29, జులై 2019, సోమవారం

అప్పడాలు-గొడుగులు: సానుకూల దృక్పథం

అప్పడాలు, గొడుగులు సరే, ఈ సానుకూల దృక్పథమేమిటబ్బా? ఈ పదం ఎప్పుడూ వినలేదే, ఇదేదో గ్రాంధిక భాష లా ఉందే అని ఇంగ్లీష్ మీడియం చదివినోళ్లకు అనిపించచ్చు కానీ అది అందరికీ తెలిసిన 'పాజిటివ్ థింకింగ్' అనే ఇంగ్లీష్ పదానికి సరి సమానమైన మన అచ్చ తెలుగు పదం.  

ఈ డోర్ మూసుకుపోయిందే అని బాధ పడుతూ మళ్ళీ ఆ డోర్ ఎప్పుడు తెరుచుకుంటుందా అని ఎదురుచూడకుండా, ఇంకో డోర్ ఏదైనా తెరిచి ఉంటుందేమో వెతుకు.

నా మిగిలిన జీవితంలో ఇదింకా మొదటి రోజే, ఇప్పటికీ మించిపోయింది లేదు నాకు చాలా టైం ఉంది ఏదైనా సాధించాలి అనుకుంటే. 

కాలిలో ముళ్ళు గుచ్చుకుందని బాధపడటమెందుకు? కంట్లో కుచ్చుకోలేదని సంతోషించు. 

అర్రె! గ్లాస్ లో సగం జ్యూస్ అయిపొయిందే అనుకునే కన్నా సగం మిగిలి ఉందని అనుకో.  

రోజుకు 1440 నిముషాలు అంటే 1440 అవకాశాలు ఉన్నట్లు, ఏదైనా కొత్తగా ఆలోచించి ఆచరణలో పెట్టడానికి. 

రోజా పువ్వుకు ముళ్ళు ఉన్నాయని చూడకు, అంతకు మించిన అందం దానికి ఉందని గుర్తుంచుకో. 

ఇలా పాజిటివ్ థింకింగ్ గురించిన కొటేషన్స్ ప్రతీ రోజూ ఫేస్బుక్, వాట్సాప్ మెస్సేజుల్లో చదువుతూనే ఉంటాం, కానీ అవసరమైన చోట మాత్రం ఈ పాజిటివ్ థింకింగ్ ని ఆచరణలో పెట్టం.  

ఈ పాజిటివ్ థింకింగ్ గురించి ఒక చిన్న కథ చెప్పుకుందాం. ఒకానొక ఊరిలో ఎంకాయమ్మ  అని ఒక పెద్దావిడ ఉండేది. ఆవిడ ఇద్దరు కూతుర్లకి పెళ్ళిళ్ళు చేసింది. పెద్ద అల్లుడు అప్పడాల వ్యాపారం, చిన్న అల్లుడు గొడుగుల వ్యాపారం చేసేవాళ్ళు. ఇద్దరు అల్లుళ్ళు మంచి వాళ్ళే, వారి భార్యలను బాగానే చూసుకునేవారు.  అయినా కూడా ఎప్పుడూ ఆ పెద్దావిడ దిగులుగా ఏడుస్తూ ఉండేది. కారణం ఎవరికీ తెలిసేది కాదు కానీ, ఊర్లో వారందరూ ఆవిడను ఏడ్చే ఎంకాయమ్మ అని పిలిచేవాళ్ళు. 

ఒక రోజు ఆ ఊరికి స్వామిజీ వచ్చారు, ఆయన దగ్గరికి వెళ్ళి  తన గోడు వెళ్లబోసుకుంది. స్వామీ, ఎండ ఉండే రోజు, ఎవరూ గొడుగులు కొనరు. కాబట్టి నా చిన్న అల్లుడు ఊరూరా తిరుగుతూ ఒక్క గొడుగు కూడా అమ్మలేడు అందుకే ఎండ ఉండే రోజు ఈ బాధ మనసును తొలుస్తూనే ఉంటుంది. ఇక వర్షం పడే రోజు, పెద్ద అల్లుడు ఊరూరా తిరుగుతూ అప్పడాలు అమ్మలేడు, అలాగే ఇంట్లో తయారు చేసిన అప్పడాలను ఇంటి డాబా మీద కూడా ఎండబెట్టలేడు. కాబట్టి వర్షం పడే రోజు పెద్ద కూతురి సంసారం గురించి బాధ. కాబట్టి వర్షం పడినా బాధే, ఎండ కాసినా బాధే అని తన గోడు వెళ్లదీసుకుంది ఆ స్వామీజీ తో. 

అప్పుడు ఆయన 'చూడు తల్లీ! ఎండ ఉండే రోజు నీ పెద్ద అల్లుడి వ్యాపారం గురించే ఆలోచించు, ఆ రోజు ఎక్కువ అప్పడాలు అమ్మి డబ్బు సంపాదించుకుంటాడు కాబట్టి. వర్షం పడే రోజు నీ చిన్న అల్లుడి వ్యాపారం గురించే ఆలోచించు, ఎందుకంటే ఆ రోజు ఎక్కువ గొడుగులు అమ్మి డబ్బు సంపాదించుకుంటాడు కాబట్టి. అనవసరంగా సమస్యను భూతద్దం లో చూడకుండా  సానుకూల దృక్పథాన్ని అలవరచుకో ' అని చెప్పి పంపించాడు. ఆ రోజు నుంచి  ఏడ్చే ఎంకాయమ్మ కాస్త 'నవ్వే ఎంకాయమ్మ' అయ్యింది. 

భూతద్దం అంటే భూతాలను, ప్రేతాలను చూపే అద్దం  కాదు, magnifying glass అని మనవి. ఈ జనరేషన్ వాళ్ళు భూతద్దం అంటే అదేదో బూతు మాట అనుకునే ప్రమాదం ఉంది. అసలే రూపాయి కన్నా ఘోరంగా మన తెలుగు వేల్యూ పడిపోతోంది రోజు రోజుకి. 

అరే, ఆ ఎంకాయమ్మ సమస్య చాలా సింపుల్ కదా, దీనికి పోయి ఆ ఎంకాయమ్మ బాధ పడటం  ఏమిటి మరీ సిల్లీ కాకపొతే అని అనుకుంటాం కానీ మనలో కూడా చాలా మంది ఇలాంటి వాటికే బాధపడుతుంటాము. 

మరి ఇంత చెప్తున్నావ్? ముందు నువ్వు చెప్పు, చిన్న చిన్న విషయాలకు నువ్వెప్పుడూ బాధపడలేదా అంటారా?  "విజయానికి ఐదు మెట్లు" పుస్తకం రాసిన యండమూరి కూడా కొన్నిట్లో విజయాలు సాధించలేక పోయాడని గుర్తుంచుకోండి. 

"విజయానికి ఐదు మెట్లు" అంటే ఒక గుర్తొచ్చింది, ఆ పుస్తకం చదవకుండానే అంతో ఇంతో విజయాలు సాధించాను, ఇక ఆ పుస్తకం కూడా చదివేస్తే మరిన్ని విజయాలు సాధించచ్చు. హమ్మయ్య!  ఇవాళ్టికి పాజిటివ్ థింకింగ్ అయిపోయింది. 

ఫైనల్ గా నే చెప్పొచ్చేది ఏమిటంటే మీ చేతిలో లేని విషయాల గురించి బాధపడటం మానేసి ఉదయాన్నే ఈ "అప్పడాలు-గొడుగులు" సిద్ధాంతాన్ని ఫాలో అయిపోయి రోజంతా సంతోషంగా ఉండండి. 

అలాగే ప్రతీ రోజు రాత్రి పడుకునే ముందు మరొక్కటి ఆలోచించండి, ఈ రోజుకు ఎంతో కొంత సాధించామా లేదా అని? ఏదీ సాధించలేదా, కనీసం ఎంతో కొంత నేర్చుకున్నాం కదా అనుకోండి, అదీ చెయ్యలేదా కనీసం జబ్బు పడలేదు కదా అనుకోండి, సరే జబ్బు పడ్డామా, చావలేదు కదా అది చాలు అందుకు సంతోషించండి, "రేపు" అనేది ఇంకా ఉంది నేను అనుకున్నది సాధించడానికి అని హాయిగా నిద్రపోండి. 

15, జులై 2019, సోమవారం

ఇంద్రధనస్సు లో రంగులెన్ని?

ఇవాళ లంచ్ కి బయటికి వెళ్తున్నా, నువ్వు రా ప్లీజ్. 

లేదు బ్రో, నేను లంచ్ తెచ్చుకున్నా. నువ్వెళ్ళు 

పర్లేదు రా, నీ లంచ్ బిల్ నేనే పే చేస్తా. 

కిషోర్ తో వెళ్తావుగా ఎప్పుడు, తనను తీసుకెళ్ళు ప్లీజ్ 

తనకు మీటింగ్ ఉందట. 

సరే పద వెళదాం. నడిచా, కార్లోనా?

కార్లోనే వెళదాం, బయట ఎండ ఎక్కువగా ఉంది. 

                              *******************

అరే ఎందుకంత స్లో గా వెళ్తున్నావ్? చూడు ఆ కార్ వాడు ఓవర్టేక్ చేసి మనకంటే ముందుకు వెళ్ళాడు. 

ఫర్లేదు లే బ్రో. 

                                                        ******************

కార్ ఎందుకు స్లో చేసావ్ మళ్ళీ ?

ఊరికే?

ఈ సారి వెనుక ఏ కార్ రాలేదు కాబట్టి సిగ్నల్ ముందున్న నిలబడ్డ కార్ మాదే అయింది.  గ్రీన్ సిగ్నల్ పడ్డా కార్ ని ముందుకు పోనివ్వలేదు ఫ్రెండ్. 

బ్రో, గ్రీన్ సిగ్నల్ పడింది ఎందుకు ఇంకా ఆగి ఉన్నావ్? 

గమనించలేదు 

                                                        ***********************

మళ్ళీ స్లో చేసావ్ కార్, ఇప్పుడర్థమైంది నాకు.  నువ్వెందుకో సిగ్నల్ వస్తే కార్ స్లో చేస్తున్నావ్?

సరే, దాచడమెందుకు చెప్పేస్తా. నాకు కలర్ బ్లైండ్నెస్ ఉంది. 

అంటే?

అంటే నాకు రెడ్ అయినా, గ్రీన్ అయినా, ఆరంజ్ అయినా ఏ కలర్ అయినా బ్లాక్ గానే కనపడుతుంది. నేను కలర్స్ మధ్య డిఫరెన్స్ గుర్తించలేను. 

ఏంటి జోకా?

లేదు, నిజం. అందుకే కార్ లో ఎప్పుడూ ఒంటరిగా పోను, నాకు తెలిసిన వారిని తోడుగా తీసుకెళ్తా. ఒక వేళ ఎవరూ తోడు లేకుండా  ఒంటరిగా వెళ్లాల్సి వస్తే, సిగ్నల్ వచ్చేప్పుడు కార్ స్లో చేస్తా, దాంతో నా వెనక ఉన్నోడు ఓవర్టేక్ చేసి వెళ్తాడు. దాన్ని బట్టి నేను మూవ్ అవుతా, వాడు ఆగితే నేను ఆగిపోతా, వాడు సిగ్నల్ క్రాస్ చేస్తే నేనూ సిగ్నల్ క్రాస్ చేస్తా. 

                                               ***********************

ఇది ఒక దాదాపు సంవత్సరం క్రితం జరిగిన సంఘటన.   

ఈ కలర్ బ్లైండ్నెస్  గురించి చెప్పాలంటే మనకు ఇంద్రధనస్సు ఏడు రంగుల్లో కనపడితే వారికి ఇంద్రధనస్సు అంతా ఒకే రంగు లో కనపడుతుంది. 

ఈ కింది పిక్చర్ చూపించి అందులో కనపడుతున్న అంకెలు గురించి చెప్పమంటే కలర్ బ్లైండ్నెస్ ఉన్నవాళ్లు చెప్పలేరు, కారణం వారికి అంతా ఒకే రంగులో ఉండటమే వల్ల. 


ఈ కలర్ బ్లైండ్నెస్ లో కూడా తేడాలు ఉంటాయి, మా ఫ్రెండ్ కి ఉన్నది ఎక్స్ట్రీమ్ అంటే 95%. సాధారణంగా 20-25% ఉన్నవారు కొద్దిగా డిఫరెన్స్ కనుక్కోగలరు రంగుల్లో. 95% ఉన్నవారు అస్సలు కనుక్కోలేరు. 

EnChroma అనే కంపనీ వాళ్ళు చాలా ఏళ్లుగా ప్రయత్నించి కలర్ బ్లైండ్నెస్ ను పోగొట్టే గ్లాస్సెస్ తయారుచేశారు. ఈ కలర్ బ్లైండ్నెస్ గ్లాస్సెస్ లాస్ట్ 2 ఇయర్స్ నుంచి మార్కెట్ లో ఉన్నాయి గాని, ఇప్పటికి అవి బెస్ట్ రిజల్ట్స్ ఇవ్వడం మొదలెట్టాయట ఆ కంపనీ వాళ్ళ ఇంప్రూవ్మెంట్స్ వలన. 

ఇప్పుడు తను అవి పెట్టుకుని రంగుల్లో తేడా గుర్తించగలుగుతున్నాడు. ఒంటరిగా కార్ లో వెళ్లగలుగుతున్నాడు. సో హ్యాపీ ఎండింగ్. కాకపొతే ఈ గ్లాసెస్ రేట్ కాస్త ఎక్కువ, అతనికి 750 $ దాకా ఖర్చయింది (offcourse గ్లాస్సెస్ రేంజ్ కాస్త ఎక్కువ తక్కువ ఉండచ్చు, దానికి ఉపయోగించిన ఫ్రేమ్స్ బట్టి ). కాకపొతే అతను సిగ్నల్స్ క్రాస్ చేసినప్పుడు కట్టిన ఫైన్స్ తో పోలిస్తే ఈ అద్దాల ధర తక్కువే. 

ఒకప్పటి అమెరికా ప్రెసిడెంట్ అయిన బిల్ క్లింటన్ కూడా ఈ కలర్ బ్లైండ్నెస్ ఉన్నవారేనట. 

ఇంద్రధనస్సు లో రంగులెన్ని? అని ఎవరినైనా అడిగితే ఒకటి అని  వారి నుంచి సమాధానం వస్తే ఆశ్చర్యపోకండి. 

11, జులై 2019, గురువారం

కమాన్ ఆస్ట్రేలియా కమాన్ కప్పు గెలిచేయ్

ఏమిటి సంగతి?

పిల్లాడు ఏడుస్తున్నాడు

ఎందుకనో?

మ్యాచ్ పోయిందట, అందుకని.

అందుకా, రెండ్రోజుల్లో అంతా మర్చిపోతాడు. మా కాలంలో మేమూ అలాగే ఏడ్చేవాళ్ళము ఇండియా ఓడిపోతే, అదంతా కామన్ పట్టించుకోకు 

                                            ********************

ధోని రన్ అవుట్ ఇల్లీగల్ అట 

అవునా?

అవును, ఐదుగురు ఫీల్డర్స్ బదులు ఆరుగురు ఉన్నారట బౌండరీ లైన్ దగ్గర 

ధోని ఉంటే కొట్టేవాడేమో 

రోహిత్, కోహ్లీ కనీసం పది పరుగులైనా తీసి ఉండాల్సింది, గెలిచే వాళ్ళం 

ఇదీ ఉదయాన్నే ఆఫీసులో చుట్టుపక్కల వారి విశ్లేషణ, గత నెల రోజులుగా ప్రతీ రోజు ఉదయం ఒక అరగంట డిస్కషన్ జరుగుతోంది.

                                                ********************

జీవితం లో ఒక కోరిక తీరింది భయ్యా? అన్నాడో కొలీగ్ మొన్నా మధ్య 

ఏమిటది?

పాకిస్తాన్ ఇండియా తో ఆడి ఓడిపోయాక, ఒక్క పాకిస్తానీ మొహం అన్నా చూడాలి అన్నది నా కోరిక, అది నెరవేరింది, మన ఆఫీస్ లో ఒక పాకిస్తానీ ఉన్నాడు, ఉదయాన్నే అతని దిగులు మొహం చూసి శాడిస్టిక్ ఆనందం అనుభవించాను అన్నాడు. 

మరి ఇవాళ ఆ పాకిస్తానీ కూడా మన ఇండియన్స్ మొహాలు చూసి అదే రకమైన శాడిస్టిక్ ఆనందం పొందాడో లేదో తెలీదు మరి. 

                                               **********************

ఇండియా ఎలాగూ ఓడిపోయింది కాబట్టి, మనం ఎలాగూ ఆస్టేలియా లో ఉన్నాం కాబట్టి ఆస్టేలియా ని సపోర్ట్ చేద్దాం అంటున్నారు ఇక్కడి వాళ్ళు. 

కాబట్టి కమాన్ ఆస్ట్రేలియా కమాన్ కప్పు గెలిచేయ్. కంగారూలూ


మన తెలుగు న్యూస్ పేపర్స్ లో కంగారూలూ అని రాసేవాళ్ళు. Australia వచ్చిన కొత్తలో ఒకసారి కంగారు ఐలాండ్ కి ఎలా వెళ్లాలి అని అడిగా రైల్వే స్టేషన్లో.

అరె, పేరు మార్చేసిన విషయం నాకు తెలీదే. ఇంతకు మునుపు దాన్ని కేంగరూ ఐలాండ్ అనేవాళ్ళం అన్నాడు ఎలా వెళ్ళాలో చెప్తూ.

మరి కంగారూలు కంగారు పడిపోయి ఓడిపోతే???

8, జులై 2019, సోమవారం

మూడున్నర్రేళ్ల మా బుడ్డోడు చెప్పిన కథ

నిన్న సాయంత్రం పిల్లలతో ఆడుకుంటున్నప్పుడు మా మూడున్నర్రేళ్ల బుడ్డోడు చెప్పిన కథ ఇది. వాడు ఇంగ్లీష్ లో చెప్పాడు దాన్నే నేను తెలుగులో రాస్తున్నాను.

పక్క నున్న అడవి నుంచి ఒక ఊర్లోకి  సింహం వచ్చింది.  అందరినీ తినటానికి వెంట పడుతుంటే భయంతో  'రక్షించండి రక్షించండి' అని అందరూ అరుస్తూ పారిపోతున్నారు.

ఇదంతా చెట్టు మీద కూర్చున్న కోతి చూసి, వెంటనే అందరికి అరటి పండ్లు విసిరేసింది.

అప్పుడు వారంతా ఆ పండు తినేసి భలే ఉంది టేస్ట్ అన్నారట సింహంతో.

అప్పుడు సింహం 'నేను బనానా తినను' అందట.

అప్పుడు 'గాడిదకేం తెలుసు గంధం వాసన' అని హేళనగా మాట్లాడారట.

అప్పుడు సింహం సరే అని ఒక అరటి పండు తిన్నదట, దానికి ఆ రుచి ఎంతగానో నచ్చి ఇంకో పది పళ్ళు తిన్నదట.

అప్పుడు దానికి ఆకలి పోయి మనుషులను తినటానికి వెంటపడలేదట.  కాసేపటికి అక్కడి నుంచి వెళ్లిపోతుంటే జూ వాళ్ళు వచ్చి పట్టుకొని జూ కి తీసుకెళ్ళారట.

జూ వాళ్లకు ఫోన్ చేసి పిలిపించినందుకు, అలాగే జనాలను కాపాడినందుకు అక్కడి వారంతా కోతికి థాంక్స్ చెప్పారట. 

గత నెల రోజులుగా ఉద్యోగంలో కాస్త అలజడి. ఉన్నట్లుండి క్లయింట్ ప్రాజెక్ట్ ఆపేస్తున్నట్లు చెప్పారు. దాంతో ఇప్పటికిప్పటికి ప్రాజెక్ట్ దొరక్క ఇబ్బంది పడాల్సి వచ్చింది, మా కంపెనీ వాళ్లేమో ఇండియా వెళ్లమన్నారు. ఇప్పటికిప్పుడు ఇండియా వెళ్లాలంటేమా అమ్మాయి చదువు అనవసరంగా బ్రేక్ చెయ్యాలి, మళ్ళీ అక్కడికి వెళ్లి సెటిల్ అవ్వాలి అంటే కాస్త టైం పడుతుంది అని కాస్త దిగులుపడాల్సి వచ్చింది. 

ఏమైతేనేం ఆపేసిన ప్రాజెక్ట్ మళ్ళీ మొదలైంది నిన్నటి నుంచి. సాఫ్ట్వేర్ ఫీల్డ్ లో కష్టాలు ఇలాగే ఉంటాయి 'ప్రాజెక్ట్ డెడ్ లైన్స్, ప్రెజర్స్, కంపెనీ లో కాస్ట్ కటింగ్స్' అంటూ.  బయటి వాళ్ళకేమో ఇవన్నీ కనపడవు, లక్షలు లక్షలు సంపాదిస్తున్నారని వాళ్ళింట్లో పిల్లల్ని కూడా ఈ సాఫ్ట్వేర్ ఫీల్డ్ లోకి బలవంతంగా నెట్టేస్తుంటారు.

చాలా రోజులైంది బ్లాగ్ వైపుకు రాక, అందుకే ఏదో ఒకటి రాద్దామనుకుంటే నిన్న మా బుడ్డోడు చెప్పిన కథ గుర్తొచ్చి రాద్దామని మొదలుపెట్టా. అసలు విషయం ఏమిటంటే మా బుడ్డోడికి అరటి పండు అంటే అస్సలు నచ్చదు, కానీ అరటి పండు గురించి కథలో ఎందుకు చెప్పాడో మరి.

ఈ పోస్ట్ లో బనానా గురించి మాట్లాడుకున్నాం కాబట్టి, ఒక చిన్న క్వశ్చన్, కాస్త ఫన్నీ గా ఆన్సర్ చెయ్యగలరేమో ట్రై చెయ్యండి. 

బనానా డాక్టర్ దగ్గరకు ఎందుకు వెళ్ళింది?