9, మే 2022, సోమవారం

అర్రే, పంచు నాకు పడిందే


యూట్యూబ్ లో 'తల్లి పోగాదే' (ఇలాగే పలకాలా, ఏమో తెలీదు మరి) అని కొత్త తమిళ్ సినిమా కనపడితే చూడటం మొదలెట్టాను. ఒక అరగంట అయిన తర్వాత 'ఉన్నట్టుండి గుండె వంద కొట్టుకుందే' పాట మ్యూజిక్ మొదలైనప్పుడు డౌట్ వచ్చింది అరే, ఇది మన తెలుగు సినిమా 'నిన్ను కోరి' లో పాట కదా అనుకున్నాను. కాసేపటి తర్వాత ఆ సినిమా రీమేకే నేను చూస్తున్న సినిమా అని అర్థమైంది. 'నిన్ను కోరి' సినిమా కాన్సెప్ట్ తెలుసు కానీ ఆ సినిమా చూడలేదు కాబట్టి పోల్చుకొని తెలిసేప్పటికి గంట సినిమా ముగిసింది. 


ఇక చూద్దామా వద్దా అనే ఊగిసలాటలో అక్కడి నుంచి సినిమా ఎంజాయ్ చెయ్యలేకపోయాను. అరె, నాని అయితే ఈ సీన్లో ఇంకా బాగా యాక్ట్ చేసి ఉంటాడేమో, అనుపమ కంటే నివేదా థామస్ బాగా చేసేదేమో అని అనిపిస్తూనే ఉంది. రీమేక్ సినిమాలతో వచ్చే తంటానే ఇదేమో, యెంత వద్దనుకున్నా కంపారిజన్ వచ్చేస్తుంది. పైగా 'హృదయం' హీరో మురళి కొడుకు అధర్వ గానీ, అనుపమ పరమేశ్వరన్ గానీ నాకెందుకో నచ్చరు, అది కూడా ఒక కారణం కావచ్చు.


పైగా ఇదే సినిమా ఫ్లేవర్ లో అభినందన, ప్రేమాలయం, ప్రేయసీ రావే, కన్యాదానం, శ్రీమతి వెళ్ళొస్తా లాంటి బోలెడు పాత సినిమాలు చూసినందువలన కూడా పెద్దగా నచ్చలేదు.


ఆ సినిమా చూడడం అయిపోయాక నా భార్యను కాస్త ఉడికిద్దామని  నేను కాలేజీలో చదివే రోజుల్లో నన్ను కూడా ఒక అమ్మాయి ప్రేమించింది కాకపోతే కులం-మతం, ఆస్తులు-అంతస్తులు, అప్పడాలు-వడియాలు, కోడి -పకోడీ లాంటి కారణాల వల్ల నేను తనని పెళ్లి చేసుకోలేకపోయాను. అప్పటి నుంచి తను ఇప్పటికీ పెళ్లి చేసుకోలేదు నన్ను తలుచుకుంటూ. ఇందాక చూసిన సినిమాలో లాగా తనని కూడా  మన ఇంటికి తీసుకొని వస్తే ఎలా ఉంటుంది ఒక్కసారి ఆలోచించు అన్నాను. 


నేను ఎక్స్పెక్ట్ చేసింది ఏమిటంటే .. "తీసుకురా నిన్ను, దాన్ని కలిపి చీపురు తిరగేస్తాను అంటుందని అనుకున్నా,  కానీ తను సింపుల్గా "ఆ పని చెయ్ పుణ్యం ఉంటుంది రోజూ ఈ వంట పని చేసే బాధ ఉండదు, అది ఉన్నన్ని రోజులు ఆ పని దానికి అప్పగిస్తే సరిపోతుంది." అంది 


అర్రే, పంచు నాకు పడిందే అనుకున్నా. 

5, మే 2022, గురువారం

మళ్ళీ ఫ్రైడ్ రైసా?

ఇది మునుపటి పోస్ట్ పోర్ట్ స్టీఫెన్స్ ట్రిప్ విశేషాలు కి కొనసాగింపు.


అది పేరుకు హోటల్ గానీ మాకు అలాట్ చేసిన యూనిట్ ఒక త్రీ బెడ్రూమ్ హౌస్. బయట స్విమ్మింగ్ పూల్ తో పాటు లోపల పెద్ద కిచెన్ ఉంది. ఆ రాత్రి పడుకొని ఉదయాన్నే లేచి కిచెన్ లో ఇండియన్ టీ పెట్టుకొని తాగి, ఇండియన్ బ్రేక్ఫాస్ట్ అయిన దోశ వేసుకొని తిని రూమ్ ఖాళీ చేసి వేల్ వాచింగ్ కోసం వెళ్ళిపోయాము. మేము స్టే చేసిన రూమ్ పక్కన ఉండే ఇండియన్ షాప్ లో పాల కోసం వెళ్తే దోశ పిండి దొరికింది మరి.


మధ్యాహ్నం థాయ్ రెస్టారెంట్ బయట మెనూ చూస్తూ - "ఏంటి ఫ్రైడ్ రైస్ 11 డాలర్ లేనా అంత తక్కువ రేట్ పెట్టాడు అంటే ఏదో డౌట్ కొడుతోంది, టూరిస్ట్ ప్లేస్ లో ఇంత తక్కువ లో దొరుకుతుందా? పైగా నిన్న రాత్రి ఇండియన్ రెస్టారెంట్ లో ఉప్పు లేని ఆ ఫ్రైడ్  రైస్ తిన్న తర్వాత మళ్ళీ ఈ సాహసం అవసరమా" అంది మా ఆవిడ.


సరే మనకు వేరే ఆప్షన్ ఏమన్నా ఉన్నాయా? మరో రెస్టారెంట్ కూడా దగ్గర్లో లేదు కాబట్టి ఇక్కడే ఏదో ఒకటి తినేసి వెళ్ళిపోదాం అన్నాను నేను లోపల సంబరపడిపోతూ తక్కువ రేటుకు ఫుడ్ దొరికినందుకు.


నా చిన్నప్పుడు మా ఊర్లో ఒక డాక్టర్ ఉండే వారు. ఆయన ఏదైనా సూది పొడిస్తే ఏంటి సారు అసలు చురుక్కుమనలేదు మీరు అసలు మంచి సూది మందు వేస్తున్నారా అని అడిగే వాళ్లట అక్కడి పల్లెటూరి వాళ్ళు. ఆయన మంచివాడే పాపం, మంచి ఇంజక్షన్ లే ఇచ్చేవాడు. ఒక్కోసారి ఆయన నవ్వుతూ ఇలా అనేవాడు. వీళ్లకు ఉప్పు, నీళ్లు కలిపి దాన్ని సిరంజీ లోకి ఎక్కిచ్చి వెయ్యాలి అప్పుడే వీళ్లు నన్ను నమ్ముతారు అనేవాడు. చురుక్కుమని కాస్త నొప్పి పుట్టేలా ఉండే ఇంజక్షన్ అయితే మంచిది అని వారి నమ్మకం. అయినా పెరటి చెట్టు వైద్యానికి పనికి రాదన్నట్లు మనూరి డాక్టర్ వేస్ట్, పక్కన పులివెందులలో ఉండే డాక్టర్ బెస్ట్ అనేది వాళ్ళ అభిప్రాయం.


వాళ్లనే కాదు ఎవరైనా ఇలాంటి అభిప్రాయంతోనే ఉంటారు రేటు తక్కువ పెడుతున్నారంటే డౌట్ పడుతుంటారు. ఏ మాటకా మాట చెప్పుకోవాలంటే మేము తిన్న ఆ ఫ్రైడ్ రైస్ టేస్ట్ చాలా బాగుంది అక్కడ.


మొన్న ఇండియన్ రెస్టారెంట్ లో ఉప్పు లేని ఆ ఫ్రైడ్  రైస్ తిన్న తర్వాత ఇంతకుముందు వెళ్ళిన ట్రిప్ లో జరిగిన ఒక ఇన్సిడెంట్ గుర్తొస్తోంది. పెరి పెరి చికెన్ పిజా ఆర్డర్ చేస్తే అందులో బేకన్ వేసి తెచ్చారు, అందుకు మేము రిపోర్ట్ చేస్తేవారు సారీ చెప్పి ఫ్రెష్ గా మరో పెరి పెరి చికెన్ పిజా తీసుకువచ్చి ఇవ్వడమే కాకుండా బిల్ లో ఆ పిజ్జా ఛార్జ్ చేయకుండా మా వైపు జరిగిన తప్పుకు కాంప్లిమెంటరీ ఇది అని చెప్పారు.

2, మే 2022, సోమవారం

పోర్ట్ స్టీఫెన్స్ ట్రిప్ విశేషాలు

మొన్న ఈస్టర్ లాంగ్ వీకెండ్ వచ్చిందని ఓ రెండ్రోజుల ట్రిప్ కోసం "పోర్ట్ స్టీఫెన్స్" అనే ప్లేస్ కి వెళ్ళాము . 

ఆ రోజు 'శాండ్ బోర్డింగ్' అని తలకి 40$, కామెల్ రైడ్ కి తలకో 30$ సమర్పించుకొని (ఈ శాండ్ బోర్డింగ్ మా పెన్నా నదిలో ఫ్రీ గా చెయ్యచ్చు, మా ఊరి తిరణాలలో 100 రూపాయలు పెట్టి ఈ కామెల్ రైడింగ్ చెయ్యొచ్చు, ఏమైనా శంఖం లో పోస్తేనే తీర్థం అయినట్లు డబ్బులు వదిలించుకుంటే గానీ సాటిస్ఫాక్షన్ రాదు) తర్వాత మోకాలి చిప్పలు నొప్పెట్టేవరకు కొండ పైకి ఎక్కేసి రాత్రి పది గంటల టైం లో ముందు రోజే బుక్ చేసుకున్న రిసార్ట్స్ కి వెళ్ళాము. 

మీరు బుక్ చేసుకున్న రూమ్ ఇక్కడికి మరో కిలోమీటర్ అని చెప్పి కీస్ ఇచ్చి మా వాడిని ఫాలో అయిపోండి తీసుకెళ్తాడు అని చెప్పింది రిసెప్షనిస్ట్ ఆఫీస్ క్లోజ్ చేస్తూ. వాడు మా ముందు బైక్ లో వెళ్తుంటే మేము వాడిని ఫాలో అయిపోయాము గుడ్డిగా. 

అదొక అపార్ట్మెంట్, అందులో ఒక ఫ్లోర్ లో ఉండే యూనిట్స్ అన్నీ ఈ హోటల్ వాడు కొనేసి వాటిని ఇలా పీక్ సీజన్లో హోటల్ గదులుగా అద్దెకి ఇస్తుంటాడు అన్న మాట. 

బాబూ, ఇక్కడ మంచి రెస్టారెంట్స్ ఉన్నాయా అంటే రెండు మూడు లోకల్ రెస్టారెంట్స్ పేరు చెప్పాడు గానీ ఉదయం నుంచి ఆ బర్గర్స్, పీజ్జాలు తిని నాలుక చప్పబడిపోయి ఉండటం వల్ల అలాగే అన్నానికి మొహం వాచి దగ్గర్లో ఇండియన్ రెస్టారెంట్స్ ఉన్నాయా అని అడిగితే వాచ్ లో టైం చూసుకొని '2 బ్రదర్స్' అనే ఒక ఇండియన్ రెస్టారెంట్ 3 కిలోమీటర్స్ దూరంలో ఉంది పదకొండు వరకు ఓపెన్ అన్నాడు. 

వెంటనే అక్కడి నుంచి మ్యాప్ పెట్టేసుకొని వెళ్ళి తిన్నాము. ఫ్రైడ్ రైస్ లో ఉప్పు లేదని అక్కడే ఉన్న వెయిటర్ ని పిలిచి ఇందులో ఉప్పు లేదు అని కంప్లైంట్ చేస్తే ఇదేమైనా పేస్టా ఉప్పు ఉండటానికి అనే రేంజ్ లో మెనూ కార్డు తెచ్చి ఇందులో సాల్ట్ వేస్తామని రాశామా? అంది. నేను షాక్ లోంచి తేరుకొని మరి ఈ చికెన్ కర్రీ లో వేస్తామని మెనూ లో రాయలేదు కదా మరెందుకు వేశారు అని అడిగేలోపే అక్కడినుంచి వెళ్ళిపోయింది. ఇక్కడికి వచ్చి తినేది టూరిస్ట్స్ మాత్రమే కదా ఒకసారి వచ్చిన వారు మళ్ళీ వస్తారని గారంటీ లేదనే 'డోంట్ కేర్ యాటిట్యూడ్' అయి ఉండచ్చు. 

భోజనం చేసి బయలుదేరే ముందు గుర్తొచ్చింది అర్రే! మనం స్టే చేసే ప్లేస్ అడ్రస్ నోట్ చేసుకోలేదు కదా, ఇప్పుడెలా అని. అప్పుడు ఆ రిసార్ట్స్ దగ్గరికి వెళ్లి అక్కడినుంచి గుడ్డిగా ఆ బైక్ వాడిని ఫాలో అయిన రోడ్ లను ఒక్కక్కటిగా సర్వే చేస్తూ వెనక్కి ముందుకు వెళ్ళి ఏదోలా ఆ ఇంటి అడ్రస్ పట్టేశాము. 

గూగుల్ మ్యాపులు గట్రా లేని రోజుల్లో చలామణిలో ఉన్న చిన్న జోక్ ఇప్పుడు:

ఒకతనికి ఇంట్లో ఉండే పెళ్ళంటా పాటు ఆవిడ పెంచుకునే కుక్క అన్నా ఇష్టం ఉండేది కాదట. అందుకని ఒక రోజు ఆ కుక్కను పెళ్ళాం చూడకుండా కార్ లోకి కుక్కేసి, ఒక రెండు మైళ్ళ దూరం తీసుకెళ్ళి వదిలేసి వచ్చాడట దాన్ని వదిలించుకోడానికి. 

అక్కడినుంచి అతను తిరిగి వచ్చి గారేజ్ లో కార్ పార్క్ చేసే లోపే ఆ కుక్క ఇంటికి చేరి మొరుగుతూ స్వాగతమిచ్చిందట. ఇలా కాదని మరుసటి రోజు ఒక 20 మైళ్ళ దూరంలో విడిచి వస్తే అతని కంటే ముందే అది ఇంటి చేరిందట, ఇలా కాదని ఒక 100 మైళ్ళ దూరానికి వెళ్ళి అక్కడ కుక్కను విడిచి ఇంటికి బయలుదేరాడట. ఒక నాలుగైదు గంటల తర్వాత ఇంటికి ఫోన్ చేసి కుక్క ఇంట్లో ఉందా అని అడిగాడట పెళ్ళాన్ని?

ఉంది గానీ ఇంత రాత్రి పూట చెప్పా పెట్టకుండా ఎక్కడికి వెళ్లిపోయారు అందట 

వస్తా గానీ ముందు కుక్కకు ఫోన్ ఇవ్వు, ఇంటికి దారి కనుక్కోవాలి మూడు నాలుగు గంటల నుంచి దారి తప్పిపోయి తిరుగుతున్నా అన్నాడట

అలా ఉండేవేమో అప్పట్లో తిప్పలు.  ఈ GPS, గూగుల్ మ్యాపులు లేకపోతే బైక్ రోడ్ లో ఆపేసి అటు పక్క ఉండే షాప్స్ వారినే లేదంటే ఆ రోడ్ లో ట్రావెల్ చేస్తున్న వారినో అడ్రస్ అడిగి వెళ్లిన రోజులు నాకింకా గుర్తే. 

26, ఏప్రిల్ 2022, మంగళవారం

రీమేకులకు ఇక కాలం చెల్లినట్లే

ఓ పది పన్నెండేళ్ళ క్రితం హీరో రాజశేఖర్ మీద ఒక మేకు జోకు బాగా వినిపించేది.

ఇంటర్వ్యూ కోసం ఒక విలేఖరి రాజశేఖర్ ఇంటికి వెళ్తాడు. సర్ వస్తారు కూర్చోండి అని ఒక సర్వెంట్ హాల్లోని సోఫాను చూపిస్తుంది. అతను సోఫా లో కూర్చొని ఉంటే ఆవిడ ఇల్లు క్లీన్ చేసే పనిలో ఉంటుంది. 

ఆ విలేఖరి ఇంటిని తేరిపార చూస్తూ అక్కడ కింద పడి ఉన్న ఒక మేకు ను గమనించి 'ఇదిగో అమ్మాయ్ ఇక్కడ మేకు పడి ఉంది తీసి ఎక్కడైనా పెట్టు' అని అంటాడు.

అయ్యో! మెల్లిగా మాట్లాడండి, మా అయ్య గారికి వినపడుతుంది అంటుందావిడ కంగారుగా

వినపడితే వచ్చే నష్టమేముందమ్మాయ్ .. మేకునే కదా నేను ఎత్తేయమన్నాను అంటాడు

అయ్యో మెల్లిగా మాట్లాడండి సర్ ..మేకు అనే మాట వినపడితే చాలు పూనకం వచ్చిన వాడిలా ఏదో ఒక సినిమా రీ'మేకు' రైట్స్ కొనడానికి తమిళనాడుకో, కేరళాకో బయల్దేరతారు అంటుంది మెల్లిగా. 

అప్పట్లో రాజశేఖర్ ఎక్కువగా రీమేక్ సినిమాలే చేస్తుండటం వల్ల వినపడ్డ జోక్ అది. ఇప్పటికీ 'శేఖర్' అనే రీమేక్ సినిమా చేస్తూ అదే జోన్ లోనే ఉంటున్నాడు "పరుగు ఆపడం ఒక కళ" అని అర్థం చేసుకోకుండా. ఇక ఇప్పుడు పవన్ కళ్యాణ్ విషయంలో కూడా ఆ జోక్ ని అన్వయించుకోవచ్చేమో...వకీల్ సాబ్, భీమ్లా నాయక్ అంటూ వరుసగా రీ-మేకులు దించుతున్నాడు. 

మొన్న "జిగర్ తాండ"/"గడ్డలకొండ గణేష్" సినిమాని "బచ్చన్ పాండే" అని రీమేక్ చేసి చేతులు కాల్చుకున్నారు, నిన్నటికి నిన్న జెర్సీ సినిమాతో మరో సారి  అదే రిపీట్ అయింది. పదేళ్ళ క్రితం పరభాషా సినిమాలు అతి తక్కువ మంది చూసేవారు కాబట్టి ఈ రీమేకులు వర్కౌట్ అయ్యేవి. ఇప్పుడు ప్రపంచసినిమాలని మన ఇంట్లోనే చూసే సౌలభ్యం కలిగాక ఈ రీమేకుల ను చూసే ఇంటరెస్ట్ జనాలలో తగ్గిపోయింది. 

ఏదో పవన్ కళ్యాణ్ కాబట్టి, అంతో ఇంతో పిచ్చిగా చూసే అభిమానులు ఉండబట్టి అతని రీమేక్ సినిమాలు కాస్తో కూస్తో బాగా ఆడి ఉండచ్చు కానీ మరో హీరో సినిమాలు అయితే బొక్క బోర్లా పడటం ఖాయం. పోను పోను ఆ మాత్రం కూడా ఆడతాయని నమ్మడానికి లేదు కాబట్టి పవన్ కళ్యాణ్ జాగ్రత్త పడటం మంచిది. 

పర భాషలో హిట్టయ్యింది కదా అని వందల కోట్లు కుమ్మరించి మళ్ళీ రీమేక్ అని తీయడం వల్ల లాభం లేదని ఈ పాటికే బచ్చన్ పాండే, జెర్సీ సినిమా నిర్మాతలకి అర్ధమయ్యే ఉంటుంది, అయినా ఇంకా పలు తెలుగు, తమిళ  సినిమాలని రీమేక్ చేస్తున్నారంటే వారి లెక్కలు వారికి ఉండే ఉండచ్చు. 

సూరారై పోట్రు / ఆకాశమే నీ హద్దురా  సినిమాని అక్షయ్ కుమార్ రీమేక్ చేస్తున్నారు. ఛత్రపతి సినిమాని మన బెల్లంకొండ హీరోగా రీమేక్ చేస్తున్నాడంటే ట్రోలర్స్ కి కావాల్సినంత స్టఫ్ ని బంగారు పళ్ళెం లో పెట్టి ఇవ్వడమే, ఇప్పటికే ఆ ఛత్రపతి  బెంగాళీ రీమేక్ సినిమా హీరో ని మన ప్రభాస్ తో పోల్చుతూ బోలెడంత కామెడీ చేశారు యూ ట్యూబ్ వీడియో లలో. 

ఇక తప్పని సరి తద్దినం అయిన మెగాస్టార్ సినిమా వస్తోంది, ఆ మెగా ఫామిలీ కి మా రెండెద్దుల ఫ్యామిలీ ఏ జన్మలోనే పడిన బాకీని ఈ జన్మలో ఇలా తీరుస్తున్నాను.  ఇలా మన రెండు తెలుగు రాష్ట్రాలలో ఎన్ని ఫామిలీస్ యెంత బాకీ పడ్డాయో గానీ ఆ బాకీ తీరే వరకూ ఈ తాత సినిమాలు ఆపేలా లేడు.  సినిమానో, సీరియలో లేదంటే షార్ట్ ఫిల్మో కూడా అర్థం కానంత సినిమాని వదిలాడు లెజెండ్ అనుకునే ఇంకో తాత.  ఘోరాతి ఘోరమైన హిట్టు అని వినిపించిన సినిమా వదిలాడు మరో తాత. కాకపోతే ఇవేవీ రీమేకులు కాకపోవడం మన అదృష్టం. 

"పరుగు ఆపడం ఒక కళ" అని ఈ తాతల వయసు హీరోలు తెలుసుకోలేరు, మనం అయినా తెలుసుకుంటే మంచిదేమో. 

24, మార్చి 2022, గురువారం

RRR Review - బాక్సాఫీస్ బద్దలే

 RRR టికెట్స్ బుక్ చేద్దామని సైట్ ఓపెన్ చేస్తే 28$ అని వెక్కిరించింది. మొన్న 20$ పెట్టి భీమ్లా నాయక్ చూసొచ్చాము, ఇప్పుడు ఈ సినిమాని ఆస్ట్రేలియా వరకు 1.5 మిలియాన్ డాలర్లు పెట్టి డిస్ట్రిబ్యూట్ చేశారు కాబట్టి రికవరీ కోసం టికెట్ రేట్స్ ఎక్కువ పెట్టారని తెలిసింది. మా టికెట్స్ వరకు ఓకే గానీ మా పిల్లలు ఈ సినిమాలు చూడరు ఆ డబ్బు మాత్రం కృష్ణార్పణం అనుకోవాల్సిందే. మాకు నలుగురికి కలిపి 125$ దాకా సమర్పించుకోవాలి అవసరమా అనిపించి నెక్స్ట్ వీక్ టికెట్ రేట్స్ $25 కి తగ్గిస్తే వెళదాం లేదంటే ఇంకో 3 నెలల తర్వాత టీవీ లో చూద్దాం అని డిసైడ్ అయ్యాం. 

"ముష్టి మూడు డాలర్ల కోసం మూడు రోజులు సినిమా చూడటం వాయిదా వేస్తావా, టికెట్ రేట్స్ తగ్గించకపోతే OTT కి వచ్చినప్పుడు టీవీ లో చూస్తావా? అసలు థియేటర్ లో చూడాల్సిన సినిమాలు కొన్ని ఉంటాయి, భీమ్లా నాయక్ లాంటి సినిమాలు థియేటర్ లో చూడకపోయినా వచ్చే నష్టం లేదు ఏదో పవన్ కళ్యాణ్ ఫ్యాన్ వి కాబట్టి చూసావు సరే. ఒకప్పుడు ఎవడు, వన్ నేనొక్కడినే లాంటి సినిమాలకు 35$ ఖర్చు పెట్టి మరీ వెళ్ళావు మరి ఇప్పుడు నీలోని సినిమా ప్రేమ తగ్గిపోయిందా?అసలు RRR లాంటి సినిమాలు థియేటర్ లోనే చూడాల్సిందే అని నీకు తెలీదా" అని నా లోని సినిమా ప్రేమికుడు రాత్రి కలలోకి వచ్చి క్లాస్ పీకితే జ్ఞానోదయమై ఉదయాన్నే పిల్లలను స్కూల్ లో దిగబెట్టివచ్చి నీ పని కావాలంటే సాయంకాలం చేసిపెడతా, ఓ నాలుగు గంటలు నన్ను వొగ్గేయి దొరా బాంచన్ నీ కాల్మొక్కుతా అని మా బాస్ ని ఉదయం స్టాండప్ కాల్ లో బతిమాలుకొని టికెట్స్ బుక్ చేసేసుకొని మా ఆవిడతో పాటు 10 గంటల షోకి వెళ్ళిపోయాను. 

నాలాంటి సినిమా ప్రేమికులు చాలా మంది ఉన్నారని అర్థం అయింది థియేటర్ లోనికి వెళ్ళగానే. సినిమా మొదలవగానే షరా మామూలే విజిల్స్ కేకలు, మా ఊర్లో థియేటర్ లో చూసిన ఫీలింగ్ కలిగింది. 

అబ్బో, బాణానికి బాంబును జోడించి వదలడాలు, సైన్స్ పాఠాలు మొత్తం తప్పు అని నిరూపిస్తూ రాజమౌళి ఇద్దరు హీరోలతో సినిమాలో చేయించిన విన్యాసాలు పెద్ద స్క్రీన్ లో చూసి తీరాల్సిందే. ఎన్ని ఇంగ్లీష్ సినిమాల లోంచి కొట్టుకొచ్చాడో ఒక్కొక్కరు బయట పెట్టి ట్రోలింగ్ చేస్తారేమో రాజమౌళి ని త్వరలో.  తన గ్యాంగ్ తో బ్రిటిష్ వారి కోటలోకి చొరపడే సీన్లో అడవి మృగాలతో కలిసి ఎన్టీఆర్ ట్రక్ లోంచి దూకే సన్నివేశం అయితే ఫాన్స్ కి పూనకాలు తెప్పిస్తుంది. 

మొదటి సగం ఇద్దరు హీరోల ఫ్రెండ్ షిప్ తో ఇంటరెస్టింగ్ గా నడిస్తే, రెండవ సగం కాస్త స్లో అయినా సినిమా పూర్తయ్యేసరికి పెట్టిన డబ్బులకు, సమయానికి సరైన న్యాయం చేసి పంపిస్తారు రాజమౌళి. ఒక టైం లో ఫైటింగ్స్ గట్రా కాస్త మితిమీరినట్లు అనిపిస్తాయి గానీ కాస్త ఓపికపడితే ప్రాబ్లెమ్ ఏమీ లేదు. మాస్ క్యారెక్టర్ కాబట్టి సినిమాలో తక్కెడ కాస్త ఎన్టీఆర్ వైపే తూగినట్లు అనిపిస్తుంది, ఇక చరణ్ నటనలో ఇంప్రూవ్ అయ్యాడో లేక నేనే అలవాటు పడ్డానో తెలీదు గానీ మరింత నచ్చేశాడు.  చరణ్ ని అల్లూరి సీతా రామరాజు గా ప్రొజెక్ట్ చేయడానికి పెట్టిన కొన్ని లీడ్ సీన్స్ ఫోర్స్ గా అనిపిస్తాయి. ఇంతకి మించి చెబితే స్పాయిలర్ అయ్యే ప్రమాదం ఉంది. 

మొత్తానికి సినిమా అయితే బంపర్ హిట్ అయ్యే అవకాశాలే ఎక్కువగా ఉన్నాయి. సినిమా లో ఎమోషన్ బాగా పండింది. మొదటి సీన్ తో మొదలయ్యే ఎమోషన్ అలా కంటిన్యూ అవుతూనే ఉంటుంది, రాజమౌళి సినిమాలకి మిగతా డైరెక్టర్స్ సినిమాకి అదే తేడా. 

ఇక అజయ్ దేవగన్, శ్రీయ, అలియా భట్ వీళ్ళంతా మెరుపు తీగలే. సినిమా మొత్తం హీరోలిద్దరే కనపడుతూ ఉంటారు. 

The StoRy

The WateR

The FiRe

అని సినిమా స్టోరీ అంతా నీటిని, నిప్పును బాగా వాడుకున్నాడు ఇద్దరు హీరోలను రెప్రజెంట్ చేస్తూ.

23, మార్చి 2022, బుధవారం

ఓల్డెస్ట్ లివింగ్ పర్సన్

125 సంవత్సరాల స్వామి శివానంద గారికి పద్మశ్రీ అవార్డు ఇవ్వడం నిజంగా సంతోషించదగ్గ విషయం. నిన్న మాత్రమే ఈయన గురించి మొదటి సారి విన్నాను, నాకు పెద్దగా లోక జ్ఞానం లేకపోవడం ఒక కారణం కావచ్చు.

కాకపోతే ఓల్డెస్ట్ లివింగ్ పర్సన్ గా నైనా ఇతని గురించి విని ఉండాలి కదా, అది కూడా జరగలేదే అని గూగుల్ చేస్తే రిజల్ట్స్ డిఫరెంట్ డిఫరెంట్ గా ఉన్నాయి. 

ఈ స్వామి శివానంద వారి బర్త్ డేట్ ని ధ్రువపరిచే సర్టిఫికెట్స్ లేకపోవడం లాంటి వాటి వలన ఇతన్ని 'ఓల్డెస్ట్ లివింగ్ పర్సన్' గా రికార్డ్స్ లో ఉంచలేదా అని నా అనుమానం. 

గిన్నీస్ రికార్డ్స్ ప్రకారం ఓల్డెస్ట్ లివింగ్ పర్సన్ ఒక జపనీస్ వ్యక్తి అని చూపుతోంది. 



ఓల్డెస్ట్ లివింగ్ పర్సన్ ఇన్ ఇండియా అని చూస్తే స్వామి శివానంద గారిని చూపెడుతోంది. అంటే ఇండియా 'వరల్డ్' లో లేదా ఏమిటి??



రామాయణం లో పిడకల వేటలా ఏమిటీ చచ్చు ప్రశ్నలు అంటారా? ఊరికే, సమాధానం ఎవరికైనా తెలిసి ఉండచ్చేమో అని ఇలా పోస్ట్ చేయడం అంతే. 




26, జనవరి 2022, బుధవారం

సినిమా జ్ఞాపకాలు - మండే సూర్యుడు

నా  తొమ్మిదవ తరగతి మిత్రుడు ముగ్ధుమ్ కు వీడ్కోలు చెబుతున్న సమయం అది. మా నాన్నగారికి కర్నూల్ జిల్లా పత్తికొండ నుంచి కడప కి ట్రాన్స్ఫర్ అయ్యింది. (ఇప్పుడు ఈ జిల్లాల పేర్లు అలానే ఉంచారో లేక నిన్న విడుదల చేసిన జాబితాలో మార్చేశారో తెలీదు) 

సరిగ్గా మేము ఆ పత్తికొండ లో ఉన్నది ఒక్క సంవత్సరమే అయినా ఆ కొద్ది సమయం లోనే నా  మనసుకు దగ్గరయిన మిత్రుడు ముగ్ధుమ్ అని చెప్పగలను. అప్పట్లో మా వయసుకి  సినిమా మాత్రమే సరదా కాబట్టి చివరి రోజు ఇద్దరం కలిసి సినిమాకి వెళ్ళాలని డిసైడ్ చేసుకున్నాం. 

అప్పట్లో ఆ ఊర్లో ఉన్నది  రెండు థియేటర్స్, ఒక దాంట్లో మేము చూసేసిన సినిమా ఏదో ఆడుతోంది కాబట్టి రెండో దాంట్లో ఏ సినిమా ఆడుతుందో దానికే వెళ్ళాలని డిసైడ్ చేసుకున్నాం. 

ఆ రెండో థియేటర్ లో 'మండే సూర్యుడు' అనబడే తెలుగు లోకి డబ్ చేసిన తమిళ్ సినిమా ఆడుతోంది. సైడ్ క్యారెక్టర్, విలన్ లేదంటే సెకండ్ హీరో వేషాలేసుకొనే అతను ఆ సినిమాలో  హీరో అని బయట సినిమా పోస్టర్ చూస్తే అర్థం అయింది. నిజంగా చెప్పాలంటే అతన్ని స్టువర్ట్ పురం పోలీసుస్టేషన్  సినిమాలో  విలన్ గా, గ్యాంగ్ లీడర్ సినిమాలో చిరంజీవి  అన్నగా చూసినట్లు గుర్తు కానీ అతని పేరు అప్పటివరకూ రిజిస్టర్ కాలేదు. అంతే కాకుండా 'కెప్టెన్ ప్రభాకర్' అనే తమిళ్ సినిమా లో కూడా చూశాను కానీ అతను బాగా గుర్తుండి పోయింది మాత్రం వెంకటేష్ నటించిన  సూర్య I.P.S సినిమాలో, అదేమంత బంపర్ హిట్ కాదు గానీ ఆ రోజుల్లో బానే ఆడింది.

ఆ సినిమాలో ఒక బాక్సింగ్ పోటీలో అతని చేతిలో వెంకటేష్  ఓడిపోతాడు. అప్పటికే వెంకటేష్ మంచి కమర్షియల్ హిట్లతో స్టార్ల లిస్ట్ లో చేరిపోయినా  క్యారెక్టర్ కోసం వెంకటేష్ ఎలాంటి సీన్స్ అయినా చేసేవాడు. మిగతా స్టార్ హీరోల లాగా ఇగో ల మాటున ఇరుక్కోవడం అప్పటి నుంచే లేదు అతనికి. ఆ సినిమాలో పోలీస్ ట్రైనర్ క్యారెక్టర్ లో అతని బాడీ లాంగ్వేజ్, పర్సనాలిటీ మాత్రం బాగా నచ్చింది. అర్రె, హీరో అంటే ఇలా కదా ఉండాలి, ఇతనెందుకు హీరో కాకూడదు అనుకున్నాను అప్పట్లో. 

సో అప్పుడెప్పుడో అనుకున్నది కళ్ళ ఎదురుగా జరగడం చూసి ఆ సినిమాకే వెళదామని డిసైడ్ అయ్యాం. మరి తక్కువ అంచనాలతో చూడటం వల్లో, లేదంటే సినిమా నిజంగానే బాగుండటం వల్లో మాకు విపరీతంగా నచ్చేసింది 'మండే సూర్యుడు' అనబడే ఆ సినిమా. ఆ తర్వాతే తెలిసింది అతని  పేరు శరత్ కుమార్ అని. 

ఆ తర్వాత ఈ 'మండే సూర్యుడు' సినిమా ఎప్పుడూ చూడలేదు, మళ్ళీ చూసినా నచ్చుతుంది అన్న గారంటీ లేదు, కొన్ని సినిమాలు ఆ కాలానికే నచ్చుతాయి అంతే. చిన్నప్పుడు పల్లెల్లో ఉండటం వల్ల  ఖైదీ సినిమా చూళ్ళేదు, 1995 టైం లో అనుకుంటా ఒక సారి చూశాను. నాకేం పెద్ద నచ్చలేదు. ఏముందని ఈ సినిమాలో అంత హిట్టయ్యింది అని అనిపించింది కానీ కాలం తో జరిగే మార్పుల ప్రభావం అది అని అప్పుడు నాకు అర్థం కాలేదు. క్లాస్ సినిమాల మాటేమో గానీ మాస్ సినిమాలకెప్పుడూ కాలం గడిచిన తర్వాత కూడా ఆదరణ దక్కుతుందని చెప్పలేము.  

'మండే సూర్యుడు' అనే టైటిల్ తోనే  ఆర్య హీరోగా ఒక డబ్బింగ్ సినిమా నిన్న యూట్యూబ్ లో చూశాను, అప్పుడు ఈ పాత జ్ఞాపకాలు గుర్తొచ్చి ఇలా పోస్ట్ రాసేశాను.  వీలయితే చూడండి సినిమా బానే ఉంటుంది పోకిరి సినిమా ఫ్లేవర్ కనపడుతుంది ఈ సినిమాలో.