఒప్పుకోలా ఇదీ అంతే.

అది కాదు సార్

నువ్వు అంతలా అంటున్నావ్ కాబట్టి మేకోవర్ కోసం మా వాడిని ఒక నెల అమెరికా పంపించి మహేష్ బాబు లా తయారు చేయిస్తా. సరే, ఇంకో పాట ఏం రాసావో చెప్పు

లకు చికి రాణి … లకు చికి రాణి

ఏమైనా కానీ…చేస్తానే బోణీ

మీ నాన్న రానీ…మా నాన్న రానీ 

ఎవరైన రానీ…ఆగదీ ప్రేమ కహానీ 


గడి బిడ గండు…గడి బిడ గండు

జిలేబి దిండు….. పుట్ట చెండు

దానిమ్మ పండు…నీకిస్తా రెండు

ఇలా ఒక సాంగ్ స్విట్జర్లాండ్ లో పిక్చరైజ్ చేద్దాం. 

ఇదేమిటయ్యా, ఇలా మనం పల్లెటూరి స్టోరీ తీస్తూ ఇలా ఫారిన్ లొకేషన్ లో సాంగ్ పెడితే సాంగ్ కు, వెనుక సీన్స్ కు సంభంధం లేదనుకుంటారేమో?

సార్ మీరింకా ఈ ఫీల్డ్ కి కొత్త, అవన్నీ ఎవరు అబ్సర్వ్ చేస్తారు.

కనీసం ఆ పాటకి అర్థం పర్థం కూడా లేదు కదయ్యా. 

అర్థముండే పాటలు ఎవరికి కావాలి సార్, యెంత గోలగా ఉంటే అంత హిట్టు, ఎలాగూ బొంబాయ్ నుంచి పిలిపించిన హిందీ సింగర్స్ తోనే  పాడిస్తాం కాబట్టి  ఆ పాట ఎవడికి అర్థం కాదు.

నేను కన్విన్స్ అయ్యా, మనం ఈ సినిమా తీస్తున్నాం.    నాకొక సాంగ్ తట్టిందయ్యా ఇప్పుడే

చెప్పండి సార్

బొబ్బట్టు తీసుకో మామా
నేతి బొబ్బట్టు తీసుకో మామా

నీ చేతి బొబ్బట్టు బాగుందే పిల్లా
అబ్బబ్బ కావాలే ఇంకోటి మళ్ళా

అబ్బబ్బబ్బ అదిరింది సార్, టైటిల్ సాంగ్ గా వాడచ్చు. ఒక ఊపు ఊపేస్తుంది యూత్ ని.

సరే, నెక్స్ట్ మంత్ మన 'బొబ్బట్టు' షూటింగ్  స్టార్ట్ చేద్దాం.

1, ఏప్రిల్ 2019, సోమవారం

సెల్ఫీ పిచ్చి ఏంటో ఆస్వాదించక

పదిహేనేళ్ల క్రితం అనుకుంటా, చిరంజీవి గారిని ఒక యాంకర్ ఇంటర్వ్యూ చేస్తూ ... "మిమ్మల్ని ప్రేక్షకులు ఇంకో ముప్పయ్యేళ్లయినా చూస్తూనే ఉంటారు సర్" అంది. 

అప్పుడు చిరంజీవి గారు కథ లాంటి ఒక కల్పితాన్ని చెప్పారు. 

తిరుమలలో దర్శనానికి క్యూలో వచ్చిన భక్తులు కొందరు, కొద్ది సేపు కూడా మమ్మల్ని మా స్వామిని చూడనీయకుండానే పక్కకు తోసేస్తున్నారు అని గొడవ పెడితే ఒక వంద మంది పరమ భక్తుల్ని సెలెక్ట్ చేసి మీ ఇష్టం మీరు ఇక్కడయెంత సేపైనా స్వామిని చూస్తూ ఉండి పోవచ్చు మీకు ఇక్కడే సకల సౌకర్యాలు కల్పిస్తాం అన్నారట ఆలయ కార్యకర్తలు. 

ఇంకేముంది ఆ వంద మంది భక్తులు భలే! భలే! అని తెగ సంతోషించారట. 

గంట సేపటి తర్వాత ఆ కౌంట్ యాభై మందికి తగ్గిందట 

ఇంకో అరగంటకి ఇరవై కి చేరిందట

ఇంకో అరగంటకి ఐదు కి చేరిందట 

సాయంత్రానికి అక్కడ ఒక్కరు కూడా లేరట. 

అలాంటి వెంకటేశ్వర స్వామినే పట్టుమని పది గంటలు కూడా చూడలేదు అలాంటిది, ఆఫ్ట్రాల్ నన్ను ఇంకో ముప్పయ్యేళ్లు ఎవరు చూస్తారు? అని ఆ యాంకర్ తో అన్నారు 

సో, అందంగా, ఆకర్షణీయంగా ఉంది కదా అని ఏదైనా ఎక్కువ సేపు చూడలేం, నేను కూడా దీనికి మినహాయింపు కాదు.  నెమలి పురి విప్పింది కదా అని దాన్నే పది నిముషాల పాటు చూస్తూ కూర్చోలేను.  ఆ మెమోరీస్ ని మైండ్ లో, వీలయితే ఫోన్ లో బంధించుకొని బయల్దేరడమే.

"సెల్ఫీ పిచ్చి ఏంటో ఆస్వాదించక" అన్నాడు ఒక వ్యక్తి ఫేస్బుక్ లో బొటానికల్ గార్డెన్ లో ఒక రోజు పోస్ట్ కు స్పందిస్తూ. దీన్ని సింపుల్ గా వదిలేయచ్చు, కాకపొతే ఆ విషయం గురించి కాస్త ఆలోచించినప్పుడు చిరంజీవి ఇంటర్వ్యూ గుర్తొచ్చింది, ఇది ఒక పోస్ట్ గా రాస్తే బాగుంటుంది అనిపించి రాశా.  నేనేదో నెగటివ్ కామెంట్స్ తట్టుకోలేక రాసిన పోస్ట్ కాదు, నెగటివ్ గా అయినా సరే పాజిటివ్ గా అయినా సరే కామెంట్స్ తప్పక స్వీకరిస్తాను. అప్పుడప్పుడూ కామెంట్స్ అనేవి మరింత డిస్కషన్ కు కారణమవుతాయి, దాని వలన మరిన్ని కొత్త విషయాలు నాకు తెలుస్తుంటాయి. 

సెల్ఫీలు, ఫోటోల వల్ల కొన్ని కొన్ని ఉపయోగాలు కూడా ఉంటాయి. నమ్మండి నమ్మకపోండి, ఇది నిజం. మొన్న రాత్రి చీకట్లో ఫోటో తీశానా, తర్వాత చూసుకుంటే తెలిసింది ఆ ఫోటోలో రెండు స్టార్ట్స్ కూడా ఉన్నాయని.  ఇదిగో అదే ఆ ఫోటో

2 Stars found when I took a picture in the night,
can somebody tell me how to inform this to NASA :)
ఈ రెండు కొత్త స్టార్స్ గురించి NASA వాళ్లకు  తెలియజేయాలి, వాళ్ళను ఎలా కాంటాక్ట్ అవ్వాలో మీకెవరికైనా తెలిస్తే నాకు తెలియజేయరూ ప్లీజ్?