21, డిసెంబర్ 2021, మంగళవారం

ఆ మాత్రం ఇంగ్లీష్ రాదనుకున్నారా?

ఆఫీస్ పార్టీ నుంచి వచ్చినప్పటి నుంచీ వెంకమ్మ బాగా కోపంగా ఉంది 

చివరకి కారణం అడిగేశాడు రామారావ్ 

"నాకున్న అనుమానం నిజమేనన్నమాట, నీకు ఆఫీస్ లో కూడా ఒక వైఫ్ ఉంది" అంది ముక్కు చీదుకుంటూ 

అదేంటి వెంకూ, అర్థం పర్థం లేకుండా మాట్లాడుతావ్. 

మీరేగా మీ ఆఫీస్ పార్టీ లో నన్ను  పరిచయం చేస్తూ 'హౌస్ వైఫ్' అన్నారు, అంటే ఇంట్లో నేను ఉన్నట్లే ఆఫీసులో మీకు మరో వైఫ్ ఉన్నట్లేగా. నాకు ఆ మాత్రం ఇంగ్లీష్ రాదనుకున్నారా? అంది కోపంగా  

                                                           *******

ఇంట్లో పేరుకుపోయిన పేపర్స్ అన్నీ క్లియర్ చేద్దామని ఇవాళ కూర్చుంటే నేను ఆస్ట్రేలియా వచ్చిన కొత్తలో మా ఆవిడకి వీసా అప్లై చేయడానికి ఫిల్ చేసిన అప్లికేషన్ కళ్ళబడింది. అందులో spouse occupation అనే చోట 'హౌస్ వైఫ్' అని రాశాను. 

అప్పట్లో  'హౌస్ వైఫ్' అనే మాటే వాడే వాళ్ళం అని గుర్తు. ఆ తర్వాత  'హౌస్ వైఫ్' అనే మాట బాగా పాతది అయిపోయి, బదులుగా 'హోమ్ మేకర్' అని వాడుతున్నారు. ఆ పదం అయితే ఆడ, మగ యిద్దరికీ సరిపోతుంది కాబట్టేమో. 

15, డిసెంబర్ 2021, బుధవారం

బకెట్స్ లో పండ్లు నింపుకుందామా?

"పవన్, వీకెండ్ లో నువ్వు కూడా పార్ట్ టైం జాబ్ చేస్తావా"  అన్నాడు మా మేనేజర్?

పార్ట్ టైం జాబా ? అన్నాను ఆశ్చర్యంగా 

అదే Orange Picking అన్నాడు నవ్వుతూ. 

పోయిన నెల పండ్ల తోటకి వెళ్ళాము, అక్కడికి మా మేనేజర్ కూడా వచ్చాడట అక్కడ నన్ను చూశాడట అదీ విషయం. 

ఆస్ట్రేలియా లో ఈ సీజన్లో oranges విరివిగా పెరుగుతాయి. కొన్ని పండ్ల తోటల ఓనర్స్ పది లేదా ఇరవై డాలర్ల టికెట్ పెట్టి పబ్లిక్ ని లోనికి వెళ్ళనిస్తారు. పది డాలర్ల టికెట్ కొన్నవారికి  చిన్న బకెట్,  ఇరవై డాలర్ల టికెట్ కొన్నవారికి పెద్ద బకెట్ చేతికిస్తారు. లోపల తిన్నన్ని పళ్ళు తిని మిగతావి ఆ బకెట్స్ లో నింపుకొని రావచ్చు. 

చిన్నప్పుడు మేము కడప జిల్లా పులివెందుల దగ్గర ఉండే అంకాలమ్మ గూడూరు అనే పల్లెలో ఉండేవాళ్ళము అక్కడ శీనాకాయ తోటలు బాగా ఉండేవి. మా పక్కింట్లో ఉండేవారికి ఆ తోటలు ఎక్కువగా ఉండేవి. మాకు వాళ్ళు బాగా క్లోజ్ అవడం వల్ల ప్రతీ వారం అక్కడికెళ్ళి మేమే కోసుకొని తినేవాళ్ళము. అవీ కాక చింత చెట్లు, రేగి పండ్లు, గంగి రేగు పండ్లు, సుగంధాలు కాచే చెట్లు కూడా ఉండేవి. 

రేగు పండ్లలో రకరకాలు ఉండేవి, కొన్ని పెద్ద సైజు, కొన్ని చిన్న సైజు. ఆవులు, గేదెలు తోటలోకి రాకుండా ఉండటానికి ఈ చిన్న సైజు రేగు పండ్ల చెట్లను తోటల చుట్టూ పెంచేవారు. ఈ చిన్న సైజు రేగు పళ్ళతో రేగు వడలు చేసేవారు, భలే రుచిగా ఉంటాయి కొంచెం కొంచెం కొరుక్కుంటూ తింటూ ఉంటే. కొన్ని ప్రాంతాల్లో వీటిని రేణిగాయలు అని కూడా అంటారు, ఈ రేణిగాయల చెట్టుకు ముళ్ళు ఉంటాయి, అవి అప్పుడప్పుడూ చేతికి కుచ్చుకునేవి రేణిగాయలు తెంచడానికి ప్రయత్నించినప్పుడు.  

కొంచెం పెద్ద సైజు రేగు పళ్ళను గంగి రేగు పండ్లని పిలిచేవారు. ఇవి పుల్లగా కాకుండా కాస్త తియ్యగా ఉండేవి. ఈ  గంగి రేగు పండ్ల సైజు లోనే ఉంటూ వాటి కంటే తియ్యగా ఉండటంతో పాటు మంచి సువాసనతో ఉండే పళ్ళను సుగంధాలు అని పిలిచేవారు. ఈ పండ్లు ఇప్పటికీ ఉన్నాయో లేదో కాస్తున్నాయో లేదో నాకు తెలీదు. గ్లోబలైజషన్ వచ్చాక స్ట్రాబెర్రీస్, చెర్రీస్ లాంటివి వచ్చేసి మన మధురమైన పండ్లు మూలన పడిపోయినట్లున్నాయి. 

పల్లెల్లో పెరిగిన నా లాంటి వాడికి ఇలాంటి పళ్ళ తోటలు కొత్త కాదు కానీ మా పిల్లలకి అలాగే సిటీస్ లోనే పెరిగిన వారికి ఇలా పళ్ళ తోటలలోకి వెళ్ళి పళ్ళు కోసుకోవడం లాంటివి సరదాగా ఉంటుంది కాబట్టి తిరణాలకి తరలి వెళ్ళినట్లు ఇక్కడి జనాలు పండ్ల సీజన్ లో తోటలకి వెళ్తారు. దాని వల్ల ఆ పళ్ళ తోటల చుట్టుపక్కల దాదాపు రెండు మూడు కిలోమీటర్ల మేర విపరీతమైన ట్రాఫిక్ ఉంటుంది. 

తోట లోపల పండ్లు తినడం వరకూ బాగానే ఉంటుంది కానీ చాలా మంది పండ్లు ఒలిచి కొంచెం మాత్రం తినేసి  మిగతాది పారేయడం వంటివి చేస్తూ ఉంటారు అదే కొద్దిగా బాధగా అనిపిస్తుంది. ఒక్క అన్నం మెతుకు పారేయాలంటేనే భాధపడే రైతు కుటుంబం నుంచి వచ్చిన నాకు అలా పండ్లను వృధా చేయడం, ఫోటో దిగడం కోసం ఆ కొమ్మల మీద వాలిపోయి వాటిని విరిచిపారేయడం వంటివి బాధ కలిగిస్తూ ఉంటాయి. 

ఆ పండ్ల తోటల ఓనర్స్ కి ఇలాంటివి నష్టం కలిగించినా, ఇంకో రకంగా వాళ్ళు లాభపడతారు. అదెలాగంటే పండ్లు కోయించే కూలీ ఖర్చు తగ్గిపోతుంది (ఇక్కడ లేబర్ ఖర్చు చాలా ఎక్కువ, వాచ్ లాంటివి పని చేయకపోతే వాటిని రిపేర్ చేయించుకునే ఖర్చుతో ఇంకో కొత్త వాచ్ కొనుక్కోవచ్చు) పైగా వాటిని కోసిన తర్వాత మార్కెట్ కి తరలించే ట్రాన్స్పోర్టేషన్ ఖర్చు కూడా తగ్గుతుంది. 

అక్కడ ఆ తోటల బయట ఉన్న గొఱ్ఱెలు, ఆవులు, కోళ్ళను చూసి పిల్లలు యెంత సంబరపడ్డారో వాటిని అబ్బురంగా చూస్తూ.  

How do oranges communicate with each other? 

చిన్న జోకు లాంటి పై ప్రశ్నకి సమాధానం కనుక్కోండి చూద్దాం?

... 

... 

Answer: By speaking in  Mandarin.

ఇక్కడ oranges ని మాండరిన్స్ అంటారు. మాండరిన్ అనేది ఒక లాంగ్వేజ్, చైనాతో సహా కొన్ని దేశాల్లో కొందరు ప్రజలు ఈ భాషలో మాట్లాడుతారు. 

12, డిసెంబర్ 2021, ఆదివారం

ఈ మధ్యకాలంలో ఒకటే కాన్సెప్ట్ తో వచ్చిన కొన్ని సినిమాలు

పోయిన వారం కాన్సెప్ట్ పరంగా పోలికలు ఉన్న రెండు తమిళ సినిమాలు చూశాను. రెండూ 'టైం లూప్' మీద బేస్ అయి తీసిన సినిమాలు పైగా జస్ట్ ఒక్క వారం గ్యాప్ లో రిలీజ్ అయ్యాయి. కాకపోతే ఒక దాంట్లో నోటెడ్ యాక్టర్ అయిన శింబు హీరో అయితే మరొక దాంట్లో ఒక కొత్త హీరో. అతని నటన చూసిన తర్వాత అతని పేరు కనుక్కోవాలన్నఆసక్తి కూడా కలగలేదు.

ఆ రెండు సినిమాలలో మొదట రిలీజ్ అయింది 'జాంగో' అయితే రెండవది శింబు హీరోగా వచ్చిన 'మానాడు'. దీన్ని తెలుగులో కూడా రిలీజ్ చేయడానికి డబ్బింగ్ కూడా చేసి 'లూప్' అనే పేరుతో కొన్ని ట్రైలర్స్ కూడా వదలి ప్రమోషన్స్ మొదలు పెట్టినట్లు ఉన్నారు కానీ లాస్ట్ మినిట్ లో దీన్ని తెలుగులో డబ్బింగ్ కాకుండా రీమేక్ చేద్దాము అన్న ఉద్దేశంతో దాన్ని ఆపేసినట్లు ఉన్నారు. కాకపోతే ఇలాంటి కాన్సెప్ట్ తెలుగులో ఎంతవరకు వర్కవుట్ అవుతుంది అన్న అనుమానం నాకయితే బలంగా ఉంది చూద్దాం ఏమవుతుందో.

రెండు సినిమాలు పర్లేదు కానీ 'మానాడు' కాస్త బోరింగ్ గా అనిపించింది అవే అవే సీన్స్ సినిమా అంతా రిపీట్ అవుతూ ఉండడం ఈ చికాకుకు కారణం. 'జాంగో' మీద అదే ఫీలింగ్ కలిగింది, దానికి తోడు హీరో ఏ సీన్ లో ఏ ఎక్స్ప్రెషన్ ఎందుకు పెడుతున్నాడో అర్థం కానంత ఘోరం గా ఉండటం మరింత చిరాకు తెప్పించింది. కాకపోతే 'జాంగో' సినిమాలో తెలివిగా హీరోయిన్ మీదే స్టోరీ నడవడం వల్ల హీరోయిన్ ఆటోమేటిక్ గా సినిమాలో భాగం అయింది, 'మానాడు' సినిమాలో హీరోయిన్ ఉండాలి కాబట్టి యాడ్ చేసినట్లు అనిపించింది గానీ ఆ క్యారెక్టర్ లేకపోయినా ఆ సినిమా కథ నడుస్తుంది.

ఈ రెండు సినిమాలకు హాలీవుడ్ మూవీ 'ఎడ్జ్ అఫ్ టుమారో' ఇన్స్పిరేషన్ అయి ఉండచ్చు అని అంటున్నారు సినీ విశ్లేషకులు.

kennedy club అని మూడేళ్ళ క్రితం తమిళ్ లో తీసి ఈ మధ్యే తెలుగు లోకి డబ్ చేసిన సినిమా చూశాను. ఇది గ్రామీణ ప్రాంతాల్లో ఉండే ఆడపిల్లల కబడ్డీ పోటీలకు సంబంధించిన కథ. దాదాపు ఆ సినిమా కాన్సెప్టు లానే ఈ మధ్యే మన తెలుగులో గోపీచంద్ హీరోగా 'సీటీ మార్' అనే సినిమా వచ్చింది. kennedy club కాస్త లో కాస్త రియాల్టీ అనిపించే సీన్స్ ఉంటాయి ఇక ఫుల్లీ కమర్షియలైజ్డ్ అయిన 'సీటీ మార్' గురించి చెప్పాలంటే మాటలు చాలవు.

ఆ మధ్య మొగలిరేకులు ఫేమ్ 'సాగర్' హీరోగా 'షాదీ ముబారక్' అనే సినిమా వచ్చింది. నాగార్జున కొడుకు అఖిల్ హీరోగా 'ది మోస్ట్ ఎలిజిబుల్ బ్యాచిలర్' సినిమాని కూడా దాదాపు అదే కథ తో తీస్తున్నామని తెలిసి స్టోరీ లో కాసిన్ని మార్పులు చేర్పులు చేసి రిలీజ్ చేశారట. ఈ మోస్ట్ ఎలిజిబుల్ బ్యాచిలర్ సినిమా చూడలేదు కాబట్టి పూర్తిగా కామెంట్ చేయలేను కానీ కాన్సెప్ట్ పరంగా రెండూ ఒకటే అని విన్నాను

స్టూవర్టుపురం నాగేశ్వర్రావు కథతో కూడా ఓ రెండు సినిమాలు సమాంతరంగా తయారవుతున్నట్లు ఈ మధ్యే తెలిసింది. ఇంకా వెనక్కి వెళ్తే కొండపల్లి రాజా, భరత్ అని ఒకే కథతో రెండు సినిమాలు వచ్చాయి. ఇందులో విచిత్రం ఏమిటంటే మొదటి దానిలో సుమన్ సెకండ్ హీరో అయితే రెండవ దాంట్లో సుమన్ మెయిన్ హీరో, నాగబాబు సెకండ్ హీరో.

2, డిసెంబర్ 2021, గురువారం

హిట్ కి కొలమానం ఏదైనా ఉందా?

నేను నిన్న రాసిన అఖండ తో బాలయ్య మరో పదేళ్ళు?? అనే పోస్ట్ లో వంశోద్ధారకుడు ప్లాప్ అయితే నువ్వు హిట్ అని రాశావు అని నా ఫ్రెండ్ అన్నాడు. 

పవిత్ర ప్రేమ మా ఊర్లో వంద రోజులు ఆడింది కాబట్టి అది ప్లాప్ సినిమా కింద ఎలా కన్సిడర్ చేస్తావు, అలాగే టాప్ హీరో కూడా ప్లాప్ కాదు అని ఒక వ్యక్తి అన్నారు. 

దాని గురించి అదే పోస్ట్ లో కామెంట్స్ రాద్దామని మొదలెట్టాను, కానీ అది ఒక పెద్ద పోస్ట్ అయి కూర్చుంది, అదే ఈ సారాంశం. 

అవి నేను కొత్తగా కడపకు వచ్చిన రోజులు, ఒక్కడినే సినిమా కెళ్ళడం కూడా అదే మొదటి సారి. 

సినిమా ఆల్రెడీ స్టార్ట్ అయింది కాబట్టి కౌంటర్ దగ్గర జనాలు లేరు అనుకున్నా, ఫస్ట్ క్లాస్ కి ఒక టికెట్ ఇవ్వండి అన్నాను కౌంటర్ దగ్గర కెళ్ళి 

అతను టికెట్ఇవ్వబోయాడు. 

నేను డబ్బులు నా చేతిలోనే ఉంచుకొని టికెట్ తీసుకోకుండా 'సీట్స్ ఉన్నాయా లోపల' అని అడిగాను

లేవు తమ్ముడూ, థియేటర్ ఫుల్ అన్నాడు 

అయితే టికెట్ వద్దన్నా అన్నాను 

పర్లేదు తమ్ముడూ, ఎక్స్ట్రా చైర్ వేస్తారు. నిలబడి చూడాల్సిన అవసరం లేదు అన్నాడు 

ఆ సమాధానం తో కాస్త సంతృప్తి చెంది టికెట్ తీసుకొని లోపకి వెళ్తే నేను ఫూల్ అయ్యానని అర్థం అయింది.  

మొత్తంగా పట్టుమని పది మంది కూడా లేరు ఫస్ట్ క్లాస్ లో, థియేటర్ మొత్తంలో యాభై మంది ఉంటే ఎక్కువ అది కూడా ఆదివారం మధ్యాహ్నం షో కి. నాకేం తెలుసు సినిమా ఆడినన్ని రోజులు జనాలతో నిండిపోయి ఉండేవేమో థియేటర్స్ అని అనుకునే వయస్సు అది. 

ఆ థియేటర్ మా ఇంటికి దగ్గరలో ఉండేది దాని పేరు  'లక్ష్మి రంగ',  మరి ఇప్పటికీ అది ఉందో లేదు తెలీదు. అది యెంత పెద్ద థియేటర్ అంటే ఆ థియేటర్ ని కొట్టేసి ఇంకో మూడు థియేటర్స్ కట్టే అంత. పది లారీల జనాన్ని అందులోకి పంపినా ఇంకా సీట్స్ ఖాళీగా ఉంటాయి అని అనేవారు అప్పట్లో ఆ థియేటర్ గురించి. 

ఆ సినిమా పేరు బంగారు బుల్లోడు, అప్పటికే ఆ సినిమా 50 రోజులు పూర్తి చేసుకుంది. అంటే మిగతా 50 రోజులు ఇలా 50 మందితోనో లేదంటే ఇంకా తక్కువ మందితోనే వంద రోజులు పూర్తి చేసుకోవాలి. ఆ తర్వాత తెలిసిందేమిటంటే కొన్ని సినిమాలు ఆబ్లిగేషన్ మీద లేదంటే ఫాన్స్ తలా కొంత డబ్బులు పోగు చేసి ఆ థియేటర్ వాడికిచ్చి వంద రోజులు ఆడిస్తారని తెలిసింది. 

పైగా బంగారు బుల్లోడుతో పాటు ఒకే రోజు విడుదల అయిన 'నిప్పురవ్వ' సినిమా మీద ఈ సినిమా హిట్ అని అనిపించుకోవడానికి కొంత తంటాలు పడ్డారని తెలిసింది. అలా అని బంగారు బుల్లోడు ప్లాప్ అని నేను చెప్పడం లేదు, కాకపోతే ఎందుకో నిప్పు రవ్వే మంచి సినిమా ఏమో అని నాకప్పుడు అనిపించింది. 

కాబట్టి సినిమా హిట్టా ఫట్టా అనే దానికి నిర్దిష్టమైన కొలమానం ప్రజలు మాట్లాడుకునే మాటలే అంతే. 

నేను చిన్నప్పుడు 'శంకరాభరణం' సినిమా చూడని జన్మా ఒక జన్మేనా అనే మాట వినపడేది మేముండే ఒక  పల్లెలో, అంటే 'శంకరాభరణం' చూడకపోతే జన్మ వ్యర్థం అని కాదు, ఆ సినిమా ఏదో బాగుందనో హిట్టయ్యిందనో మాకు అర్థం అయ్యేది. అలా జనాల మాటలే కొలమానం అని నా ఉద్దేశం.  

ఉదాహరణకు నేను MCA చదివే రోజల్లో ఫ్రెండ్స్ రూమ్ కి వెళ్తే, నైట్ అక్కడే పడుకోవాలి అని డిసైడ్ అయితే మృగరాజా? నరసింహనాయుడా? అని అడిగేవారు. 

నరసింహనాయుడా? వద్దు బాబోయ్, మృగరాజు బెటర్ అనేవాళ్ళము. 

మీ కర్థం కాలేదు కదూ, చెబుతా. ఎక్కువ రోజుల నుంచి ఉతక్కుండా వాడే లుంగీ అయితే నరసింహనాయుడు, ఈ మధ్యే ఉతికిన లుంగీ అయితే మృగరాజు అని దాని అర్థం. నరసింహనాయుడు ఎక్కువ రోజులు ఆడిందని, మృగరాజు పట్టుమని పది రోజులు కూడా ఆడలేదని ఆ మాటల్లో అర్థం. 

ఇలా జనాల మాటల్లో తెలిసిపోయేది ఏది హిట్టు ఏది ప్లాప్ అని. 

అలా నా చుట్టుపక్కన వాళ్లతో మాట్లాడినప్పుడు తెలిసిన విషయాలని బట్టి నేను పవిత్ర ప్రేమ ప్లాప్ అని వంశోద్ధారకుడు హిట్ అని నాకు అప్పట్లో అర్థమైంది. నేను వేరే ఊరిలో ఉంటే ఈ అభిప్రాయం వేరే లాగా ఉండేదేమో చెప్పలేను. 2+2=4 అన్నంత ఖచ్చితంగా ఇది హిట్టు ఇది ప్లాప్ అని డిసైడ్ చేయడం కష్టం అని నా ఉద్దేశ్యం.  

1, డిసెంబర్ 2021, బుధవారం

అఖండతో బాలయ్య మరో పదేళ్ళు??

ఇవాళ మాస్ ప్రియులని ఉర్రూతలూగించడానికి బాలయ్య అఖండతో బరిలోకి దిగుతున్నారు. అందుకే బాలయ్య సినిమాల మీద ఈ స్పెషల్ ఆర్టికల్.  

మొన్న ప్రీ రిలీజ్ ఫంక్షన్ లో రాజమౌళి మాట్లాడుతూ  'బాలయ్య ఆటంబాంబు లాంటోడు, ఎలా వాడాలో బోయపాటి కే తెలుసు' అన్నాడు. అది ముమ్మాటికి నిజం. బాలయ్య కి ఏ డైరెక్టర్ పడితే ఆ డైరెక్టర్ హిట్ ఇవ్వలేడు. 

బాలయ్య అనే ఆటంబాంబు ని ఎలా వాడాలో బోయపాటి కే కాక మరో ఇద్దరు, ముగ్గురు  డైరెక్టర్స్ కి మాత్రమే తెలుసు, వారెవరో ఇక్కడ విశ్లేషిద్దాం. 

కొంత ఫ్లాష్ బాక్ లోకి వెళ్తే, ప్రియదర్శన్ దర్శకత్వంలో వచ్చిన గాండీవం విరిగిపోయింది, అలాగే మాంచి ఫార్మ్ లో ఉన్న యస్వీ క్రిష్ణారెడ్డి బాలయ్య బాబుతో 'టాప్ హీరో' అనే ఒక దిక్కుమాలిన సినిమా తీశాడు. అదే రోజు రిలీజ్ అయిన ఈవీవీ 'ఆమె' సినిమాకి ఏ మాత్రం పోటీ కాలేక పోయింది. రెండు సినిమాల టార్గెట్ ఆడియన్సు వేరైనప్పటికీ ఆమె సూపర్ హిట్టయ్యి 'టాప్ హీరో' టాప్ చిరిగి పోయింది. . 

ఆ తర్వాత  ఈవీవీ దర్శకత్వం లో గొప్పింటి అల్లుడు అనే సినిమా అటకెక్కేసింది.  

యస్వీ క్రిష్ణారెడ్డి, ప్రియదర్శన్ , ఈవీవీ లాంటి వారికి ఈ ఆటంబాంబు ను ఉపయోగించడం చేత కాలేదు, కాబట్టి వీరిని రెడ్ లిస్ట్ లోకి వెయ్యొచ్చు. 

అగ్ర దర్శకులుగా పేరొందిన కోదండ రామి రెడ్డి బొబ్బిలి సింహం లాంటి బంపర్ హిట్ ఇచ్చాడు గానీ, నిప్పు రవ్వ, యువరత్న రాణా, ముద్దుల మొగుడు, మాతో పెట్టుకోకు లాంటి ప్లాప్స్ ఇచ్చారు కాబట్టి వీరికీ ఆటంబాంబు ను ఉపయోగించడం చేత కాలేదు అని చెప్పొచ్చు  (యువరత్న రాణా - ఈ సినిమా చేసిన విషయం బాలయ్య బాబు హార్డ్ కోర్ ఫాన్స్ కైనా గుర్తుండకపోవచ్చేమో అంత అట్టర్ ఫ్లాప్ ఈ సినిమా, బాల కృష్ణ ఫ్యాన్ అయిన మా గుప్తా ని తెగ ఏడిపించేవాళ్ళం ఈ సినిమా ప్లాప్ అయిన టైములో, అందుకే నాకు బాగా గుర్తుండిపోయింది. )

పవిత్ర ప్రేమ, కృష్ణ బాబు లాంటి అట్టర్ ప్లాప్స్ తో ముత్యాల సుబ్బయ్య, పరమ వీర చక్ర అంటూ స్వర్గీయ దాసరి, అది పాండు రంగడు కాదు పాడు రంగడు అంటూ ప్రేక్షకులతో ఛీ కొట్టేలా చేయించిన రాఘవేంద్ర రావు, బంగారు బుల్లోడు తో హిట్ ఇచ్చి దేవుడు సినిమాతో గోవిందా అనిపించినాడు కాబట్టి రవిరాజా పినిశెట్టి ని లిస్ట్ లోంచి కొట్టేయచ్చు. 

ఇక గ్రీన్ లిస్ట్ లోకి ఎవరెవరిని వెయ్యొచ్చో చూద్దాం. 

మధ్య మధ్య లో ఆదిత్య 369, భైరవ ద్వీపం లాంటి హిట్ సినిమాలతో ఫామిలీ ప్రేక్షకులని బాలయ్య కి దగ్గర చేసినా శ్రీ కృష్ణా ర్జున విజయం లాంటి సినిమాతో విజయానికి కాస్త దూరమయ్యారు సింగీతం శ్రీనివాస రావు లాంటి క్లాసిక్ డైరెక్టర్. ఈయన ఆటంబాంబుని ఆటం బాంబు లా కాకుండా చిచ్చుబుడ్డి లా వాడి ఒక సెక్షన్ ఆఫ్ ఆడియెన్సు ని బాలయ్యకి దగ్గర చేశాడు. 

డైరెక్టర్ శరత్ లాంటి వారు వంశోద్దారకుడు, వంశానికొక్కడు, పెద్దన్నయ్య లాంటి సూపర్ హిట్లు, సుల్తాన్ వంటి ప్లాప్ ఇచ్చాడు గానీ బంపర్ హిట్ అనబడే సినిమా అయితే ఇవ్వలేకపోయాడు. ఈయన ఆటంబాంబుని ఆటం బాంబు లా కాకపోయినా నాటు బాంబు రేంజ్ లోనైనా ప్రయోగించగలిగాడు. 

బాలయ్య కెరీర్ కొత్తలో 'మంగమ్మ గారి మనవడు' సినిమాతో బూస్ట్ ఇచ్చాడు స్వర్గీయ కోడి రామకృష్ణ గారు ఆ తర్వాత మువ్వ గోపాలుడు,  ముద్దుల మామయ్య లాంటి మంచి హిట్స్  ఇచ్చాడు (ముద్దుల మేనల్లుడు లాంటి ప్లాప్స్ ఉన్నాయి గానీ పెద్దగా బాలయ్య ఇమేజ్ డామేజ్ కాలేదు వాటితో )

తర్వాత బాలయ్య కెరీర్ ని బాగా బూస్ట్ చేసింది మాత్రం  బి. గోపాల్ అని చెప్పొచ్చు. ఒకటా రెండా మొత్తంగా నాలుగు మాస్ హిట్స్ ఇచ్చాడు. అవి అలాంటి ఇలాంటి హిట్స్ కాదు  - లారీ డ్రైవర్, రౌడీ ఇన్స్పెక్టర్, సమరసింహా రెడ్డి, నరసింహా నాయుడు ఒకటికి మించి ఒకటి మాస్ సినిమాకి కేర్ ఆఫ్ అడ్రస్ లాంటివి అవి.  ఇదే గోపాల్ 'పల్నాటి బ్రహ్మనాయుడు' అని కన్నడం లో విష్ణువర్ధన్ హీరోగా వచ్చిన ఒక సినిమాని ఎత్తుకొచ్చి తొడగొడితే కుర్చీ ముందుకొచ్చే సన్నివేశానికి తన క్రియేటివిటీ/పైత్యం జోడించి తొడగొడితే ట్రైన్ ఆగిపోవడం లాంటి కిచిడి యాడ్ చేసి చెత్త సినిమా తీసాడు కానీ ఆ నాలుగు హిట్స్ ముందు దీన్ని మర్చిపోవచ్చు. 

ఆ తర్వాత ఇక బాలయ్య పని అయిపోయింది  అని అందరూ అనుకునే టైం లో వచ్చాడండీ ఈ  బోయపాటి శీను సింహా సినిమాతో, ఆ తర్వాత లెజెండ్ అంటూ దెబ్బకు బాలయ్య ఇంకో పది సంవత్సరాలు హిట్స్ లేకపోయినా బండి లాగించగలడు అనే రేంజ్ లో హిట్ ఇచ్చాడు. 

ఇప్పడు అఖండ హిట్టయిందా, బాలయ్య కెరీర్ హీరోగా ఇంకో పదేళ్ళు పెరిగినా ఆశర్య పోవాల్సిన అవసరంలేదు. 

10, నవంబర్ 2021, బుధవారం

టికెట్ ఎలా రాదో నేనూ చూస్తా

జ్యోతిష్య స్టార్ గా పేరొందిన ఏకాంబరాన్ని, ఏడుకొండలు  తన ఇంటికి ఆహ్వానించాడు. 

"రాబోయే ఎన్నికల్లో ఎమ్మెల్యే గా నేను గెలుస్తానంటారా?" అడిగాడు ఏడుకొండలు . 

ఆ జ్యోతిష్కుడు అతని కాళ్ళు, వేళ్ళు, గోళ్ళు అన్నీ క్షుణ్ణముగా పరిశీలించి 'చాన్స్ లేదన్నాడు' 

"అంటే, ఓడిపోతానంటారా?" వణికే పెదవులతో 

గెలవడం, ఓడటం కాదు అసలు మీరు ఎన్నికల్లో నిలబడితే కదా?

అదెలా సాధ్యం?

ఎందుకంటే ఎన్నికల్లో నిలబడటానికి మీకు టికెట్ ఇవ్వరు కాబట్టి 

స్వాతంత్రం వచ్చినప్పటి నుంచి మా ముత్తాత, తాత, తండ్రి మొదలుకొని మా కుటుంబానికే టికెట్ ఇస్తూ వస్తున్నారు, అంతేకాదు జ్యోతిష్యలెజెండ్ గా పేరొందిన మీ  నాన్న కనకాంబరం గారు ఇంకో వందేళ్ళ వరకు ఆ టికెట్ మా ఫామిలీ కే వస్తుందని ఘంటాపదంగా చెప్పారు. 

కావచ్చు కానీ .. ఇప్పటి మీ ఇంటి వాస్తు బాగోలేదు.  

మరి పరిష్కారం

కొన్ని పూజలు జరిపించాలి, పైకం పంపండి. మీ ఇంట్లో ఈశాన్యం మూలలో బరువు ఎక్కువుంది 

అవును స్వామి అటు వైపు పూల కుండీలు పెట్టాము అందుకే అటు వైపు బరువెక్కువైనట్లు ఉంది.  

వాటిని తీసి మేడ మీద పెట్టించండి. 

అలా మారిస్తే టికెట్ ఖచ్చితంగా నాకొస్తుందంటారా?

నా మాటకు తిరుగులేదు, మా నాన్న గారి మాటకు ఎదురులేదు. 

                                                         *****************

వారం తిరగక ముందే మేడ మీద పెట్టిన పూల కుండీ ఏడుకొండలు మీద పడి స్వర్గానికి టికెట్ అందుకున్నాడు ఆ  జ్యోతిష్య స్టార్ మాటకు తిరుగులేకుండా. 

పార్టీ టికెట్ మిసెస్ పద్మావతి కి దక్కింది జ్యోతిష్యలెజెండ్  మాటకు ఎదురు లేకుండా. 

7, నవంబర్ 2021, ఆదివారం

డాక్టర్ సీతారాం బినాయ్ - పక్క భాషల సినిమాలు

ఈ వారం రెండు సినిమాలు చూశాను అందులో ఒకటి తమిళ్ మరొకటి కన్నడ. రెంటిలో బాగా నచ్చిన కన్నడ సినిమా గురించి మొదట చెప్పుకుందాం.  

విజయ్ రాఘవేంద్ర నటించిన  'సీతారాం బినాయ్ కేసు నెంబర్ 18' అతని కెరీర్ లో 50 వ సినిమా.  కమర్షియాలిటీ కి బాగా దూరంగా ఉంటుంది కాబట్టి చాలా మందికి నచ్చకపోవచ్చు. ఇతని తమ్ముడు శ్రీ మురళి నటించిన 'ఉగ్రం' సినిమా డైరెక్టరే ప్రశాంత్ నీల్,  కర్ణాటక లో పెద్ద హిట్ అయిన ఈ సినిమా తర్వాత వచ్చిన KGF హిట్ తో కర్ణాటక బయట కూడా అతని పేరు మార్మోగి పోయింది. ఈ విజయ్ రాఘవేంద్ర, శ్రీ మురళి ల మేనత్తే స్వర్గీయ రాజ్ కుమార్ సతీమణి పార్వతమ్మ. నెపోటిజం అన్నది ఏ భాషా ఇండస్ట్రీలో నైనా ఉండేదే తప్పుపట్టడానికి లేదు.  

ఇళ్ళను దోచుకునే దొంగలని పట్టుకునే సినిమాగా మొదలై ఆ తర్వాత సీరియల్ కిల్లర్ ని పట్టుకొనే సినిమా గా మలుపు తిరుగుతుంది.  అక్కడక్కడ నేటివిటీ మూలంగా కాస్త డల్ గా అనిపించినా ఓవరాల్ గా సినిమా బానే మెప్పిస్తుంది. 

ఇక మరో సినిమా తమిళంలో అలాగే తెలుగులో కూడా రిలీజ్ అయిన తమిళ్ సినిమా డాక్టర్/ వరుణ్ డాక్టర్. శివ కార్తికేయన్ హీరో గా నటించిన ఈ సినిమాకి తెలుగులో టైటిల్ దగ్గర సమస్యలేమైనా వచ్చాయేమో అందుకే 'డాక్టర్' టైటిల్ కి ముందు వరుణ్ అని కలిపారు. ఈ సినిమా చూస్తున్నంత సేపు వద్దన్నా నాని నటించిన గ్యాంగ్ లీడర్ సినిమాని గుర్తుకు తెప్పిస్తుంది పైగా రెండు సినిమాల్లోనూ అదే హీరోయిన్. 

నాని, శివ కార్తికేయన్ ఇద్దరూ రేడియో / టీవీ లలో ప్రెసెంటర్స్ గా పని చేసిన అనుభవం ఉన్నవారే, సినిమాల్లో బ్యాక్గ్రౌండ్ లేకుండా కష్టపడి పైకి వచ్చారు. 

శివ కార్తికేయన్ టీవీ లో పని చేసేప్పుడు స్నేహ భర్త 'ప్రసన్న' హీరోగా నటించేవాడు సినిమాల్లో. అలా ఒక మూవీ ప్రమోషన్ లో భాగంగా టీవీ లో పని చేసే శివ కార్తికేయన్, ప్రసన్న ను ఇంటర్వ్యూ చేశాడు. ఆ తర్వాత ప్రసన్న అంతగా క్లిక్ అవ్వలేకపోయాడు కానీ శివ కార్తికేయన్ హీరోగా ప్రమోట్ అయ్యాడు, అదే శివ కార్తికేయన్ ను ఈ ప్రసన్న ఒక టీవీ ఇంటర్వ్యూ లో ఇంటర్వ్యూ చేస్తూ తమ సీట్స్ తారుమారు అయిన విశేషాన్ని చెప్పుకొచ్చాడు. కొన్ని పాత సినిమాల్లో రవితేజ చిన్నా చితక వేషాలు వేశాడు, ఇప్పుడు అదే రవితేజ హీరోగా నటించిన సినిమాలో ఆ పాత సినిమాల్లోని ప్రధాన పాత్రలు వేసిన వాళ్ళు చిన్నా చితక వేషాలు వేస్తున్నారు. ఓడలు బండ్లు, బండ్లు ఓడలు అవ్వడం అంటే ఇదేనేమో. 

హీరో శివ కార్తికేయన్ నటించిన ఇతర సినిమాల వల్ల, అలానే ఈ డాక్టర్ సినిమా పోస్టర్ చూసి  ఇదేదో క్రైమ్ యాక్షన్ థ్రిల్లర్ అనుకున్నాను కానీ, సినిమా మొదలైన కాసేపటికే నా అంచనా తప్పని  ఇది డార్క్ కామెడీ అని అర్థమైంది. చాలా సీరియస్ ఇష్యూ ని కామిక్ వే లో చెప్పడమే ఈ డార్క్ కామెడీ కాన్సెప్ట్. 

అమ్మాయిలను కిడ్నాప్ చేస్తున్న గ్యాంగ్ నుంచి ఆ అమ్మాయిలని తప్పించడానికి ఒక డాక్టర్ పడ్డ తాపత్రయమే ఈ సినిమా. ఇందులో ప్రతినాయకుడి పాత్రని వాన సినిమాలో హీరో గా నటించిన 'వినయ్ రాయ్' పోషించాడు. ఈ వాన సినిమా కన్నడ సూపర్ హిట్ అయిన 'ముంగారు మలే' కి తెలుగు రీమేక్. అసలు 'ముంగారు మలే' సినిమా హిట్టయ్యింది కథ వల్ల కాదు కేవలం పాటలు అందులో హీరో గా నటించిన గణేష్ ఆకట్టుకునే నటన వల్లనే(ఈ గణేష్ కూడా టీవీ బాక్గ్రౌండ్ నుంచి వచ్చినవాడే)  అసలు 'ముంగారు మలే' కన్నడలో ఎందుకు  హిట్ అయిందో సరిగ్గా అంచనా వేయకుండానే తెలుగులో తీసి బోల్తా పడ్డారు. అంటే M.S రాజు కు ఈ మాత్రం జడ్జిమెంటల్  స్కిల్స్ లేకుండానే అంత పాపులర్ ప్రొడ్యూసర్ అయ్యాడా అంటే నేనేం చెప్పలేను. 'ముంగారు మలే' రిలీజ్ అయినప్పటికి నేను బెంగుళూరు లోనే ఉన్నాను ఒక తెలుగు ప్రేక్షకుడిగా నాకు అందులో పాటలు, గణేష్ యాక్టింగ్, డైలాగ్ డెలివరీ విపరీతంగా నచ్చేశాయి, మరి అలాంటి సినిమాకి మంచి పేస్ ఎక్స్ప్రెషన్స్ ఇవ్వగల హీరో ని పెట్టి తీయాలి గానీ  'వినయ్ రాయ్' లాంటి వాళ్ళు సరి తూగలేరు. నేను ఇంతకు ముందు చెప్పినట్లే కన్నడ సినిమాలు తెలుగులో రీమేక్ చేస్తే 10% మాత్రమే వర్కౌట్ అయ్యాయి ఇంతవరకు. ఆ 90% కోవలోకే వెళ్తుంది ఈ వాన. 

అదేంటి ఎక్కడో మొదలెట్టి ఎక్కడో ముగించాడు అని తిట్టుకోకండి, సినిమాలకి రివ్యూస్ రాయడం కాదు నా పని, జస్ట్ ఆ సినిమాల వెనుక, ఆ సినిమాల్లో నటించిన నటీనటుల వెనుకో ఉండే ఆసక్తికరమైన విశేషాలను పంచుకోవడమే నా ఉద్దేశ్యం. ఉదాహరణకి పైన మాట్లాడుకున్న నటుల్లో నాని, శివ కార్తికేయన్ మరియు గణేష్ టీవీ నేపధ్యం నుంచి వచ్చిన వారే. టాలెంట్ ఉండి కాస్త అదృష్టం కలిసి రావాలి అంతే, ఎవరైనా హీరోలు అయిపోవచ్చు సినిమా ఫీల్డ్ లో. 

4, నవంబర్ 2021, గురువారం

పర్మనంట్ అడ్రస్

మా నాన్నగారు బాంక్ ఉద్యోగి అవడం మూలాన ప్రతీ రెండు మూడేళ్ళకోసారి ఊరు మారాల్సి వచ్చేది. కొన్ని సార్లు సంవత్సరానికోసారి మారాల్సి వచ్చిన సందర్భాలు కూడా ఉన్నాయి. కాబట్టి సంవత్సరం పూర్తి కాగానే ఎప్పుడు ట్రాన్స్ఫర్ ఆర్డర్ వస్తుందో ఎప్పుడు బయలుదేరాలో అనేట్టు ఉండేది. అందువల్ల చిన్నప్పుడు స్కూల్లో చదివే రోజుల్లో నుంచి 'పర్మనంట్ అడ్రస్' అనే కాలం కింద ఏం రాయాలి అనే భేతాళ ప్రశ్న ఎదురయ్యేది.  

ఇక కాలేజ్ కి వచ్చాక ఈ  భేతాళ ప్రశ్న తీవ్రత పెరిగిందే కానీ తగ్గలేదు. మీ 'పర్మనంట్ అడ్రస్'  అప్లికేషన్ ఫారం మీద రాసివ్వు నీ స్పోర్ట్స్ సర్టిఫికెట్స్ లేదంటే ఫీజ్ కట్టిన రిసీప్ట్స్ లాంటివి మీ ఇంటికి పంపిస్తాం అనేవారు. ఈ సంవత్సరం ఫీజ్ రీయింబర్సుమెంట్ కింద మీ డబ్బులు వాపసు ఇచ్చేస్తాం  మీ పర్మనంట్ అడ్రస్ రాసి వెళ్ళండి ఫార్మాలిటీస్ అన్నీ పూర్తయ్యాక చెక్ మీ ఇంటికి పంపిస్తాం అన్నారు  డిగ్రీ కాలేజ్ ముగిశాక. 

ఆ ఫీజ్ రీయింబర్సుమెంట్ కింద పంపే చెక్కు విలువ అయిదారు వందల రూపాయల దాకా ఉండేది, అప్పట్లో మా లాంటి మధ్య తరగతి వాళ్లకు అది చాలా  పెద్ద మొత్తమే. 

ఏమోయ్, మొన్న మీ అబ్బాయి బారసాల అని లీవ్ పెట్టుకున్నావు కదా. ఇవాళేమో పెళ్ళికి లోన్ తీసుకుంటున్నావేమిటీ? అడిగాడు ఆశ్ఛర్యపోతూ కొత్తగా వచ్చిన ఆఫీసర్. 

నా పెళ్ళికని లోన్ కోసం రెండేళ్ళ క్రితం అప్లికేషన్ పెట్టుకుంటే అది ఇప్పుడు శాంక్షన్ అయింది సర్ అన్నాడా ఉద్యోగి. 

ప్రభుత్వ ఆఫీసుల్లో జరిగే రెడ్ టేపిజం గురించి మాట్లాడేప్పుడు తరచుగా వినిపించే జోక్ ఇది. సో, ఆ కాలేజ్ వాళ్ళు ఆ చెక్కు పంపే లోపు మేమసలు ఆ అద్దె ఇంట్లో అదే ఊర్లో ఉంటామో లేదో అని భయం, పోనీ పర్మనెంట్ అడ్రస్ ఏదైనా ఇద్దామనుకుంటే అలాంటిదొకటి ఏడ్చి ఛస్తే కదా?

MCA సీట్ అడ్మిషన్  కోసం అనుకుంటా మీ పర్మనెంట్ అడ్రస్ ప్రూఫ్ జత చేయండి అది లేని పక్షంలో  మీ మండల రెవిన్యూ అధికారితో మీరు ఫలానా చోట ఉంటున్నట్లు సంతకం చేయించుకున్న ఫారం జతపర్చండి అన్నారు. ఆ మండల రెవిన్యూ అధికారి అనే పదార్ధం ఎప్పుడు ఎక్కడుంటుందో తెలీక పడ్డ చిక్కులు అన్నీ ఇన్నీ కావు. 

తిరుపతి లో MCA సీట్ వచ్చాక, కాలేజీ లో డిసెంబర్ 4 వ తేదీ నుంచి క్లాసెస్ మొదలుతాయి ఏమైనా అప్డేట్ ఉంటే మీకు ఉత్తరం ద్వారా తెలియజేస్తాం మీ అడ్రస్ ఇచ్చి వెళ్ళండి అన్నారు(అప్పట్లో ఫోన్ సౌకర్యాలు అంత అభివృద్ధి చెందలేదు మరి)

ఏ అడ్రస్ ఇచ్చి వెళ్ళాలి? అప్పటికే ఉంటున్న ఊరిలో రెండేళ్ళు దాటడం వల్ల  ట్రాన్స్ఫర్ ఆర్డర్ వచ్చింది నాన్నకు. సరే అని చేసేదేమీ లేక అప్పుడు ఉంటున్న అడ్రసే ఇచ్చి వెళ్ళాను. ఆ తర్వాత పది రోజులకే ఆ ఉన్న ఊరి నుంచి మరో ఊరికి వెళ్ళాము. 

డిసెంబర్ 4 వ తేదీ కాలేజ్ కి వెళ్తే,  వారం రోజులు పోస్ట్ పోన్ చేస్తున్నట్లు మీకు ఉత్తరం పంపామే అన్నారు. పంపే ఉంటారు కానీ మేము ఆ ఊరు వదలి వెళ్ళడం వల్ల అది మాకు చేరలేదు. 

ఇక ఆ తర్వాత బ్యాంకు అకౌంట్ ఓపెనింగ్ కోసం, పాస్పోర్ట్ అప్లై చేసేప్పుడు, మ్యారేజ్ రిజిస్ట్రేషన్ సర్టిఫికెట్ కోసం వెళ్ళినపుడు ఇలా చెప్పుకోలేనన్ని సార్లు ఈ పర్మనంట్ అడ్రస్ లేదంటే అడ్రస్ ప్రూఫ్ లాంటిది లేక ఇబ్బంది పడ్డ రోజులు ఇప్పటికీ గుర్తున్నాయి. 

ఇక ఆస్ట్రేలియా వచ్చాకా ఆ ఇబ్బంది ఎప్పుడూ ఏర్పడలేదు, మనం అద్దె ఇంట్లో ఉన్నా సరే ఎలక్ట్రిసిటీ బిల్లులు, గ్యాస్ బిల్లులు మన పేరు మీదే పంపించే ఏర్పాటు ఉంటుంది, వాటిని అడ్రస్ ప్రూఫ్స్ గా ఎక్కడైనా కన్సిడర్ చేస్తారు. ఇక్కడ నచ్చిన మరో విషయం ఏమిటంటే గ్యాస్ అయిపోతోందని మరో సిలండర్ ఆర్డర్ చెయ్యాలి అనే దిగులు లేకపోవడం. వాటర్ కనెక్షన్ లానే గ్యాస్  కనెక్షన్ కూడా ఉంటుంది, వాడుకున్నంత మేర బిల్లులు పంపిస్తుంటారు. ఇండియా లో కూడా ఇలాంటి ఏర్పాటు త్వరలోనే వస్తుంది అని పదేళ్ళ కిందటే విన్నాను కానీ అదెంతవరకు వచ్చిందో తెలీదు మరి. 

గత రెండు నెలలుగా ఏదైనా అప్లికేషన్ నింపుతున్నప్పుడు 'పర్మనంట్ అడ్రస్' అనే కాలం కనపడినప్పుడల్లా నా ఛాతీ రెండించులు వెడల్పవుతోంది. 

నడ్డి మీదకు నలభయ్యేళ్ళు దాటేదాకా ఈ పర్మనంట్ అడ్రస్ అన్నది లేదు ఇప్పటికీ పేరుకు పర్మనంట్ అడ్రస్ అనే కానీ మరో ముప్పయ్యేళ్లు గాడిద చాకిరీ చేస్తే గానీ అది పూర్తిగా నా సొంతమవ్వదు బ్యాంక్ నుండి. 

ఆ పర్మనంట్ అడ్రస్ లో ఇది మా తొలి దీపావళి. మీ అందరికీ కూడా దీపావళి శుభాకాంక్షలు. 




31, అక్టోబర్ 2021, ఆదివారం

పఠనమా..లేక దృశ్య మాధ్యమమా?

ఎనిమిదేళ్ళ క్రితం అనుకుంటాను తెలుగు మీద  మోజుతోనో లేదంటే ఏదో తెలుగుని బతికించాలి అనే సదుద్దేశ్యంతో ఒక తెలుగు పత్రిక స్టార్ట్ చేశారు ఆస్ట్రేలియా లో. మంత్లీ 4 డాలర్లు కట్టండి లేదంటే సంవత్సర చందా 40 డాలర్లు కట్టండి,  పత్రిక మీ ఇంటికే పంపిస్తాము. నెలలో జస్ట్ ఒక కాఫీ కంటే తక్కువ ఖర్చుకే మీరు మంచి తెలుగు కథలు చదవచ్చు అని advertise చేసుకున్నారు. 

పుస్తకం పట్టుకు చదివితే వచ్చే మజానే వేరు అనే ఉద్దేశ్యంతో నేనూ 8 డాలర్లు మిగులుతాయని సంవత్సర చందా 40 డాలర్లు కట్టాను, తర్వాత సరిగ్గా సంవత్సరానికి ఎక్కువ మంది చందాదారులు లేక ప్రింట్ ఆపేస్తున్నాము, ఇంట్రస్ట్ ఉన్నవాళ్ళు ఆన్లైన్ లో చదువుకోండి  అని చెప్పి ఆన్లైన్ లో మరో ఏడాది కొనసాగించి ఆ తర్వాత దుకాణం పూర్తిగా మూసేశారు. చదవాలి అనే ఆసక్తి పాఠకుల్లో లేకపోవడమో లేదంటే చదివి తీరాలి అనిపించే కంటెంట్ వాళ్ళు ఇవ్వలేకపోవడమో జరిగింది. మరొక ముఖ్యమైన విషయం ఏమిటంటే పఠనానికంటే దృశ్య మాధ్యమానికే మొగ్గు చూపుతున్నారు ఈ నాటి తరం. చిన్న హాస్య పుస్తకం చదవడానికంటే జబర్దస్త్ చూడటానికో, సినిమా రివ్యూ చదవడం కంటే పబ్లిక్ ఒపీనియన్ తెలుసుకోవడానికో యు ట్యూబ్ ఓపెన్ చేస్తున్నారు తప్ప అసలు చదవడం అన్నదానికి ఫుల్ గా ఫుల్స్టాప్ పెట్టేసినట్లున్నారు. 

నేనొక న్యూస్ కంపనీ లోని IT డిపార్ట్మెంట్ లో పని చేస్తున్నాను. ఆ న్యూస్ పేపర్స్ కి ఉన్న సబ్స్క్రైబర్స్ సంఖ్య చాలా ఎక్కువ, నేను మాట్లాడేది ఆన్లైన్ సబ్స్క్రిప్షన్ గురించి కాదు ప్రింట్ సబ్స్క్రిప్షన్ గురించి. ఇంకా ఇంటికి పేపర్ తెప్పించుకొని చదివే అలవాటు పెంచుకుంటున్నారు తప్పితే తగ్గించుకోవడం లేదు. ప్రింట్ పేపర్ తగ్గించడం వల్ల వాతావరణానికి మంచి చేసినట్లే అవ్వచ్చు కానీ మన కంటికి విపరీతమైన ఒత్తిడి పెంచుతున్నాము అదే టైం లో ఈ లాప్టాప్, మొబైల్ ఫోన్స్ వాడి విపరీతమైన రేడియేషన్ పెంచుతున్నాము అని నా అభిప్రాయం. 

ఇక్కడ చాలా మంది తెల్లోళ్ళ ఇళ్ళలో ఈ బుక్ షెల్ఫ్ అన్నది ఖచ్చితంగా ఉంటుంది, వారు ఈ చదివే అలవాటు తగ్గించుకోవడం లేదు. మన పాత జనరేషన్ లో ఈ బుక్ షెల్ఫ్ వ్యవహారం ఉండేది కానీ ఇప్పుడు పూర్తిగా తగ్గిపోయింది. ఈ జనరేషన్ వాళ్ళు అంతా ఫోన్ లోనే వినడం లేదంటే పోడ్ కాస్ట్ లంటూ వింటూ ఉండటం, చివరికి కథలు కూడా ఎవరో రికార్డు చేస్తే  వింటున్నారు. అసలు కథలను మనం చదివితే కదా మజా, వాళ్లెవరో చదివి వినిపించడం ఏమిటి? సరేలెండి నేను ఓల్డ్ జనరేషన్  కాబట్టి నా అభిప్రాయం ఇదేమో. చదవడానికి అంత టైం ఎక్కడుంది, వినడం అయితే సైకిల్ మీద  వెళ్తూనో లేదంటే జాగింగో, జిమ్ చేస్తూనో వినచ్చు అంటున్నారు ఇప్పటి వారు.  ఏదైనా సరే ఒక విషయం గురించి తెలుసుకోవడానికి ఒక వీడియో చూడటం కంటే చదివి తెలుసుకోవడం ఉత్తమం అనేది పాత చింతకాయ పచ్చడి కిందే లెక్క. 

మొన్నీ మధ్యే ఏదో మళయాళ సినిమా బాగుంది అన్నాడు ఒక మిత్రుడు. ఎప్పుడు చూశావ్ అంటే చూడలేదు విన్నాను అన్నాడు. వినడం ఏమిటి, అప్పట్లో మాయాబజార్,  శ్రీ కృష్ణ తులాభారం లాంటి సినిమా ఆడియో కాస్సెట్స్ వచ్చేవి, పాటలు మాత్రమే కాకుండా సినిమా అంతా. అలా ఇప్పుడు కూడా ఆడియో సినిమాలు రిలీజ్ చేస్తున్నారా అని అడిగాను. 

అదేం లేదు, యు ట్యూబ్ లో కొన్ని సైట్స్ ఉన్నాయి.  రెండు గంటల సినిమా చూసే ఓపిక లేని వాళ్ళకు సినిమా స్టోరీ  మొత్తం అరగంట లో చెప్పేస్తారు అన్నాడు. సినిమా కథ ఎక్స్ప్లెయిన్ చేస్తూ యు ట్యూబ్ వీడియోస్ కూడా వచ్చాయంటే జనాలు దృశ్య మాధ్యమానికి యెంత అడిక్ట్ అయ్యారో తెలుస్తోంది. ఇదేం విచిత్రం రా నాయనా అనుకున్నా?  20-20 క్రికెట్ మ్యాచుల జనరేషన్ లో పోను పోను ఇలాంటి ఎన్ని విచిత్రాలు వినాల్సి వస్తుందో. 

పాతికేళ్ళ క్రితం 'రోజులో అలా 8 గంటలు టీవీ ముందు కూర్చుని క్రికెట్ చూస్తూ టైం ఎందుకు వేస్ట్ చేస్కుంటారు' అని మా నాన్న అంటుంటే ఓల్డ్ జనరేషన్ అని సరిపెట్టుకున్నా. ఇప్పుడు  నేను కూడా అదే ఓల్డ్ జనరేషన్ లోకి చేరినట్లున్నాను. 

పాత నీరు పోయి కొత్త నీరు రావాల్సిందే, అదే ప్రకృతి ధర్మం కూడా. 

29, అక్టోబర్ 2021, శుక్రవారం

కన్నడ పవర్ స్టార్

ఎక్కడి నుంచి మొదలు పెట్టాలో తెలియలేదు ఈ పోస్ట్. 

నిన్న సాయంత్రం మిత్రుడి కొడుకు బర్త్డే పార్టీ లో ఉన్నప్పుడు  'పునీత్ రాజ్ కుమార్ చనిపోయారట' అన్నాడో మిత్రుడు వాట్సాప్ లో వచ్చిన మెసేజ్ చూసి. 

ఇదేదో ఫేక్ న్యూస్ అయి ఉంటుందిలే అన్నాను. మొన్నొకసారి శ్రీకాంత్ మరణం అని హెడ్డింగ్ పెట్టి హీరో శ్రీకాంత్ ఫోటో కూడా పెడితే అయ్యో పాపం అనుకున్నా, తీరా చూస్తే హెడ్డింగ్ ఒకటి మేటర్ మరొకటి. ఇది కూడా అలాంటిదేనేమో అన్నాను. 

లేదు నిజమే, ఫొటోస్ కూడా షేర్ చేశారు అన్నాడు. 

కొంచెం షాకింగ్ గానే అనిపించింది అతని మరణం. నేను MCA చదువుతున్న రోజుల్లో ఒకసారి బెంగుళూరు వెళ్ళినప్పుడు అప్పు సినిమా రిలీజ్ అయి దుమ్ము దులుపుతోంది. యెవర్రా ఈ హీరో అని చూస్తే రాజ్ కుమార్ కొడుకు 'పునీత్ రాజ్ కుమార్' అని ఆ సినిమా డైరెక్టర్ మన పవన్ కళ్యాణ్ తో బద్రి తీసిన పూరి జగన్నాథ్ అని తెలిసింది. 

మొదటి సినిమా బద్రి తో బంపర్ హిట్ కొట్టి రెండవ సినిమా  బాచి తో మొహం వాచేలాగా ప్లాప్ అందుకున్న పూరి జగన్నాధ్ ని పిలిచి మరీ రాజ్ కుమార్ తన పెద్ద కొడుకుతో అప్పటికే తెలుగులో బంపర్ హిట్ అయిన 'తమ్ముడు' సినిమాని రీమేక్ చేయించాడు. 

ఆ తర్వాత పూరీ జగన్నాద్ తెలుగులో 'ఇట్లు శ్రావణి సుబ్రహ్మణ్యం' తో మళ్ళీ హిట్ అందుకుని కన్నడ ఇండస్ట్రీ వైపు వెళ్ళకూడదు అని డిసైడ్ అయ్యారట, కానీ మళ్ళీ  రాజ్ కుమార్ గారు పిలిపించి తన చిన్న కొడుకైన పునీత్ రాజ్ కుమార్ ని హీరో గా ఇంట్రడ్యూస్ చేసే బాధ్యత పూరి భుజాలపై ఉంచారు. కన్నడ ఇండస్ట్రీ వైపు వెళ్ళకూడదని అనుకున్న పూరి, రాజ్ కుమార్ గారి మీద గౌరవంతో చేసిన సినిమానే 'అప్పు'. అప్పట్లో అదొక బ్లాక్ బస్టర్ హిట్. 

అదే సినిమాని రవి తేజ తో 'ఇడియట్' గా తీసిన పూరి వెనక్కి తిరిగి చూసే అవసరం లేనంతగా దూసుకెళ్లిపోయారు వరస హిట్లతో. 

నెక్స్ట్ ఇయర్ పూరి జగన్నాథ్ జూనియర్ ఎన్టీఆర్ తో ఆంధ్రా వాలా తీస్తుంటే అదే సినిమాని కన్నడలో కూడా పునీత్ తో తీయమని అడిగితే పూరి జగన్నాథ్ సున్నితంగా తిరస్కరించారట కావాలంటే ఇదే కథని వేరే డైరెక్టర్ తో తీసుకోమని. అప్పుడు  అదే కథని మెహర్ రమేష్ డైరెక్షన్ లో 'వీర కన్నడిగ' పేరుతో సమాంతరంగా తీశారు. రెండు భాషల్లో రిలీజ్ అయిన ఆ సినిమా తెలుగులో బోల్తా కొడితే కన్నడ లో బంపర్ హిట్ అయింది. 

ఆ తర్వాత కూడా ఎన్నో తెలుగు సినిమాలు రీమేక్ చేసి హిట్స్ అందుకున్నారు పునీత్. రీసెంట్ గా యువరత్న సినిమాతో తెలుగు లో కూడా కాస్త చోటు సంపాదించుకోవాలని చూశారు గానీ పెద్దగా వర్కౌట్ కాలేదు. 

ఒక సూపర్ స్టార్ కొడుకు సూపర్ స్టార్ అవ్వడం చూస్తుంటాం. కృష్ణ గారి అబ్బాయి మహేష్ బాబు లాగా కానీ ఒక సూపర్ స్టార్ ఇద్దరి కొడుకులు సూపర్ స్టార్స్ అవ్వడం అరుదుగా చూస్తుంటాం.  అలాంటి రికార్డు సాధించారు రాజ్ కుమార్ గారి పుత్రులు శివరాజ్ కుమార్ మరియు పునీత్ రాజ్ కుమార్. రాజ్ కుమార్ గారి రెండవ కొడుకు రాఘవేంద్ర రాజ్ కుమార్ కెరీర్ లో  'నంజుండి కళ్యాణ' లాంటి రెండు మూడు బంపర్ హిట్స్ ఉన్నా పెద్దగా నిలదొక్కుకోలేక పోయారు. (ఇదే 'నంజుండి కళ్యాణ' సినిమాని తెలుగులో రాజేంద్ర ప్రసాద్, నిరోషా జంటగా 'మహాజనానికి మరదలు పిల్ల' అని రీమేక్ చేశారు గానీ ప్లాప్ అయింది. కన్నడ నుంచి రీమేక్ చేసిన 90% సినిమాలు తెలుగులో ప్లాప్ అయ్యాయి నా అంచనా ప్రకారం). 

శోభన్ బాబు గారు ఆరోగ్యం బాలేక కాదు ఆయుష్షు లేక మరణించారు అంటుంటారు అలా పునీత్ గారిని కూడా ఆయుష్షు లేక మరణించారనే అనుకోవాలి.  ఎందుకంటే నిత్యం వ్యాయామం చేస్తూ ఆహారం కూడా మితంగానే తీసుకుంటారని అతని సన్నిహితులు చెప్తూ ఉండేవారు. 

ఫ్రీ స్కూల్స్, వృద్దాశ్రమాలు, అనాధాశ్రమాలు, గోశాలలు లాంటివి నిర్మించి తన సేవా గుణాన్ని కూడా చాటుకున్నారు. బాల నటుడిగా కెరీర్ మొదలెట్టి నటుడిగా కెరీర్ లో ఇంకా ముందుకు దూసుకు పోతాడు అనుకున్న అభిమానులను శోకం లో ముంచి వెళ్లిపోయిన పునీత్ రాజ్ కుమార్ గారికి ఆత్మ శాంతించాలని కోరుకుంటున్నాను. 

25, అక్టోబర్ 2021, సోమవారం

నాగేంద్ర బాబు - ఫెయిల్యూర్ స్టార్

ఈ మధ్య కాలంలో సినిమాల ద్వారా కాకపోయినా వివాదాల మధ్య నలిగిన పేరుగా నాగబాబు బాగా గుర్తుండిపోయాడు.  

మంచి ఎత్తు, పర్సనాలిటీ ఉన్న నాగబాబుని చిరంజీవి మంచి డైరెక్టర్స్ చేతిలో పెట్టలేదేమో అని నా అనుమానం.  పోటీ కొస్తాడని భయపడ్డాడా లేక హీరో మెటీరియల్ కాదని అనుకున్నాడా? అయినా ఈ నాగార్జున, వెంకటేష్ మొదట్లో చేసిన యాక్షన్ కంటే బానే చేశాడు, కనీసం కృష్ణ గారి అబ్బాయి రమేష్ బాబు అప్పట్లో మంచి ఫామ్ లో ఉన్న మంచి డైరెక్టర్స్ అయిన దాసరి, కోదండరామి రెడ్డి, జంధ్యాల, వి మధు సూధన రావు లాంటి వారి డైరెక్షన్ లో ట్రై చేశాడు గానీ ఒక్క బజార్ రౌడీ తప్పితే సోలో హీరోగా పెద్దగా హిట్స్ ఏమీ కొట్టలేకపోయాడు గానీ సోలో హీరోగా డజన్ సినిమాలతో లక్ చెక్ చేసుకున్నాడు. మరి నాగేంద్ర బాబు సోలో హీరో గా వర్క్ అవుట్ కాలేడని మూడు నాలుగు సినిమాలతోనే చిరంజీవి డిసైడ్ అయ్యారా లేక నిర్మాతలే ముందుకు రాలేదా?

అఫ్ కోర్స్  కొడుకు, తమ్ముడు ఒకటే కాకపోవచ్చు. లేదంటే 'తమ్ముడు తమ్ముడే పేకాట పేకాటే' అని అప్పటికే చిరంజీవి పక్కన అల్లుకుపోయిన వారెవరైనా ఎగదోశారా? జస్ట్ అస్కింగ్. 

మొన్నా మధ్య పాత సినిమాల వైపు మనసు లాగితే పనిలో పనిగా దాదర్ ఎక్ష్ప్రెస్స్ , 420 లాంటి సినిమాలు చూశా.

దాదర్ ఎక్ష్ప్రెస్స్ సినిమా మసాలాలు ఉండని కాస్త డ్రై సబ్జెక్టు. మాటల రచయిత గా సత్యానంద్ గారిది అందె వేసిన చెయ్యి కావచ్చేమో గానీ డైరెక్షన్ మరీ బాడ్ గా ఉంది దానికి తోడు యాక్షన్ అంటే స్పెల్లింగ్ కూడా తెలీని హీరోయిన్ వల్ల సినిమా అస్సలు ఆకట్టుకోదు. అప్పట్లో ఈ సినిమా మీద వివాదం రేగి చివరకు సూపర్ ఎక్ష్ప్రెస్స్ అని పేరు మార్చి రిలీజ్ చేశారు.  దాదర్ ఎక్ష్ప్రెస్స్ లో అలాంటి సంఘటన జరగలేదని అనవసరంగా ప్రజలను భయభ్రాంతులకు గురి చేయరాదని సెన్సార్ వాళ్ళు అడ్డుకున్నట్లు ఉన్నారు. 

ఇక 420 సినిమా గురించి వినడమే గానీ చూడటం ఇదే తొలిసారి. దీనికి ఈవీవీ సత్య నారాయణ డైరెక్టర్. అప్పటికే సీతా రత్నం గారి అబ్బాయి, ఆ ఒక్కటి అడక్కు లాంటి హిట్లతో ఫామ్లో ఉన్నాడు. ఈ సినిమాలో పాటలు అనవసరంగా ఫ్లో కు అడ్డుపడ్డాయి గాని మాంచి టైంపాస్ మూవీ. తాడి మట్టయ్య అనబడే క్యారెక్టర్ లో కోట, కానిస్టేబుల్ గా మల్లి ఖార్జున రావు పాత్రలని ఎక్స్టెన్షన్ లాగా మళ్ళీ హలో బ్రదర్ లో వాడుకున్నాడు కాస్త సెంటిమెంట్ టచ్ లాస్ట్ లో అద్దేసి. 

ఆ తర్వాత హాండ్స్ అప్, కౌరవుడు లాంటి సినిమాల్లో ట్రై చేసాడు గానీ అప్పటికే యంగ్ జెనెరేషన్ వేగంలో అవి సరిపోవు అనిపించింది 

నాగబాబు ఉంటే ఆ సినిమా ఫట్టవుతుందని అప్పట్లో నాకో గట్టి నమ్మకం ఉండేది, ఆ నమ్మకాన్ని అతను నటించిన చాలా సినిమాలు వమ్ము కాదని ప్రూవ్ చేశాయి. 

ప్రతీ నటుడికి లాండ్మార్క్ లాంటి ఒక మూవీ ఉంటుంది చెప్పుకోవడానికి.  కానీ నటించడం మొదలెట్టిన ఇన్నేళ్లయినా అలాంటి సినిమా ఒక్కటి కూడా లేకపోవడం ఇతనికి లోటే. చందమామ, రుక్మిణి లాంటి సినిమాల్లో కాస్తో కూస్తో గుర్తుంచుకో గలిగే పాత్రలు చేశాడు గానీ అవి ఎంతమందికి గుర్తుంటాయి అనేది ప్రశ్నార్ధకమే. ఇకపైన అయినా  కనీసం అలాంటి ఒక సినిమా తాను చేయగలడని సినిమాల్లో ఫెయిల్యూర్ లా మిగిలి పోవద్దని  ఆశిస్తూ ఇంకో రెండు మూడు రోజుల్లో 60 వ వడిలో అడుగు పెట్టబోతున్న మా నాగబాబు కి జన్మదిన శుభాకాంక్షలు. ఏం మెగా స్టార్. పవర్ స్టార్ కేనా ఫాన్స్ ఉండేది టవర్ స్టార్స్ కి ఉండరా?

20, అక్టోబర్ 2021, బుధవారం

చల్లని కేసు

ఈ మధ్య నేను చూసిన మరో మంచి సినిమా కోల్డ్ కేస్, పృథ్వి రాజ్ ప్రధాన పాత్రలో నటించిన మళయాళ సినిమా ఇది, మరి తెలుగులో డబ్బింగ్ చేశారో లేదో తెలీదు. 

పరిష్కరించకుండా మిగిలిపోయిన కేసునో లేదంటే ఐడెంటిఫై చేయలేని వ్యక్తుల హత్య కి సంబంధించిన కేస్ లని కోల్డ్ కేస్ అంటారని నాకు అర్థమైన ప్రకారం నిర్వచించగలను. గూగుల్ లో సరదాగా సెర్చ్ చేస్తే తెలుగు అనువాదం ఇలా దొరికింది, దాన్నే తీసుకొచ్చి టైటిల్ గా  పెట్టేశా.




కోల్డ్ బ్లడెడ్ మర్డరర్ ని అయితే 'చల్లటి రక్తపు హంతకుడు' అని అనువాదం చేసుకోవచ్చేమో.  సరే సోది పక్కనబెట్టి సినిమా గురించి మాట్లాడతా. 

సాధారణంగా మర్డర్ మిస్టరీ కి సంబంధించిన థ్రిల్లర్ సినిమాల్లో ఇతనే హంతకుడు అని మొదట్లోనే పరిచయం చేయడం ఆ తర్వాత హీరో అతన్ని ఏ విధంగా కనిపెట్టి పట్టుకుంటాడు అనేది ఒక రకం అయితే మరో రకం లో చివరి వరకు ఆ హంతకుడెవరో ప్రేక్షకులకి కూడా తెలియనివ్వకుండా చివర్లో రివీల్ చేయడం. సో, ఈ రెండు పద్ధతుల్లో ఏది బెటర్ గా తీయొచ్చు అనేది ఆ తీసే విధానం బట్టి ఉంటుంది గానే మొదటి పద్దతిలోనే తీస్తేనే లేదంటే రెండో పద్దతిలోనే తీస్తేనే హిట్ అవుతాయని ఎవరూ బల్ల గుద్ది చెప్పలేరని నా గట్టి నమ్మకం. లేటెస్ట్ గా వచ్చిన నాని, సుధీర్ బాబు కాంబినేషన్ లో వచ్చిన 'V ' మొదటి రకానికి చెందినదైతే, అదే నాని నిర్మాతగా విశ్వక్ సేన్ హీరో గా వచ్చిన 'Hit' సినిమా రెండో కోవలోకి చెందినది. 

ఈ రెండవ కోవలోని థ్రిల్లర్స్ ని కూడా రెండు రకాలుగా విభజించచ్చు అని నా అభిప్రాయం. చాలా వరకు సినిమాల్లో హత్య లేదా హత్యలు  చేసిన వాడు ఇదిగో వీడే అంటూ ప్రేక్షకులను ఫూల్స్ ని  చేస్తూ  అంత వరకు సీన్ లో చూపించని కారెక్టర్ ని సీన్ లో కి తీసుకొచ్చి వీడే హంతకుడు అని చెప్తారు. అక్కడే ప్రేక్షకులు ఆ ట్విస్ట్ ని ఎంజాయ్ చేయలేక ఆ సినిమా మీద నెగటివ్ ఫీడ్బ్యాక్ ఇస్తారు. 'శివన్ ' అని ఒక తెలుగు సినిమా యు ట్యూబ్ లో ఉంటుంది చూడండి, చివర్లో  అంతవరకూ సినిమాలో చూపించని వాడిని తీసుకొచ్చి, వీడే అంతటికీ కారణం అని చివర్లో చిన్న ఫ్లాష్ బ్యాక్ జత చేర్చి చూపెడతారు. 

ఇక రెండో కోవలోకి వచ్చేది నాకు గుర్తున్నంతలో అప్పట్లో వంశీ అన్వేషణ, రాజశేఖర్ 'ఆర్తనాదం', కథ లో సస్పెన్స్ పండించగలిగితే బాబీడియోల్ ని కూడా హీరోగా పెట్టి హిట్ తీయొచ్చని నిరూపించిన 'గుప్త్',  నిన్నటి రీమేక్ సినిమా రాక్షసుడు. ఈ సినిమాల్లో అంతవరకూ కథలో ఉండే కారెక్టరే ఆ హత్యలు చేస్తున్నట్లు చూపించి, అర్రే మనం గుర్తించలేక పోయామే భలే ట్విస్ట్ ఇచ్చాడు రా కథకుడు అని సలాం చేస్తారు. సరిగ్గా ఈ కోల్డ్ కేస్ సినిమాలో కూడా అంతవరకూ కథలో ఉండే కారెక్టరే ఆ హత్యలు చేస్తున్నట్లు చూపించి కాస్త థ్రిల్ చేస్తారు. ఈ సినిమాలో థ్రిల్ కి హారర్ మోడ్ ని కూడా ముడెయ్యడం కొంచెం వెరైటీ అనుకోవాలి. 

కథలో కొన్ని లూప్ హోల్స్ ఉన్నాయి గానీ సినిమాటిక్ లిబర్టీ కింద వాటిని వదిలేయచ్చు. పైగా  చెత్త సినిమాల మధ్య ఈ మాత్రం విషయం ఉన్న సినిమా చూపిస్తే ఖుషీ అయిపోతాం. సినిమా నాకు నచ్చింది కానీ మరెందుకో చాలా మందికి నచ్చినట్లు లేదు. 

మమ్ముట్టి నటించిన మళయాళ సినిమా 'ది ప్రీస్ట్' కూడా చూశాను గానీ అంతగా నచ్చలేదు, యేవో రెండు స్టోరీ లను కలిపి ఒక సినిమాగా తీసిన ఫిలింగ్ కలిగింది. ఈ సినిమా నాకు నచ్చలేదు కానీ ఎక్కువ మందికి నచ్చినట్లు ఉంది. 

12, అక్టోబర్ 2021, మంగళవారం

పెదరాయుడు దెబ్బకు చిత్తై పోయిన బిగ్ బాస్

బిగ్ బాస్ దెబ్బకు పెదరాయుడు చిత్తై పోతాడనుకుంటే పెదరాయుడు దెబ్బకు బిగ్ బాస్ మట్టి కరిచాడు. ఇది నిన్నో మొన్నో జరిగిన మా ఎన్నికల గురించి అని అనుకునేరు? కాదు కాదు పాతికేళ్ళ క్రితం జరిగిన విషయం చెప్తున్నా. 

ఘరానా మొగుడు సినిమాతో 10 కోట్ల కలెక్షన్స్ సాధించి శిఖరం అంచుకు ఎక్కేసిన చిరంజీవి, ముగ్గురు మొనగాళ్లు, మెకానిక్ అల్లుడు, SP పరశురామ్ అంటూ దిగడం మొదలు పెట్టాడు, ఎంతగా అంటే హిట్టొస్తే చాలురా ఈవీవీ సత్యనారాయనా అని అల్లుడా మజాకా సినిమాలో నటించి మరింత కిందికి దిగజారి పోయాడు. ఆ రోజుల్లో మహిళలతో ఛీకొట్టించుకుని సభ్య సమాజం తలదించుకునేలా పేరు తెచ్చుకున్న ఆ బూతు సినిమా ఎలాగోలా హిట్టనిపించుకుంది గానీ చిరంజీవి రేంజ్ కి నికార్సయిన హిట్ సినిమా కాదది.  

అల్లుడా మజాకా తర్వాత విడుదల అవుతున్న బిగ్ బాస్ సినిమాతో మళ్ళీ శిఖరం పైకి ఎక్కుతాడని అప్పట్లో నేనెంతో ఆశపడ్డాను  పైగా గ్యాంగ్ లీడర్ లాంటి బంపర్ హిట్ తీసిన విజయ బాపినీడే ఈ బిగ్ బాస్ కు దర్శకుడు అవడం నా ఆశలకు మరింత ఊతమిచ్చింది. 

అదే రోజు రిలీజ్ అవుతున్న పెదరాయుడు మీద వేరే ఎవరికైనా నమ్మకాలు ఉన్నాయేమో గానీ మెగా స్టార్ మేనియా లో ఉన్న నా కళ్ళకు ఆ సినిమా అనలేదు. పైగా ఆ సినిమాలో రజని కాంత్ ఉన్నాడు, నాలుగైదు నెలల క్రితం రిలీజ్ అయిన బాషా రికార్డ్స్ ఇంకా కళ్ల ముందు కదలాడుతూనే ఉన్నాయి అయినా సరే బిగ్ బాస్ ఇక్కడ అని ధైర్యం చెప్పుకున్నా. 

అప్పట్లో రిలీజ్ కి ముందు రోజు రాత్రే ఫాన్స్ షో వేసే వారు, దానికి టికెట్స్ తీసుకురావడానికి ఎప్పటిలాగానే మా కరడు గట్టిన చిరంజీవి అభిమాని ఉండనే ఉన్నాడుగా కాబట్టి టికెట్స్ గురించి భయం లేదు. ఉన్న దిగులంతా నాన్న ను ఒప్పించడమే, మరీ కష్టం కాదు కానీ ఆ రోజుకు ఒక రెండు గంటలు ఎక్కువ చదివేస్తే ఒప్పుకుంటారు సినిమాకి వెళ్ళడానికి. 

రాత్రి 10 గంటల టైం లో షో మొదలైంది. గంట లోపే అర్థం అయిపోయింది సినిమా లో అస్సలు విషయం లేదని.  ఫాన్స్ అయిన మాకే నచ్చలేదంటే ఇక మామూలు ప్రేక్షకులకు అస్సలు ఎక్కదు అని సినిమా చూసొచ్చాక అర్థమైంది. ఇంటికొచ్చేదాకా మేమెవ్వరం నోరు విప్పలేదు సినిమా ఇంట చెత్తగా ఉందే అని. 

భాషా లాంటి సినిమా తీయాలని అనుకున్నారని, లేదు.... లేదు  భాషా సినిమా లాంటి కథనే తీయబోయి భాషా రిలీజ్ అయిందని స్టోరీ మార్చేసి కలగా పులగం చేశారు అని ఎవరికి నచ్చినట్లు వారు విశ్లేషించారు సినిమా సర్కిల్స్ లో. 

ఏది ఏమయితేనేం రెండ్రోజులకే పూర్తిగా బిగ్ బాస్ థియేటర్స్ ఖాళీ ఇక్కడ, అక్కడేమో పెదరాయుడు ఆడే థియేటర్స్ లో జాతర మొదలైంది. అగ్నికి వాయువు తోడయినట్లు  మోహన్ బాబు నటనకు, రజనీ కాంత్ స్టైల్ తోడై  బిగ్ బాస్ ను పూర్తిగా బూడిద చేసేసింది పైగా 10 కోట్లు అని గొప్పగా చెప్పుకునే ఘరానా మొగుడు కలెక్షన్స్ ని 2 కోట్ల మార్జిన్ తో దాటేసింది. 

అదీ, పెదరాయుడు దెబ్బకు చిత్తై పోయిన బిగ్ బాస్ విషయం. మొన్న జరిగిన 'మా' ఎన్నికలకు దీనికి ఎటువంటి సంబంధం లేదని మనవి.  

చిరంజీవి సినిమాలతో పాటు దాదాపు ఒకే టైం లో రిలీజ్ అయి అంచనాలు తారుమారుచేసిన సినిమాలు మచ్చుకు కొన్ని గుర్తున్నాయి.  

రిక్షావోడు - ఒరేయ్ రిక్షా (దాసరి, ఆర్ నారాయణ్ మూర్తి కాంబినేషన్)

స్టూవర్ట్ పురం పోలీస్ స్టేషన్ - స్టువర్ట్ పురం దొంగలు (భానుచందర్ హీరో)

మృగరాజు - నరసింహనాయుడు (హీరో ఎవరో చెప్పాల్సిన పని లేదు)

కొదమ సింహం - ఇంద్రజిత్ 

ఈ చివరి రెంటిదీ డిఫరెంట్ స్టోరీ. రెండూ హిట్ కాలేదు కానీ, కొదమ సింహం వల్ల  తన కొడుకు బోసుబాబు(అతనికి మొదటి/చివరి సినిమా ఇదే అనుకుంటాను) ని  హీరో గా పెట్టి తను డైరెక్ట్ చేసిన సినిమా 'ఇంద్రజిత్' కి నష్టం జరిగింది అని గిరిబాబు చాలా సార్లు తన గోడు వెళ్లబోసుకున్నారు. 

30, సెప్టెంబర్ 2021, గురువారం

ఆస్ట్రేలియా ఏమీ స్వర్గం కాదు - 4

ఆస్ట్రేలియా సీరీస్ లో ఒకటవ , రెండవ మరియు  మూడవ భాగాలకి ఇది కొనసాగింపు. 

ఆ రోజు సాయంత్రం ఆఫీస్ నుంచి బయటికి రాగానే చీకటి పడిపోయింది, టైం చూస్తే 5:30. మొదటి రోజు ఆఫీసులో పెద్ద పనిలేదు కాబట్టి ఒక గంట ముందే బయలుదేరేవాన్ని. క్రాంతి ఫోన్ చేసి 5:30 వరకు వెయిట్ చేయగలవా నేనూ వస్తాను, ఇద్దరం కలిసి వెళ్దాం రూమ్ కి అన్నాడు. 

ఇదేంట్రా అబ్బాయ్, ఇంత చీకటి పడింది అన్నాను క్రాంతి తో ఆఫీస్ నుండి బయటికి రాగానే. 

ఇంకా చలికాలం స్టార్ట్ అవలేదు కాబట్టి ఈ మాత్రం.. లేదంటే సాయంకాలం నాలుగుకే చీకటి పడుద్ది. 

మధ్యాహ్నం లంచ్ కి వచ్చినప్పుడు అన్ని షాప్స్ తెరచి ఉంచారు, ఇదేంటి ఇప్పుడు ఒకటి రెండు తప్ప అన్నీ మూసేశారు? 

అవును ఇక్కడ సాయంత్రం 5 కే మూసేస్తారు, ఆ తెరచి ఉన్న షాప్స్ కూడా మన ఇండియన్స్ పెట్టుకున్న షాప్స్ అయి ఉంటాయి. 

ఆఖరికి మెడికల్ షాప్ లు కూడానా. 

అవును,కెమిస్ట్ warehouse లాంటి పెద్దవి తప్ప చిన్న మెడికల్ షాప్స్ ఐదుకే మూసేస్తారు. 

ఇలా తొందరగా చీకటి పడ్డం వల్ల ఇక్కడా సాయంకాలం మిస్ అవ్వవల్సిందేనా? బెంగుళూరు లో ఉన్నప్పుడు ఆఫీస్ నుంచి బయటకి వచ్చేప్పటికి సాయంత్రం ఏడో లేదా ఎనిమిదో అయ్యేది. ఒక వేళ లక్కీగా మేనేజర్ ఆఫీస్ కి రాకపోతే సాయంత్రం ఆరుకే బయటపడినా ఆ ట్రాఫిక్ ని ఈదుకొని ఇంటికి చేరడానికి 7:30 అయ్యేది. అలా బెంగుళూరు లో ఎన్ని లెక్కలేనన్ని సాయంత్రాలు మిస్ అయ్యానో ఆ విషయం తలచుకుంటే ఇప్పటికీ బాధగా ఉంటుంది. అయితే కనీసం ఇక్కడ ఎండలు బాగా తక్కువన్నమాట అన్నాను చుట్టూ చూసి అప్పటికే పూర్తి చీకటి పడిపోవడంతో. 

అలా అనుకునే నేనొచ్చిన మొదటి వారమే ఎగేసుకొని బీచ్ కి వెళ్ళి తిరిగొస్తే మా రూమ్ లో వాళ్ళు నా మాడిపోయిన మొహాన్ని గుర్తుపట్టక రూమ్ లోకి రానివ్వలేదు. ఇక్కడి ఎండలతో స్కిన్ కాన్సర్ వచ్చే అవకాశాలు మెండుగా ఉన్నాయి కాబట్టి బాడీకి సన్ స్క్రీన్ లోషన్ అప్లై చేయకుండా ఎండాకాలంలో బయటికి వెళ్ళకు.  సరే గానీ మన ఆఫీసులు ఉండే ఏరియా లో ఇండియన్ హోటల్స్ లేవు కదా మధ్యాహ్నం ఏం తిన్నావ్ అన్నాడు. 

మనకు రైస్ ఐటెం తప్ప పిజ్జా, బర్గర్, పాస్తా లాంటివి నచ్చవు కాబట్టి థాయ్ రెస్టారెంట్ ఉంటే అక్కడ క్రాబ్ మీట్ ఫ్రైడ్ రైస్ తిన్నాను. టేస్ట్ చాలా బాగుంది అన్నాను 

టేస్ట్ప బాగుంటుంది గానీ పర్సు కి చిల్లెట్టి ఉంటారే?

అవును, 22 డాలర్లు ఛార్జ్ చేశారు. ఇలాగైతే ఇక్కడ డబ్బులు మిగిల్చి బెంగుళూరు లో ఒక ఫ్లాట్ కొనుక్కోవడం కాదు కదా ఇంకా అప్పులు చెయ్యాల్సి వస్తుంది. కాబట్టి రేపటి నుంచి నేను కూడా నీ లాగే డబ్బా తెచ్చుకోవాల్సిందే అన్నాను. 

సరే, మొన్న నా ఫేవరిట్ హీరో పవన్ కళ్యాణ్  గబ్బర్ సింగ్ సినిమా రిలీజ్ అయింది. వెళదామా నీ కిష్టమైతే అన్నాడు. 

నీది తెనాలే, నాది తెనాలే అని చంకలు గుద్దుకొని వెళదాం అని చెప్పి 'అవును ఇక్కడికి కొత్త  తెలుగు సినిమాలన్నీ తెస్తారా ?' అని అడిగాను. 

అన్నీ కాదు కానీ పెద్ద హీరోల సినిమాలు తెస్తారు కానీ ఇక్కడ సినిమాలు చూడాలంటే బెంగుళూరు లో ఫ్లాట్ కొనుకునే నీ కోరిక ను వాయిదా  వేస్తూనే ఉండాలి, ఎందుకంటే టికెట్ రేట్ 25-30 డాలర్ల దాకా ఉంటుంది బాగా కాస్ట్లీ అన్నాడు. 

సరే మరి రాత్రి భోజనం?

ఆ థియేటర్ ఉండే ఏరియా లో మన పారడైజ్ బిర్యాని రెస్టారెంట్ ఉంది. కాబట్టి ఇబ్బంది లేదు అన్నాడు. 

సరే సినిమా చూసొచ్చాక రెస్టారెంట్ కి వెళదాం అన్నాను, పవన్ కళ్యాణ్ సినిమా ఎప్పుడెప్పుడు చూద్దామా అన్న ఉత్సాహంలో.  

ఇదేం బెంగళూరో, హైదరాబాదో  కాదు అప్పటికి రెస్టారెంట్ తెరిచుంచడానికి 

అదేంటి రెస్టారెంట్ కూడా పది లోపలే  మూసేస్తారా? 

అవును ఇప్పడు కొంచెం బెటర్, మన ఇండియన్స్ ఇక్కడికి చొరబడ్డాక ఈ మాత్రం లేట్ గా అయినా షాప్స్ తెరచి ఉంచుతున్నారు. లేదంటే వీళ్ళ early to bed early to rise పాలసీ వల్ల హోటల్స్ కూడా ఎనిమిదికే మూసేవారు. 

రెస్టారెంట్ కి వెళ్ళి మెనూ చూసి ఇదేంటి, బిర్యాని 15 డాలర్లా? అన్నాను. 

చెప్పానుగా నువ్వనుకున్నంత ఈజీ కాదు ఇక్కడ డబ్బులు మిగిలించడం. ఇక్కడ అన్నీ ఎక్స్ట్రీమ్ రేట్స్. రెంట్స్ మరీ ఎక్కువ, ఆ రెంట్స్ కట్టుకునే బదులు ఊరి బయట టెంట్స్ వేసుకుని బతకడం బెస్ట్. 

కనీసం అదైనా ఫ్రీ అన్నమాట. 

అంతలేదు, దానికీ డబ్బు కట్టాల్సిందే. సిడ్నీ బాగా కాస్ట్లీ సిటీ. అంతేకాదు ఈ దేశంలో లో టాక్స్ బాగా ఎక్కువ. ఇక్కడ సంపాదించిన డబ్బు నీళ్ళను మన రెండు చేతులతో పట్టుకున్నట్లే ఉంటుంది. సంపాదన చేతుల నిండుగా ఉన్నట్లు ఉంటుంది గానీ మన నోటి దాకా వచ్చేలోగా సగంటాక్సుల రూపంలో కారిపోతుంది అని ముందే హెచ్చరించాడు. 

అక్కడ బిర్యాని తిని తర్వాత గబ్బర్ సింగ్ సినిమా చూసి రూమ్ కి వెళ్ళేపాటికి  టవల్ కి, బాత్రూం గోడలకి , సింకులో ఎక్కడపడితే అక్కడ ఎర్రటి మరకలు ....రక్తం లాగా

24, సెప్టెంబర్ 2021, శుక్రవారం

ది గ్రేట్ ఇండియన్ కిచెన్ టులెట్

బ్లాక్ బస్టర్ కథల కోసమయితే బ్యాంకాక్ బీచ్ ల దాకా వెళ్ళాలేమో తెలీదు గానీ ఒక డీసెంట్ సినిమా తీయడానికైతే  ఎక్కడికీ పోవలసిన అవసరం లేదు. మన జీవితంలో జరిగిన విషయాలో లేదంటే మన పక్కింట్లో చూసిన విషయాలో ఒక్కసారి నెమరేసుకొని ఒక చక్కటి కథని అల్లుకొని సినిమా తీయొచ్చని నేను ఈ వారం చూసిన టులెట్, ది గ్రేట్ ఇండియన్ కిచెన్ సినిమాలు గుర్తు చేస్తాయి. 

మనం ఇల్లు మారే ప్రతీసారి పడే ఇబ్బందుల్ని లేదంటే ఉన్న ఫలంగా ఇంకో నెల రోజుల్లో బాడిగ ఇంటిని ఖాళీ చెయ్యమని ఇంటి ఓనర్ ఆజ్ఞ ఇచ్చినప్పుడు మళ్ళీ ఇప్పుడు ఇంకో కొంప ఎలా  వెతుక్కోవాలిరా భగవంతుడా అని మనకు ఎన్నోసార్లు అనిపించే ఉంటుంది. ఆ ఒక్క నెల టైం లో మన ఆర్ధిక స్థోమతకు సరిపడే ఇల్లు దొరకబుచ్చుకునేపాటికి తల ప్రాణం తోకకి వస్తుంది. ముఖ్యంగా 10 లేదంటే 12 నెలల అడ్వాన్స్ కట్టాలి అంటే మాత్రం భలే కష్టం. మీరు ఇళ్ళు ఖాళీ చేసిన తర్వాతే అడ్వాన్స్ ఇచ్చేది అని కనికరం లేని కొందరు ఇళ్ళ ఓనర్స్ మెలిక పెడతారు, మీరు అడ్వాన్స్ పూర్తిగా చెల్లిస్తే గానీ ఇంట్లో అడుగుపెట్టడానికి వీల్లేదు అని ఆ కొత్త ఇంటి ఓనర్ కండీషన్ పెడతాయి. 

ఇలాంటివే ఒక 12-15 ఏళ్ళ క్రితం రెండు సంఘటనలు జరిగాయి నా జీవితంలో - ఒకటేమో బ్యాంకు స్టేట్మెంట్ ఇస్తే గానీ పాస్పోర్ట్ అప్లికేషన్ తీసుకోము అంటారు పాస్పోర్ట్ ఆఫీసులో, అడ్రస్ ప్రూఫ్ కోసం పాస్పోర్ట్ ఇస్తేనే బ్యాంకు అకౌంట్ ఓపెన్ చేస్తాం అని బ్యాంకు లో అనేవారు. రెండోదేమో  జాబ్ కావాలంటే ఎక్సపీరియెన్స్ అడిగేవారు, ఆ ఎక్సపీరియెన్స్ రావాలంటే ఎవరో ఒకరు ముందు మనకు జాబ్ ఇవ్వాలి. ఇలాంటి సిట్యుయేషన్స్ ని 'క్యాచ్ 22' అంటారనుకుంటాను ఇంగ్లీషులో. 

అయినా పది పన్నెండు నెలల అడ్వాన్స్ ఇచ్చేటంత ఎక్స్ట్రా డబ్బు మధ్యతరగతి వాళ్ళ దగ్గర ఎక్కడి నుంచి వస్తుంది? ఇక ఆ తిప్పలు మరీ దారుణం, నేనైతే ఆఫీసులో అడ్వాన్స్ కోసం అప్లై చేసుకోవడం లాంటి తిప్పలు పడాల్సి వచ్చేది. ఇక ఆ నెల దాటినా ఇల్లు దొరక్కపోతే, దొరికినా లాస్ట్ మినిట్ లో ఆ కొత్త ఇంటి ఓనర్ మొండి చెయ్యి చూపిస్తే పరిస్థితి ఎలా ఉంటుంది అనేది దాదాపు ప్రతీ మధ్యతరగతి వ్యక్తీ అనుభవించే ఉంటాడు. కేవలం ఇలాంటి సన్నివేశాలతోనే సినిమాని తీసి మెప్పించారు టులెట్ అనబడే తమిళ్ సినిమాలో. 

ఉదయం లేచిన దగ్గరి నుంచి రాత్రి పడుకునే దాకా ఇంటి పనులతో, వంటింటి పనులతో సతమతమయ్యే ఇల్లాలి బాధలను చూపించిన సినిమా ది గ్రేట్ ఇండియన్ కిచెన్. అక్కడక్కడా వంటలు ఎలా వండాలో గిన్నెలు ఎలా తోమాలో నేర్పించే ప్రోగ్రాం లా ఈ సినిమా సీన్స్ అనిపిస్తాయి గానీ సినిమా అంతా చూసాక ఆ సీన్స్ అంత సేపు పెట్టడం వల్లే మనం ఆ హీరోయిన్ పాత్రను  అంతగా  ఓన్ చేసుకోగలిగాము అనిపిస్తుంది. ఓల్డ్ జెనరేషన్ లో మరీ దారుణంగా రోజంతా అలానే కష్టపడేవారు.  అలాగని ఈ జెనెరేషన్ లో స్త్రీలు కష్టపడటంలేదు అని కాదు నా అభిప్రాయం.  ఇప్పుడు కూడా అంతే కష్టపడుతున్నారు కాకపోతే భర్తల్లో కాస్త మార్పు వచ్చి వారు తమ భార్యలకి కాస్త చేదోడు వాదోడుగా ఉంటున్నారని నా అభిప్రాయం. 

ఇక న్యూస్ పేపర్ లో వచ్చే వార్తలని చూసి కూడా ఒక కథను అల్లేసుకోవచ్చని నిరూపించిన సినిమా మలయాళంలో వచ్చిన 'హెలెన్' అనే సినిమా.

ఇవేమో ఈ నెలో, పోయిన నెలో రిలీజ్ అయినా సినిమాలు కాదు. నేను చూడ్డం బాగా ఆలస్యమైంది అంతే. అయినా నేనే చూశానంటే ఈ పాటికే చాలా మంది చూసి ఉంటారు గానీ, చూడని వారు ఎవరైనా ఉంటే ఈ వీకెండ్ లో వీటితో కాలక్షేపం చెయ్యొచ్చు.

19, సెప్టెంబర్ 2021, ఆదివారం

ఆస్ట్రేలియా ఏమీ స్వర్గం కాదు - 3

అప్పుడెప్పుడో రాసి పోస్ట్ చేసిన ఆస్ట్రేలియా సీరీస్ లో మొదటి మరియు రెండో భాగాలకి ఇది కొనసాగింపు. 

మరుసటి రోజు ఆదివారం కాబట్టి రెస్ట్ తీసుకున్నా. మా ఆఫీస్ అడ్రస్ కూడా లక్కీ గా  క్రాంతి ఆఫీస్ దగ్గరలోనే అని తెలిసింది.

సోమవారం తనతో కలిసి స్టేషన్ కి వెళ్తే ట్రైన్స్ లేట్ అని అనౌన్సుమెంట్ వినపడింది. 'ఇండియా లో ట్రైన్ లేట్ అయినప్పుడల్లా, ఇదే ఫారిన్ లో అయితేనా అస్సలు ట్రైన్స్ లేట్ అనే మాట వినపడదు అని అన్నవాడిని కరవాలనిపించింది.' మిగతా ఫారిన్ కంట్రీస్ గురించి నాకు తెలీదు కానీ ఇక్కడ ట్రైన్స్ లేట్ గా రన్ అవడం అప్పుడప్పుడూ జరుగుతూనే ఉంటాయి. 

సరే, పద నువ్వు ఇంకా పాస్ తీసుకోలేదు కాబట్టి ట్రైన్ టికెట్ కొందువు అని కౌంటర్ దగ్గరికి తీసుకు వెళ్ళాడు క్రాంతి నన్ను. 

నా మొహం మీద నీళ్ళు చల్లి లేపి 'అదేంటి అలా పడిపోయావ్, నీకే మైనా మూర్ఛ రోగం ఉందా?' అని అడిగాడు. 

ఏ మాయదారి రోగాలు లేవు గానీ, మన రూమ్ నుండి మా ఆఫీస్ 15 కిలోమీటర్స్ ఉంటుందని గూగుల్ లో చూసాను వీడేంటి  4 డాలర్లు అంటున్నాడు?

అవును ఇక్కడ ట్రైన్ ఛార్జెస్ బాగా ఎక్కువ.  

అవునా, ఈ ఛార్జ్ తో  అయితే నేను బెంగళూరు నుంచి మా ఊరికి వెళ్ళి రావచ్చేమో అన్నా.  

సరే పద ట్రైన్ లేటయ్యింది, కాఫీ తెచ్చుకుందాం అని కాఫీ షాప్ లోనికి వెళ్ళగానే వాటర్ బాటిల్ మూత తీసి రెడీ గా పెట్టుకున్నాడు. 

'ఇక్కడ కాఫీ రేట్ విని అదిరి పడతావనుకున్నానే? మామూలుగానే ఉన్నావ్?' అన్నాడు వాటర్ బాటిల్ మూత మూసేసి. 

కాఫీ రేటు నాకు సిడ్నీ ఎయిర్పోర్ట్ లోనే షాకిచ్చింది కాబట్టి నేను ప్రిపేరయి ఉన్నాను. అయినా కాఫీకి నాలుగున్నర్ర డాలర్లు ఏమిటి? 

'సిడ్నీ లో అంతే, సిడ్నీ లో అంతే' అన్నాడు రౌడీ అల్లుడులో అల్లు రామలింగయ్యలా.  సరే ట్రైన్ రావడానికి ఇంకో 15 నిముషాలు ఉంది కదా పద ఇదే బిల్డింగ్ లో బ్యాంకు ఉంది, నువ్వు అకౌంట్ ఓపెన్ చేద్దువు గానీ అన్నాడు. 

వినడానికి నమ్మశక్యంగా లేకపోయినా నిజంగానే పదంటే పదే నిముషాల్లో అకౌంట్ ఓపెన్ చేశాను బ్యాంకు లో.  ఆస్ట్రేలియా స్వర్గం కాకపోయినా నరకం అయితే కాదని తెలియజేయడానికి గతంలో జరిగిన ఒక సంఘటన గుర్తొచ్చింది.  

నేను చదువుకోవడానికి తిరుపతికి వెళ్ళినప్పుడు మొదటి సారి అకౌంట్ ఓపెన్ చేయడానికి బాంక్ కి  వెళ్ళా. అంతవరకూ జీవితం లో ఒంటరిగా బ్యాంకు లోకి వెళ్లాల్సిన అవసరం లేకపోయింది. నాన్న బ్యాంకు ఉద్యోగి అవడం వల్ల నా సంతకం చేయడం తప్ప బ్యాంకు అకౌంట్ ఓపెన్ చేయడంలో ఏ కష్టం కలగలేదు.  

హౌ కెన్ ఐ హెల్ప్ యు? అంది కౌంటర్ లోపల కూర్చున్న ఒక అమ్మాయి.  నేమ్ ప్లేట్ మీద 'మల్లీశ్వరి, క్లర్క్'  అని రాసుంది. 

'మీ బాంక్ లో ఒక అకౌంట్ ఓపెన్ చేద్దామనుకున్నా'  అన్నాను. 

'ఏదీ మీ చేతులు ఒకసారి చూపించండి' అంది. 

నా చేతిలో ఏముంటుందండీ ఒట్టి గీతలు తప్ప అన్నాను. 

అహ, చేతికి ఉంగరాలు గట్రా ఏమన్నా ఉన్నయోమేనని అంది. 

తాడు బొంగరం లేని వాడిని నా వేళ్ళ కెందుకు ఉంటాయి ఉంగరాలు, మీరు మరీనూ. 

బొంగరం ఏమిటి,  ఉంగరం కూడా కొని పెడతారు పెళ్లి చేసుకుంటే అంది.

ఆ టైం నాకింకా రాలేదు లెండి అన్నాను. 

కక్కు వచ్చినా కళ్యాణం వచ్చినా ఆగదంటారు. ఏ క్లర్కో మీతో కళ్యాణం కోసం పుట్టే ఉంటుంది లెండి. 'జస్ట్ రెండు పాస్పోర్ట్ సైజు ఫొటోలు ఇవ్వండి, ఓపెన్ చేద్దాం' అంది ఉత్సాహంగా. 

ఇవిగోండి అని పర్సు ఓపెన్ చేసి ఇవ్వబోతుంటే అందులోనుంచి ఒక అమ్మాయి ఫోటో బయట పడింది. దాన్ని నేను తనకి కనపడకుండా దాచడానికి ప్రయత్నించేలోగా...  

"నిన్ను ఇంట్రడ్యూస్ చేయడానికి ఒకర్ని తీసుకురా అలాగే నీ ఓటర్ కార్డు, మీ ఆస్తి పత్రాలు, మీ ఇంటి అటక మీదుండే తాళ పత్రాలు, మీ గుమ్మానికి కట్టిన మామిడాకులు, మీ అవ్వ కొంగులో చుట్టి పెట్టుకున్న తమలపాకులు, మీ వంటింటి డబ్బాలో ఉన్న పూతరేకులు, మీ పెరట్లో కాసిన మామిడాకులు, మీ వీధి చివర కుప్పతొట్టి లో పారేసిన ఇస్తరాకుల తో పాటు నీ వేలి ముద్రలు, కాలి ముద్రలు పట్రా.... వచ్చేశాడు ఉట్టి తలకాయ ముద్రలు తీసుకొని" అంది మల్లీశ్వరి కాస్తా ఎల్లారీశ్వరి రేంజ్ లో గొంతు పెంచి కోపంగా

కిసుక్కున నవ్వి బ్యాగులోంచి పెన్ను పేపర్ తీసుకొని సీరియస్ గా రాసుకోవడం మొదలుపెట్టాడు   అక్కడే ఒక టేబుల్ మీద కూర్చొని ఉన్న ఒక గెడ్డం అతను. 

అటు చూస్తావేం, నేను చెప్పిన వాటిని తీసుకొని రా అలాగే నిన్ను ఇంట్రడ్యూస్ చేయడానికి ఒకర్ని తీసుకురా. 

సత్యనారాయణో, రాఘవేంద్ర రావో లేదంటే జగన్నాథ్ గారినో అడగాలి మరి అన్నాను నేను ఆలోచిస్తూ.  

వాళ్లెవరు?  ఈ బ్యాంకు లో వాళ్ళకు  అకౌంట్ ఉందా?

ఉండకపోవచ్చు గానీ పవన్ , మహేష్, పునీత్ లని వాళ్ళే ఇంట్రడ్యూస్ చేశారు. 

వాళ్లెవరు, మీ రూంమేట్సా?

అయితే బాగుండు. పవన్, మహేష్ తెలుగు సినిమా స్టార్స్, మరి పునీతేమో పూరి జగన్నాథ్ 'అప్పు' సినిమా తో ఇంట్రడ్యూస్ చేసిన కన్నడ సినిమా స్టార్ 

నువ్వేమయిన స్టార్ కొడుకువి అనుకుంటున్నావా ఇంట్రడ్యూస్ చేయడానికి, ఇంట్రడ్యూస్ చేయడమంటే ఈ బ్యాంకు లో అకౌంట్ ఉన్నవాళ్ళు నువ్వు తెలుసని చెప్పడం. 

గోవిందా! గోవిందా!, నా డబ్బులు నేను బ్యాంకులో దాచుకోవడానికి కూడా ఇంత శ్రమ పడాలా అని  తూర్పు తిరిగి ఆ ఏడు కొండల వాడికి దండం పెట్టి అక్కడి నుంచి బయలుదేరాను.  

కానీ ఇన్నేళ్లయినా ఆ గెడ్డం ఉండే ఆయన అంత అర్జెంట్ గా పెన్ను పేపర్ వెతుక్కొని ఏం రాసుకున్నాడో నాకు అర్థం కావడం లేదు, మీకేమైనా అతనెవరో, ఎందుకలా చేశాడో  తట్టింటే కాస్త చెప్పరూ ప్లీజ్. 

13, సెప్టెంబర్ 2021, సోమవారం

ఎవ్వరినీ ఉద్దేశించి రాసిన కథ కాదు

ఒకానొక ఊర్లో భూషణం అని ఒక పెద్ద మనిషి ఉండేవాడు, అతనంటే చుట్టుపక్కల గ్రామాలన్నిటికీ భయం భక్తి  ఉందో లేదో తెలీదు కానీ రాజు గారి దేవతా వస్త్రాల టైపు లో కొంతమంది కి ఉన్నట్లు ఇంకొంత మందికి లేనట్లు ఉండేది. ఆ పెద్ద మనిషి కూడా అందరికీ నేనే పెద్దన్న అన్నట్లు గానే  వ్యవహరిస్తూ తన ఊరిని బాగానే చూసుకునేవాడు ఈగ కూడా వాలనీయకుండా, అలాంటిది ఒకానొక రోజు ఏనుగుల గుంపు వచ్చి అతని తోటని పెంట పెంటగా చేసి చెల్లాచెదరు చేసి ఊరిని అల్లకల్లోలం చేశాయి. 

అతని తోటనే కాపాడుకోలేకపోయాడు ఇక ఊరినేం కాపాడతాడు అని అవహేళన చేశారు చుట్టుపక్కల జనం. ఈగో హర్ట్ అయి ఆ ఏనుగుల గుంపు ని వేటాడటానికి మెరికల్లాంటి తన మనుషులను కొందరిని పోగు చేసి మంచి ట్రైనింగ్ ఇప్పించి పంపాడు. 

వాళ్ళు వేట మొదలెట్టారు, ఆ ఏనుగుల అడవిలోకి పారిపోతూ వీళ్ళకి దొరకలేదు.  అయ్యా, రోజూ మనూరి నుంచి బయలుదేరి అక్కడికి వెళ్ళి వేటాడి మళ్ళీ మన ఊరికి వచ్చేప్పటికి బాగా అలసిపోతున్నాం అన్నారు ఆ మెరికలు

సరే మీ కోసం ఆ ఊర్లోనే వసతి ఏర్పాటు చేస్తాను, యెంత ఖర్చైనా పర్లేదు ఆ ఏనుగుల మంద ను మట్టుబెట్టి తీరాల్సిందే అని వారికో వంటమనిషి, పనిమనిషి పెట్టాడు. కొన్ని రోజులకు వాళ్ళ పెళ్ళాలు, పిల్లలు అక్కడే సెటిల్ అయ్యారు, మరింత ఖర్చులు పెరిగాయి. 

సర్పంచ్ ఊరి అభివృద్ధికి వచ్చే డబ్బులను అక్కడికి తరలించాడు, సరి పోకపోతే తన ఊరి ప్రజల నుంచి పోగు చేసి పంపాడు. 

కొన్ని నెలలకి ఆ ఏనుగుల గుంపు లీడర్ ని చంపారు, కానీ మిగతా ఏనుగుల మందను మట్టుబెట్టే దాకా అక్కడి నుంచి తిరిగి రావద్దని ఆదేశించాడు. 

ఇలా తరాలు మారిపోయాయి, అటువైపు ఏనుగుల మంద పెరుగుతూనే ఉంది , ఇటువైపు వీళ్ళకు ఖర్చులు పెరుగుతూనే ఉన్నాయి. తర్వాతి తరం వాడైన బోడయ్య,  ఆ మెరికలని అక్కడి నుంచి వెనక్కి వచ్చెయ్యమన్నాడు. 

మూడ్రోజుల క్రితమే రాసిన ఈ పోస్ట్ వ్యక్తిగత పనుల్లో పడి మర్చిపోయి ఇప్పుడు పోస్ట్ చేస్తున్నా. ఈ కథ చనిపోయిన లేదా బతికి ఉన్న వారిని ఉద్దేశించి రాసినది కాదని, మీకెక్కడైనా పోలికలు కనిపిస్తే అవి కేవలం యాదృచ్ఛికం అని సవినయంగా మనవి చేసుకుంటున్నాను. ఇంతే సంగతులు చిత్తగించగలరు. 

21, ఆగస్టు 2021, శనివారం

దియా - దివ్యమైన సినిమా

నా  MCA ఫ్రెండ్ ఈ సినిమా చూడమని రెకమండ్ చేస్తే నటీనటులు ఎవరో తెలియకపోయినా చూద్దాం అని నిన్న రాత్రి డిసైడ్ అయ్యాము.  కాసేపటికే సినిమా బాగా ఆకట్టుకుంది. ఎంతగా లీనం అయ్యామంటే ఒకానొక సీన్ లో నేను, మా ఆవిడ ఇద్దరం ష్.. అనేశాం అదేదో నిజంగా మా కళ్లముందే జరుగుతున్నట్లు, అయ్యో అలా జరగకుండా ఉంటే బాగుండేదని. 

సినిమా అంటే తెర నిండా నటీ నటులు, సెట్టింగ్స్, పాటల్లో భారీతనం అక్కర్లేదు అనిపించింది సినిమా  చూస్తున్నంతసేపు. హడావిడి లేకుండా ఉండే ప్లెసెంట్ బ్యాక్ గ్రౌండ్ మ్యూజిక్ ఈ సినిమాకి మరొక అసెట్. 

సినిమాలో మొత్తంగా ఒక పది పాత్రలు ఉంటాయి. ఒక్క పవిత్రా లోకేష్ తప్ప మిగతా నటులను చూడటం ఇదే మొదటి సారి. మూడు ప్రధాన పాత్రదారుల నటన బాగుంది,  ముగ్గురిలో ముందుగా చెప్పాల్సింది ఆది క్యారెక్టర్ ప్లే చేసిన నటుడి గురించే. అతన్ని చూస్తే ఆకలి రాజ్యం టైం లో యంగ్ కమల్ హాసన్ ను చూసినట్లు అనిపించింది అతని హెయిర్ స్టైల్, హైట్ కమల్ హాసన్ నే గుర్తుకు తెచ్చాయి నా వరకైతే.  

లెక్కల మేష్టారు లెక్కల పరీక్ష లో ఫెయిల్ అయ్యాడే అనిపిస్తుంది చివర్లో ఆది క్యారెక్టర్ చూశాక.  అందరికీ శకునం చెప్పే బల్లి కుడితి తొట్లో పడ్డట్లు అనే సామెత గుర్తొస్తుంది. సాధారణంగా తమిళ్ సినిమాల ఎండింగ్ ఇలాగే ఉంటుంది. చివర్లో ఈ సినిమా డైరెక్టర్ ని తమిళ్  డైరెక్టర్ పూనాడేమో?

'సమస్యలు లేకుండా అదేం జీవితం అండీ' అని ఆది చెప్పే ఒక డైలాగ్ ఉంటుంది ఈ సినిమాలో. అది అక్షర సత్యం. ఇదొక్క డైలాగ్ అనే కాదు ప్రతీ  డైలాగ్ బాగుంటుంది. ప్రతీ సీన్ ఈ సినిమా కథలో మనం ఊహించగలిగినదే అయినా  ఎక్కడా బోర్ కొట్టకుండా సాగుతుంది. నాకైతే చాలా వరకు ఈ సినిమా కథ 'అందాల రాక్షసి' సినిమా  కథనే పోలి ఉందనిపించింది. 

కన్నడ లో తీసి, పోయిన సంవత్సరం రిలీజ్ చేసిన ఈ సినిమాని అదే పేరుతో తెలుగులోకి డబ్బింగ్ చేశారు. ఇంకో ఇంట్రెస్టింగ్ విషయం ఏమంటే  కన్నడ సినిమా రీమేక్ రైట్స్ తీసుకొని తెలుగులో షూటింగ్ కూడా కంప్లీట్ చేసి సెప్టెంబర్ మూడో తేదీ రిలీజ్ చేయబోతున్న టైములో 10 రోజుల ముందు యూ ట్యూబ్ లో డబ్బింగ్ వెర్షన్ పెట్టారంటే,  something fishy అనిపించి గూగుల్ లో ఈ సినిమా గురించి సెర్చ్ చేస్తే యేవో ఫైనాన్సియల్ సెటిల్మెంట్ ఇష్యూస్ నడుస్తున్నట్లు తెలిసింది.    

సరే మన తెలుగులో 'డియర్ మేఘ' ని ఎలా కుక్ చేశారో చూద్దామని అందుబాటులో ఉన్న రెండు మెతుకులను (అదేనండి ట్రైలర్)  రుచి  చూస్తే కాస్త మసాలాలు యాడ్ చేసి రిచ్ నెస్ కోసం కాసిన్ని డెకొరేషన్స్ కూడా చేసినట్లు ఉన్నారు తెలుగు ప్రేక్షకుల టేస్ట్ కి తగ్గట్లు. 

కాబట్టి హడావిడి లేని సినిమా చూడాలంటే యూట్యూబ్ లో ఉన్న 'దియా' చూడండి లేదూ మాకు మసాలా యాడ్ చేసిన వెర్షన్ కావాలనుకుంటే 'డియర్ మేఘ' రిలీజ్ వరకు వెయిట్ చెయ్యండి. ఛాయస్ మీదే.  

Final verdict: నీ  ఊపిరి ఇంకా తగులుతూనే ఉంది దియా సూప్....కాదు కాదు దియా సూపర్. 

12, ఆగస్టు 2021, గురువారం

వర్షం పడిన రాత్రో లేక ఒక బలహీన క్షణమో అది చూసేశాను

తెలియని భాష అని లేదంటే థ్రిల్లర్ మూవీస్ కాబట్టి ప్రతీ డీటెయిల్ అర్థం అవ్వాలని సబ్ టైటిల్స్ పెట్టుకుంటారు కానీ సబ్ టైటిల్స్ చూస్తూ ఉంటే ఆ సినిమాలోని నటీనటుల పేస్ ఎక్స్ప్రెషన్స్ ఎంజాయ్ చేయలేక పోతారు.  అందుకే అర్థం అయినా కాకపోయినా సబ్  టైటిల్స్ లేకుండానే చూడటానికి ఇష్టపడతాను. తమిళ్ అయితే పూర్తిగా అర్థం అవుతుంది కానీ మలయాళం మీద ఇంకా అంత పట్టు చిక్కలేదు అయినా సరే ఆ భాష లో వచ్చిన సినిమాలు కూడా చూస్తుంటాను ఇష్టంగా. 

యోధ సినిమా చూసినప్పటి నుంచి మోహన్ లాల్ అన్నా, స్వాతి కిరణం/దళపతి సినిమాల నుంచి  మమ్ముట్టి నటన అన్నా బాగా ఇష్టం. అందుకే వారి సినిమాలు మిస్ అవకుండా చూస్తూ ఉంటాను. కొన్ని సార్లు వీళ్ళ సినిమాలో మరీ స్లో మోషన్ లో హీరో ని చూపిస్తూ అవసరం ఉన్నా లేకపోయినా చెవులు చిల్లులు పడేలా బ్యాక్ గ్రౌండ్ మ్యూజిక్ తో హోరెత్తిస్తుంటారు అవి కమర్షియల్ పాయింట్ అఫ్ వ్యూ లో ఓకే అని సరి పెట్టుకోవాలి. ఆ మధ్య రాజశేఖర్ తో తీసిన 'కల్కి' సినిమాని  ఈ ఎక్స్ట్రా స్లో మోషన్ సీన్సే దెబ్బతీశాయని నా నమ్మకం. 

దృశ్యం 2 ఎప్పటి నుంచో చూడాలని ఉన్నా, అది సీక్వెల్ అవ్వడం వల్ల అంతగా ఇంటరెస్ట్ లేక చూడకుండా ఉండిపోయాను. సాధారణంగా సీక్వెల్ అనేది డైరెక్టర్ లేదా హీరో హిట్స్ లేక కొట్టుమిట్టాడుతున్నప్పుడో లేక గల్లా పెట్టెలు నింపుకోవడానికో లేదంటే బ్లాక్ మనీ ని వైట్ చేసుకోవడానికో ప్రయోగించబడే గిమ్మిక్కులు, లేదంటే ప్రేక్షకులను టేక్ ఇట్ ఫర్ గ్రాంటెడ్ గా తీసుకోవడమో జరిగినప్పుడు తయారవుతుంటాయి. మన ఇండియన్ హిస్టరీ లో అతి కొద్ది సినిమాలు మాత్రమే ఈ సీక్వెల్ ప్రయోగంలో హిట్టయ్యాయి. 

పైగా మన వెంకీ దృశ్యం2 ని రీమేక్ చేస్తున్నాడని తెలిసి కాస్త మన నేటివిటీ, తెలిసిన ఆర్టిస్టులు అయితే బాగుంటుందని ఆశించి ఆ మలయాళ సినిమాని చాలా రోజులుగా అట్టే పక్కన పెట్టేసాను. 

కథల్లోనో, సినిమాల్లోనే చెప్పినట్లు 'ఒక వర్షం పడిన రాత్రో లేక ఒక బలహీన క్షణమో' తెలీదు కానీ ఏ దిక్కుమాలిన సినిమాలో చూడటం కంటే దృశ్యం 2 చూడటం బెటర్ అనుకున్నా known devil is better than unknown angel అన్నట్లు.  ఒకప్పుడు మళయాళ సినిమాలు అంటే షకీలా సినిమాలో లేదా బూతు సినిమాలు అనే ఒక తప్పుడు అభిప్రాయం ఉండేది, వాటి డబ్బింగ్ టైటిల్స్ కూడా అలానే ఉండేవి నేను ఈ పెట్టిన టైటిల్ లాగా. గత పదేళ్ళలో మంచి మంచి సినిమాలు రావడం వల్ల ఆ అభిప్రాయం పూర్తిగా మారిపోయింది. పదేళ్ళ క్రితం కూడా కొన్ని గొప్ప సినిమాలు వచ్చాయి కానీ అవి చాలా మందికి చేరలేకపోయేవి అప్పట్లో ఉండే పరిమితుల రీత్యా. 

అసలు కంటే కొసరు ఎక్కువైపోయింది కాబట్టి ఇప్పుడు సినిమా గురించి మాట్లాడుకుందాం. దృశ్యం సినిమా ఎక్కడ ముగిసిందో అక్కడే మొదలవుతుంది ఈ సీక్వెల్.  సినిమా ఫస్ట్ హాఫ్ అంతా ఫిల్లింగ్ కోసం పెట్టుకున్న పాత్రలు, వాటి మధ్య అనవసరమైన సీన్స్ అనిపిస్తాయి కానీ ఇంటర్వెల్ లో కొన్ని పాత్రల అవసరం , క్లైమాక్స్ లో మరి కొన్ని పాత్రల అవసరం తెలిసిన తర్వాత ఆ కథకుడైన దర్శకుడికి హాట్స్ హాఫ్ చెప్పకుండా ఉండలేము. దృశ్యం సినిమా ఏదో కొరియన్ సినిమా నుంచి ఎత్తుకొచ్చినా కనీసం దృశ్యం 2 లో సొంత ఆలోచనలు జొప్పించి ఆ లోటు పూడ్చారు. కొన్ని సీన్స్ సిల్లీగా అనిపించినా సినిమాటిక్ లిబర్టీ కింద వాటిని పెద్దగా పట్టించుకోనవసరం లేదు. ఫస్ట్ హాఫ్ లో కొన్ని సీన్స్ రిపీటెడ్ సీన్స్ లా అనిపించి కొంచెం బోర్ కొట్టిస్తాయి కానీ సినిమా మొత్తంగా చూస్తే బాగుంది.

అంతా తొండి, యు ట్యూబ్ వీడియో లో లాగా టైటిల్ ఒకటి విషయం మరొకటి రాశాను కదూ. 

26, జులై 2021, సోమవారం

ఆ మాత్రం లాజిక్ ఆలోచించలేకపోయావా?

హే పవన్,  మన 'సినిమా పిచ్చోళ్ళు'  వాట్సాప్  గ్రూప్ నుంచి బయటికి వెళ్లిపోయావ్? నిన్న మీ ఫేవరెట్ హీరో గురించి నెగటివ్ గా మాట్లాడామని అలిగావా?

లేదబ్బా, COVID వల్ల ఈ వారం బయటికి వెళ్ళడానికి వీల్లేదు, కనీసం ఏదో ఒక రకంగా బయటికి వెళ్లాలని గ్రూప్ లోంచి బయటికి వెళ్ళా 😝

సరే, మళ్ళీ గ్రూప్ లోకి యాడ్ చేస్తాలే నిన్ను. 

థాంక్స్,  ఇంకేంటి విషయాలు. 

ఏం చేస్తాం, నా కంటే నా చేతులే ఎక్కువ  ఆల్కహాల్ తాగుతున్నాయి, మాటి మాటికి చేతులు రబ్ చేసుకోవడం వల్ల బొబ్బలు కూడా వచ్చేస్తాయేమో 

ఈ  మాత్రం దానికే బొబ్బలు వచ్చేస్తాయా నువ్వు మరీనూ. 

రాలేదు, కాకపొతే ఈ రోజు నుంచి బట్టలు నేనే ఉతుక్కోవాలి అందుకు వస్తాయేమోనని 

వాషింగ్ మిషన్ వాడచ్చుగా 

అది సరిగ్గా పని చెయ్యట్లేదు పవన్, ప్రతీ అర నిమిషానికి ఆగిపోతోంది. 

అదేంటి, పోయిన సంవత్సరమేగా కొన్నావు. 

అవును మొన్నటివరకు పని చేసింది, ఇవాళే పని చేయడం లేదు.  వారంటీ ఉంది కాబట్టి ఈ లాక్డౌన్ ఎత్తేశాక రిటర్న్ ఇచ్చెయ్యాలి. 

అవును, అమెజాన్ ప్రైమ్ లో ఏదైనా కొత్త సిరీస్ ఏమైనా స్టార్ట్ అయిందా?

థర్డ్ వేవ్, ఫోర్త్ వేవ్ అని COVID కొత్త సిరీస్ లు ఆపేస్తే గానీ కొత్త వెబ్ సిరీస్ స్టార్ట్ అవ్వవేమో. అవును, నిన్న డబ్బు డ్రా చేయడం కోసం బ్యాంకుకి వెళ్లానన్నావ్? ఎటిఎం కి వెళ్లచ్చుగా?

జనాలు సూపర్ మార్కెట్ ల మీదే కాదు, పిచ్చి పిచ్చిగా ఎటిఎం ల మీద కూడా పడి డబ్బు డ్రా చేసుకున్నారు, అందుకని ఎటిఎం లో డబ్బు లేక బ్యాంకు వెళ్ళాను. సినిమాల్లో చూపించినట్లు బాంక్ కొల్లగొట్టడానికి వచ్చిన దోపిడీ దొంగ మాదిరి మాస్క్ వేసుకొని వెళ్ళి డబ్బు తెచ్చుకోవాల్సి వస్తుందని ఎప్పుడూ అనుకోలేదు. 

అవును నిజమే.  

ఈ మాస్క్ ఉండటం వల్ల బ్యాంకు బయట ఉండే సెక్యూరిటీ గార్డు నన్ను గుర్తుపట్టలేదు. 🤣🤣

అందులో విశేషం ఏముంది?

వాడికి నేను అప్పున్నా, డబ్బు లేదని చెప్పి తీర్చకుండా తిరుగుతున్నా, గుర్తుపట్టలేదు కాబట్టి సరిపోయింది లేదంటే ఆ డబ్బు తీసేసుకునేవాడు. 

మాస్క్ వల్ల ఉపయోగాలు ఉన్నాయన్నమాట. 

ఈ మధ్య ఎప్పుడూ షార్ట్స్ వేసుకొని ఉంటున్నామా, నిన్న బ్యాంక్ కి వెళ్ళడానికి జీన్స్ వేసుకుంటే కంఫర్ట్ గా అనిపించలేదు.  

కొంపదీసి ఆ జీన్స్ ప్యాంట్ గానీ వాషింగ్ మెషిన్ లో వేశావా?

అవును, ఎప్పుడో సంవత్సరం క్రితం ఉతికేసింది, ఇప్పుడన్నా ఉతికేద్దామని వేశా. 

వెంటనే అది తీసి ఆన్ చెయ్. 

అవును పవన్, నిజంగానే ఇప్పుడు పనిచేస్తోంది.  

నువ్వు మాత్రం గత ఏడాదిగా షార్ట్స్ వేసుకొని, నిన్నొక్క రోజు జీన్స్ వేసుకుంటే కంఫర్ట్ గా లేదు అన్నావు. మరి, ఆ వాషింగ్ మెషిన్ పరిస్థితీ అదేగా, కొన్నప్పటి నుంచి దానికి నిక్కర్లు, బనీన్లు మాత్రమే ఉతికే అలవాటుంది. ఇప్పుడు జీన్స్ వేస్తె ఎలా? దానికీ హెవీ అనిపించదూ పాపం?        


23, జులై 2021, శుక్రవారం

బాలయ్య కు భారత రత్న ఇవ్వాల్సిందే

"ఏంటి కబుర్లు" అంటూ ఫోన్ లో ఫ్రెండ్.  

ఏముంది, మా బాలయ్య కు భారతరత్న ఎప్పుడిస్తారా? అని ఆలోచిస్తుంటే నువ్వు ఫోన్ చేశావ్. 

ఇది మరీ విడ్డూరంగా ఉంది. ఒక ముతక సామెత చెప్పినట్లు, పెద్దాయన అంటే గౌరవం ఉంది కాబట్టి అది చెప్తే బాగోదు. అయినా తండ్రికే ఇవ్వట్లేదు అంటే కొడుక్కి కావాలంటావ్?

నేను కావాలని అనట్లేదు, భారత రత్న తనకి ఇవ్వాలని మా బాలయ్యే అన్నాడు. 

అదెప్పుడు?

మొన్నొక ఇంటర్వ్యూ లో 

అలా అనలేదే, భారత రత్న మా నాన్న చెప్పుతో సమానం అన్నాడు. 

కదా, మరి తండ్రి ఆస్థి ఎవరికి చెందాలి

కొడుక్కి 

మరి భారతరత్న వాళ్ళ నాన్న చెప్పుతో సమానం అంటే అది వాళ్ళ నాన్న ఆస్థి అయినట్లే కదా. తండ్రి ఆస్థి అయినా అస్తికలు అయినా కొడుక్కే కదా చెందాలి.  కాబట్టి భారత రత్న ని మా బాలయ్యకే ఇవ్వాలి. 

అలా వచ్చావా. ఖర్మ. నిన్ను, బాలయ్య ను అర్థం చేసుకోవడం ఎవరి వల్ల కాదు. 

సర్లే వాళ్ళో వీళ్లో ఇచ్చేదేమిటి? నేనే ఇస్తా బాలయ్య బాబు కి భారత రత్న. 

అదెలా?

మొన్నా మధ్య హీరో  సుమన్ కు 'దాదా సాహెబ్ పాల్కే' అవార్డు ఇచ్చారు కదా అలా. 

సుమన్ కు 'దాదా సాహెబ్ పాల్కే' అవార్డు ఏంటి? మతుండే మాట్లాడుతున్నావా?

అవును, పేపర్స్ లో ఆ వార్త చదివలేదా?

లేదే? 

చెప్తా విను. సుమన్ కు 'దాదా సాహెబ్ పాల్కే' అవార్డు ఇచ్చారని పేపర్లో చదివా.  సామాన్యంగా  మన తెలుగోళ్ళకి అవార్డు ఇవ్వరు, ఒక వేల ఇచ్చినా ఏదో పెద్ద రేంజ్ లో లాబీయింగ్ జరగాలి.  మరి సుమన్ కి అంత రేంజ్ లేదు, పైగా కృష్ణ లాంటి సీనియర్ యాక్టర్ ని పెట్టుకొని సుమన్ కి ఎందుకు ఇచ్చారు? అయినా అమితాబ్ కి రజని కాంత్ కి ఇచ్చారు కాబట్టి పాపులారిటీ లో వారి తర్వాతి స్థానం చిరంజీవిదే  కాబట్టి తనకైనా ఇవ్వాలి కానీ సుమన్ కి ఎలా ఇచ్చారు అని కాస్త శోధిస్తే తెలిసిందేమిటంటే ఏదో ఒక సంస్థ వాళ్ళిచ్చే అవార్డుకి  ''దాదా సాహెబ్ పాల్కే" అని పేరు పెట్టేసుకొని ఇచ్చేస్తున్నారట.  అలా నేను కూడా ఇస్తా బాలయ్య బాబు కి భారత రత్న. 

ఖర్మ రా దేవుడా ?  నీ ఇష్టం. జేమ్స్ కామెరూన్ కన్నా, రెహమాన్ కన్నా మీ బాలయ్య తక్కువేం కాదు కాబట్టి భారతరత్న తో పాటు ఆస్కార్ కూడా ఇచ్చుకో. 

20, జులై 2021, మంగళవారం

మనం ఊహించనిది జరిగేదే జీవితం అంటే!

ఒరేయ్ గోవిందం, తాజ్ మహల్ గురించి నీకేం తెలుసో చెప్పరా?

ఆ బ్రాండ్ పొడి తో చాయ్ చేస్తే ఘుమ ఘుమలాడిపోతది సార్. 

ఖర్మ రా, పోనీ ఇండియా గేట్ గురించి 

ఆ బ్రాండ్ బియ్యంతో తో బిర్యాని చేస్తే ఘుమ ఘుమలాడిపోతది సార్. 

పోనీ చార్మినార్ గురించి చెప్పు 

అది తెలీనోడు ఎవడుంటాడు సార్, మనకు బాగా పరిచయం దాంతో.  

ఇప్పుడు దారిలోకి వచ్చావ్, చెప్పు  

ధారాళమైన పొగ, తక్కువ ఖర్చులో దొరికే సిగరెట్ సార్. 

పోనీ కనీసం, గాంధీ జయంతి గురించి చెప్పు?

గాంధీ గురించి తెలియదు గానీ జయంతి అంటే మా పక్కింట్లో ఉండే ఆంటీ. 

మన దేశ ఐకాన్స్ తెలీదు, జాతి పిత గురించి తెలీదు, ఎందుకు పనికొస్తావురా నువ్వు. రేపు వచ్చేప్పుడు మీ అయ్య సిగ్నేచర్ తీసుకురా. 

మరుసటి రోజు ఆ టీచర్ క్లాస్ లోకి రాగానే టేబుల్ మీద 



అంతే, అగ్గి  మీద గుగ్గిలం అయ్యాడు ఆ టీచర్, ఇలాంటి మూర్ఖుడిని చదివించడం డబ్బు దండగ అని ఆ కుర్రాడి పేరెంట్స్ కి నచ్చ జెప్పి స్కూల్ నుంచి పంపించేశాడు.  తెలివితక్కువ గోవిందం స్కూల్ నుంచి వెళ్లిపోవడంతో మిగతా స్టూడెంట్స్ అందరూ సంతోషించారు. 

                                                                     ***************

చూస్తుండగానే 20 సంవత్సరాలు గడిచిపోయాయి. ఆ 20 సంవత్సరాలు తాను స్కూల్ నుంచి పంపించేసిన గోవిందం గురించి మధన పడుతూనే ఉన్నాడు. ప్రతీ ఒక్కరిలో ఏదో ఒక టాలెంట్ ఉండి ఉంటుంది. జనరల్ నాలెడ్జ్ లేకపోతేనేం మాథ్స్ లోనే సైన్స్ లోనే తనకు పట్టు ఉండి ఉండచ్చు, ఆ దిశగా నేను అతన్ని ప్రోత్సహించి ఉంటే అతను ఖచ్చితంగా గొప్పోడు అయ్యేవాడు అనుకునేవాడు. 

                                                                   ***************

"పోయిన నెల COVID తో హాస్పిటల్ లో చేరిన మిమ్మల్ని కాపాడలేమని ఈ సిటీలో ఉండే డాక్టర్స్ అందరూ చేతులెత్తేస్తే ఈ ఒక్క డాక్టర్ గారే ముందుకొచ్చారు. మీరిలా తిరిగి కళ్ళు తెరవగలుగుతున్నారంటే దానికి కారణం ఈయనే  నాన్నా" అని అప్పుడే రూమ్ లోకి ఎంటర్ అవుతున్న డాక్టర్ ని చూపించాడు కొడుకు.  

మెల్లగా కళ్ళు తెరిచి, అద్దాలు పెట్టుకొని ఆ డాక్టర్ కి దండం పెట్టబోయాడు మన కథలోని స్కూల్  మేష్టారు. 

మేస్టారూ, మీరు నాకు దండం పెట్టడమేమిటి అని ఆయన చేతులు పట్టుకునే లోపే శ్వాస తీసుకోవడానికి ఆ పెద్దాయన ఇబ్బంది పడుతున్నారని అర్థం చేసుకున్నాడు డాక్టర్. ఉన్నట్టుండి ఏమైపోయింది అనుకొని జరిగిందేమిటో అర్థం చేసుకొని  వెంటనే రియాక్ట్ అయి మేష్టారు ని మరోసారి కాపాడాడు ఆ డాక్టర్. 

ఆ డాక్టర్ ఎవరో కాదు, చిన్నప్పుడు ఇదే మేష్టారు స్కూల్ నుంచి మూర్ఖుడని ముద్ర వేసి పంపిన మన హీరో గోవిందం అనుకుంటే, మీ ఆలోచనలకు అడ్డుకట్ట వెయ్యండి. తెలుగు సినిమాలు యెక్కువ చూడటం , ఇన్స్పిరేషన్ ఇచ్చే ఇన్సిడెంట్సో లేక మోటివేషన్ కి పనికొచ్చే కథలో ఎక్కువ చదివితే ఇలాగే తయారవుతారు.  

అసలు జరిగిందేమిటంటే, మన హీరో గోవిందం ఆ రూమ్ క్లీన్ చెయ్యడానికి వచ్చి ఖాళీ సాకెట్ ఏదీ దొరక్క, వెంటిలేటర్ ప్లగ్ పీకేసి అందులో వ్యాక్యూమ్ క్లీనర్ ప్లగ్ పెట్టి ఆ రూమ్ క్లీనింగ్ మొదలెట్టాడు.  

18, జులై 2021, ఆదివారం

4 వ వారం లాక్డౌన్

సిడ్నీలో ఈ రోజుతో COVID సెకండ్ వేవ్ 4 వ వారం లాక్డౌన్ లోకి అడుగుపెడుతున్నాం. 3 వారాలుగా ఇంట్లోనే ఉండి జనాలకి పిచ్చెక్కిపోతోంది, సరైన కారణం లేకుండా రోడ్ల మీద కనపడితే భారీగా ఫైన్స్ వేస్తున్నారు. ఉద్యోగాలు లేక చాలా మంది అవస్థలు పడుతున్నారు. 

సర్దార్జీ ల మీద ఎన్ని సిల్లీ జోకులు వేసినా 'పండ్లున్న చెట్లకే రాళ్ళ దెబ్బలు' అని నిరూపిస్తూ ఎప్పటికప్పుడు వారికి తోచిన సాయం చేస్తున్నారు. కొంతమంది సర్దార్జీ లు ఒక గ్రూప్ గా ఫార్మ్ అయి ఇబ్బందుల్లో ఉన్నవారు అడగవలిసిన అవసరం లేదు, మీరే వచ్చి మీక్కావలసిన సరుకులు తీసుకెళ్లండి అని ఒక ట్రక్ లో బియ్యం, బ్రెడ్ లాంటి నిత్యావసరాలన్నీ ఒక పెద్ద ట్రక్ లో ఉంచుతున్నారు. అంతే కాదు వంట వండుకోలేని స్టూడెంట్స్ లాంటి వారికి ఉపయోగకరంగా ఉంటుందని టేక్ అవే ఫ్రీ మీల్స్ కూడా ఏర్పాటు చేశారు. అందుకే కదా సింగ్ ఈజ్ కింగ్ అన్నారు. 

ఇబ్బందుల్లో ఉన్న వారికి, జాబ్స్ పోయినవారికి సోషల్ సెక్యూటరీ కింద నెలకు కొంత అమౌంట్ గవెర్నమెంట్ వారి ఖాతాల్లో జమ చేస్తోంది. 

పిల్లలతో, ఆఫీస్ వర్క్స్ తో పిచ్చెక్కే ఎంప్లాయిస్ కి రిలీఫ్ కోసం కంపెనీలు ఆన్లైన్ కౌన్సిలింగ్ గట్రాలు నిర్వహిస్తున్నాయి. యోగ చెయ్యండి, దాని నుంచి మీకు కొంత రిలీఫ్ ఉంటుంది అని ఆ కౌన్సిలింగ్ లో చెప్పారని నా మిత్రుడు అన్నాడు. శంఖంలో పోస్తే గానీ తీర్థం అవదు అన్నట్లు, మన యోగా గురించి ఈ ఇంగ్లీష్ వాళ్ళు చెప్తే కానీ నమ్మటం లేదు మనవాళ్ళు. 

నేను తొమ్మిదో తరగతి లో ఉన్నప్పుడు మా నాన్న యోగ నేర్చుకోవడానికి వెళ్తే పగలబడి నవ్విన జనాన్ని చూశాను. ఆయన ఉదయం పూట ఇంట్లో యోగ చేస్తుంటే, అది చూసి మా ఇంటికి వచ్చిన నా ఫ్రెండ్స్ నవ్వుకునేవారు.  ఎవరు నవ్వితే మనకేంటి అని గత పాతికేళ్లుగా ఆయన యోగా చేస్తూనే ఉన్నారు. నేనూ ఒకప్పుడు రెగ్యులర్ గా చేసేవాడిని కానీ ఆ తర్వాత ప్రొడక్షన్ సపోర్ట్ లో పని చేయాల్సి వచ్చింది, దాని వల్ల లేట్ నైట్ ప్రొడక్షన్ ఇష్యూస్, డెప్లాయిమెంట్స్ అని రాత్రుళ్ళు మేలుకోవలసి వచ్చి లైఫ్ బాగా డిస్టర్బ్ అయింది . కంపెనీ స్పాన్సర్డ్ వర్క్ వీసా నా మెడ మీద కత్తి లాగా ఉండేది, కాబట్టి ఇష్టం లేకపోయినా చెయ్యాల్సి వచ్చేది.  ఆ గ్యాప్ తో యోగ అనేది నా లైఫ్ లో పార్ట్ టైం జాబ్ లాగా అయిపొయింది.  'ఫిట్నెస్ కోసం ఇవాళ అర గంట  టైం కేటాయించలేకపోతే, రేపెప్పుడో  రెండు గంటలు టైం హాస్పిటల్ చుట్టూ తిరగడానికి కేటాయించాల్సి వస్తుంది' అని తెలిసీ యోగా ని రెగ్యులర్ గా చేయాలి అనే విషయాన్ని ఆచరణలో పెట్టలేకపోతున్నాను. 

స్టాక్ మార్కెట్ ఎఫెక్ట్ ఎలా ఉంటుంది అనే దాని మీద చైనా లో జోక్ లాంటి ఒక  నిజం చలామణిలో ఉంటుంది. ఇప్పుడు దాన్ని COVID ఎఫెక్ట్ కి అన్వయించుకోవచ్చు. 

ఆ జోక్ ఏమిటంటే 

రెండు నెలల క్రితం, మార్కెట్ బాగుండేది. నేను తినేదే నా కుక్క కూడా తినేది. 

పోయిన నెల, మార్కెట్ కొంచెం దెబ్బతింది, నా కుక్క తినేదే నేనూ తిన్నాను. 

ఈ నెల మార్కెట్ పూర్తిగా క్రాష్ అయింది, నా కుక్కనే నేను తిన్నాను. 

కాస్త చేదుగా, ఎబ్బెట్టుగా అనిపించినా ఇది కాదనలేని నిజం. త్వరలో ఈ COVID కేసెస్ తగ్గి, ఇక్కడి ప్రభుత్వం లాక్ డౌన్ ఎత్తేస్తుందని, అందరం మళ్ళీ సాధారణ జీవితాన్ని గడుపగలుగుతామని  ఆశిస్తున్నాను.