30, జనవరి 2019, బుధవారం

బ్లడీ ఇండియన్ పేరెంట్స్ మైండ్ సెట్

బిజీ ఏం లేదు నాన్నా, ఇప్పుడే రూంకి వచ్చా.. నువ్వు ఫోన్ చేశావు.   

అదేరా, డబ్బులు?

నెల నెలా పంపిస్తున్నట్లు నిన్న కూడా ఇరవై వేలు పంపించానుగా నా జీతం లోంచి, ఇంకేం?

జీతం డబ్బులేవో ఈ నెల నుంచి పదివేలు పెరిగాయని పార్టీ ఇచ్చావటగా మన సుబ్బు గాడు చెప్పాడు

అయితే ఇప్పుడేమంటావ్?

పది వేలు నువ్వొక్కడివే ఏం చేసుకుంటావ్, అందులోంచి 8 వేలు పంపరా, అమ్మకు మందులు, పంటకు పురుగుల మందులు కొనాలి. 

ఈ వయసులో ఇప్పుడా నష్టాలొచ్చే వ్యవసాయం చేయకపోతే వచ్చే నష్టమేమి నాన్నా? 

నువ్వే అన్నావు గదరా వ్యవసాయం అని అందులోనే సాయం ఉందిరా, కష్టమో, నష్టమో ఈ రైతులు ప్రపంచానికి చేస్తున్న సాయమే ఈ వ్యవసాయం. 

అయినా ఇప్పుడా సాయం అదే వ్యవసాయం చేసి ఎవరిని ఉద్దరించాలని?

అందరూ అలా అనుకుంటే తినడానికి కరెన్సీ కట్టలు తప్ప కూడు ఉండదురా కొడకా

సరే పంపిస్తాలే, అన్నిటికీ అన్నీ చెబుతావ్, నువ్వు చదువుకోలేదు కానీ లోకాన్ని బాగా చదివావ్, నీతో ఏం మాట్లాడగలను, అమ్మ కి ఫోన్ ఇవ్వు. 

ఏంటి డ్యూడ్ ! మీ డ్యాడా, డబ్బు పంపించమంటున్నాడా? ఈ బ్లడీ ఇండియన్ పేరెంట్స్ మైండ్ సెట్ మారదు బ్రో, ఎంతసేపూ పిల్లలను బాగా చదివించి వాళ్ళ డబ్బు మీద బతికేయాలనుకుంటారు ఓల్డ్ అయ్యాక, అదే ఫారిన్ కంట్రీస్ లో అయితే ఇలా వాళ్ళ పిల్లల నుంచి మనీ అస్సలు expect చెయ్యరు తెలుసా?

ఏరా అబ్బి, బాగున్నావా? ఏమన్నా తిన్నావా లేదా?

తిన్నాను కానీ, నీకేదో బాలేదంట. 

మీనాయన అట్లే చెబుతాడులేరా, ఎప్పుడూ ఉండే కాళ్ళ నొప్పులే, అవి మందులు మాకులతో పోవు, నాతోనే పోవాల, టైం కు తింటా ఉండు, జాగ్రత్త.  

సరే అమ్మ, ఉంటా మరి. 

                                      *****************************

నాకు ఫోన్ చేసింటే బస్సు స్టాండ్ కి వచ్చి బైక్ లో పికప్ చేసుకునేవాడ్నిగా నాన్నా?

పర్లేదు లేరా, మీ రూమ్ దగ్గరేగా బస్టాండ్ నుంచి, అందుకే నడిచే వచ్చేశా. 

అమ్మ బాగుందా?

బాగుంది, ఇదిగో నీకోసం తినడానికి యేవో పంపించింది.  

ఈ వయసులో అమ్మ ఇలా కష్టపడకపోతేనేం నాన్నా, కాళ్ళ నొప్పులు పెట్టుకొని. 

దానికి నీ మీద ఉన్న ప్రేమ, దాని కాళ్ళ నొప్పుల్ని మరిపించేస్తుందిరా. అది సరే గానీ, ఉద్యోగం ఏమన్నా దొరికినాదిరా ?

లేదు నాన్న, రెసిషన్ కదా, ఎక్కడా జాబ్స్ దొరకట్లేదు. 

సరే ఈ డబ్బు ఉంచరా, ఖర్చులకు ఉంటది. 

వద్దులే నాన్నా, నేనే ఎలాగోలా అడ్జస్ట్ చేసుకుంటాను. మళ్ళీ నీకు ఇబ్బంది అవుతుంది. 

ఇది నువ్వు పంపించిన డబ్బు లోదేలేరా. 

ఖర్చయిపోలేదా? తోటకి, ఇంటి రిపేర్లకు ఖర్చులున్నాయని అని అన్నావ్?

లేదురా, ఇన్నేళ్లు ఎవరి ముందు చెయ్యి చాచకుండా నిన్ను చదివించి ఈ జీవితాన్ని ఇలా నెట్టుకొచ్చాను, ఇప్పుడు మాత్రం నీ ముందు చెయ్యి ఎలా చాచుతాననుకున్నావురా? నా తిప్పలేవో నేను పడ్డాను, నీ డబ్బులు అస్సలు ఎప్పుడూ వాడాలనుకోలేదు.  

మరి నెలా నెలా డబ్బులెందుకు పంపమనేవాడివి?

ఈ కాలం కుర్రాళ్ళు పార్టీలని, ఫ్యాషన్లని డబ్బంతా వృధా చేస్తారని భయపడి, ప్రతీ నెలా నీ దగ్గరి నుంచి అడిగి తీసుకొని, నా పేరు మీద బ్యాంక్లో వేసేవాడిని, నేను సీనియర్ సిటిజెన్ ని కదా నా పేరు మీద వేస్తే కొంచెం వడ్డీ ఎక్కువస్తది. అలా అప్పుడు దాచిన సొమ్మే ఇప్పుడు నీకు ఉపయోగపడుతోంది.  

హే డ్యూడ్! ఈయనేనా మీ డాడ్? 

అవును బాబూ, ఆ బ్లడీ ఇండియన్ పేరెంట్స్ మైండ్ సెట్  ఉన్నవాడిని నేనే, రూపాయికి రూపాయి కూడబెట్టి బిడ్డల బాగు కోసం మిగలబెట్టాలని ఆశ ఉన్న ఇండియన్ తండ్రిని, కట్టె కాలేవరకు ఈ బ్లడీ ఇండియన్ పేరెంట్స్ మైండ్ సెట్ మారదు. ఇంతే మేమింతే. 

                                        ****************************

ఎప్పుడూ యేవో కబుర్లే రాస్తుంటాను కదా అందుకని, నా స్కూల్ కాదని తెలిసీ 'కథ' ఒకటి రాయడానికి పూనుకొని చివరికి ఏదో రాసేసాను దీన్ని మరి 'గిథ' అనో 'గాథ' అనో అనచ్చేమో 😊.  

నా కొలీగ్ అయిన ఒక నార్త్ ఇండియన్ అమ్మాయి 'బ్లడీ ఇండియన్ పేరెంట్స్ మైండ్ సెట్' అంటూ ఉంటుంది ఎప్పుడూ, సో ఆ పాయింట్ మీద ఒక కథ రాయాలని అనుకొని ఏదో గెలికేశాను. నచ్చితే మెచ్చుకోండి 😊, నచ్చకపోతే హెచ్చరించండి ⚠️ఇక ముందు ఇలాంటివి రాయకుండా ఉండటానికి 😭 

27, జనవరి 2019, ఆదివారం

సిడ్నీ లో సంక్రాంతి సంబరాలు

ప్రతీ సంవత్సరం లాగానే, ఈ సంవత్సరం కూడా తెలుగు దేశం పార్టీ వాళ్ళు సిడ్నీలో  సంక్రాంతి సంబరాలు నిర్వహించారు.

దీని గురించి రాస్తున్నానని, నేనేదో తెలుగు దేశం పార్టీ వాడిని అనుకునేరు, నేను ఏ పార్టీ కి చెందిన వాడిని కాదు. ఏ రాయయినా ఒకటే తల పగులకొట్టుకోవడానికి అని నా ఉద్దేశం. కాబట్టి ఇలాంటి సంబరాలు ఏ పార్టీ వాళ్ళు అరేంజ్ చేసినా వెళ్తాను, నాకు అలాంటి పట్టింపులు లేవు. 

మొదట్లో అందరం వెళదాం అనుకున్నాం కానీ, ఈ సంబరాలు ఈవెనింగ్ టైం అరేంజ్ చెయ్యడం, మా ఇంటికి బాగా దూరం అవడం వల్ల, బాగా నైట్ లేట్ అవుతుందేమో, పిల్లలు పడుకుంటారు అని అనుమానంతో నేనూ, పిల్లలు వెళ్ళలేదు కాబట్టి అక్కడి విశేషాలను తెలియజేయలేను. దానికి తోడు వర్షం పడే సూచనలు ఉండటంతో వెళ్ళడానికి కుదరలేదు, అసలే కొత్త గొడుగు కొన్నాను  వర్షం లో వెళితే కొత్త గొడుగు తడిసిపోతుందేమో అని 😊

కాకపోతే ఈ పోస్ట్ రాయడానికి ఒక ముఖ్య కారణం,  నిన్న జరిగిన ఈ సంబరాల్లో మా ఆవిడ డాన్స్ ప్రోగ్రాం ఉండటం.

ఎప్పుడో మా పెళ్లి  కాకముందే మరచిపోయిన తనలోని కళని ఇప్పుడిలా వెలికి తీసింది, నాకు తెలిసి దాదాపు 17 సంవత్సరాల తర్వాత అనుకుంటా తను ఇలా డాన్స్ చేయడం, అదీ తన  పుట్టినరోజున కావడం విశేషం.

మీరూ క్రింది లింక్ మీద ఒక లుక్కేసి చెప్పండి మరి, తను ఎలా డాన్స్ వేయగలిగిందో ఆఫ్టర్ ఏ  లాంగ్ గ్యాప్

https://www.youtube.com/watch?v=4WUhSya8oNw&feature=youtu.be

పింక్ డ్రెస్ లో ఉన్నది మా ఆవిడ, పక్కన రెడ్ డ్రెస్ వేసుకున్నది మా ఆవిడ ఫ్రెండ్ మంజు, కాలేజ్ లో ఎన్నో బహుమతులు గెల్చుకున్న డాన్సర్. ఆవిడ వేద్దామని మా ఆవిడని అడగ్గానే డాన్స్ మీద ఉన్న ఆసక్తితో, ఎన్నో ఏళ్ళ నుంచి డాన్స్ వేయకపోయినా ఒక రెండు, మూడు  గంటలు ప్రాక్టీస్ చేసి నలుగురి ముందు (నలుగురు అంటే నలుగురు అని కాదు, ఫ్లో కోసం అలా రాశాను అంతే ) బెరుకు లేకుండా ఉత్సాహంగా వేయగలిగింది.



సిడ్నీలో తెలుగు దేశం ఆధ్వర్యం లో జరిగిన సంక్రాంతి సంబరాలు అంబరాన్ని తాకే రేంజ్ లో జరిగాయి. అమ్మయ్య! టైటిల్ జస్టిఫికేషన్ ఇచ్చేశా 😊

23, జనవరి 2019, బుధవారం

మా ఊరిలో ముగ్గుల పోటీలు

మొన్న మీ వాడికి పిల్లను చూడ్డానికి కొండాపురం పోయిన్నారు కదా, సంభంధం ఏమన్నా ఖాయం అయిందా?

లేదు వదినా,  ఆయమ్మి వాళ్ళ అమ్మ నాకు నచ్చలేదు. 

ఆవిడ పద్దతి నచ్చలేదా?

కాదు, ఆవిడ చీర కట్టుకున్న పద్దతి నచ్చలేదు. చీరకి, జాకెట్ కి కలర్ మ్యాచ్ అవలేదు, అందుకే ఆ సంభంధం వద్దనుకున్నాము.

మరి నిన్న చూసొచ్చిన ఆ పొద్దుటూరి సంబంధం?

ఖాయం అయ్యేట్లే వుందొదినా.

పిల్ల వాళ్ళకు ఆస్తి అదీ ఉందా?

ఆళ్ళ నాన్న మంచి ఉద్యోగంలో ఉన్నాడు, ఒక్కటే పిల్ల. పైగా ఆయప్ప, రెండు ప్లేట్ల మీద కూడా ఆయమ్మి పేరే రాయిచ్చాడు.

దానిదేముందిలే వదినా, మా ఇంట్లో అన్ని ప్లేట్ల మీద మా యబ్బి పేరే రాయించాం.

ప్లేట్లంటే తినే ప్లేట్లు కాదు వదినా. 

మరి, పూజకు పెట్టుకునే బంగారు ప్లేట్లేమిటి వదినా?

ఆ ప్లేట్లు కాదు, మొన్న మీరు తాడిపత్రి లో పాతిక లచ్చలెట్టి కొన్లా ఆ ప్లేట్లు. 

ప్లాట్ అను మరి. 

అదేలే, నాకు నోరు యాడ తిరుగుద్ది. అది సరే గానీ పోయిన వారం సంక్రాంతి ముగ్గుల పోటీలో గొడవ పడ్డావంట

అవును, నాకేమో 5 వ ప్రైజ్ వచ్చింది, మేము అయ్యవార్లం, ముక్కలు తినము కదా? అందుకే 4 వ ప్రైజ్ అడిగా, దానికి గొడవ అయింది అంతే




మా స్వంత ఊరు అయిన తాళ్ల ప్రొద్దుటూరు లో ముగ్గుల పోటీలు జరిగాయని తెలిసి దాని మీద ఒక పోస్ట్ రాయాలనుకొని రాసేసాను. 

"కడప జిల్లా , తాళ్ల ప్రొద్దుటూరు గ్రామంలో సంక్రాంతి సంధర్బంగా జరిగిన సంబరాలలో భాగంగా ముగ్గుల పోటీలు జరిగాయి. మహిళలు ఉత్సాహంగా పాల్గొని బహుమతులు గెలుచుకున్నారు. ముఖ్య అతిధి గా ఫలానా వ్యక్తి విచ్చేశారు" అని రాస్తే చదవడానికి ఎవరికి ఇంటరెస్ట్ ఉంటుంది. ఆ విషయాలు న్యూస్ పేపర్ లో చదవడానికే ఇంట్రస్ట్ ఉండదు, ఏదో ఆ ఊరి వాళ్ళకో మహా అయితే ఆ జిల్లా వాళ్ళకో చదవాలనిపిస్తుంది. మరి నా బ్లాగ్ దాకా ఎందుకు? 

అందుకే నా స్టయిల్ లో (ఏడ్చావులే ) ఒక ఫన్నీకోటింగ్ ఇచ్చాను. 

ఏదో సరాదాకు రాసింది మాత్రమే, ఎవరినీ హర్ట్ చేయాలని కాదు. 

ఆ పోటీ నుంచి మచ్చుకో ముగ్గు, మెచ్చుకోగలితే మెచ్చుకోండి ఈ ముగ్గేసిన మా ఊరి మహిళను. 


తాళ్ల ప్రొద్దుటూరా? అదెందుకు తెలీదు, పొద్దుటూరే కదా "సెకండ్ ముంబై" అని కూడా అంటారు మాకు తెలుసు అనుకుంటున్నారేమో, కాదండీ "తాళ్ల ప్రొద్దుటూరు" అని ఒక పల్లె ఉంది అదే నా స్వంత ఊరు. 

16, జనవరి 2019, బుధవారం

అమర్ అక్బర్ ఆంథోని - చూశా నేనీ చెత్తని

దొంగలు పడ్డ ఆర్నెల్లకు కుక్కలు మొరిగినట్లు ఇప్పుడు రివ్యూ ఏమిటి అని అనుకోకండి. అయినా సంక్రాంతి కి రిలీజ్ అయిన సినిమాల గురించి రాయకుండా ఎప్పుడో సినిమాకి ఇప్పుడు రివ్యూ ఏమిటి అని కూడా అనుకోకండి.  ఇది రివ్యూ కాదు 'అమర్ అక్బర్ ఆంథోని' సినిమా చూసినప్పుడు ఏర్పడ్డ మైండ్ డిస్టర్బెడ్ అండ్ డీవియేటెడ్ డిసార్డర్. (కొత్త  డిసార్డర్ పేరు కనిపెట్టా) 

జనవరి ఫస్ట్ రోజు మిత్రులందరితో కలిసి గుడి నుంచి వచ్చాక అందరూ లంచ్ తినేసి కాసేపు పడుకున్నారు. నేను, ఇంకో మిత్రుడు మాత్రం నిద్ర రాలేదని మేల్కొని ఉన్నాము.

శ్రీనువైట్ల, రవితేజ కొత్త సినిమా నెట్ ఫ్లిక్స్ లో పెట్టారు చూద్దామా అన్నాడు మిత్రుడు.

నిద్ర ఎలాగూ రాలేదు చూద్దాం అన్నా.

కాసేపటికి 'ఈ హీరోయిన్ లో కాస్త ఇలియానా పోలికలు కనపడుతున్నట్లున్నాయి' అన్నాను.

ఆవిడ ఇలియానానే అన్నాడు. 

అదేంటి? కరువు కంట్రీ కి బ్రాండ్ అంబాసిడర్ లా, ఇసుకలో ఎండేసిన ఎండు చేపలా ఉంటదే   ఇలియానా అనే అమ్మాయి.

ఒకప్పటి అబ్బాయిలం అయిన నువ్వు, నేను ఇప్పుడు అంకుల్స్ అయినట్లు, ఆ అమ్మాయి ఇప్పుడు ఆంటీ లా మారిపోయింది అంతే. 

ఏంటో! సినిమా మరీ సుత్తిగా ఉంది మేష్టారు అన్నాను. 

సగం పైగా చూసేసాం గా, పూర్తిగా చూసేస్తే నష్టమేముంది. మీకు నచ్చకపోతే కాసేపు పడుకోండి అన్నాడు. 

సినిమాలో సునీల్ ఉన్నాడన్నారు కదా, సునీల్ ఎంటర్ అయితే కామెడీ  ఉంటుంది కదా కనీసం ఆ కామెడీ అయినా ఎంజాయ్ చేస్తాలెండి. అంతదాకా ఎలాగోలా వెయిట్ చేస్తాను. 

మేష్టారు మీరు అద్దాలు పెట్టుకునే చూస్తున్నారుగా?

అవును, ఎందుకా డౌట్? అన్నాను అతని వైపు చూసి



ఏయ్! ఇదేంటి ఇలా ఉన్నావ్? ఆ జుట్టేంటి అలా పీక్కున్నావ్?

సినిమా అర్థం కావట్లేదు ఆ ఫ్రస్ట్రేషన్ లో తెలీకుండానే పీక్కున్నట్లున్నానేమో అన్నాను.

సునీల్ ఎంటర్ అయి పది నిముషాలు అయింది. ఇంకా సునీల్ కోసం వెయిట్ చేయడం ఏమిటి?  ఇప్పుడు వస్తున్న ఆ సీన్ లో కూడా సునీల్ ఉన్నాడు.

సునీలా ఎక్కడబ్బా నాకు కనపడడే?

అదిగో బస్తాలా ఉన్నాడుగా, రవితేజ ఎదురుగా కూర్చొని.

ఆడు సునీల్ ఏంటండీ బాబు, ఫామిలీ ప్యాక్ వాడూనూ.  మాంఛి సిక్స్ ప్యాక్ తో ఫిట్  ఉంటాడు సునీల్.  మొన్ననే పూల రంగడు మూవీ లో చూశానుగా.

మొన్న అంటే

మొన్న అంటే ..అదే  మూడేళ్ళ క్రితం

అదీ విషయం. సిక్స్ ప్యాక్ నుంచి ఫామిలీ ప్యాక్ కి మారడానికి మూడేళ్లు చాలా ఎక్కువ.

నాన్నా! నా కార్ బొమ్మ ఎక్కడ పెట్టావ్? అని వచ్చారొకరు ఆడుకుంటున్న పిల్లల గుంపు లోంచి.

ఏమండీ అమర్ గారు, మీ అమ్మాయి ఏదో కంప్లైంట్ చేస్తోంది చూడండి అన్నాను పక్కన నిద్రపోతున్న మా ఫ్రెండ్ ని లేపి.

అమర్ ఎవరు? అని అటువైపు తిరిగి పడుకున్నాడు.

సారీ, మీరు అక్బర్ కదా! ఏమండీ  అమర్ గారూ! ఈ అమ్మాయి ఏదో కంప్లైంట్ చేస్తోంది చూడండి అని ఇటు పక్కన నిద్రపోతున్న  ఫ్రెండ్ ని లేపా.

అక్బర్ ఎవరు? అని లేచాడు

సారీ, మీరు ఆంథోని కదా, ఈ అమ్మాయి

అమ్మాయి ఎక్కడ, అబ్బాయి కదా అక్కడ ఉండేది.

ఎవరో ఒకరు లెండి, వాళ్ళ నాన్న కోసం వచ్చాడండీ. ఇంతకీ ఇతను ఎవరి అబ్బాయి మేష్టారు? ఇంతమంది పిల్లల్లో ఎవరు ఎవరి పిల్లలో తెలియట్లేదు.

మీ అబ్బాయిని పట్టుకొని ఎవరి పిల్లాడో అంటారేమిటి మేష్టారు. ఏంటి!ఏదో మూవీ చూస్తూన్నట్లున్నారు అన్నాడు T.V  వైపు తిరిగి.

అంతే! ఒలింపిక్ రన్నర్ లా పరిగెత్తి రిమోట్ అందుకొని T.V ఆపేస్తూ, పెళ్ళాం పిల్లలు ఉన్నవాళ్లు మీరు, వాళ్ళకు  అన్యాయం చేయకండి అని అన్నాడు.

'మీకీ, మీకీ  గొడవలు వస్తే మాకీ మిక్సీ ఎందుకు ఆపేస్తారు? నేను పులిహోర బిర్యాని చేసుకొని మీకీ ఇవ్వకుండా నాకీ మాత్రమే తినేస్తాను, యెవర్రా అది, కిచెన్ లో పెద్దాడివి నీకీ ఏమీ పని?' అని అక్బర్ క్యారెక్టర్ లోకి అట్నుంచి మైండ్ డిస్టర్బెడ్ అండ్ డీవియేటెడ్ డిసార్డర్ కి వెళ్ళిపోయాడు పక్కన మూవీ చూస్తున్న ఫ్రెండ్ . 


పూర్తి సినిమా చూడలేదు కానీ, నాకు మాత్రం ఒక్క డౌట్ ఉండిపోయింది. అమలాపురం లో తీసినా సరిపోయే  సినిమాని అమెరికా లో తీయాల్సిన అవసరం ఎందుకు అని?  మూవీ రిచ్ గా ఉంటుందనా?

ఈ పోస్ట్ చదివాక మీకు కూడా 'మైండ్ డిస్టర్బెడ్ అండ్ డీవియేటెడ్ డిసార్డర్' వచ్చిందేమోనని చిన్నడౌటనుమానం , ఏదీ మీ పేరు చెప్పండి? 

8, జనవరి 2019, మంగళవారం

సంక్రాంతి సినిమాలు

ప్రతీ సంవత్సరం లాగే ఈ సారి కూడా సంక్రాంతి కి కొన్ని సినిమాలు రిలీజ్ అవుతున్నాయి. ఇందులో మొదటిగా చెప్పుకోవాల్సింది, విడుదల అవుతోంది 'కథానాయకుడు' సినిమా. ఎన్టీవోడి సినిమా ప్రయాణం గురించి అందరికీ తెలిసిందే కాకపొతే దాన్ని క్రిష్ మరింత ఇంట్రెస్టింగ్ గా చూపించి ఉంటారు అనే నమ్మకమే ఈ సినిమా చూడాలని అనిపిస్తుంది. 

కాకపొతే, దీనితో పాటే అక్కినేని నాగేశ్వర రావు బయోపిక్ కూడా రిలీజ్ అవుతుండటం యాదృచ్ఛికం. నాగేశ్వర రావు బయోపిక్ అంత ఇంటరెస్టింగ్ గా అనిపించదు, తీయడం వృధా అని నాగార్జున అన్నాడు కానీ మరి ఎవరు తీస్తున్నారబ్బా ఆయన బయోపిక్? అయినా నాగేశ్వర రావు బయోపిక్ లో మాయావతి కారెక్టర్ ఎందుకు వచ్చింది. ఏంటీ? కాదంటారా? కావాలంటే కింది ఫోటో చూడండి.

నాగేశ్వర రావు బయోపిక్ లో మాయావతి ఎందుకుంది?
ఈ మధ్య కాలంలో ఇలా ఈ సినిమా మీద వచ్చినన్ని వెటకారాలు ఇంకే సినిమా మీద వచ్చి ఉండవు. ఏ మాటకామాట చెప్పుకోవాలంటే పై ఫొటోలో బాలకృష్ణ కంటే సుమంత్ బాగా సెట్టయ్యాడు. 

సామాజిక మాధ్యమాల్లో ఈ సినిమా లోని బాలకృష్ణ స్టిల్స్ మీద చేస్తున్న కామెడీ అంతా ఇంతా కాదు. నేను కూడా inspire అయి మచ్చుకు ఒకటి తయారుచేశా. 

ఇది ఎవరి బయోపిక్ చెప్మా?

బాలకృష్ణ కాకుండా ఇంకో పదేళ్ల తర్వాత జూనియర్ ఎన్టీఆర్ అయితే ఎన్టీవోడి పాత్రకు బాగా సూట్ అయ్యేవాడేమో అనిపిస్తోంది.

పౌరాణిక సినిమాల్లో నటించాక కిరీటాలు, విగ్గులు, గదలు, చెప్పులతో సహా ఎన్టీఆర్ వాటిని తనతో పాటు తీసుకెళ్ళి పోయి తన స్టూడియో లో భద్రపరిచేవారని, వాటినే ఇప్పుడు బాలకృష్ణ ఈ సినిమాలో వాడారని అంటున్నారు కొందరు.

మామూలుగా అయితే బాలకృష్ణ కు సంక్రాంతి కొంచెం బాగా కలిసొచ్చింది. సంక్రాంతికి రిలీజ్ అయిన వాటిల్లో ఎక్కువ సినిమాలు హిట్ కూడా అయ్యాయి. అయితే ఈ సినిమా మరీ బ్లాక్ బస్టర్ అనేంత కాకపోచ్చు గానీ క్రిష్ మార్కు తో కాస్త క్లాస్ గా ఉండచ్చు అని  నా అభిప్రాయం.

ఇక నెక్స్ట్ క్యూ లో ఉండేది రామ్ చరణ్ 'వినయ విధేయ రామ'. రంగస్థలం తర్వాత వస్తున్న సినిమా కాబట్టి అంచనాలు ఎక్కువగా ఉన్నాయి. కాబట్టి mostly ఇది రంగస్థలం రేంజ్ అంచనాలు అందుకునే స్థాయిలో ఉండకపోవచ్చు. 'ఇలాంటి సినిమాలు ప్రేక్షకులకి కొత్త కాదు కానీ నాకు కొత్త' అని రామ్ చరణ్ ఇచ్చిన స్టేట్మెంట్ ని బట్టే ఊహించచ్చు ఇది కొత్తదనం లేని బోయపాటి స్టైల్ ఊర మాస్ సినిమా అని. పాటలు కూడా పెద్ద బాలేవు కాబట్టి ఈ సినిమాను కేవలం మాస్ ప్రేక్షకులే నిలబెట్టాలి.

ఇక తర్వాత రేసులో ఉన్న సినిమా ఫన్ అండ్ ఫ్రస్ట్రేషన్ అనబడే ''F 2'. సినిమాలో ఫన్  కంటే ఫ్రస్ట్రేషన్ ఎక్కువగా ఉందంటే సినిమా ఢమాలే.  మంచి కామెడీ సీన్స్ పడితే చెలరేగి పోయే వెంకీ, అందుకు తగ్గ కామెడీ తన సినిమాల్లో చూపించిన అనిల్ రావిపూడి కనుక మాజిక్ రిపీట్ చేయగలిగితే సినిమాలో మంచి ఫన్ expect చెయ్యొచ్చు. 

లాస్ట్ బట్  నాట్ ది లీస్ట్, సంక్రాంతి కి రిలీజ్ అవబోతున్న నాలుగవ సినిమా 'పెట్టా'  గురించి చెప్పే ముందు ఒక చిన్న జోక్ చెప్పుకుందాం. 

ఇద్దరు జూనియర్ ఆర్టిస్టులు సెట్లో మాట్లాడుకుంటున్నారు. 

అదేంటి? హీరో గారు ఇవాళ షూటింగ్ కాన్సుల్ చేసుకొని వెళ్లిపోయారు హడావిడిగా?

హీరో గారి కూతురికి ఇందాకే మనవడు పుట్టాడని ఫోన్ వచ్చిందట, అందుకని . 

ఇది ఇప్పటికి జోక్ లాగే అనిపిస్తుంది గానీ, రజనికాంత్ విషయంలోనే కాక మన తెలుగు సినిమా సీనియర్ హీరోల విషయం లో కూడా ఇది  ఎప్పుడో ఒకసారి నిజమయ్యే అవకాశం ఉంది. ఏంటో మన ఖర్మ కాకపొతే ముసలాళ్లను కూడా హీరోలలాగా చూడాల్సి రావటం. చిన్నప్పుడు నేను చూసిన ప్రేమాభిషేకం సినిమాలో కూడా 58 ఏళ్ళ అక్కినేనిని లవర్ బాయ్ గా చూడాల్సి వచ్చింది అదీ 20 ఏళ్ళ యంగ్ శ్రీదేవి పక్కన. కాబట్టి ముసలాళ్ళు హీరోలు గా ఉండటం అనేది ఎప్పటినుంచో మన తెలుగు సినిమాలకు పట్టుకున్న దరిద్రం.

ఇక పెట్టా గురించి చెప్పడానికి పెద్దగా చెప్పడానికి ఏమి లేదు. థియేటర్లు దొరకలేదని ఆ నిర్మాతలు చేస్తున్న గొడవ తప్ప. అయినా సంక్రాంతికి ఇన్ని తెలుగు సినిమాలు ఉండగా ఈ అరవ సినిమా గోల అవసరమా అన్నట్లు తెలుగు ప్రేక్షకులు కూడా ఎవరూ పెద్ద ఆతృతగా ఎదురు చూస్తున్నట్లు అనిపించట్లేదు నాకైతే. 

చూద్దాం మరి, మెజారిటీ ప్రేక్షకుల ఓటు దేనికో?

6, జనవరి 2019, ఆదివారం

అరె ఏందిరా భయ్ ఈ కొత్త సంవత్సరం లొల్లి

మనది కాని ఈ కొత్త సంవత్సరం అసలు జరుపుకోవడం అవసరమా? అరె ఏందిరా భయ్ ఈ కొత్త సంవత్సరం లొల్లి! దీనికి ఎందుకు అంత ప్రాధాన్యత ఇవ్వడం అనే పెడసరి ధోరణితో కొందరు,  'దీన్ని బహిష్కరిద్దాం, శుభాకాంక్షలు చెప్పుకోవలసిన అవసరం లేదు' అని సోషల్ మీడియాలలో క్లాసులు పీకుతున్నారు.

Be a roman, when you are in Rome అంటారుగా, మరి మనమున్నది ఈ గ్లోబల్ యుగంలో కాబట్టి ఉలిపి కట్టెలా ఉండకుండా జనవరి ఫస్ట్ కు కూడా ప్రాధాన్యత ఇద్దాం. తప్పేముంది ఉగాది ని జరుపుకుందాం, జనవరి ఫస్ట్ జరుపుకుందాం. రెండు సార్లు మితృలకు శుభాకాంక్షలు తెలుపుదాం, వీలయితే పర్సనల్ గా కలిసి మరీ చెబుదాం.

కొత్త సంవత్సరం అని చెప్పి మితృలతో కలిసి లిమిట్ వరకు తాగడం, తందనాలు ఆడటం లో  తప్పేం లేదు, ఏదో ఒక రకంగా కనీసం మిత్రులతో సరదాగా గడిపేసినట్లే కదా. After all, some times, we just need a break from the routine.

ఫ్రెండ్ ఒకతను వాళ్ళింట్లో థర్టీ ఫస్ట్ నైట్ పార్టీ ఏర్పాటు చేస్తే దాదాపు 6 ఫామిలీస్ కలిసాము అక్కడ. పేకాట ఆడేవాళ్లు పేకాట ఆడుతూ,  ఆడని వాళ్ళు, ఆడవాళ్లు హాయిగా కబుర్లాడుకుంటూ, పాటలు పాడుకుంటూ,మ్యూజికల్ చైర్స్ లాంటి ఆటలాడుకుంటూ ఉంటే ఇక పిల్లలందరూ వాళ్ళింటిని కిష్కింధ గా మార్చేసి సంతోషంగా ఆడుకున్నారు అర్ధరాత్రి వరకు.

మగాళ్లు కాసేపు పేకాట పక్కనెట్టి, మ్యూజికల్ చైర్స్ ఆట ఆడాలని ఆడాళ్ళు డిమాండ్ చేస్తే, వారి డిమాండ్ కి తలొగ్గి ఆ ఆట ఆడి రెండు ప్లాస్టిక్ చైర్స్ విరగ్గొట్టేశాము. (మేడ్ ఇన్ చైనా చైర్స్ మరి విరగక ఛస్తాయా, ఈ ఆస్ట్రేలియా లో 50% మేడ్ ఇన్ చైనానే వస్తువులైనా, మనుషులైనా 😊)

12 కాగానే పిల్లలు కేక్ కట్టింగ్ కు రెడీ అయిపోయారు, దేనికోసమైతే వాళ్ళు వేచి ఉన్నారో ఆ పని కానిచ్చేసి (వాళ్లకు ఇష్టమైన చాకోలెట్ కేక్ తినేసి) ముసుగు తన్నేసారు. 



మరుసటి రోజు అనగా జనవరి ఫస్ట్ తారీకు రోజు అందరిలాగే యధావిధిగా దైవ దర్శనానికై గుడికి వెళ్లి ఫేస్బుక్ లో పెట్టడానికి కొన్ని ఫొటోస్ తీసుకున్నాము   😊

అదే రోజు మధ్యాహ్నం నేను తీసుకున్న రెసొల్యూషన్ లిస్ట్ లో పాయింట్ 3 ని అమలుచేయలేక పోయాను. విధి రాత తప్పించుకోలేక 'అమర్ అక్బర్ ఆంథోని' అనే అత్యంత చెత్త చిత్రాన్ని చూసాను మిత్రులతో కలిసి. 

సిడ్నీ చుట్టుపక్కల  100  బీచ్ ల దాకా ఉన్నాయి, వారానికో బీచ్ కి వెళ్లినా ఆ బీచ్ లన్నీ చూసేలోగా స్విమ్మింగ్ నేర్చుకోవచ్చు దాంతో నేను తీసుకున్న రెసొల్యూషన్ లిస్ట్ లోని పాయింట్ 7 లో ఒక పార్ట్ ని కంప్లీట్ చెయ్యొచ్చు అని అనుకున్నా 😊

వెదుకుతున్న తీగ కాలికి  చందంగా మిత్రులందరూ మరుసటి రోజు Wattamolla బీచ్ కి వెళదామన్నారు. Wattamolla ఈజ్ వన్ అఫ్ ది బెస్ట్ అండ్ బ్యూటిఫుల్ బీచెస్ ఎవర్ ఐ హావ్ సీన్.  (Wattamolla means "place near running water") 

నేను సీ దగ్గరికి వెళ్ళగానే 'లాంగ్ టైం నో సీ' అని నన్ను పలరించినట్లైంది. సముద్రం అంటే పిల్లలు యెంత ఇష్టపడతారో, దానికి పదింతలు నేను ఇష్టపడతా.  ఆ సముద్రంలో అలలను చూడగానే నాలోని బాల్యం బయట పడింది, దానికిదే రుజువు.



ఈ బీచ్ లో ఒక వైపు ప్రత్యేకత ఏంటంటే ఇక్కడ అలలు ఉండవు, కాబట్టి స్విమ్మింగ్ కి అనువుగా ఉంటుంది.  పిల్లలు హాయిగా ఆడుకున్నారు, అల వచ్చి లాక్కెళ్తుందని భయం లేకుండా. 



ఈ విధంగా కొత్త సంవత్సరం సందర్బంగా రెండ్రోజులు ఫోన్ కి దూరంగా, ఫామిలీ మరియు ఫ్రెండ్స్ కి దగ్గరగా ఉన్నాను. After all, some times, we just need a break from the routine.

ఇవాళ మరో రెసొల్యూషన్ తీసుకున్నాను అదేమిటంటే, కనీసం నెలకు నాలుగు పోస్టులు అయినా రాస్తూ ఉండాలని. అందరికి తెలిసిన విషయమైనా సరే లేక కొత్త విషయమైనా, ఏదైనా సరే రాస్తూ పోవడమే.  జస్ట్ లైక్ డైరీ లా ప్రతీ విషయం నోట్ చేద్దామనుకుంటున్నాను. 

2, జనవరి 2019, బుధవారం

న్యూ ఇయర్ రెసొల్యూషన్ లిస్ట్


తెలిసిన జోకే అయినా ఇది సరైన సందర్భం కాబట్టి ఇక్కడది చెప్పుకుందాం. 

న్యూ ఇయర్ రోజున ఇద్దరు మిత్రులు కలుసుకున్నారు. 

బాబాయ్ ఒక సిగరెట్ ఇవ్వు అన్నాడు మొదటి వాడు  

రాత్రే కదా, న్యూ ఇయర్ రోజు నుంచి సిగరెట్లు మానేస్తానని నిర్ణయం తీసుకున్నావ్? అన్నాడు రెండో వాడు

అవును తీసుకున్నాను, దాంట్లో భాగంగానే మొదటి స్టేజిలో ఉన్నాను. 


మొదటి స్టేజి అంటే?


సిగరెట్లు కొనేది మానేయడం

నాకు సిగరెట్, మందు లాంటి అలవాట్లు లేవు కాబట్టి అవి మానేయాలి అనే రెసొల్యూషన్స్ లేవు గానీ, యేవో కొన్ని ఉన్నాయి.  ఇవి ఏ రోజు నుంచి అయినా ఫాలో అవచ్చు, కాకపొతే న్యూ ఇయర్ రెసొల్యూషన్ అని పెట్టుకోవడం వల్ల గుర్తుండిపోతుంది కదా లిస్ట్ ప్రిపేర్ చేసుకున్నా. 

  1. కాలమతి నుంచి సుమతి గా మారడం (గత 20 ఏళ్లుగా ఫెయిల్ అవుతూనే ఉన్నాను ఇందులో)
  2. కొత్త వాళ్లతో అంత తొందరగా మాటలు కలపలేను. ఇందులో కాస్త ఇంప్రూవ్మెంట్ కోసం ట్రై చేయడం. 
  3. వీలయితే ఒక్క మగాడు, బ్రహ్మోత్సవం, అజ్ఞాత వాసి లాంటి సినిమాలకు దూరంగా, కామెడీ సినిమాలకు దగ్గరగా ఉండటం. 
  4. నడక తగ్గించడం, రోజుకు 6-7 కిలోమీటర్లు నడుస్తున్నాను, వీలయితే అది కాస్త తగ్గించడం. 
  5. 63 కిలోల నుచి 62.5 కిలోలకు తగ్గడం (500 గ్రాములు పెరగడం ఈజీ కానీ, తగ్గడం కష్టం )
  6. 🐓 🐑 🍕 లాంటివి మానేసి 🥑 🥕 🥦 🍄 🌽 🐟 లాంటివి ఎక్కువగా తినడం (కష్టమే, కానీ ట్రై చేస్తే ఆరోగ్యానికి మంచిది)
  7. జీవితంలో ఖచ్చితంగా నేర్చుకోవాల్సిన రెండు ముఖ్య విషయాలైన స్విమ్మింగ్ మరియు డ్రైవింగ్ నేర్చుకోవడం.
  8. ఎక్కడికైనా వెళ్ళాలి అనుకున్నప్పుడు ఇంటి దగ్గర నుంచి 10 నిముషాలు ముందే బయలుదేరడం, హడావిడిగా లేటుగా బయలుదేరకుండా.
  9. మిత్రుల, కుటుంబ సభ్యుల, బంధువులకు  అన్ని రకాల విషెస్ చెప్పడం లాంటివి. (నా వరకు నాకు ఎందుకో ఈ పండుగ విషెస్, బర్త్ డే విషెస్ లాంటివి చెప్పాలంటే అంత ఇష్టం ఉండదు, దాన్ని మొహమాటం అంటారో ఏమో నాకే తెలీదు మరి)
  10. ఇక నుంచైనా ప్రతీ రోజూ పుస్తకాలు చదవడం అలవాటు చేసుకోవాలి. (చదివితే మరింత జ్ఞానం పెరిగి మంచి మంచి పోస్టులు రాస్తానని ఆశ)
  11. ఆ మధ్య చేయడం ఆపేసిన యోగా ను మళ్ళీ కంటిన్యూ చేయడం. 
  12. పైన చెప్పిన లిస్ట్ అంతా నెక్స్ట్ ఇయర్ రెసొల్యూషను లిస్ట్ లోకి మూవ్ చేయడం😜

వీటిలో ఏది మిస్ అయినా చివరిది మాత్రం మిస్ కాకుండా చూసుకుంటానని మీ అందరి ఎదుట ప్రామిస్ చేస్తున్నాను.

"మీ జీవితం లో ఈ కొత్త సంవత్సరం మరింత అదృష్టాన్ని, సంతోషాన్ని, సంపదను తీసుకొస్తుందని  ఆశిస్తూ 'కొత్త సంవత్సర శుభాకాంక్షలు' తెలుపుతున్నాను".


హమ్మయ్య కాస్త లేటయినా పైన చెప్పిన శుభాకాంక్షలతో తొమ్మిదవ పాయింట్ లో మొదటి స్టేజి కంప్లీట్ చేయగలిగాను నా రెసొల్యూషన్ లిస్ట్ లో నుంచి.

నేనేదో రాంగ్ ఫోటో పెట్టానని అనుకుంటే మీరు పప్పులో కాలేసినట్లే, ఎందుకంటే ప్రతి సంవత్సరం  జరిగే సిడ్నీ fireworks లో భాగంగా జరిగిన పొరపాటు అది. హ్యాపీ న్యూ ఇయర్ 2019 అని కాకుండా 2018 అని డిస్ప్లే చేయడం.