14, నవంబర్ 2022, సోమవారం

చెల్లని నాణెం

పూరి జగన్నాథ్ కొడుకుని హీరో గా పెట్టి అప్పుడెప్పుడో తీసిన మెహబూబా సినిమా ఈ వీకెండ్ చూశాను. ఇక తరువాతి వాక్యం చదివే ముందు ఒక గ్లాస్ చల్లటి నీళ్ళు పక్కన పెట్టుకోండి ముందు ముందు పనికొస్తాయి. 

ఆయన ఆ సినిమా 2018 లో తీసినట్లు ఉన్నాడు గానీ ఆశ్చర్యకరమైన విషయం ఏమిటంటే అలాంటి కథనే నేను 2015 లో రాసుకున్నా. ఇప్పుడు మీరు మూర్చబోయే స్టేజి లో ఉంటారు, కాస్త ఆ చల్ల నీళ్లు మీ గొంతులో పోసుకోవడమో లేదంటే మొహాన కొట్టుకోవడమో చేయండి.  

ఇప్పుడు కాస్త తేరుకున్నారు కదా, మళ్ళీ చదవండి. చిన్నప్పటి నుంచి సినిమాలు అంటే కొంత ఇష్టం ఉండటం వల్ల అవంటే నాకు అభిమానం. అందుకే యెంత చెత్త సినిమా అయినా పూర్తిగా చూడందే వదలను. చూసిన తర్వాత అలా కాకుండా ఎలా తీస్తే బాగుండేదో నేను ఒక బుక్ లో రాసుకునేవాడిని.  అలా రాసుకున్న పుస్తకం నేను సిడ్నీ కి వచ్చేసాక బెంగళూరు లో నేనుండే రెంటెడ్ హౌస్ ఖాళీ చేసేప్పుడు మా నాన్న న్యూస్ పేపర్స్ తో పాటు నా నోట్స్ మెటీరియల్స్ అంతా పాత పేపర్ వాడికి అమ్మేశాడు. 

సిడ్నీ కి వచ్చాక ఒక రెండు మూడేళ్ళు బుధ్దిగానే ఉన్నాను. తర్వాత 2015 టైం లో అనుకుంటా నేను బ్లాగ్ లో రాయడం మొదలెట్టాను. చాలా మంది చదివి అభినందించేవారు బాగానే రాస్తున్నావని. అప్పుడు నా మైండ్ లో ఒక పాత జ్ఞాపకం మెదిలింది. 

నేను బెంగళూరు లో ఉన్నపుడు, మగధీర సినిమా విడుదలయ్యి బాగా హిట్టయ్యింది. నాకప్పుడు సినిమా బాగానే అనిపించింది కానీ దాన్ని ఇంకా బాగా తీయొచ్చు అనిపించింది (రచయిత లేదా దర్శకుడు పాపం కథ బాగానే రాసుకొని ఉంటాడు, కాకపోతే బాగా పేరున్న హీరోలు, అతని వెనకున్న భజన బృందాలు వాళ్ళ బంధువులు అంతా తలో చెయ్యి వేసి ఆ కథను బ్రష్టు పట్టించి ఉంటారు. అదేదో సినిమాలో ఒకతను సీరియస్ సినిమా తీద్దాం అనుకుంటే షూటింగ్ పూర్తయ్యి ప్రివ్యూ చూసేప్పటికీ అది ఒక కామెడీ సినిమాలా అవుతుంది. పులిహోర కలపాలని దర్శకుడు అనుకుంటే అతనితో బిర్యాని వండిస్తారు)  

నోట్స్ లో అదే మగధీర సినిమానే ఇంకెలా తీయొచ్చు అనుకున్నపుడు వేరొక కథ మదిలో మెదిలింది. నేను పుట్టక ముందు నుంచి అంటే మూగ మనసులు తో మొదలుకొని జానకి రాముడు మీదుగా నిన్నటి మగధీర వరకు పునర్జన్మల మీద సినిమాలు తీసి హిట్ కొడుతున్నారు అంటే మనం ఎంటర్టైనింగ్ గా తీయగలితే ఇంకో హిట్ సినిమా కూడా తీయొచ్చు అని క్లుప్తంగా ఒక కథ రాసుకున్నాను పునర్జన్మల కథకు అప్పుడెప్పుడో చూసిన సన్నీడియోల్ 'గదర్:ఏక్ ప్రేమ్ కథా'  సినిమా కాన్సెప్ట్ ని మిక్స్ చేస్తూ (నాకు తెలిసి 90% సినిమా వాళ్ళు ఒక నాలుగైదు సినిమాలు చూసేసి ఒక కథ అల్లుకుంటారనుకుంటా)  రాసుకున్న నోట్స్ చెత్త పేపర్స్ వాడి దగ్గరికి చేరినా ఆ కథ మాత్రం నా మైండ్ లో అలాగే ఉండిపోయింది కదా అని దాన్ని డెవలప్ చేసి ఫుల్ డైలాగ్స్ వెర్షన్ తో ఒక బౌండెడ్ స్క్రిప్ట్ రాసి బైండ్ కూడా చేసి పెట్టుకున్నాను. నాకంత సీన్ లేదు, నేను ఆ సినిమా ఎలాగూ తీయలేనని తెలుసు గాని అదో సెల్ఫ్ సాటిస్ఫాక్షన్  అంతే. ఆ 132 పేజీల స్క్రిప్ట్ ని ఎప్పుడూ నా టేబుల్ మీదే ఉంచుకుంటాను నేను  నా ఫెయిల్యూర్ కి జ్ఞాపకంలా. 

నా ఉద్దేశ్యం చెత్త వాడికి అమ్మేసిన ఆ నోట్స్ పూరి గారి కంట పడి కాపీ కొట్టాడని కాదు కానీ ఐడియాస్ అలా ఇద్దరికీ ఒకేలా వస్తుంటాయి అని. సంతోషం సినిమాలో ప్రభుదేవా ఒక పల్లెకి ఉదయాన్నే వెళ్ళినప్పుడు, కాల కృత్యాల కోసం మోకాళ్ళ మీద కూర్చుని ఉన్న వారంతా లేచి నిలబడతారు. పర్లేదు కూర్చోండి నాకంత మర్యాద ఇవ్వాల్సిన అవసరం లేదు అంటాడు ప్రభుదేవా . అప్పుడు పక్కన ఉన్న మా శీను నాకెప్పటి నుంచో ఇలాంటి సీన్ నా మైండ్ లో ఉండేది అన్నాడు. 

ఇప్పుడు కూడా కొన్ని సినిమాలు రిలీజ్ అయ్యాక కొందరు ఇది నా కథ అని గొడవ పెడుతుంటారు. వాటి విషయం లో కూడా ఇద్దరూ ఒకే లాగా అలోచించి ఉండచ్చు లేదంటే నిజంగానే కథ కొట్టేసి ఉండచ్చు అది వేరే విషయం. 

సినిమాలో కుర్రాడు బానే చేశాడు, పూరి జగన్నాథ్ గారు గనుక మునుపటి ఫామ్ లోకి వచ్చి ఇడియట్ లాంటి హిట్టు సినిమాలు అతడితో తీస్తే అతను స్టార్ హీరో అయ్యే అవకాశం ఉంది  (ఇడియట్ అనేది గొప్ప సినిమా అని కాదు కానీ, హిట్టే సినిమా ఇండస్ట్రీలో కొలమానం అది బాగుందా లేదా అని కాదు. నిజం చెప్పాలంటే పూరి గారి ఏ సినిమా నాకింత వరకు నచ్చలేదు. నా లాంటి ఓ బోడి లింగానికి నచ్చకపోతే ఆయనకేం నష్టం లేదనుకోండి)  ఇక ఆ సినిమా సెకండ్ హాఫ్ నుంచి పూరీ విశ్వరూపం చూపిస్తాడు.  ఇక  క్లైమాక్స్ లో మాత్రం తాండవం ఆడేస్తాడు.  ఎంతో సెన్సిటివ్ గా తీసి ఉండాల్సిన లవ్ స్టోరీ ని బాగా లౌడ్ గా తీశాడు. ఇక ఇండియన్ పాకిస్తాన్ బోర్డర్ విషయాలను  మాత్రం  వీధిలో నీళ్ళ కొళాయిల దగ్గర జరిగే కొట్లాట స్థాయి లోకి దిగజార్చి చూపించాడు.  బాబోయ్ ఆ బోర్డర్ దగ్గర ఇండియన్ మిలిటరీ ఆఫీసర్ గా ఓవర్ యాక్షన్ చేసిన ఆవిడెవరో గానీ ఆస్కార్ ఇచ్చేయచ్చు (పోకిరి సినిమా తర్వాత ఆవిడని మళ్ళీ ఇదే సినిమాలోనే చూడ్డం)

సారూప్యత ఉందనిపిస్తోంది కాబట్టి ఎక్కడో ఎప్పుడో చదివిన ఒక చిన్న కథ నాకు గుర్తు ఉన్నంతలో చెప్పి ముగిస్తాను. సమానమైన విలువున్న ఓ రెండు కొత్త కాయిన్స్ ని ముద్రించి వదిలారు. అందులో ఒక కాయిన్ ఎక్కడో రోడ్లో పడిపోయింది, ఇంకో కాయిన్ మాత్రం చలామణి లోకి వెళ్ళిపోయి దాని వేల్యూ అది పొందింది. రోడ్లో పడిన కాయిన్ అలా వాహనాల కింద పడి అట్నుంచి అటు రోడ్ పక్కన చెత్తలోకి చేరిపోయింది. కొన్నేళ్ళకి చెత్త ఏరుకునే వాడికి ఆ కాయిన్ దొరికింది కానీ అప్పటికే సొట్టలు పడి, తుప్పుపట్టిపోయి ఉన్న ఆ కాయిన్ ఎక్కడా చెల్లలేదు. 

ఈ పోటీ ప్రపంచం లో మీ ఐడియాస్ ని వీలైనంత తొందరగా సేల్ చేసెయ్యండి. దేనికైనా విలువ ఉండేది సరైన సమయంలో దాన్ని వినియోగించినప్పుడే అంతే కాదు సరైన ఛానెల్లో వెళ్ళినప్పుడే.  మీరూ వినే ఉంటారు శంఖంలో పోస్తేనే తీర్థం అని, సరైన టైం లో మీ ఐడియాస్ ఎగ్జిక్యూట్ చేయకుండా పక్కన పెట్టేస్తే కథలోని ఆ చెల్లని నాణెం లాగా లేదంటే నా 132 పేజీల స్క్రిప్ట్ లాగా మీ ఐడియా కూడా ఎందుకూ పనికి రాకుండా పోతుంది. 

2, నవంబర్ 2022, బుధవారం

ది ఘోస్ట్ - ఓ.టి.టి రివ్యూ

రెండు మూడు నెలల క్రితం చంద్రుడి బ్యాక్ డ్రాప్ లో గన్ పట్టుకొని , క్లాక్ టవర్ బ్యాక్ డ్రాప్ లో తల్వార్ పట్టుకొని నిలుచునే రెండు పోస్టర్స్ వదలగానే చూసి 'పేరు గొప్ప' అనుకున్నా గానీ సినిమా మొదటి సీన్ చూశాకే అర్థమైంది 'ఊరు దిబ్బ' అని. 

మనం పాట్లాక్ అంటూ నాలుగు పిక్నిక్ మాట్స్ పార్క్ కి ఎత్తుకెళ్ళి, ఒక క్యాంపింగ్ సెట్ వేసుకొని మనం వండుకు తెచ్చిన చపాతీలు, కూరలు, అన్నం అంతా అక్కడ సర్దుతున్నట్లు ..  సినిమా ఓపెనింగ్ సీన్ లోనే టెర్రరిస్టులు ఒక ఎడారిలో నాలుగు  తివాచీలు పరిచి, పది టెంట్స్ వేసుకొని నల్ల చెక్క పెట్టెలలో తెచ్చుకున్న గన్స్, బాంబులు బయటికి తీస్తుంటారు. 

ఇంతలో ఎక్కడినుంచో బుల్లెట్ల వర్షం, కాసేపటికి ఇసుకలోంచి బయటకి దూకుతూ నాగ్ మాయ్య ఎంట్రీ, అటువైపు నుంచి బాలీవుడ్ కన్నా తెలుగు సినిమాల్లోనే ఎక్కువగా కనపడే బాలీవుడ్ హీరోయిన్ అనబడే ఆటలో అరటిపండు లాంటి ఒక హీరోయిన్. 

ఆ యాక్షన్ సీక్వెన్స్ తర్వాత ఇది ప్రెజెంట్ జెనెరేషన్ హీరో మూవీ అని కలరింగ్ ఇస్తూ ఒక లిప్ కిస్ ప్లస్ ఇప్పటికీ మన్మథుడు అని చూపించుకోవడానికి ఒక రొమాంటిక్ కలర్ ఫుల్ సాంగ్. 

ఆ తర్వాత మరో రెండు ఫైట్ సీక్వెన్సెస్ తర్వాత గార్ధభ స్వరంతో ఓండ్ర పెడుతూ హీరో గురించి బిల్డప్ ఇస్తూ  

ఇదిగిదిగో వచ్చాడొక ఘోస్ట్

చేస్తాడిక  మీ టైం వేస్ట్

మీరు అవుతారు చికెన్ రోస్ట్

ఇందాక అయిపోయిన రొమాంటిక్ సాంగ్ ఒక్కటే మీకు ఫీస్ట్

ఇక ఆ తర్వాతదంతా వరస్ట్

ఇది చూడ్డానికి వచ్చారంటేనే తెలుస్తోంది మీ టేస్ట్ 

మీకిదే నా అల్ ది బెస్ట్ 

అని ఒక బాక్గ్రౌండ్ సాంగ్. 

ఇన్నేళ్ళ బట్టీ చూస్తున్నా గానీ కొన్ని సీన్స్ లో నాగ్ మాయ్య ఎక్సప్రెషన్స్ ఏమిటో అర్థం కావు.  జగపతి బాబు, బాలయ్య బాబు లాగా ఈయన కూడా కూసింత వీకే కొన్ని రకాల ఎక్స్ప్రెషన్స్ మోహంలో పలికించాలంటే. 

ఇక ఆ హీరోయిన్ గత పన్నెండేళ్ళ నుంచి ఫిజిక్ మెయింటైన్ చేయడంలో పెట్టిన ఎఫర్ట్ నటన ఇంప్రూవ్ చేసుకోవడంలో పెట్టలేదేమో అనిపిస్తోంది. నాకు తెలిసి బాలకృష్ణ తనకి ఏ హీరోయిన్ దొరక్క ఈవిడని పట్టుకురాక పోయి ఉంటే ఈ పాటికి ఈవిడకి ఈ మాత్రం తెలుగు సినిమా ఛాన్స్ లు కూడా వచ్చేవి కావేమో. కంటెంట్ ఉంటే కటవుట్ ఎలా ఉన్నా పర్లేదు అని నిత్యామీనన్, విద్యా బాలన్, సాయి పల్లవి లాంటి హీరోయిన్స్ నిరూపించారు వారి నటనతో. ఈవిడది డిఫరెంట్ రూటు. కంటెంట్ ఎలా ఉన్నా కటవుట్ తో కొట్టుకొస్తోంది.    

మొదట్లో కాజల్  ని హీరోయిన్ గా అనుకొని ఆవిడ ప్రెగ్నెంట్ అని యాక్షన్ సన్నివేశాలు కష్టం అని తెలిసి లాస్ట్ మినిట్ లో ఈవిడని పట్టుకొచ్చారట ఏ రాయి అయితేనేం ఈ సినిమా లో నటించడానికి అని.   

ఇక అక్క గా ఎవరూ దొరకనట్లు ఆ గుల్ పనాగ్ ను ఎందుకు తెచ్చారో తెలీదు, మేకప్ ఎక్కువ యాక్టింగ్ తక్కువ.  యాక్షన్ రాదో, మర్చిపోయిందో లేక ఆ డైరెక్టర్ ఏం చెపుతున్నాడో అర్థం కాక ఏదో ఒక ఎక్స్ప్రెషన్ ఇచ్చిందో ఆవిడకే తెలియాలి. చైల్డ్ ఆర్టిస్ట్ గా మనకు సుపరిచయమైన అనీఖా సురేంద్రన్ పక్కన కూడా ఈవిడ యాక్టింగ్ సరితూగలేదంటే ఆ రోల్ కి న్యాయం చేయలేక పోయిందనే చెప్పుకోవాలి.  

గడ్డం పెంచితే ధనవంతులలా కనిపిస్తారనో లేక  అలా అయ్యాకే గడ్డం పెంచుతారో తెలీయట్లేదు.  ఈ మధ్య కాలం వచ్చే సినిమాల్లో రిచ్ పీపుల్ అంటే వారికి గడ్డం ఉండాల్సిందే అని ఫిక్స్ అయినట్లు ఉన్నారు. ప్రతీ ఒక్కడూ గడ్డం తోనే.  ఎవడు ఎవడో ఎవడి మొహం ఎవడిదో పోల్చుకునేప్పటికే సినిమా మొత్తం అయిపొయింది. తిరుపతిలో గుండు గీయించుకుని దానికి  గంధం పూసుకొని నుదుట నామాలు పెట్టుకుని  తిరిగినట్లు సినిమాలో అందరూ గెడ్డాలు పెంచుకొని కూలింగ్ గ్లాస్సెస్ పెట్టుకొని సూటు బూటు వేసుకొని తిరుగుతూ ఉంటారు.  

హీరో క్యారెక్టర్ ఆర్క్ అనేది పెరుగుతూ పోవాలి అనేది కమర్షియల్ సినిమా సూత్రం, దానికి రివర్స్ లో ఉంటుంది ఈ సినిమా. ఒక రకంగా చెప్పాలంటే ఇటీవల వచ్చిన కమల్ హాసన్ 'విక్రమ్' కథా ఇలాంటిదే, కానీ తాగుబోతుగా అతన్ని చూపించి తర్వాత తర్వాత అతని రేంజ్ పెంచుతూ పోయారు. కానీ ఇందులో ఆపోజిట్ లో మొదట్లో హీరోని హై పిచ్ లో చూపించి చివరికి నాగార్జున 'కిల్లర్' సినిమా ట్రాక్ లోకి తీసుకువచ్చారు. 

తమిళ్ హీరో విక్రమ్ కి నా సినిమాలో నువ్వు పది వేషాలు వెయ్యాలి అంటే కథ కూడా వినకుండా ఒప్పేసుకున్నట్లు నాగార్జున కి కూడా నువ్వు నా సినిమాలో ఒక ఇంటర్ పోల్ ఆఫీసర్ వి గన్నులతో కాల్చుకోవచ్చు అని అంటే ఒప్పుకుంటాడేమో (అధికారి, వైల్డ్ డాగ్ లాంటి సినిమాలని ఇదే మత్తులోనే ఒప్పుకొని ఉంటాడేమో). 

అసలు విలన్ ని చూస్తే వీడేం విలన్ రా బాబూ అనిపిస్తుంది. 'డీల్ తీసుకునే ముందు వాడి బాక్గ్రౌండ్ ఏమిటో తెలుసుకోమని నీకెన్ని సార్లు చెప్పాను అసలే తెలుగు సినిమా హీరోలందరికీ భాషా లాంటి ఫ్లాష్ బ్యాక్ ఉంటుందని తెలీదా' అని విలన్ బెల్ట్ లాంటిది తీసుకొని కొడుకుని కొడుతూ ఉంటే 'ఇది అట్టర్ ప్లాప్ అయిందని తెలిసి కూడా ఫ్రీ గా వస్తోందని ఓ టి టి లో చూస్తావా' అని ఆ దెబ్బలు నా వీపుకు తగిలినట్లు అనిపించింది. 

4, అక్టోబర్ 2022, మంగళవారం

గ్రాండ్ ఫాదర్ .. క్షమించాలి గాడ్ ఫాదర్

ఒరేయ్ అబ్బీ, పాత చొక్కా వేసుకొని వెళ్ళాలని తెలీదా చిరంజీవి కొత్త సినిమాకి వెళ్ళేప్పుడు అని తిట్టేవాళ్ళు అప్పట్లో. ఆ పాత రోజుల్ని తలచుకొని సంబరపడటమే. 

ఇప్పుడు చిరంజీవి సినిమా మొదటి రోజు చూడాలి అనే ఇంటరెస్ట్ కలగడం లేదు. గాడ్ ఫాదర్ రైట్స్ నెట్ ఫ్లిక్స్ కి  ఇచ్చారట , ఒక నాలుగైదు వారాల్లో చూడచ్చులే అని లైట్ తీసుకున్నా. 

చిరంజీవి కి స్టోరీ ఎంచుకునే సామర్థ్యము తగ్గిపోయింది అని నా ఉద్దేశ్యం. 150 సినిమాలు చేసిన ఆయనకి తెలియకపోవడం ఏమిటి అనుకోవచ్చు కానీ ఎవరికైనా డౌన్ ఫేజ్ అనేది ఉంటుంది కదా ఎప్పుడో అప్పుడు. అసలు సినిమాల్లోకి రీ ఎంట్రీ అన్నప్పుడు  "ఆటో జానీ" అనే టైటిల్ తో సినిమా అని వినిపించింది. ఈ మధ్య దేవర కొండ నెత్తిన మరో బండ పడేసిన పూరి డైరెక్షన్ లో ఆ సినిమా అన్నారు. అసలు ఆ టైటిల్ పూరి చెప్పినప్పుడే కథ కూడా వినకుండా రిజెక్ట్ చెయ్యాల్సింది. నా లాంటి ఓల్డ్ జెనెరేషన్ పీపుల్ తప్ప ఎవరైనా ఈ కాలంలో రిలేట్ అవగలుతారా ఆటో డ్రైవర్ క్యారెక్టర్ తో. ఇదేమైనా రౌడీ అల్లుడు కాలమా? అసలు చిరంజీవి ఏజ్ కి రేంజ్ కి ఆటో డ్రైవర్ అంటే మ్యాచ్ అవుతుందా? టాక్సీ డ్రైవర్ అంటే కాస్తో కూస్తో ఓకే. కాకపోతే నా అభిప్రాయం ఏమిటంటే ఆ 'ఆటో జానీ' స్టోరీ నే అటూ ఇటూ మార్చేసి బాలయ్య తో "పైసా వసూల్" అని తీసేశాడని నా ఫీలింగ్. 

సరే, అప్పటి విషయం వదిలేస్తే ఇప్పుడు మొహంలో గ్రాండ్ ఫాదర్ కళ కొట్టొచ్చినట్లు కనపడుతుంటే గాడ్ ఫాదర్ అని పెట్టుకుని వస్తే జనాలు చూస్తారా? లేదా? అనేది ఈ రోజుతో తేలిపోనుంది. 

వకీల్ సాబ్, భీమ్లా నాయక్, గాడ్ ఫాదర్ అని వరసబెట్టి పక్క రాష్టాల సరుకును మన మీదికి తోలుతున్న మెగా బ్రదర్స్ ఇకనైనా రూట్ మార్చకపోతే వారి ఫేట్ మార్చడానికి తెలుగు ప్రజలు రెడీ గా ఉన్నారన్నది కాదనలేని సత్యం. కాకపోతే ఒక్కటి మాత్రం నిజం, ఈ OTT కాలంలో కూడా అందరూ చూసేసిన పరభాషా సినిమాలను కూడా హిట్ సినిమాలుగా మలచగలుగుతున్నారంటే మాత్రం ఆ మార్పులు చేసిన వారిని అభినందించి తీరాల్సిందే. 

చెర్రీ, వర్రీ, వెర్రి, ధర్రీ, కర్రీ, బర్రి, గొర్రి అని ఇప్పటికే అరడజను వారసులను హీరోలను మోస్తున్నాము. చరణ్ ని చెర్రీ అన్నట్టు వరుణ్ ని వర్రీ అని సాయి ధరమ్ ని ధర్రీ  అని  పిలవచ్చేమో? రేప్పొద్దున జెర్రి అని ఇంకో హీరో రావచ్చు. మరి వారి ఫామిలీ నుంచి ఇంత మంది హీరోలు ఉండగా ఇప్పటికైనా ఈయన హీరోగా చెయ్యడం ఆపచ్చు కదా అనిపిస్తుంది. ఇంకా నయం ఈ సినిమాలో హీరోయిన్ అంటూ లేదు కాబట్టి డ్యూయెట్స్ ఉండకపోవచ్చు. కమల్ లాగా విక్రమ్ లాంటి సినిమా చేస్తే బాగుండేది ఏజ్ కి తగ్గట్టు. 

దెబ్బలు తిన్న సింహాన్ని కాకులు కూడా లోకువగా పొడుచుకుతింటాయంటారు కదా ఇప్పటికే సైరా, ఆచార్య లాంటి దెబ్బలు తిన్న మా బాస్ కి అలాంటి పరిస్థితి రానీయకుండా ఈ సినిమా హిట్టవ్వాలని కోరుకుంటున్నాను.  

26, ఆగస్టు 2022, శుక్రవారం

లైగర్ - పూరీ పగిలిందట

బద్రి, ఇడియట్, పోకిరి , బిజినెస్ మాన్, ఇస్మార్ట్ శంకర్ లాంటి పనికి మాలిన సినిమాలను రిజెక్ట్  చేయకపోవడం వల్ల వచ్చిన ఖర్మ ఇది. ఇడియట్, పోకిరి లాంటి సినిమాలు హిట్టయి ఉండచ్చు, ఎక్కువ మంది ఆడియెన్స్ కి నచ్చి ఉండచ్చు గానీ వాటికంటే ఇట్లు శ్రావణి సుబ్రహ్మణ్యం, అతడు (ఇది వేరే డైరెక్టర్  సినిమా, కాకపోతే పోకిరి ముందు వచ్చిన సినిమా) లాంటి సినిమాలు బాగుంటాయి.  

యేవో నాలుగు పంచ్ డైలాగ్స్, రెండు మెట్ట వేదాంతాలు, శృతి మించిన హీరోయిజం అతని సినిమాలో వాడేసి హిట్ అని అనిపించుకుంటాడు గానీ చాలా వరకు అతని సినిమాల్లో మొదటి నుంచి  విషయం తక్కువే. కొన్ని సినిమాల్లో అయితే హీరోయిన్ అనే పదార్థానికి చీము నెత్తురు, రోషం పౌరుషం, సిగ్గు షరం, మానం మర్యాద లాంటివేవీ ఉండవన్నట్లు కారక్టరైజెషన్ పెడతాడు. 

ఫేస్బుక్, వాట్స్ అప్ లలో వచ్చే కోట్స్ కి ఆయన తన స్టైల్ కోటింగ్ ఇచ్చి ఆ మధ్య musings మొదలు పెట్టాడు. శంఖం లో పోస్తేనే తీర్థం అన్నట్లు సెలబ్రిటీ నోటి నుంచి వచ్చాయి కాబట్టి అవి బాగా క్లిక్ అయినట్లున్నాయి. అది చూసి కొందరు వాతలు కూడా పెట్టుకున్నట్లు ఉన్నారు. 

పూరి గారికి టాలెంట్ ఉంది. అది కాదనే దమ్ము, ధైర్యం ఎవరికీ లేదు ఎందుకంటే ఆయన సినిమాలు చెప్పాయి  ఆయన టాలెంట్ ఏంటో. సినిమా జనాలు ఆహా ఓహో అని ఆయన్ను తెగ పొగిడేస్తూ ఉంటారు మీరు అది సర్ ఇది సర్ అని, వాళ్ళందరినీ కాస్త దూరం పెట్టి జాగ్రత్త తో పొలోమని పాన్ ఇండియన్ సినిమా అని ఇంకొకరి లాగా తాను కూడా పాన్ ఇండియా డైరెక్టర్ కావాలని వాతలు పెట్టుకోవడం మానేస్తే మంచిది.  

ఈ లైగర్ సినిమా ప్లాప్ వల్ల అనసూయతో పాటు మెగాస్టార్ ఫాన్స్ సంతోషంతో చంకలు గుద్దుకొని "కర్మ సిద్ధాంతాన్ని" ప్రచారం చేస్తున్నారు. అనసూయ కి విజయ్ దేవరకొండ కి మధ్య అప్పుడెప్పుడో అర్జున్ రెడ్డి సినిమా టైములో జరిగిన గొడవలు కారణం అయితే, అప్పట్లో "ఆటో జానీ" సినిమా సెకండ్ పార్ట్ నచ్చలేదని చిరంజీవి ఆ సినిమా చేయకుండా "బ్రూస్ లీ" అనే కళాఖండం లో గెస్ట్ రోల్ చేస్తే అది తుస్సుమన్నప్పుడు చార్మీ సంతోషపడుతూ ట్వీట్స్ చేయడం మరొక కారణం .   

ఒకప్పుడు ఫలానా హోటల్ లో పూరి బాగుంటుంది అని ఎగబడి తింటున్న జనాన్ని చూసి, ఎలాగూ ఇక వస్తూనే ఉంటారులే అని ఆ హోటల్ ఓనర్ పదేళ్ళ క్రితమే పెద్ద మొత్తంలో పిండికలిపి పెట్టుకుని ఇప్పటికీ  అదే పిండితోనే పూరీలు చేసి వడ్డిస్తున్నాడు.ఈ మధ్య వాటికి పాచి కంపు మొదలయ్యేసరికి కస్టమర్లు ఆ సద్ది పూరీలు తినలేక కొద్ది కొద్దిగా రావడం తగ్గించేశారు. 

కాబట్టి కాస్తో కూస్తో పూరి అభిమానిగా నా ఆశ ఏమిటంటే తన హోటల్ లో జనాలు పూర్తిగా  కనుమరుగయ్యే లోపు ఆ పాత పిండిని పారేసి కొత్త పిండిని కలుపుకుంటే మంచిది లేదంటే ఇక తన గురువు గారి లాగా కొట్టు మూసేసి షెడ్డు దారి పట్టడమే.  

25, ఆగస్టు 2022, గురువారం

సినిమాలో కథ ఎవడికి కావాలి?

మన సినిమాలో హీరో కి సొట్ట కాలు, పేరు "బండోడు". 

టైటిల్ అదే పెడదామా? బాగా మాసీ గా ఉంది. 

ఆగండి సర్, నేను టైటిల్ ఫిక్స్ చేసుకున్నా ఆల్రెడీ. 

వెరీ గుడ్, కంటిన్యూ. 

ఒక గుడి దగ్గర చెప్పులు పెట్టుకునే స్టాల్లో పని చేస్తుంటాడు.  హీరోయిన్ కి గుడ్డి, అదే గుడి దగ్గర పూల వ్యాపారం చేస్తుంటుంది. 

ఏంటీ, తమిళ్ సినిమా తీస్తున్నామా?

కాదు తెలుగే, కాస్త మాస్ కారక్టరైజెషన్. 

ఇలా సినిమా తీస్తే తర్వాత అదే గుడి దగ్గర నేను అడుక్కుతినాలి. అయినా కుంటి, గుడ్డి ఇవన్నీ అవసరమా. 

అదే ట్రెండ్ సర్, ఏదో ఒక లోపం పెడితే ఆడియన్స్ కి కిక్కివ్వచ్చు. ఈ మధ్య కొన్ని సినిమాలు చూశాం కదా. 

సరే మిగతా కథ చెప్పు 

అవును సర్,  'చెప్పే' మన కథా వస్తువు. 

అర్థం కాలేదు. 

చెప్తాను వినండి. ఒక పెద్ద లీడర్ అయిన "అమిత్ నరేంద్ర జోడి" ఢిల్లీ నుంచి  ఏదో ఒక పని మీద  హైదరాబాద్ వచ్చి ఈ గుడికి దర్శనానికి వస్తాడు. 

అతను గుడి నుండి బయటకి రాగానే  మన బండోడు వెళ్ళి తన చేతులతోనే చెప్పులు తొడుగుతాడు. దాంతో అతను ఇంప్రెస్ అవుతాడు. 

బాగుంది, తర్వాత.. 

మన "జోడి" కార్ ఎక్కేప్పుడు ఆ కార్ లోపల నుంచి మెరుపులా ఒకడు దూకి కోడి కత్తితో పొడవబోతుంటే మన బండోడు ఉరుములా వచ్చి "జోడి" ని కాపాడతాడు. దాంతో ఆ "జోడి" మన బండోడ్ని మెచ్చి తనతో పాటే ఢిల్లీ  తీసుకుపోతాడు. 

ఇంటరెస్టింగ్ 

ఇక అక్కడి నుంచి మన హీరో ఎలా ఎదుగుతాడు అనేది మనకిష్టం వచ్చినట్లు ఏ రోజు ఎలా తడితే అలా తీసుకోవచ్చు. 

మరి గుడి దగ్గరి హీరోయిన్ 

అక్కడితో ఆ హీరోయిన్ ని వదిలేద్దాం సర్, ఢిల్లీ లో క్లబ్ లో డాన్స్ చేస్తూ మరో హీరోయిన్ ని దింపుదాం. హీరోయిన్స్ మన ఇష్టం సర్, ముగ్గురు నలుగురు హీరోయిన్స్ కూడా పెట్టుకోవచ్చు. కానీ హీరో ఒక్కడే ఉండాలి. 

అంతేనంటావా? 

కావాలంటే ఆ హీరోయిన్ ని కూడా ఢిల్లీ రప్పించి ఇద్దరు హీరోయిన్ లని పెట్టి ఫారిన్ లో 

"అటు మాస్, ఇటు క్లాస్ .. మధ్యలో నేను ఊర మాస్

ఇటు పచ్చడి అటు పిజ్జా .. నంజుకోరా తనివి తీరా

ఇటు ఐస్క్రీమ్ అటు పుల్లైసు .. చప్పరించేయ్ చెలికాడా

అటు స్లమ్ము ఇటు స్లిమ్ము ఇక చూపిస్తా నా దమ్ము"

అని ఒక మంచి ఊపున్న సాంగ్ క్లైమాక్స్ ముందు ప్లేస్ చేద్దాం.  

ఇప్పుడు డబల్ ఓకే. ఇంకా కావాలంటే ఆ "జోడి" ఒకప్పుడు అదే గుడి దగ్గర టెంకాయలు అమ్మేవాడని అక్కడే హీరో తల్లిని తండ్రిని చంపి వాళ్ళ "టెంకాయల" కొట్టును కొట్టేశాడని ఒక రివెంజ్ కథ కూడా అల్లుకోవచ్చు. 

గ్రేట్ సర్. టైటిల్ 'చప్పల్' అని పెడదాం. 

హిందీ పేరులా ఉంది??

అవును సర్. దేశమంతా అదే టైటిల్ తో ప్రచారం చేసుకొని పాన్ ఇండియా మూవీ అందాం.  ఒక నార్త్ ఇండియన్ పిల్లని హీరోయిన్ గా పెడదాం ఎలాగూ. ఆ లీడర్ క్యారక్టర్ ని ఒక నార్త్ ఇండియన్ ఆర్టిస్ట్ తో చేయించి, అతని పక్క ఇద్దరు ముగ్గురు ఆర్టిస్టులని కన్నడ, తమిళ్, మలయాళం నుంచి తీసుకొచ్చి అవసరం ఉన్నా లేకున్నాఇరికిద్దాం పాన్ ఇండియా మూవీ అయిపోతుంది. 

ఇంప్రెస్డ్.  రేపే ప్రెస్ మీట్ పెట్టి మన సినిమా 'చప్పల్' అనౌన్స్ చేద్దాం. 

తోక ముక్క: ఈ విధంగా డబ్బు మూటల్తో వచ్చిన నిర్మాతకి ఏదో ఒక కథ చెప్పేసి కొద్ది మంది దర్శకులు కథ లేకుండా కాకరకాయ మాత్రమే పెట్టి సినిమా తీస్తున్నట్లు ఉన్నారు. నాకూ అలాంటి నిర్మాత దొరికితే బాగుండు, బోలెడు కథలు రాయగలను నేను కూడా డబ్బులిస్తే మరింత శ్రద్ధగా.                                         


22, ఆగస్టు 2022, సోమవారం

చిరంజీవన్నయ్య

వెండి తెరపై నటుడిగా నా కంటే ముందు పుట్టడం వల్ల అన్నయ్య అయ్యాడు. నా వయసు పెరుగుతున్నట్లే అన్నయ్య ఇమేజ్ పెరుగుతూ వచ్చింది. నా ఆటల్లో పాటల్లో అన్నయ్య ఒక భాగం అయిపోయాడు, అందుకేనేమో ఆ బాండింగ్ ఇప్పటికీ ఇలా నిలిచిపోయింది. 

ఒకపక్క ఎన్టీఆర్-ఏయన్నార్ లాంటి మహామహులు, మరో పక్క కృష్ణ -శోభన్-కృష్ణంరాజు లాంటి సీనియర్లు , తన తర్వాత వచ్చిన బాలకృష్ణ-నాగార్జున-వెంకటేష్ లాంటి జూనియర్స్ తో పోటీ పడి వారందరి జనరేషన్ మధ్య ఒక వారధిగా ఉండగలిగారంటే యెంత కష్టపడి ఉంటారు. ఇక పడిన కష్టం చాలనుకున్నారో ఏమో ఆ కష్టపడేతత్వాన్ని రాజకీయాల్లో కంటిన్యూ చేయలేక మొదట్లోనే కాడి వదిలేసి వెళ్ళడం మాత్రం ఒక మాయని మచ్చ. 

ఒక చిరంజీవి అభిమాని గా నేను చాలా ఎక్కువ ఆశిస్తాను, అదే నాకు వచ్చిన ప్రాబ్లెమ్. నా వరకైతే టాలెంట్ విషయం లో "కమల్ హాసన్ + రజని కాంత్ = చిరంజీవి" . అబ్బ ఛా! వీడు మరీ ఎక్కువ  అతి చేస్తున్నాడు అని మీరు అనుకోవచ్చు గానీ, నటన పరంగా కమల్ కు, స్టైల్స్ విషయం లో రజనీ కి చిరంజీవి సరితూగగలడు అని నా గట్టి నమ్మకం. 

అప్పట్లో మణిరత్నం, శంకర్ లాంటి డైరెక్టర్స్, వాళ్ళకు తోడు రెహమాన్ లాంటి యంగ్ మ్యూజిక్ డైరెక్టర్ మన తెలుగులో తగలక కాస్త రేసులో వెనుకబడ్డాడు. పైగా మన తెలుగు వాళ్ళు తమిళ్ సినిమా వాళ్ళని ఆదరించినంతగా అక్కడివారు మన వాళ్ళని ఆదరించరు అని నా అభిప్రాయం. 

కమల్ హాసన్ కి ఉన్న నేషనల్ వైడ్ క్రేజ్ ని మణిరత్నం నాయకుడు, శంకర్ భారతీయుడు మరింత పెంచాయి. అలాగే రజనీ క్రేజ్ ని మణిరత్నం 'దళపతి', శంకర్ 'శివాజీ', 'రోబో సీరీస్' సినిమాలు పెంచాయి. 'Bigger Than Bachhan' అనే క్రేజ్ ఉన్న రోజుల్లోనే చిరంజీవికి  ఇప్పటి రాజమౌళి లాంటి వాడు దొరికిఉంటే ఆ క్రేజ్ రెట్టింపు అయ్యేది. 

కథల ఎంపికలో, తనకు తగిన సినిమాలు చేయడంలో చిరంజీవి పొరపాట్లు కూడా ఉండి ఉండచ్చు.  దానికి తోడు కాస్త ధైర్యం చేసి ముందడుగు వేసినప్పుడల్లా 'రుద్రవీణ', 'స్వయం కృషి', 'ఆపద్బాంధవుడు' , 'డాడీ' లాంటి సినిమాలు దెబ్బతిన్నాయి. 'డాడీ' సినిమాలో కూతురిని కాపాడుకోలేక జైలులో నిస్సహాయుడుగా కూర్చోవడం నచ్చక కడప లో ఒక థియేటర్ లో ఫాన్స్ ఆ థియేటర్ ని పీకి పందిరి వేశారు. అప్పుడెప్పుడో ఖైదీ లోనే పోలీసులని ఉతికి ఆరేసిన మా హీరో ఇప్పుడు లాకప్ లో ఏడవడం ఏమిటి అని. సరే అదంతా ఆయన స్వయంకృతాపరాధమే. 'రోగి పాలు కావాలన్నాడు, డాక్టర్ అవే తాగు బాబూ' అన్నాడు అన్నట్లు కెరీర్ మొత్తం లో అన్నీ అలాంటి సినిమాలే చేసాడు ఫ్యాన్స్ కోసం అంటూ.  

కమల్ హాసన్ పాత సినిమాలు ఇప్పటికీ ఎవరు గ్రీన్ అనిపిస్తాయి. అడ్డంగా ఇరవై ముప్పై మందిని చితక్కొట్టే మాస్ సన్నివేశాలు ఆయన సినిమాలో అరుదు. మొదట్లో ఉట్టి మాస్ సినిమాలు, కమర్షియల్ సినిమాలు చేసిన సల్మాన్ ఖాన్, షారుక్ ఖాన్ కెరీర్ దెబ్బతింది. కానీ మొదట్లో కుదురుకోవడానికి కాస్త టైం పట్టినా రొడ్డకొట్టుడు సినిమాలు చేయని అమీర్ ఖాన్ కెరీర్ మంచి బూమ్ లో ఉంది ఈ మధ్య వచ్చిన రెండు ప్లాప్స్ తప్ప. 

అన్నయ్య కెరీర్ వయసు కంటే తక్కువ వయసున్న నేను ఆయనకు చెప్పగలిగే స్థాయిలో  లేను కానీ ఒక అభిమానిగా 'అమ్మడు లెట్స్ డూ కుమ్ముడు' లాంటివి పక్కన బెట్టి తన వయసుకు తగ్గ సినిమాలు చేసి అలరిస్తారని కోరుకుంటున్నాను. 

Belated happy birthday wishes చిరంజీవి అన్నయ్య. 

చిన్న జ్ఞాపకం: ఖైదీ సినిమా మొదట వేరే హీరో చేయాల్సి ఉండేది అనే మాట నిజం. కానీ అది మా దగ్గరికి వచ్చేప్పటికి - "రగులుతోంది మొగలిపొద" పాటలో బెండు అప్పారావు (క్షమించాలి ఆయన ఫాన్స్ నన్ను. యెంత చిరంజీవి ఫ్యాన్ అయినా నాకెందుకో ఆయనంటే ఇప్పటికీ బాగా అభిమానం, అప్పట్లో ఆయనను కొందరు అలా యెగతాళి చేసేవారు కానీ ఇలాంటి సిల్లీ విషయాలను అస్సలు పట్టించుకోని సాహసి ఆయన) డాన్స్ అస్సలు చేయలేకపోయాడని అందుకే ఆయన్ని తీసేసి పల్లెటూరి రైతు పాత్రని స్టూడెంట్ పాత్రగా మార్చి చిరంజీవి ని పెట్టి తీశారనే విధంగా మారిపోయింది రాజు గారి నోట్లో తాటి చెట్టు  మొలిచిందట అనే సామెత లాగా.  

మీ సొట్ట కాళ్ళోడు యెంత గంతులేసినా మా హీరో లాగా డైలాగ్స్ చెప్పలేడు అనేవాళ్ళు అవతలి హీరో ఫాన్స్.  

అవన్నీ ఇప్పుడు తలచుకుంటే భలే నవ్వొస్తుంది. 

16, ఆగస్టు 2022, మంగళవారం

ఆస్ట్రేలియా ఏమీ స్వర్గం కాదు - 6

ఇది ఆస్ట్రేలియా ఏమీ స్వర్గం కాదు - 5  కి కొనసాగింపు  

ఆఫీస్ కి వెళ్ళే హడావిడిలో ఉంటే డోర్ ఎవరో కొడుతున్నట్లు శబ్దం వచ్చింది. 

ఓపెన్ చేసి చూస్తే ఇంగ్లీష్ బామ్మ, ఆవిడ తలుపు తట్టిందంటే ఎవరికైనా చెమటలు పట్టాల్సిందే. ఎప్పుడూ ఏదో ఒక రగడ చేస్తుంది వచ్చిందంటే. 

మీ బాల్కనీ లో బట్టలు ఆరేశారు అంది 

ఇది కొత్తగా వచ్చిన మా ముఖేష్ పనే అని అర్థమైంది మాకు. 

ఈ సారికి మమ్మల్ని ఒగ్గెయ్యవే బామ్మ అని కాళ్ళు చేతులు పట్టుకొని బతిమలాడితే "కొత్తవాడు తెలియదు అన్నారు కాబట్టి వదిలేస్తున్నా" అంది 

బాబూ ముఖేషూ,  బాల్కనీ లో బట్టలు ఆరేయద్దు. 250 డాలర్ల దాకా ఫైన్ వేస్తారు అన్నాను. 

ఎందుకలా?

బాల్కనీ లో బట్టలు ఆరేస్తే , బిల్డింగ్ బ్యూటీ దెబ్బతింటుందని ఇక్కడి వారి బోడి ఫీలింగ్. 

అవును మరి ఇదో ఓపెరా హౌస్ లేదంటే తాజ్ మహల్ మరి, కనీసం మా ఊరిలో పాడు బడ్డ రాయల్ టాకీస్ లా కూడా లేదు అన్నాడు. 

అవుననుకో, కానీ ఇక్కడ రూల్స్ అలా ఉన్నాయి మరి. మన బాల్కనీ అటు మెయిన్రోడ్  వైపుకు వస్తుంది కాబట్టి ఆరేయకూడదు. 

అయినా నేను ఆరేసింది బాల్కనీ గోడలమీద కాదు కదా, బాల్కనీలో ఉన్న మన చైర్స్ మీదే కదా! 

మన బాల్కనీ ఎవరికీ కనపడకుండా రోడ్డుకు వెనుక వైపు ఉంటే ఆరేసుకోవచ్చు. లేదంటే అది కూడా తప్పే అన్నాను. 


                                                    ********************


బుధవారం సాయంత్రం రూమ్ కి వచ్చేసరికి కిచెన్ లో కాస్త బ్యాడ్ స్మెల్ వస్తున్నట్లు అనిపించింది. ఏమిట్రా అని అన్ని గిన్నెలు వెదికితే విరిగిపోయిన పాలు కనిపించాయి ఒక గిన్నెలో. 

"నేనే పాలల్లో తోడు వేశా పెరుగు కోసం" అన్నాడు మా ముఖేష్. 

ఈ చలికి అంత ఈజీగా పెరుగు తోడుకోదు, మైక్రోవోవెన్ లో ఉంచు లేదంటే రెండు రోజులైనా పేరుకోక ఇలా బాడ్ స్మెల్ వస్తుంది. మన రూమ్ పక్కన ఉండే షాప్ లో కొను ఈ ఇబ్బందులు పడకుండా అన్నాను. 

వాడి దగ్గర పెరుగు లేదు అన్నాడు. 

వాడి దగ్గర ఉంటుందే, నేను ఎప్పుడూ అక్కడే తెచ్చుకుంటా. 

అదేంటి? మరి వాడు నేను అడిగితే తెలీదు, లేదు అన్నాడే?

నువ్వేం అడిగావు?

కర్డ్ అని అడిగా. 

ఈ సారి వెళ్ళినప్పుడు యోగర్ట్ అని అడుగు ఇస్తారు, వీళ్ళు కర్డ్ అనే మాట వాడరు అన్నాను. 


                                                       ******************                             


మరుసటి రోజు ఇవాళ చికెన్  చేసుకుందాం అని చికెన్ షాప్ కి పట్టుకెళ్ళాడు. 

కిలో చికెన్ అడిగితే షాప్ వాడు ఫ్రిడ్జ్ లోంచి తీసి ఇచ్చాడు. 

మనూర్లో అయితే చక్కగా అప్పటికప్పుడు మన కళ్ళ ముందు కోసి ఇస్తే గానీ తీసుకోము అలాంటిది వీడేంటి నిన్నో మొన్నో ఫ్రిడ్జ్ లో పెట్టినది తీసి ఇస్తున్నాడు. 

నిన్నో మొన్నో కాదు ప్రతీ శుక్రవారం స్టాక్ వస్తుంది 

అంటే ఈ రోజు గురువారం, అంటే 6 వ రోజు అన్నమాట 

అవును స్టాక్ వచ్చి 6 రోజులు అంతే, కోసిన తర్వాత రెండు రోజులు warehouse లో ఉంచిన తర్వాతే ఇలా షాప్ కి పంపిస్తారు రూల్ ప్రకారం. 

ఇవెక్కడి రూల్స్ రా బాబూ, మనూర్లో ఉదయం కోసిన చికెన్ మధ్యాహ్నం ఇస్తేనే ఒప్పుకోము. 

అవును ఇక్కడ అంతే. ఈ సారి శుక్రవారం ఈవెనింగ్ లేదంటే ఆదివారం వచ్చి కొను అన్నాను. 

సర్లే చికెన్ అప్పుడే కొంటా, అయినా ఈ చికెన్ తినడానికా ఆస్ట్రేలియా వచ్చింది, ఇవి కాదురా అబ్బాయ్ ..  ఇక్కడ కంగారు, క్రొకోడైల్ మాంసం దొరుకుతాయట? ఎక్కడ అన్నాడు. 

కంగారు అంటే మనకు ఇంగ్లీష్ తెలియదనుకుంటారు, దాన్ని కేంగరు అని ఒక రకంగా పలకాలి. అయినా వాటిని కూడా వదిలిపెట్టవా? 

తినేప్పుడు కోడి అయితేనేం క్రొకోడైల్ అయితేనేం పద ఆ షాప్ చూపించు అన్నాడు. 

అక్కడ అరకిలో క్రొకోడైల్ మాంసం కొని రూమ్ కి వెళ్ళాం కానీ ఆ రోజు రాత్రి జరగబోయే క్రొకోడైల్ ఫెస్టివల్ (ఉపద్రవం) ఊహించలేకపోయాం. 

11, ఆగస్టు 2022, గురువారం

ఇదో అంతులేని మరో సినిమా గాథ

                                                                చాప్టర్ 1

అనగనగా కర్నూల్ అనే ఊరిలో "పీకలు కోసి బదులుగా చెట్లు నాటే" ఒక నాటు విలన్ ఉంటాడు. అదే ఊరికి డాక్టర్ గా మన హీరో వస్తాడు. వచ్చీ రాగానే విజిల్ వేసే అమ్మాయితో ప్రేమలో పడతాడు.

"డాక్టరూ డాక్టరూ నువ్వేలే నా సారూ, తగ్గించు మా అమ్మకి షుగరు" అంటూ హీరోయిన్ ఒక పాట వేసుకుంటుంది. 

అటు విలన్ చేసే ఆగడాలు, ఇటు విజిల్ వేసే అమ్మాయి విన్యాసాలతో రెండు మూడు సీన్స్ ముగిశాక విలన్ మీద పోలీస్ స్టేషన్ లో కంప్లైంట్ చేస్తాడు మన హీరో. ఆ  కంప్లైంట్ వెనక్కి తీసుకోవాల్సి వస్తుంది విలన్ బెదిరింపుల వలన. అలా రెండు సార్లు హీరో విలన్ కి ఎదురొచ్చాక కొండారెడ్డి బురుజు దగ్గర హీరోని చితక్కొట్టి అక్కడే కొక్కానికి వేలాడదీసి వెళ్ళిపోతాడు విలన్. 


                                                                    చాప్టర్ 2

డాక్టర్ తో పని అయ్యేలా లేదు అని ఈ సారి మళ్ళీ కర్నూల్ వస్తాడు రెండేళ్ళ తర్వాత పోలీస్ అయి. 

"భూమికి బెత్తెడు లేవు నువ్వేం పోలీసువి రా"  అని విలన్ 

"భూమికి బెత్తెడు కాదు బారెడు నేను" అని హీరో 

నాలుగైదు కౌంటర్ డైలాగ్స్ అనేసుకొని రెండు మూడు ఛాలెంజ్ విసురుకోవడాలు అయిన తర్వాత  మళ్ళీ ఆ కొండారెడ్డి బురుజు దగ్గర కొట్టుకున్నాక  విలన్ ని అరెస్ట్ చేసి బొక్కలో వేస్తాడు హీరో. 

"పోలీసు పోలీసు నువ్వేలే నా బాసు, కొట్టేయ్ మా నాన్న మీది కేసు" అని హీరోయిన్ వచ్చి ఒక పాట వేసుకుంటుంది. 

అరెస్ట్ చేసిన విలన్ ని కోర్టులో ప్రవేశపెడతారు. అక్కడ విలన్ తరపు లాయర్ ఒకడు గొప్పగా వాదించేసి విలన్ మీద కేసులన్నీ కొట్టేయించి బయటకి తీసుకొస్తాడు. 

ఈ చెట్లు నాటే కార్యక్రమానికి పుల్ స్టాప్ పెట్టించాలనుకొన్న హీరో కామా మాత్రమే పెట్టించగలుగుతాడు.  


                                                                     చాప్టర్ 3

పోలీస్ తో పని పయ్యేలా లేదు అని రెండు మూడేళ్ళ తర్వాత నల్లకోటు వేసుకొని లాయర్ గా వస్తాడు. 

డ్రైవర్, మనం కరెక్ట్ రూట్ లోనే కర్నూల్ వెళ్తున్నామా?

అవును సర్.  

మరి ఏదో అడవి లాగా ఉందే దారంతా!

అవును సర్, ఈ కర్నూల్ అరణ్యం అయిపోయింది ఆ విలన్ నాటిన మొక్కలు చెట్లై, చెట్లు మానులై, మానులు వృక్షాలై, వృక్షాలు వనాలై, వనాలు అరణ్యం గా మారిపోయింది సర్. ఇలానే అయితే ఒకప్పుడు ఇక్కడ కర్నూల్ నగరం ఉండేది అని మన పిల్లలు పుస్తకాల్లో చదువుకోవసి వస్తుంది సర్ అని గుక్క తిప్పుకోకుండా గుప్పెడు డైలాగ్స్ చెప్పేస్తాడు డ్రైవర్. 

అది ఆపడానికి వచ్చింది నేను, కార్ ఆపు కోర్ట్ వచ్చేసింది అంటాడు హీరో. 

"లాయరూ లాయరూ చూపించు నీ జోరూ, అయిపోవాలి అందరూ బేజారూ" అని హీరోయిన్ వచ్చి ఒక పాట వేసుకుంటుంది. 

కేసును తిరగతోడి మళ్ళీ విలన్ ని కోర్ట్ బోనులో నిలబెడతాడు. 

అద్భుతంగా వాదించినా జడ్జి ఇచ్చిన తప్పుడు తీర్పుతో మళ్ళీ కేసు కొట్టివేస్తారు. 


                                                                చాప్టర్ 4

ఈ సారి జడ్జి గా వచ్చి విలన్ కి ఉరిశిక్ష పడేలా చేస్తాడు. 

ఉరిశిక్ష వేసి వచ్చి బయటకి వస్తుంటే ఎదురుగా ఉండే కిరాణాకొట్టులో ఉండే ఒక వ్యక్తిని చూసి ఆశ్చర్యపోయి "మీరు? ఇక్కడ?" అని అడిగితే 

అవును, నేనే ఆ తప్పుడు తీర్పు ఇచ్చిన జడ్జి ని, దానికి పశ్చ్యాతాపంగా ఆ జడ్జి జాబ్ వదిలేసి ఇదిగో ఇలా  "పక్కా కమర్షియల్" అనే కిరాణా కొట్టు నడుపుకుంటున్నాను అంటాడు. 

హీరోయిన్  వస్తుంది గానీ జడ్జి పాత్రధారి పాట పాడితే బాగోదని కొంచెం డీసెన్సీ మెయింటైన్ చెయ్యడం వల్ల ఇక్కడ సాంగ్ పెట్టడం లేదు. 

"కర్నూల్ నగరాన్ని అమెజాన్ అడవిలా పెంచి పర్యావరణాన్ని కాపాడినందుకు" రాష్ట్రపతి మెచ్చుకొని ఇచ్చిన క్షమాభిక్ష వల్ల ఉరి శిక్ష నుంచి తప్పించుకుంటాడు విలన్. 

                                                                    

                                                                చాప్టర్ 5

మీరు మరీ స్మార్ట్ ఈ పాటికే ఊహించివుంటారు హీరో ఎంట్రీ ఈ సారి రాష్ట్రపతి గా అని. 

సినిమా చివర్లో డీసెన్సీ లాంటివి వదిలేయాలి, ఎందుకంటే మాస్ కి ఇక్కడో మాంచి బీట్ ఉన్న సాంగ్ పెట్టి తీరాలి ఎప్పటి నుంచో వస్తున్న తెలుగు సినిమా ఆచారం ప్రకారం కాబట్టి "రాష్ట్రపతి రాష్ట్రపతి  నువ్వే నాకు పతి, చేసుకో నన్ను నీ సతి" అని పెట్టిన పాట సెన్సార్ నుంచి బయటకు వస్తే చూడచ్చు. 

క్షమాభిక్ష ని కొట్టివేసి తిరిగి విలన్ కి ఉరి శిక్ష విధిస్తాడు మన హీరో. 


                                                                    చాప్టర్ 6

ఈ సారి మన హీరో అమెరికా ప్రెసిడెంట్ అవుదామని అమెరికా వెళ్ళి అక్కడ రోడ్డుపై నడుస్తూ ఉండే సీన్ తో "వారియర్-2" అని  సినిమా ముగుస్తుంది. 

1, ఆగస్టు 2022, సోమవారం

అంతా ఆయనే చేశారు

సాధారణంగా నేను హిందీ సినిమాలు ఇష్టపడను. ఒక ఇరవైయ్య్యేళ్ళ క్రితం కాస్తో కూస్తో చూడాలని అనిపించేవి. తర్వాత అవీ చూడబుద్ధి కాలేదు. అప్పుడప్పుడూ మరీ బాగున్నాయి అన్న సినిమాలు తప్పితే హిందీ సినిమాలు చూడటం దాదాపు మానేశాను. 

మొన్న ఆదివారం రోజు, నాకు ఈ పంచాంగాలు, జాతకాలు తెలీదు కాబట్టి ఏ శుక్రుడో నన్ను వక్ర దృష్టితో చూస్తుండబట్టో లేక ఆ దిక్కుమాలిన ఆదివారం అమావాస్య రోజో ఏమో తెలీదు కానీ ఒక హిందీ సినిమా అదీ హారర్ చూద్దామని అనుకుంటే ఆ netflix భాండాగారంలో ఓ సినిమా కనపడింది. రేటింగ్స్ లాంటివి చూడకుండా గుడ్డెద్దు చేలో పడ్డట్టు ఏ సినిమా దొరికితే అది చూసే నేను ఆ సినిమా చూడటం మొదలు పెట్టాను.  

కాసేపటికే ఆ సినిమా హారర్ కాదు జుగుప్సకి పరాకాష్ట అనిపించింది, నా లైఫ్ లో ఒక్క సినిమా కూడా పూర్తిగా చూడకుండా మధ్యలో మధ్యలో వదిలేసింది  లేదు అలాంటిది పాతిక భాగం కూడా చూళ్ళేకపోతున్నానే అని 1.5 స్పీడ్ లో పెట్టి ముగిద్దాం అని  అనుకున్నా కానీ అర్ధ భాగం చూసేప్పటికీ ఆ జుగుప్స ని తట్టుకోలేక ఆపేశాను. ఆ సినిమా పేరు "ఘోస్ట్ స్టోరీస్" , కరణ్ జోహార్, జోయా అక్తర్, అనురాగ్ కశ్యప్, దిబాకర్ బెనర్జీ అనబడే నలుగురు ఉద్దండుల చేత తీయబడిన నాలుగు స్టోరీల సమాహారమే ఆ సినిమా. రెండు స్టోరీస్ చూసేప్పటికే నాకు కంపరం పుట్టుకొచ్చి ఆపేశాను, ఇక ఆ నాలుగు స్టోరీస్ చూసిన వారెవరో గానీ వారికి గొప్ప గొప్ప అవార్డ్స్ ఇవ్వచ్చు. 

పోయిన ఏడాది వరకు ఈ హిందీ సినిమాలు నాకు నచ్చడం లేదంటే నేను outdated అయ్యానేమో అని అనిపించింది కానీ ఇప్పుడు బాలీవుడ్ సినిమా, బాలీవుడ్  ప్రేక్షకులకే ఎక్కడం లేదంటే హమ్మయ్య! కాస్తో కూస్తో ఇంకా నేను outdated కాలేదేమో సినిమాలని ఆస్వాదించగలిగే టేస్ట్ మన దగ్గర మిగిలే  ఉంది అనుకున్నా (మన అంటే నేనే, మా ఎన్టీవోడి పద ప్రయోగం అంతే, నన్ను నేనే గౌరవంగా పిలుచుకొని, గర్వంతో భుజం తట్టుకొని అభినందించుకుంటున్నాను)

పదేళ్ళ క్రితం బాలీవుడ్ సినిమా హిట్టవ్వాలంటే షారుఖ్ అయినా ఉండాలి లేదా సెక్స్ అయినా ఉండాలి అనేవారు, తర్వాత షారుఖ్ కూడా ఆ లిస్ట్ లోంచి వెళ్ళిపోయి సెక్స్ ఒక్కటే మిగిలింది. యాభై శాతం పైన సినిమాల్లో కథలు అక్రమ సంబంధాల చుట్టూ లేదంటే సహ జీవనం  అనబడే విచ్చలవిడి జీవితాల చుట్టే తిరుగుతుంటాయి. మా తెలుగు సినిమాలే మేలబ్బా, ఇంకా అంత ఎత్తుకు ఎదగనందుకు. ఇంకా అవే రొటీన్ సినిమాలైనా ఏ చెట్టు లేని చోట ఆముదము చెట్టు లాగా వెలిగిపోతున్నాయి. 

చాలా మంది బాలీవుడ్ హీరోయిన్స్ కాస్త డిమాండ్ లో ఉన్నప్పుడు "ఆ టాలీవుడ్ లో కథంతా హీరో చుట్టే తిరుగుతుంది, అందుకే మేము తెలుగు సినిమాల్లో నటించం" అని పెద్ద స్టేట్మెంట్స్ పడేస్తుంటారు అక్కడికి వారేదో అక్కడ గొప్ప గొప్ప క్యారెక్టర్స్ చేస్తున్నట్లు. 

"దేశంలో ఉండే ఎన్నో సమస్యలతో పాటు ఈ హిందీ సినిమా ఇండస్ట్రీ ఇలా దరిద్రంగా  తయారవ్వడానికి కారణం ఆ గాంధీ గారు కదూ, నెహ్రూ గారిని కాకుండా పటేల్ గారిని ప్రధానిని చేసి ఉంటే అసలు ఇలా జరిగేదా" అని సభాముఖంగా ప్రశ్నిస్తూ సెలవు తీసుకుంటున్నాను. 

26, జులై 2022, మంగళవారం

ఫ్రీ కూపన్స్ పథకం

ఉచితాలు ఇచ్చి శ్రీలంక దివాలా తీసింది, త్వరలోనే ఆంధ్ర కూడా అలాగే అవుతుంది అని ప్రతిపక్షం జగన్ గారి మీద విమర్శలు కురిపిస్తోంది. పైగా మోడీ గారు కూడా ఈ మిఠాయి సంస్కృతి కి(ఉచితాలు ఇవ్వడం) రాష్టాలు మంగళం పాడితే మంచిది అని చురకలు అంటించారు గానీ దేశం మొత్తం మీద చాలా పెద్ద మొత్తం అప్పే ఉందని అంటున్నారు, ఇలాంటి విషయాల్లో పెద్దగా విషయ పరిజ్ఞానం లేదు కాబట్టి కాస్త లైట్ గా అన్ని విషయాలను  టచ్ చేస్తా. 

ఇప్పుడు పాకిస్తాన్ కూడా శ్రీలంకలాగా దివాలా తీస్తుందని అంటున్నారు, పాకిస్తాన్ రూపాయి డాలరుతో పోల్చితే 210 కి చేరుకుందట, మన ఇండియన్ రూపాయి 80 కి చేరుకున్నట్లు.  

పాకిస్తాన్ లో ఆ మధ్య టీ తాగడం తగ్గించుకోండి అని ప్రభుత్వం ప్రజలని రిక్వెస్ట్ చేసిందట, ఆ దేశం టీ పొడిని అధికంగా దిగుమతి చేసుకోవడం వల్ల ఆ దిగుమతి చెల్లింపులు తగ్గించుకోవడానికొచ్చిన తిప్పలు అవి. 

ఇంధనం వృథా చేయొద్దని ఫ్రాన్స్ కూడా ఏసీ లను వాడుతున్నప్పుడు వీలైనంతవరకూ తలుపులు మూసి ఉంచాలని, అలాగే లైట్స్ మితంగా వాడాలని ఆదేశాలు జారీ చేయనున్నట్లు తెలుస్తోంది. గత నెలలో ఆస్ట్రేలియా ప్రభుత్వం కూడా విద్యుత్ వినియోగం కాస్త తగ్గించుకోమని ప్రజలని కోరింది. 

ఇవన్నీ మన తాతలు తండ్రుల కాలం నుంచి చెబుతున్నవే, నీళ్ళు వేస్ట్ చెయ్యొద్దురా, కరెంట్ వేస్ట్ చెయ్యొద్దురా అని ఎన్ని సార్లు చెప్పి ఉంటారో. కోవిడ్ వచ్చేదాకా బయటికి వెళ్లి వచ్చాక చేతులే కాదు కాళ్ళు కూడా కడుక్కోవాలి అని మన పెద్దలు చెప్పిన మంచి అలవాట్ల విలువ మనకి తెలియరాలేదు. పీకల్దాకా మునిగే వరకు ఉండి అప్పుడు నివారణ చర్యలు చేపట్టడం అలవాటయిపోయింది. 

ఇక ఈ రష్యా ఉక్రెయిన్ యుద్ధం మొదలయ్యాక మొత్తం ప్రపంచమే ఒక కుదుపుకి లోనయింది. నేను కార్ కొనక ముందు లీటర్ పెట్రోల్ డాలరు, కార్ కొన్నాక రెండు  డాలర్లని దాటేసింది. నేను అపార్ట్మెంట్ లో ప్లాట్ కొనక ముందు హొం లోన్ వడ్డీ రేటు 1.5% ఉండేది, ఇప్పుడది 4% కి ఎగపాకింది, ఇంకా పెరిగే ఛాన్స్ ఉందని అది ఈ సంవత్సరం చివరకి అది 7% కి చేరవచ్చని వాట్సప్ విశ్లేషకులు కోడై కూస్తున్నారు. 

ఈ ఉచితాలు ఇవ్వడం వల్లే ఆంధ్రా అప్పుల్లో కూరుకుపోతోంది అంటున్నారు. ఆ విషయం మీద మాట్లాడే పరిజ్ఞానం నాకు లేదు గానీ ఉచితాలు అనేవి ప్రతీ దేశంలో ఉండేవే, కాకపోతే అవి ప్రోత్సాహకాలని మరొకటని పేర్లు మార్చుకొని ఉంటాయి అంతే. 

ఇక్కడ ఆస్ట్రేలియా లో కూడా సంపాదించేవారు కట్టే 35% టాక్స్ డబ్బులనుంచి పని లేని వారికి ఆహార పథకం అన్నట్లు జాబ్స్ లేని వారికి నెల నెలా డబ్బులు ఇస్తూ ఉంటుంది ప్రభుత్వం. కొంతమంది అదే చాలు అనుకుంటూ బద్దకస్తులుగా ఉండిపోయారు. ఒక ఫామిలీ లో సంపాదన బిలో సం లైన్ కింద ఉంటే ఆ ఫామిలీ లో ఉండే ఒక్కొక్క కిడ్ కి కాస్త పెద్ద మొత్తంలోనే నెల నెలా డబ్బులు ఇచ్చేవారు, ఒకప్పుడు జనాభా ఇక్కడ తక్కువని అలా ప్రోత్సాహకాలు అందించేవారు. ఇప్పడు ఆ అమౌంట్ ని కాస్త తగ్గించినట్లు ఉన్నారు. 

ఇక ఫ్రీ కూపన్స్ పథకం అని టైటిల్ లో ఎందుకు అన్నానంటే COVID తర్వాత జనాల్ని ఇళ్ళ లోంచి బయటకి రావడానికి ఎంకరేజ్ చేసి తద్వారా రెస్టారెంట్స్, రిసార్ట్స్ , థియేటర్స్ బిజినెస్ ని మళ్ళీ ట్రాక్ లోకి తీసుకురావడానికి 18 ఏళ్ళు నిండిన ఒక్కొక్కరికి (సిటిజెన్ అవ్వాల్సిన అవసరం లేదు, కేవలం ఏదో ఒక వీసా మీద ఆస్ట్రేలియా లో ఉంటే చాలు) ఎనిమిది 25$ ఫ్రీ కూపన్స్ ఇచ్చింది. వీటిని క్యాష్ చేసుకోలేము గానీ రెస్టారెంట్స్ లో గానీ థియేటర్స్ లో గానీ ఉపయోగించుకోవచ్చు. 

పోయిన సంవత్సరం పిల్లల స్కూలింగ్ అంతా ఇళ్ళలోనే గడిచి పోయింది కాబట్టి మీ పిల్లలను మీరు భరించినందుకు మా గిఫ్ట్ ఇది అంటూ గవర్నమెంట్ 250$ విలువ చేసే మరో కూపన్ ఇచ్చింది. దీన్ని ఎక్కడైనా ట్రిప్స్ కి వెళితే యూజ్ చేసుకోవచ్చు ఒక రోజు  హోటల్ రూమ్ బుక్ చేయడానికి ఇలాంటి తాయిలాలు గవర్నమెంట్ అప్పుడప్పుడూ పంచేస్తూ ఉంటుంది. 

ప్రతీ ఆరు నెలల కొకసారి పర్మనంట్ రెసిడెంట్స్/ సిటిజన్స్ కి పిల్లలు ఉంటే వారికి active vouchers అని ప్రతీ కిడ్ కి 100$ ఇస్తుంది, వీటిని కూడా క్యాష్ చేసుకోలేము, కాకపోతే పిల్లల్ని స్విమ్మింగ్ క్లాసెస్ కో లేదంటే కరాటే క్లాసెస్ కో పంపినప్పుడు వేడినీళ్ళకు చల్లనీళ్ళు తోడైనట్లు ఉపయోగపడతాయి. మన దేశంలో కూడా రేషన్ ఇవ్వడం లాంటివి ఇలాంటి పథకాల కిందే వస్తాయి, డైరెక్ట్ గా డబ్బులు చేతిలో పెట్టకుండా. 

కాబట్టి గవర్నమెంట్ దగ్గర డబ్బులుంటే క్యాష్ పరంగా కాకుండా ఇలా కూపన్స్ పరంగా ఇవ్వడం అనే పద్దతి బాగుంది, దానివల్ల ప్రజలకి, బిజినెస్ కి ఉపయోగకరంగా ఉంటుంది. కాకపోతే వాటిని క్యాష్ చేసుకోవడం లేదంటే వేరే వారికి బదిలీ చేయడం లాంటి వాటిని నిరోధించగలగాలి. 

ఇన్ని చెప్పాను కానీ దేశాలు, రాష్ట్రాలు ఎలాగోలా అప్పులు తీర్చేసుకుంటాయి కానీ ముడ్డి కింద ఉన్న నలుపు ఎరుగని గురివిందగింజ లాగా నా అప్పుల గురించి మరచిపోయానే ఈ పెరిగిన వడ్డీ రేట్లతో ఇంటి అప్పు ఎప్పటికి తీరునురా దేవుడా! 

23, జులై 2022, శనివారం

ఇలా కూడా నివాళి అర్పిస్తారు

రణవీర్ సింగ్ .. ఇతను మన విజయ్ దేవరకొండ కంటే పదాకులే ఎక్కువ చదివినట్లు ఉన్నాడు. ఇతని విచిత్ర వేషధారణ, ఎవరినీ లెక్కచెయ్యని ఆటిట్యూడ్ ఇతని సొంతం. తాజాగా ఇతను బర్ట్ రెనాల్డ్స్ అనే ఒక హాలీవుడ్ హీరో కి నివాళిగా నగ్నంగా ఫోటోషూట్ లో పాల్గొన్నాడట కాళ్ళు చేతులు అడ్డుపెట్టుకోవలసిన చోట అడ్డు పెట్టుకొని.  బర్ట్ రెనాల్డ్స్ అనే ఆయన ఎప్పుడో 1972 లో ఏదో పత్రిక కి అలా ఫోజు ఇచ్చాడట, 50 సంవత్సరాలు గడిచిన సందర్బంగా ఈయన ఆయనకి నివాళి అర్పిస్తూ ఈ పని చేశాడట. సరే ఎవరి పిచ్చి వారికానందం. 

ఈ రణవీర్ సింగ్ ట్రెండ్ ని కంటిన్యూ చేస్తూ విష్ణు విశాల్ అనబడే ఒక సౌత్ ఇండియన్ హీరో కూడా నా భార్య జ్వాలా గుత్తా ఓ ఫోటో గ్రాఫర్ గా మారి నా పిక్చర్ ని యెంత అందంగా తీసిందో చూడండి అని బెడ్ షీట్ కప్పుకున్న ఒక దరిద్రమైన ఫోటో తో దర్శనమిచ్చాడు. ఇంకెంత మంది ఈ ట్రెండ్ ని ఫాలో అవుతారో చూడాలి మరి. 

ఇలాంటి నగ్న ప్రదర్శనలు మన బాలీవుడ్ లో కొత్త విషయం కాదనుకోండి, ఇంతకుముందు మిలింద్ సోమన్ అనే అతను నగ్నం గా బీచ్ లో పరిగెట్టి, అమీర్ ఖాన్ లాంటి హీరో రేడియో లాంటివి అడ్డుపెట్టుకొని పీకే సినిమాలో నటించడం లాంటివి మనకి కొత్తేమీ కాదు. ఇకపై హీరోయిన్స్ కి హీరోస్ కూడా గట్టి పోటీ ఇచ్చేలా ఉన్నారు. ఎవరన్నా ఏమన్నా అంటే ఫ్యాషన్, ట్రెండ్ తెలియని మీరు రాతి యుగం లాంటి మనుషులు అంటూ వెక్కిరిస్తూ అదే రాతి యుగం నాటి వారికి బ్రాండ్ అంబాసిడర్లు అయిపోతున్నారు వేషధారణలో. 

                                                          ****************

ప్రస్తుత ప్రపంచ కుబేరుల్లో మొదటి స్థానం లో నిలిచిన ఎలాన్ మస్క్ తండ్రి అయిన ఎర్రోల్ మస్క్ వీర్యం కోసం పోటీ పడుతున్నారట కొంతమంది మహిళలు(లేదంటే వారి భర్తలు వెనక నుండైనా ప్రోత్సహిస్తూ ఉండచ్చు). వినడానికే కాస్త ఇబ్బందికరంగా ఉన్నా ఇది నిజం అని 76 ఏళ్ళ ఎర్రోల్ చెప్తున్నాడు. (అమితాబ్ బచ్చన్ కూడా ఇలా వీర్య దాతల లిస్ట్ లో ఉన్నట్లు కొన్ని పత్రికలు అప్పట్లో కోడై కూశాయి, అమితాబ్ బచ్చన్ గారు తనకై తాను ఎక్కడా చెప్పలేదు కాబట్టి దాని గురించి నో కామెంట్స్)   ఈ ఎర్రోల్ మస్క్ కి మొత్తం ముగ్గురు భార్యల ద్వారా ఆరుగురు పిల్లలు. ఎలాన్ మస్క్ తప్పించి మిగిలిన అయిదుగురు యెంత శాతం సక్సెస్ సాధించారో తెలీదు మరి.  

ఎర్రోల్ మస్క్ కి ముగ్గురు భార్యలు అన్నాను కదా అందులో Jana Bezuidenhout అనే ఆవిడ ఈ ఎర్రోల్ మస్క్ మూడవ భార్య మరియు ఎర్రోల్ మస్క్ రెండవ భార్య కూతురు. సొంత కూతురు కాదులేండి,   ఈవిడ ఎర్రోల్ మస్క్ రెండవ భార్యకి ఆవిడ మొదటి భర్త కి పుట్టిన బిడ్డ. అంటే ఒక రకంగా ఈయన స్టెప్ డాటర్ నే పెళ్లి చేసుకున్నట్లు. జీర్ణించుకోవడం కాస్త కష్టం కాకపోతే వారి కల్చర్ లో ఇవన్నీ పెద్ద విషయాలు కాకపోవచ్చు, ఇంకో 50 సంవత్సరాల తర్వాత ఎవరో ఒకరు నివాళి అంటూ మన రణవీర్ లాగా ముందుకు వస్తే ఆశ్చర్య పోకండి. 

                                                            ****************

కర్ణాటక లోని ఒక కాలేజీ విద్యార్థులు నడి రోడ్డు మీద 'లిప్ లాక్ ఛాలెంజ్' పేరిట నానా హడావిడీ చేశారట. ఒక అమ్మాయి, ఒక అబ్బాయి ముద్దు పెట్టుకుంటుంటే తక్కిన విద్యార్థులు అందరూ చుట్టూ చేరి ప్రోత్సహించారట. మరో 50 ఏళ్ళ తర్వాత నివాళి అంటూ ఎలిమెంటరీ స్కూల్ పిల్లలు ఇలా చేసే సంస్కృతి రాకపోతే అదే పది వేలు. 

19, జులై 2022, మంగళవారం

నట ధనవంత

మొన్న రాత్రి 21 hours అని ఓ కన్నడ మూవీ చూశా, అందులో ప్రధాన పాత్రధారి 'పుష్ప' లో ఒక పాత్ర పోషించిన ధనుంజయ్ అనే నటుడు.  అతనికి ఉన్న బిరుదు "నట రాక్షస" అట, ఈ లెక్క ప్రకారం ఇకపై వచ్చే మాస్ హీరోస్ నట క్రూర, నట కింకర, నట తాటక అని లేదంటే పాజిటివ్ గా అయితే నట దేవర, నట విరాట, నట పోరాట  ఇలా పెట్టుకుంటారేమో. 

నిన్నే"ది లెజెండ్" అనబడే  ఒక సినిమా పోస్టర్ చూశా


మరి ఈ హీరోకయితే నట ధనవంత, నట బలవంత, నట వాంతి, నట భ్రష్ట, నట దుర్భర, నట వికార, నట వంకర, నట కంకర లాంటి బిరుదులు ఇవ్వచ్చేమో కానీ తనకి తానే "లెజెండ్" అని పెట్టుకున్నట్లున్నాడు. "డబ్బులుంటే కొండ మీద కోతినయినా హీరో చెయ్యొచ్చు" అనే మాట ఫిలిం ఇండస్ట్రీ లో వినబడుతూ ఉంటుంది దానర్థం ఇదేనేమో మరి. 

"బంగారు పళ్ళ వాడు కూడబెడితే పాచి పళ్ళ వాడొచ్చి పోగొట్టినాడనే" సామెత మా ఊరి వైపు బాగా పాపులర్. శరవణ స్టోర్స్ కొట్లలో కోట్లలో బంగారం అమ్మి తండ్రులు తాతలు కూడబెట్టిన సొమ్మంతా ఈ లెజెండ్ గారు తగలెడుతున్నారేమో, లేక ఈయనే తెగ సంపాదించాడో తెలీదు మరి.   

అందం గురించి అయితే పెద్దగా వర్రీ అవసరంలేదు, ఎందుకంటే హీరో అనబడే పదార్ధం అందాన్ని ఎప్పుడో కోల్పోయింది, కనీసం ఒక పర్సనాలిటీ, కాస్తో కూస్తో నటన ఆశిస్తే తప్పు లేదని నా ఉద్దేశ్యం. 

వీధిలో ఏనుగు వెళ్తూ ఉంటే నా లాంటి కుక్కలు ఇలాగే మొరుగుతూ ఉంటాయి. సర్లే ఆయన డబ్బులు, ఆయన ఇష్టం మధ్యలో నేనెవడిని అనటానికి. 

నేను కాలేజీ రోజుల్లో ఉన్నప్పుడు ఉల్లాసం సినిమా రిలీజ్ టైం లో జేడీ జెర్రీ అనబడే ఈ దర్శక ద్వయం పేరు విన్నాను , ఆ పేరు  కొంచెం డిఫరెంట్ గా ఉండటం వల్ల బాగా గుర్తుండిపోయింది. ఆ తర్వాత రెండో మూడో సినిమాలు డైరెక్ట్ చేసినట్లు ఉన్నారు. ఇప్పుడు ఈ లెజెండ్ వీళ్ళను పట్టుకొచ్చినట్లు ఉన్నాడు తన సినిమా డైరెక్షన్ కి. technical గా కూడా మంచి పేరున్న వారినే పెట్టుకొని ఉంటాడు, మ్యూజిక్ డైరెక్టర్ హారిస్ జయరాజ్ అని తెలుస్తూనే ఉంది. 

మా చిన్నతనంలో హీరో నచ్చకపోతే మొహం మీద పేడ కొట్టేవాళ్ళు, హీరో బాలేకపోతే మనం కొట్టాల్సిన అవసరంలేదురా గేదెలే వచ్చి వేసి పోతాయి అనే వాళ్ళు, ఇప్పుడలా జరిగినా జరగొచ్చు. 

ఏదైతేనేం మొహానికి మేకప్ వేసుకొని హీరోగా చెయ్యాలి అని పట్టు పట్టి, సినిమా తీసి ఇంకో వారంలో జనం మీదికి వదులుతున్న ఆయన పట్టుదలకు జోహార్లు. 

11, జులై 2022, సోమవారం

రాముడు బాబోయ్ రాముడు

మన తెలుగు సినిమాల్లో ఒక ఇరవయ్యేళ్ళ కిందట సినిమా టైటిల్స్ విషయంలో ఒక ట్రెండ్ ఫాలో అయ్యేవారు అనుకుంటా. 'విచిత్ర' అనే పదం పేరులో ఉండే సినిమా వచ్చి హిట్ అయిందంటే ఇక విచిత్ర ను ముందో వెనుకో తగిలించుకొని కొన్ని పదుల సినిమాలు తయారయిపోయేవి. 

విచిత్ర దంపతులు 

విచిత్ర జీవితం 

విచిత్ర కుటుంబం (మరీ అంత విచిత్రం యేమీ ఉండదు ఆ కుటుంబం లో, ఏదో ఆ సమయానికి అలా పేరు పెట్టేసి ఉండచ్చు)

విచిత్ర బంధం 

విచిత్ర కాపురం 

విచిత్ర దాంపత్యం 

విచిత్ర పైత్యం 

ఇలా అన్నమాట 

డబ్బింగ్ సినిమాలైతే 

విచిత్ర కలయిక 

విచిత్ర గూఢచారి 

విచిత్ర సోదరులు 

విచిత్ర సుందరి 

ఇలా ఉండేవన్నమాట. 

ఇలా ప్రేమ, పెళ్ళి లాంటివి తగిలించుకున్న సినిమాలు వందల్లో ఉంటాయనుకుంటాను. 

ఇక మన అన్నగారైతే "రాముడు" పేరుకు ఏదో ఒక తగిలించి ఓ డజన్ పైగానే తీసి ఉంటారు తన కెరీర్ లో. 

పిడుగు రాముడు 

బండ రాముడు 

శభాష్ రాముడు  

ఛాలెంజ్ రాముడు 

అడవి రాముడు 

డ్రైవర్ రాముడు 

సర్కస్ రాముడు 

కలియుగ రాముడు 

సరదా రాముడు 

అగ్గి రాముడు 

బుగ్గి రాముడు 

దగా రాముడు 

అని ఆ పేరు అరిగి పోయే దాకా తీశారు. (చివరి రెండూ నా పైత్యం అనుకోండి )

ఇక పైత్యం ముదిరి రాముడి పేరుకు అతకని కొన్ని పదాలని కలిపేసి దొంగ రాముడు, రౌడీ రాముడు-కొంటె కృష్ణుడు,  శృంగార రాముడు లాంటివి కూడా పెట్టేసారు. 

ఈ కాలం లో అయితే పోకిరి రాముడు, మార్కెట్ రాముడు, రాకెట్ రాముడు, ఇస్మార్ట్ రాముడు, D.J రాముడు అని కూడా తీసేసేవారేమో

శృంగార రాముడా? ఇలాంటి సినిమా కూడా ఉందా అని ఆశర్య పోకండి, నేను పుట్టక మునుపే ఇది పుట్టిందట, గూగుల్ చెబుతోంది. కాకపోతే అప్పట్లో అట్టర్ ప్లాప్ అయిందని విన్నాను కానీ ఆ సినిమా చూసే ధైర్యం ఎప్పుడూ చేయలేదు. "నందమూరి అందగాడా" అనే పద ప్రయోగం ఈ సినిమాలోని ఒక పాటలో వినపడుతుంది. 

Note: 99% of the times my posts are neither educative nor informative. Those are intended for fun and relief from the daily routine work. Apologies if you feel like you wasted your time after reading my posts. Thanks for reading.

6, జులై 2022, బుధవారం

ఈ ఆర్ధిక సహాయం మతలబేంటో అర్థం కాదు నాకు

సాధారణంగా ఏ సినిమా అయినా టైటిల్స్ తో సహా చూస్తేనే సినిమా చూసిన ఫీలింగ్ ఉండే నాకు "శివ శంకర్", "సలీం", "గౌతం రాజు", "మార్తాండ్ కె వెంకటేష్", "రాజు సుందరం", "రాజు" లాంటి కొన్ని పేర్లు బాగా గుర్తుండిపోయాయి. వీరందరూ ఎక్కువగా తెర వెనుక పనిచేసే వాళ్ళే కాబట్టి నిన్నా మొన్నటి వరకూ ఈ సోషల్ మీడియా రానంతవరకూ వారి మొహాలు తెలీక పోయినా వారి పేరు బాగా గుర్తు. 

సాధారణంగా తెలుగు సినిమా ఇండస్ట్రీ లో ఎవరైనా చనిపోతే వారిలో కొందరికి చిరంజీవి  లాంటి వారు ముందుకొచ్చి వారి కుటుంబానికి మా తరపు నుండి ఆర్ధికసహాయం అని చెప్పి వారి కుటుంబాలకి కొంత డబ్బు అందిస్తూ ఉంటారు. 

రీసెంట్ గా ఓ రెండు లక్షల ఆర్ధిక సాయాన్ని దాదాపు  850 పై చిలుకు సినిమాలకి ఎడిటర్ గా పని చేసిన "గౌతం రాజు" కుటుంబానికి  చిరంజీవి అందజేశారు అని విన్నాను. ఆ 850 సినిమాలలో తెలుగే కాకుండా తమిళం, కన్నడ, హిందీ చిత్రాలు ఉన్నాయని అంటున్నారు. అంటే అన్ని సినిమాలకు పని చేసినా వారి కుటుంబానికి నిజంగా ఆర్ధిక సాయం అవసరం అయిందా లేదంటే అది కేవలం తన సినిమాలకి పని చేసినందుకు గానూ కృతజ్ఞతగా చిరంజీవి అందజేశారా అన్నది తెలీదు. రెండవ కారణం నిజం అయితే పర్లేదు, లేదు నిజంగానే వారి ఫామిలీ ఆర్ధిక ఇబ్బందుల్లో ఉందంటే కాస్త విశ్లేషించుకోవాల్సిందే. 

డాన్స్ మాస్టర్ శివ శంకర్, ఫైట్ మాస్టర్ రాజు విషయంలో కూడా ఇలానే జరిగిందని విన్నాను. అంటే దీన్ని బట్టి చూస్తే ఒకటి, వారు వారి సంపాదనని సరైన మార్గం లో ఇన్వెస్ట్ చేయలేదనుకోవాలి లేదంటే వారి వేతనం బాగా తక్కువుగా అయినా ఉండి ఉండాలి. 

ఒక వేళ వారి వేతనం బాగా తక్కువుగా ఉంది అంటే తిరిగి నిందించవలసింది చిరంజీవి లాంటి పెద్ద హీరోలనే. ఈ హీరోలు తీసుకునే కోట్లలో ఒక అర కోటి తగ్గించుకొని అది తెర వెనుక పనిచేసే వారి వేతనాలకు కలిపితే ఇలాంటి ఇబ్బందులు వారి ఫ్యామిలీస్ పడకుండా ఉంటారు అలాగే ఈ రెండు మూడు లక్షల ఆర్థిక సహాయం చేయవలసిన అవసరం రాకపోవచ్చు. 

ఒక రకంగా చూస్తే ఇది అధికారం లో ఉన్న నాయకులు ఆ ఐదేళ్లు ప్రజల డబ్బులు దోచేసుకొని మళ్ళీ ఎన్నికల ముందు ఓటుకు నోటు ఇచ్చే టైపులా ఉంది. 

5, జులై 2022, మంగళవారం

నిన్నా మొన్నటి సినిమా కబుర్లు

హీరో రవితేజ ఏజ్ కి బచ్చన్ ఫ్యాన్ అంటే ఓకే గానీ పూరీ ఆకాష్ ఏజ్ కి బచ్చన్ ఫ్యాన్  ఏమిటో?? బచ్చన్ , షారుక్ వీళ్లంతా ఎప్పుడో అవుట్ డేటెడ్  అయిపోయారు అని ఆ డైరెక్టర్ అప్డేట్ అవ్వకుండా లేదంటే పదేళ్ళ క్రితమెప్పుడో రాసుకున్న కథతో జార్జి రెడ్డి లాంటి అంతో ఇంతో మంచి సినిమా తీసిన డైరెక్టర్  'చోర్ బజార్'  అనే సినిమా తీస్తే అది 'బోర్ బజార్' అని చూసిన అతి కొద్దిమంది ప్రేక్షకులు తీర్పు ఇచ్చేశారు. బచ్చన్ గారు ఉండీ కూడా  సైరా కి ఒక్క వంద టికెట్స్ కూడా సరిగ్గా తెగినట్లు లేవు బాలీవుడ్ లో. ఇంకా బచ్చన్, చిరంజీవి అంటూ ఉంటే ఎలా?

హీరోల కొడుకులు హీరోలుగా క్లిక్ అవుతున్నారు కానీ డైరెక్టర్స్ కొడుకులు హీరోలుగా నిలబడలేక పోయారు, కారణం కొడుకులు హీరోగా ఎంట్రీ ఇచ్చే సమయానికి ఆ డైరెక్టర్స్ డైరెక్షన్ గేట్ ఎగ్జిట్ దగ్గరికి చేరటమే కారణం. 

కోదండరామిరెడ్డి, రాఘవేంద్ర రావు, దాసరి నారాయణ రావు, ఈవీవీ సత్యనారాయణ ఇలా చాలా మంది దర్శకులు వారి బిడ్డల్ని స్టార్స్ చేయలేకపోయారు. పూరీ జగన్నాథ్ కూడా ఆ కోవలోకే చెందుతాడేమో. 

గాలి నాగేశ్వర రావు అనే సినిమా కి జిన్నా అని పేరు మార్చారు. గాలి నాగేశ్వర రావు షార్ట్ కట్ లో జిన్నా అవుతుందని వాళ్లకు ఎలా అనిపించిందో. ఏదో ఒక కాంట్రవర్సీ చేసి జనాలకు సినిమాని దగ్గర చెయ్యాలని చూస్తున్నట్లు ఉంది గానీ అశోక వనంలో అర్జున కళ్యాణం విషయంలో ఇలాంటి పప్పులు ఉడకలేదని తెలియదేమో ఈ జిన్నా మేకర్స్ కి.  నిన్నా, ఇవాళ సిగరెట్ తాగుతున్న కాళికా పోస్టర్ కూడా ఈ పైత్యానికి సంబంధించినదే. 

సినిమాలను రెండు మూడు వారాలకే ఓ.టి.టి కి ఇవ్వడం వల్ల థియేటర్స్ కి జనాలు రావడం లేదని భ్రమపడి సినిమా రిలీజ్ పూర్తి అయిన ఏడు వారాల వరకూ ఓ.టి.టి కి ఇవ్వకూడదు అని నిర్మాతల మండలి (ఇదసలు ఉందో లేదో తెలీదు కానీ అప్పుడప్పుడూ ఈ పేరు వినపడుతూ ఉంటుంది, ఆటలో అరటిపండు లాగా అన్నమాట) తీర్మానించిందట. తొక్కలో సినిమా కోసం ఓ 50 రోజులు ఆగలేమా అనుకునే జనాలే  ముప్పాతిక శాతం మంది ఉంటారు అన్న విషయం మర్చిపోయారేమో మరి. 

ఒక్క సినిమా ఘోరంగా విఫలమయ్యాక, 150 సినిమాల విషయంలో గుర్తురాని న్యూమరాలజీ ఇప్పుడు గుర్తుకొచ్చి తన పేరులో మరో 'E' చేర్చుకున్నారని అందరూ అంటుంటే లేదు లేదు అది ఎడిటింగ్ లో జరిగిన లోపమని సరిపెట్టుకున్నారు ఒక జీవి. 

ఒకానొక అవార్డు విన్నర్, RRR సినిమాని గే సినిమా అన్నారని ఆయన పేరు లోని బూతు పదాన్ని హైలైట్ చేస్తూ ట్వీట్ చేశారొక సంగీత జ్ఞాని. 

అల్లూరిని ఈ మాత్రమైనా జనాలు గుర్తుంచుకునేలా చేసిన ఆ స్టార్ ని కాకుండా మరో స్టార్ ని అల్లూరి విగ్రహావిష్కరణ కి ఆహ్వానించారని మండిపడుతున్న ఒక వర్గం. 

ఎవడి పెళ్ళాం ఎవరో, ఎవడి మొగుడు ఎవురో అర్థం కాక మాజీ మొగుడు, మాజీ పెళ్ళాం, తాజా పెళ్ళాం, తాజా మొగుడు అని జుట్టు పీక్కుంటూ రోడ్డుకెక్కుతున్న ఈ రోజుల్లో కూడా ఎప్పుడు వచ్చిందో ఎప్పుడు పోయిందో తెలియని సినిమా తర్వాత "నిన్న ఒరు తమిళ్ పడం సూస్తిమి కదా, అదు నేను హీరోగా నీ డైరచ్చన్ లో రీమేక్ సేస్తుమా" అని ఓ అన్యోన్య జంట ముచ్చటించుకుంటున్నట్లు సమాచారం. 

2, జూన్ 2022, గురువారం

ఫన్ లెస్ , ఫ్రస్ట్రేషన్ అండ్ ఫోర్స్ కామెడీ

నిన్న F3 చూశాను అనేకంటే చూడాల్సి వచ్చింది అని చెప్పొచ్చు, ముందే చేసుకున్న కమిట్మెంట్స్ వల్ల. బాలేదు అని చాలా మంది చెప్పారు కాబట్టి సినిమా బాగుండదు అని నాకు నేను డిసైడ్ చేసుకొని తక్కువ అంచనాలతో చూసినా సినిమా నచ్చలేదు. 

F2 సినిమా లోనే సెకండ్ హాఫ్ లో స్టోరీ ఏదీ లేక ఏవోవో సీన్లు పెట్టి మమ అనిపించేశాడు, ఇక అది F3 లో పీక్స్ కి వెళ్ళిపోయింది. ఇంటర్వెల్ కు ముందు ఒక కథ, ఇంటర్వెల్ తర్వాత ఒక కథ అన్నట్లుగా ఉంటుంది సినిమా, సినిమా మొదటి సగం చూడకపోయినా వచ్చే నష్టం లేదు, లేదంటే రెండో సగం చూడకపోయినా వచ్చే నష్టం లేదు అనిపిస్తుంది. ఒక టికెట్ మీద రెండు అర సినిమాలు చూసినట్లు. ఆ రెండు అర సినిమాలు కూడా జబర్ధస్త్ లాంటి ప్రోగ్రాం లో వచ్చే నాలుగైదు స్కిట్స్ ని కలిపి వాటికి పాటలు కలిపి సినిమా తీసేశాడు. 

వెంకటేష్ కామెడీ బాగా చేస్తాడు కదా అని మరీ ఇంత లేకి కామెడీ అంటే చూడలేం. "నీ ఏజ్ ఏంటి నీ గేజ్ ఏంటి" అని పోకిరి సినిమాలో అలీ అనే డబల్ మీనింగ్ డైలాగ్ లాగా వెంకటేష్ వయసుకు తగ్గ క్యారెక్టర్ వేసుకుంటే మంచిదేమో. నువ్వు నాకు నచ్చావ్ గానీ లేదంటే మల్లీశ్వరి గానీ ఇప్పటికీ చూడగలుగుతున్నాం అంటే ఎంజాయ్ చేయగలిగిన కామెడీ ఉంది కాబట్టే. జంధ్యాల గారి సినిమాలైనా లేదంటే ఈవీవీ గారి వైనా కొంత వరకు చూడగలుగుతున్నామంటే మంచి నవ్వించే సీన్స్ ఉండబట్టే. 

మొత్తానికి సినిమా కామెడీ కి ఆమడ దూరంలో ఆగిపోయింది. ఇంత చవకబారు సినిమాలతో ఎక్కువ కాలం బండి లాగలేననే విషయం ఈ సినిమా తర్వాత దర్శకరచయిత అయిన అనిల్ రావిపూడి కి తెలిసి వస్తుంది కాబట్టి ఈ సారైనా కాస్త గట్టిగా అలోచించి మంచి కథలు రాసుకుంటే బెటర్. "నాన్నా పులి" అని అరిస్తే రెండు మూడు సార్లు వర్కవుట్ అవచ్చు కానీ ఆ తర్వాత కెరీర్ డేంజర్ లో పడే అవకాశం ఉంది.  ఇలాంటి ఫార్మాట్ సినిమాలు తీస్తూ పోతే "లింగడు తెగితే రాయి" అనే సామెత లాగా ఇంకో నాలుగైదు సినిమాలకి డైరెక్టర్ శీను వైట్ల లాగా మూలకు వెళ్ళిపోవాలి. 

ఇలాంటి తొక్కలో పోస్ట్ రాయడానికే నేను ఒకటికి రెండు సార్లు ఆలోచిస్తాను, అలాంటిది ఇలాంటి రొచ్చు కథతో సినిమా తీసినందుకు అతను ఎన్ని సార్లు ఆలోచించుకోవాలో మరి. 

"నా చెప్పును నిలబెట్టినా ఎన్నికల్లో గెలుస్తుంది" అని ఎన్టీయార్ గారు ఆ రోజుల్లో అనేవారని విన్నాను, అది ఎలెక్షన్స్ లో ప్రతీ సారి గెలవడం వల్ల వచ్చిన కాన్ఫిడెన్స్ నుంచి పుట్టిన ఓవర్ కాన్ఫిడెన్స్ వల్ల అవ్వచ్చు. మరి అనిల్ రావిపూడి కూడా అదే  ఓవర్ కాన్ఫిడెన్స్ వల్ల ఏ సినిమా తీసినా హిట్టవుతుందని కదా అని ఈ సినిమా తీసి ఉండచ్చు. 

ఇలాంటి తల తిక్క సినిమా చూసినందుకు డబ్బులు బొక్క,  కాకపోతే "మొలమట్టు దుఃఖం లో మోకాలు మట్టు దుఃఖం యెంత అన్నట్లు" ఆచార్య సినిమా చూసిన అనుభవంతో పోలిస్తే ఈ అనుభవం కాస్తో కూస్తో ఉపశమనం అంతే. 

30, మే 2022, సోమవారం

ఆస్ట్రేలియా ఏమీ స్వర్గం కాదు - 5

అప్పుడెప్పుడో ఆర్నెల్ల క్రితం రాసిన ఆస్ట్రేలియా ఏమీ స్వర్గం కాదు - 4 పోస్ట్ కి కొనసాగింపు....  

'పొగ త్రాగడం హానికరం మరియు ప్రమాదకరం' అంటూ సినిమాకి ముందు వచ్చే ముఖేష్ యాడ్ ని  గుర్తుకు తెచ్చేలా నా రూమ్ లోకి ఆరోజు మధ్యాహ్నమే ఒక కొత్త రూమ్మేట్ వచ్చాడు. అతను ఇన్ఫోసిస్ లో మేనేజర్ గా పనిచేసేవాడు. ఆగ్రా నుంచి వచ్చాడట, ఎప్పుడు చూసినా సిగరెట్ తాగుతూ ఉండటమో లేదంటే పాన్ పరాగ్ నములుతూ ఉండటమో చేస్తుంటాడు. ఆ పాన్ పరాగ్ ని ఎక్కడ పడితే అక్కడ ఉమ్మేస్తూ ఉంటాడు. నాకు రూమ్ లోకి రాగానే కనిపించిన ఆ రక్తపు మరకల ఎఫెక్ట్ అదే. ఉమ్మేసిన తర్వాత అక్కడ ఏ టవల్ దొరికితే ఆ టవల్ తో మూతి తుడుచుకునేవాడు తన పర అనే భేదం లేకుండా. ఆ ఒక్క రాత్రే నన్ను నిద్ర పోనీకుండా తన ఫామిలీ హిస్టరీ మొత్తం చెప్పేశాడు అర్ధ రాత్రి దాకా. 

పొద్దుటే గంట కొడుతున్న శబ్దం వినిపించి ఉలిక్కిపడి లేచా, టైం చూస్తే ఉదయం ఆరు. బాగా చలిగా ఉండే మే నెలలో అంత ఉదయాన్నే గంట కొడుతూ అగరొత్తులు వెలిగించి పూజ చేస్తున్నాడు ఆ వ్యక్తి.  

అయినా ఓరి ముఖేష్! నీకు ఈ యాంగిల్ కూడా ఉందా? సిగరెట్స్, పాన్ పరాగ్ లాంటి చెడ్డ అలవాట్లతో పాటు అగరొత్తులు, పూజ అనే ఈ మంచి అలవాట్లూ ఉన్నాయే అనుకున్నా.

గుడ్ మార్నింగ్ పవన్. అదేం విచిత్రమో లేక దైవ బలమో తెలీదు గానీ ప్రతీ రోజూ తెల్లవారుజామున ఐదుకే లేచి స్నానం చేసి పూజ చేయడం అలవాటు. ఈ చలికి చల్ల నీళ్ళతో ఎలా స్నానం చెయ్యాలా అని దిగులుపడ్డా, పైగా నేను ఇండియా నుంచి తెచ్చుకున్న వాటర్ హీటర్ ఇక్కడి ప్లగ్ సాకెట్స్ లో పట్టలేదు యెంత ట్రై చేసినా. చివరికి ఏదైతే అదవుతుందని చన్నీళ్లతోనే స్నానం చేద్దాం అనుకున్నా కానీ బై గాడ్స్ గ్రేస్ వేడి నీళ్ళు వచ్చాయి టాప్ తిప్పితే అన్నాడు. 

గాడ్స్ గ్రేస్ లేదు గాడిద గుడ్డు లేదు ఆస్ట్రేలియా లో బై డిఫాల్ట్ హీటర్ ఫిక్స్ అయి ఉంటుంది వాటర్ కనెక్షన్ కి అన్నాడు దేవుడంటే గిట్టని మా చెన్నై కమల్ హాసన్ (ఎప్పుడూ ఉదయం 9 కి గానీ లేవని మా ఫ్లాట్ లోనే మరో రూమ్ లో ఉండే ఫ్లాట్ మేట్ ఇతను,  ఆ గంట శబ్దానికి మొదటి సారి సూర్యుడి కంటే ముందే నిద్ర లేచాడు) 

అవునా, నాకా విషయం తెలీదే అన్నాడు ఆశ్ఛర్యంగా ఆ ముఖేష్. 

ఆశ్ఛర్యం తర్వాత, ముందు ఆ గంట కొట్టడం ఆపేయ్ లేదంటే మన పక్క ఫ్లాట్ లో ఉండే ఆ రష్యా వాడు డిస్టర్బ్ చేస్తున్నామంటూ కంప్లైంట్ చేస్తాడు అనే లోపే తలుపు తడుతున్నారు ఎవరో. 

తీసి చూస్తే ఆ రష్యా వాడే... 

"ఈ ఫ్లాట్ కి ఏమైంది, ఒక వైపు టంగు టంగుమని శబ్దం, మరో వైపు ఈ దట్టమైన పొగ .. దీన్ని చూస్తూ నేను సహించలేను" అంటూ సినిమా ముందు వచ్చే స్మోకింగ్ రీల్ డైలాగ్స్ ను గుర్తు చేస్తూ మా మీద విరుచుకు పడ్డాడు. 

ఈ గంట శబ్దం సరే, ఆ  పొగ కథేమిటబ్బా ఇంత పొగ చుట్టుకుంది అని చూస్తే డోర్ బయట రెండు వైపులా అటొక కట్ట, ఇటొక కట్ట అగరొత్తులు గుచ్చి ఉన్నాయి.  ఆ  అగరొత్తుల నుంచి వచ్చిన పొగ అది.

అర్థమైంది అది మా ముఖేష్ పనే అని, ఇక ఆ రష్యా వాడికి చిక్కిన ఉక్రెయిన్ వారిలా బలి కావడం తప్ప వేరే దారి లేదని మౌనంగా తలదించుకున్నాం సారీ చెబుతూ

నాకసలే ఆస్మా ఉంది, ఈ పొగకి నాకేమైనా అయితే నన్నే నమ్ముకున్న నా మొదటి భార్య చివరి ఇద్దరు పిల్లలు, రెండవ భార్య కి పుట్టిన నా పెద్ద కొడుకు, ఆవిడ మొదటి భర్త తో కన్న ఇద్దరు పెద్ద  కూతుర్ల భాద్యత, ఇప్పుడు లివింగ్ టుగెదర్ లో ఉన్న నా బాయ్ ఫ్రెండ్, వాడి మొదటి పెళ్ళాం కి పుట్టిన మూడవ పిల్లాడి భాద్యత ఎవరు చూస్తారు? మరో సారి ఇలా జరిగితే పోలీస్ కంప్లైంట్ ఇవ్వాల్సి వస్తుంది అని హెచ్చరించి వెళ్ళిపోయాడు. 

అగరొత్తులు వెలిగించొద్దా, నీకు ఆస్మా ఉందా. ఏంటీ ఈ మాత్రం పొగకే పోతావా? నిన్ను ఢిల్లీ లోనో బీజింగ్ లోనో వదిలేయాలి దెబ్బకు దారికొస్తావ్ అని మేము రూమ్ లోకి వెళ్లి సైలెంట్గా నవ్వుకున్నాం. 

కానీ  ఇలాంటిదే  మరో తుఫాన్ హెచ్చరిక  రాబోవు రెండు మూడు గంటల్లో వస్తుందని మేమూ ఊహించలేకపోయాము, ఏ ఆకాశవాణి మమ్మల్ని హెచ్చరించనూ లేదు.  

9, మే 2022, సోమవారం

అర్రే, పంచు నాకు పడిందే


యూట్యూబ్ లో 'తల్లి పోగాదే' (ఇలాగే పలకాలా, ఏమో తెలీదు మరి) అని కొత్త తమిళ్ సినిమా కనపడితే చూడటం మొదలెట్టాను. ఒక అరగంట అయిన తర్వాత 'ఉన్నట్టుండి గుండె వంద కొట్టుకుందే' పాట మ్యూజిక్ మొదలైనప్పుడు డౌట్ వచ్చింది అరే, ఇది మన తెలుగు సినిమా 'నిన్ను కోరి' లో పాట కదా అనుకున్నాను. కాసేపటి తర్వాత ఆ సినిమా రీమేకే నేను చూస్తున్న సినిమా అని అర్థమైంది. 'నిన్ను కోరి' సినిమా కాన్సెప్ట్ తెలుసు కానీ ఆ సినిమా చూడలేదు కాబట్టి పోల్చుకొని తెలిసేప్పటికి గంట సినిమా ముగిసింది. 


ఇక చూద్దామా వద్దా అనే ఊగిసలాటలో అక్కడి నుంచి సినిమా ఎంజాయ్ చెయ్యలేకపోయాను. అరె, నాని అయితే ఈ సీన్లో ఇంకా బాగా యాక్ట్ చేసి ఉంటాడేమో, అనుపమ కంటే నివేదా థామస్ బాగా చేసేదేమో అని అనిపిస్తూనే ఉంది. రీమేక్ సినిమాలతో వచ్చే తంటానే ఇదేమో, యెంత వద్దనుకున్నా కంపారిజన్ వచ్చేస్తుంది. పైగా 'హృదయం' హీరో మురళి కొడుకు అధర్వ గానీ, అనుపమ పరమేశ్వరన్ గానీ నాకెందుకో నచ్చరు, అది కూడా ఒక కారణం కావచ్చు.


పైగా ఇదే సినిమా ఫ్లేవర్ లో అభినందన, ప్రేమాలయం, ప్రేయసీ రావే, కన్యాదానం, శ్రీమతి వెళ్ళొస్తా లాంటి బోలెడు పాత సినిమాలు చూసినందువలన కూడా పెద్దగా నచ్చలేదు.


ఆ సినిమా చూడడం అయిపోయాక నా భార్యను కాస్త ఉడికిద్దామని  నేను కాలేజీలో చదివే రోజుల్లో నన్ను కూడా ఒక అమ్మాయి ప్రేమించింది కాకపోతే కులం-మతం, ఆస్తులు-అంతస్తులు, అప్పడాలు-వడియాలు, కోడి -పకోడీ లాంటి కారణాల వల్ల నేను తనని పెళ్లి చేసుకోలేకపోయాను. అప్పటి నుంచి తను ఇప్పటికీ పెళ్లి చేసుకోలేదు నన్ను తలుచుకుంటూ. ఇందాక చూసిన సినిమాలో లాగా తనని కూడా  మన ఇంటికి తీసుకొని వస్తే ఎలా ఉంటుంది ఒక్కసారి ఆలోచించు అన్నాను. 


నేను ఎక్స్పెక్ట్ చేసింది ఏమిటంటే .. "తీసుకురా నిన్ను, దాన్ని కలిపి చీపురు తిరగేస్తాను అంటుందని అనుకున్నా,  కానీ తను సింపుల్గా "ఆ పని చెయ్ పుణ్యం ఉంటుంది రోజూ ఈ వంట పని చేసే బాధ ఉండదు, అది ఉన్నన్ని రోజులు ఆ పని దానికి అప్పగిస్తే సరిపోతుంది." అంది 


అర్రే, పంచు నాకు పడిందే అనుకున్నా. 

5, మే 2022, గురువారం

మళ్ళీ ఫ్రైడ్ రైసా?

ఇది మునుపటి పోస్ట్ పోర్ట్ స్టీఫెన్స్ ట్రిప్ విశేషాలు కి కొనసాగింపు.


అది పేరుకు హోటల్ గానీ మాకు అలాట్ చేసిన యూనిట్ ఒక త్రీ బెడ్రూమ్ హౌస్. బయట స్విమ్మింగ్ పూల్ తో పాటు లోపల పెద్ద కిచెన్ ఉంది. ఆ రాత్రి పడుకొని ఉదయాన్నే లేచి కిచెన్ లో ఇండియన్ టీ పెట్టుకొని తాగి, ఇండియన్ బ్రేక్ఫాస్ట్ అయిన దోశ వేసుకొని తిని రూమ్ ఖాళీ చేసి వేల్ వాచింగ్ కోసం వెళ్ళిపోయాము. మేము స్టే చేసిన రూమ్ పక్కన ఉండే ఇండియన్ షాప్ లో పాల కోసం వెళ్తే దోశ పిండి దొరికింది మరి.


మధ్యాహ్నం థాయ్ రెస్టారెంట్ బయట మెనూ చూస్తూ - "ఏంటి ఫ్రైడ్ రైస్ 11 డాలర్ లేనా అంత తక్కువ రేట్ పెట్టాడు అంటే ఏదో డౌట్ కొడుతోంది, టూరిస్ట్ ప్లేస్ లో ఇంత తక్కువ లో దొరుకుతుందా? పైగా నిన్న రాత్రి ఇండియన్ రెస్టారెంట్ లో ఉప్పు లేని ఆ ఫ్రైడ్  రైస్ తిన్న తర్వాత మళ్ళీ ఈ సాహసం అవసరమా" అంది మా ఆవిడ.


సరే మనకు వేరే ఆప్షన్ ఏమన్నా ఉన్నాయా? మరో రెస్టారెంట్ కూడా దగ్గర్లో లేదు కాబట్టి ఇక్కడే ఏదో ఒకటి తినేసి వెళ్ళిపోదాం అన్నాను నేను లోపల సంబరపడిపోతూ తక్కువ రేటుకు ఫుడ్ దొరికినందుకు.


నా చిన్నప్పుడు మా ఊర్లో ఒక డాక్టర్ ఉండే వారు. ఆయన ఏదైనా సూది పొడిస్తే ఏంటి సారు అసలు చురుక్కుమనలేదు మీరు అసలు మంచి సూది మందు వేస్తున్నారా అని అడిగే వాళ్లట అక్కడి పల్లెటూరి వాళ్ళు. ఆయన మంచివాడే పాపం, మంచి ఇంజక్షన్ లే ఇచ్చేవాడు. ఒక్కోసారి ఆయన నవ్వుతూ ఇలా అనేవాడు. వీళ్లకు ఉప్పు, నీళ్లు కలిపి దాన్ని సిరంజీ లోకి ఎక్కిచ్చి వెయ్యాలి అప్పుడే వీళ్లు నన్ను నమ్ముతారు అనేవాడు. చురుక్కుమని కాస్త నొప్పి పుట్టేలా ఉండే ఇంజక్షన్ అయితే మంచిది అని వారి నమ్మకం. అయినా పెరటి చెట్టు వైద్యానికి పనికి రాదన్నట్లు మనూరి డాక్టర్ వేస్ట్, పక్కన పులివెందులలో ఉండే డాక్టర్ బెస్ట్ అనేది వాళ్ళ అభిప్రాయం.


వాళ్లనే కాదు ఎవరైనా ఇలాంటి అభిప్రాయంతోనే ఉంటారు రేటు తక్కువ పెడుతున్నారంటే డౌట్ పడుతుంటారు. ఏ మాటకా మాట చెప్పుకోవాలంటే మేము తిన్న ఆ ఫ్రైడ్ రైస్ టేస్ట్ చాలా బాగుంది అక్కడ.


మొన్న ఇండియన్ రెస్టారెంట్ లో ఉప్పు లేని ఆ ఫ్రైడ్  రైస్ తిన్న తర్వాత ఇంతకుముందు వెళ్ళిన ట్రిప్ లో జరిగిన ఒక ఇన్సిడెంట్ గుర్తొస్తోంది. పెరి పెరి చికెన్ పిజా ఆర్డర్ చేస్తే అందులో బేకన్ వేసి తెచ్చారు, అందుకు మేము రిపోర్ట్ చేస్తేవారు సారీ చెప్పి ఫ్రెష్ గా మరో పెరి పెరి చికెన్ పిజా తీసుకువచ్చి ఇవ్వడమే కాకుండా బిల్ లో ఆ పిజ్జా ఛార్జ్ చేయకుండా మా వైపు జరిగిన తప్పుకు కాంప్లిమెంటరీ ఇది అని చెప్పారు.

2, మే 2022, సోమవారం

పోర్ట్ స్టీఫెన్స్ ట్రిప్ విశేషాలు

మొన్న ఈస్టర్ లాంగ్ వీకెండ్ వచ్చిందని ఓ రెండ్రోజుల ట్రిప్ కోసం "పోర్ట్ స్టీఫెన్స్" అనే ప్లేస్ కి వెళ్ళాము . 

ఆ రోజు 'శాండ్ బోర్డింగ్' అని తలకి 40$, కామెల్ రైడ్ కి తలకో 30$ సమర్పించుకొని (ఈ శాండ్ బోర్డింగ్ మా పెన్నా నదిలో ఫ్రీ గా చెయ్యచ్చు, మా ఊరి తిరణాలలో 100 రూపాయలు పెట్టి ఈ కామెల్ రైడింగ్ చెయ్యొచ్చు, ఏమైనా శంఖం లో పోస్తేనే తీర్థం అయినట్లు డబ్బులు వదిలించుకుంటే గానీ సాటిస్ఫాక్షన్ రాదు) తర్వాత మోకాలి చిప్పలు నొప్పెట్టేవరకు కొండ పైకి ఎక్కేసి రాత్రి పది గంటల టైం లో ముందు రోజే బుక్ చేసుకున్న రిసార్ట్స్ కి వెళ్ళాము. 

మీరు బుక్ చేసుకున్న రూమ్ ఇక్కడికి మరో కిలోమీటర్ అని చెప్పి కీస్ ఇచ్చి మా వాడిని ఫాలో అయిపోండి తీసుకెళ్తాడు అని చెప్పింది రిసెప్షనిస్ట్ ఆఫీస్ క్లోజ్ చేస్తూ. వాడు మా ముందు బైక్ లో వెళ్తుంటే మేము వాడిని ఫాలో అయిపోయాము గుడ్డిగా. 

అదొక అపార్ట్మెంట్, అందులో ఒక ఫ్లోర్ లో ఉండే యూనిట్స్ అన్నీ ఈ హోటల్ వాడు కొనేసి వాటిని ఇలా పీక్ సీజన్లో హోటల్ గదులుగా అద్దెకి ఇస్తుంటాడు అన్న మాట. 

బాబూ, ఇక్కడ మంచి రెస్టారెంట్స్ ఉన్నాయా అంటే రెండు మూడు లోకల్ రెస్టారెంట్స్ పేరు చెప్పాడు గానీ ఉదయం నుంచి ఆ బర్గర్స్, పీజ్జాలు తిని నాలుక చప్పబడిపోయి ఉండటం వల్ల అలాగే అన్నానికి మొహం వాచి దగ్గర్లో ఇండియన్ రెస్టారెంట్స్ ఉన్నాయా అని అడిగితే వాచ్ లో టైం చూసుకొని '2 బ్రదర్స్' అనే ఒక ఇండియన్ రెస్టారెంట్ 3 కిలోమీటర్స్ దూరంలో ఉంది పదకొండు వరకు ఓపెన్ అన్నాడు. 

వెంటనే అక్కడి నుంచి మ్యాప్ పెట్టేసుకొని వెళ్ళి తిన్నాము. ఫ్రైడ్ రైస్ లో ఉప్పు లేదని అక్కడే ఉన్న వెయిటర్ ని పిలిచి ఇందులో ఉప్పు లేదు అని కంప్లైంట్ చేస్తే ఇదేమైనా పేస్టా ఉప్పు ఉండటానికి అనే రేంజ్ లో మెనూ కార్డు తెచ్చి ఇందులో సాల్ట్ వేస్తామని రాశామా? అంది. నేను షాక్ లోంచి తేరుకొని మరి ఈ చికెన్ కర్రీ లో వేస్తామని మెనూ లో రాయలేదు కదా మరెందుకు వేశారు అని అడిగేలోపే అక్కడినుంచి వెళ్ళిపోయింది. ఇక్కడికి వచ్చి తినేది టూరిస్ట్స్ మాత్రమే కదా ఒకసారి వచ్చిన వారు మళ్ళీ వస్తారని గారంటీ లేదనే 'డోంట్ కేర్ యాటిట్యూడ్' అయి ఉండచ్చు. 

భోజనం చేసి బయలుదేరే ముందు గుర్తొచ్చింది అర్రే! మనం స్టే చేసే ప్లేస్ అడ్రస్ నోట్ చేసుకోలేదు కదా, ఇప్పుడెలా అని. అప్పుడు ఆ రిసార్ట్స్ దగ్గరికి వెళ్లి అక్కడినుంచి గుడ్డిగా ఆ బైక్ వాడిని ఫాలో అయిన రోడ్ లను ఒక్కక్కటిగా సర్వే చేస్తూ వెనక్కి ముందుకు వెళ్ళి ఏదోలా ఆ ఇంటి అడ్రస్ పట్టేశాము. 

గూగుల్ మ్యాపులు గట్రా లేని రోజుల్లో చలామణిలో ఉన్న చిన్న జోక్ ఇప్పుడు:

ఒకతనికి ఇంట్లో ఉండే పెళ్ళంటా పాటు ఆవిడ పెంచుకునే కుక్క అన్నా ఇష్టం ఉండేది కాదట. అందుకని ఒక రోజు ఆ కుక్కను పెళ్ళాం చూడకుండా కార్ లోకి కుక్కేసి, ఒక రెండు మైళ్ళ దూరం తీసుకెళ్ళి వదిలేసి వచ్చాడట దాన్ని వదిలించుకోడానికి. 

అక్కడినుంచి అతను తిరిగి వచ్చి గారేజ్ లో కార్ పార్క్ చేసే లోపే ఆ కుక్క ఇంటికి చేరి మొరుగుతూ స్వాగతమిచ్చిందట. ఇలా కాదని మరుసటి రోజు ఒక 20 మైళ్ళ దూరంలో విడిచి వస్తే అతని కంటే ముందే అది ఇంటి చేరిందట, ఇలా కాదని ఒక 100 మైళ్ళ దూరానికి వెళ్ళి అక్కడ కుక్కను విడిచి ఇంటికి బయలుదేరాడట. ఒక నాలుగైదు గంటల తర్వాత ఇంటికి ఫోన్ చేసి కుక్క ఇంట్లో ఉందా అని అడిగాడట పెళ్ళాన్ని?

ఉంది గానీ ఇంత రాత్రి పూట చెప్పా పెట్టకుండా ఎక్కడికి వెళ్లిపోయారు అందట 

వస్తా గానీ ముందు కుక్కకు ఫోన్ ఇవ్వు, ఇంటికి దారి కనుక్కోవాలి మూడు నాలుగు గంటల నుంచి దారి తప్పిపోయి తిరుగుతున్నా అన్నాడట

అలా ఉండేవేమో అప్పట్లో తిప్పలు.  ఈ GPS, గూగుల్ మ్యాపులు లేకపోతే బైక్ రోడ్ లో ఆపేసి అటు పక్క ఉండే షాప్స్ వారినే లేదంటే ఆ రోడ్ లో ట్రావెల్ చేస్తున్న వారినో అడ్రస్ అడిగి వెళ్లిన రోజులు నాకింకా గుర్తే. 

26, ఏప్రిల్ 2022, మంగళవారం

రీమేకులకు ఇక కాలం చెల్లినట్లే

ఓ పది పన్నెండేళ్ళ క్రితం హీరో రాజశేఖర్ మీద ఒక మేకు జోకు బాగా వినిపించేది.

ఇంటర్వ్యూ కోసం ఒక విలేఖరి రాజశేఖర్ ఇంటికి వెళ్తాడు. సర్ వస్తారు కూర్చోండి అని ఒక సర్వెంట్ హాల్లోని సోఫాను చూపిస్తుంది. అతను సోఫా లో కూర్చొని ఉంటే ఆవిడ ఇల్లు క్లీన్ చేసే పనిలో ఉంటుంది. 

ఆ విలేఖరి ఇంటిని తేరిపార చూస్తూ అక్కడ కింద పడి ఉన్న ఒక మేకు ను గమనించి 'ఇదిగో అమ్మాయ్ ఇక్కడ మేకు పడి ఉంది తీసి ఎక్కడైనా పెట్టు' అని అంటాడు.

అయ్యో! మెల్లిగా మాట్లాడండి, మా అయ్య గారికి వినపడుతుంది అంటుందావిడ కంగారుగా

వినపడితే వచ్చే నష్టమేముందమ్మాయ్ .. మేకునే కదా నేను ఎత్తేయమన్నాను అంటాడు

అయ్యో మెల్లిగా మాట్లాడండి సర్ ..మేకు అనే మాట వినపడితే చాలు పూనకం వచ్చిన వాడిలా ఏదో ఒక సినిమా రీ'మేకు' రైట్స్ కొనడానికి తమిళనాడుకో, కేరళాకో బయల్దేరతారు అంటుంది మెల్లిగా. 

అప్పట్లో రాజశేఖర్ ఎక్కువగా రీమేక్ సినిమాలే చేస్తుండటం వల్ల వినపడ్డ జోక్ అది. ఇప్పటికీ 'శేఖర్' అనే రీమేక్ సినిమా చేస్తూ అదే జోన్ లోనే ఉంటున్నాడు "పరుగు ఆపడం ఒక కళ" అని అర్థం చేసుకోకుండా. ఇక ఇప్పుడు పవన్ కళ్యాణ్ విషయంలో కూడా ఆ జోక్ ని అన్వయించుకోవచ్చేమో...వకీల్ సాబ్, భీమ్లా నాయక్ అంటూ వరుసగా రీ-మేకులు దించుతున్నాడు. 

మొన్న "జిగర్ తాండ"/"గడ్డలకొండ గణేష్" సినిమాని "బచ్చన్ పాండే" అని రీమేక్ చేసి చేతులు కాల్చుకున్నారు, నిన్నటికి నిన్న జెర్సీ సినిమాతో మరో సారి  అదే రిపీట్ అయింది. పదేళ్ళ క్రితం పరభాషా సినిమాలు అతి తక్కువ మంది చూసేవారు కాబట్టి ఈ రీమేకులు వర్కౌట్ అయ్యేవి. ఇప్పుడు ప్రపంచసినిమాలని మన ఇంట్లోనే చూసే సౌలభ్యం కలిగాక ఈ రీమేకుల ను చూసే ఇంటరెస్ట్ జనాలలో తగ్గిపోయింది. 

ఏదో పవన్ కళ్యాణ్ కాబట్టి, అంతో ఇంతో పిచ్చిగా చూసే అభిమానులు ఉండబట్టి అతని రీమేక్ సినిమాలు కాస్తో కూస్తో బాగా ఆడి ఉండచ్చు కానీ మరో హీరో సినిమాలు అయితే బొక్క బోర్లా పడటం ఖాయం. పోను పోను ఆ మాత్రం కూడా ఆడతాయని నమ్మడానికి లేదు కాబట్టి పవన్ కళ్యాణ్ జాగ్రత్త పడటం మంచిది. 

పర భాషలో హిట్టయ్యింది కదా అని వందల కోట్లు కుమ్మరించి మళ్ళీ రీమేక్ అని తీయడం వల్ల లాభం లేదని ఈ పాటికే బచ్చన్ పాండే, జెర్సీ సినిమా నిర్మాతలకి అర్ధమయ్యే ఉంటుంది, అయినా ఇంకా పలు తెలుగు, తమిళ  సినిమాలని రీమేక్ చేస్తున్నారంటే వారి లెక్కలు వారికి ఉండే ఉండచ్చు. 

సూరారై పోట్రు / ఆకాశమే నీ హద్దురా  సినిమాని అక్షయ్ కుమార్ రీమేక్ చేస్తున్నారు. ఛత్రపతి సినిమాని మన బెల్లంకొండ హీరోగా రీమేక్ చేస్తున్నాడంటే ట్రోలర్స్ కి కావాల్సినంత స్టఫ్ ని బంగారు పళ్ళెం లో పెట్టి ఇవ్వడమే, ఇప్పటికే ఆ ఛత్రపతి  బెంగాళీ రీమేక్ సినిమా హీరో ని మన ప్రభాస్ తో పోల్చుతూ బోలెడంత కామెడీ చేశారు యూ ట్యూబ్ వీడియో లలో. 

ఇక తప్పని సరి తద్దినం అయిన మెగాస్టార్ సినిమా వస్తోంది, ఆ మెగా ఫామిలీ కి మా రెండెద్దుల ఫ్యామిలీ ఏ జన్మలోనే పడిన బాకీని ఈ జన్మలో ఇలా తీరుస్తున్నాను.  ఇలా మన రెండు తెలుగు రాష్ట్రాలలో ఎన్ని ఫామిలీస్ యెంత బాకీ పడ్డాయో గానీ ఆ బాకీ తీరే వరకూ ఈ తాత సినిమాలు ఆపేలా లేడు.  సినిమానో, సీరియలో లేదంటే షార్ట్ ఫిల్మో కూడా అర్థం కానంత సినిమాని వదిలాడు లెజెండ్ అనుకునే ఇంకో తాత.  ఘోరాతి ఘోరమైన హిట్టు అని వినిపించిన సినిమా వదిలాడు మరో తాత. కాకపోతే ఇవేవీ రీమేకులు కాకపోవడం మన అదృష్టం. 

"పరుగు ఆపడం ఒక కళ" అని ఈ తాతల వయసు హీరోలు తెలుసుకోలేరు, మనం అయినా తెలుసుకుంటే మంచిదేమో.